1, 2. (1) ¿Jamüsü choʼujaaka maʼin «eeinjatüin waaʼin sünain achuntaa nümüin Maleiwa»? (2) ¿Jarat tü pütchiirua jülüjüinjatkat waaʼin?

NAASHIN wanee wayuu aʼyataakai saʼwaipalain, ashuteesü maʼin tü lapükat naaʼu jayuuweematapa. Eesüjaʼa süpüla müin nanüiki noʼutku na wayuu nnojoliikana süpüla natunküin aipaʼa. Tia müsü aka saaʼin tü kasa alatakat maaʼulu. ¿Suluʼu jamüin? Alüʼütsü süpüla sajaʼlajaain tü kasa nuluwataakalü aaʼu Satanaa. Makalaka eejüinjatüin naaʼin na anoujüshiikana suulia natunküin sünain tü nanoulakat (Roma 13:12, NM). Eeshii süpüla mojukuwaʼipaliin waya nnojorüle eejüin waaʼin sünain tü wanoulakat. Makalaka choʼujaain maʼin laülaainjatüin waaʼin sümaa «eeinjatüin waaʼin sünain achuntaa nümüin Maleiwa» (1 Ped. 4:7).

² Süka sülüʼülüin süpüla sajaʼlajaainjatüin tü kasa nuluwataakalü aaʼu Satanaa, anasü jülüjüle waaʼin pütchikalüirua tüü: «¿Jülüjüsüche taaʼin sukuwaʼipa tanüiki sünain oʼuraajaa? ¿Kasa taashajaaka achiki toʼuraajapa? ¿Oʼuraajüshiche taya waneepia? ¿Oʼuraajüshiche taya naaʼu na waneeinnua shiataapa tachuntüin neʼe süpüleerua tü choʼujaakat tamüin otta tü keeʼireekat taaʼin? ¿Jamüsü choʼujaaka toʼuraajüin süpüla toʼtteʼennüinjachin?».

3. Püküja waneeirua kasa waaʼinrajatka woʼuraajapa.

³ Müsü nünüiki chi aluwataaushikai Pablo namüin na anoujüshii chejeʼewaliikana Éfeso: «Anakaja müleka jüchecherüle jaaʼin sünain achuntaa nümüin chi Maleiwakai» (Éf. 6:18). Eesü shiale neʼe wachuntüin nümüin Jeʼwaa tü choʼujaakat wamüin otta nükaaliinjüinjanain waya süpüla eejirawaa sümaa tü kasa mojusü alatakat wamüin. Saashin tü Wiwüliakat, naapüin Jeʼwaa sünüiki wayuu eekai suʼuraajüin nümüin. Naainjüin Jeʼwaa tia süka aipüralin nia (Sal. 65:2). Akatsaʼa nnojoluinjatüin wachuntüin neʼe tü choʼujaakat wamüin woʼuraajapa nümüin Jeʼwaa. Oʼuraajüinjanaʼaya waya  süpüla waʼwaajüinjachin Jeʼwaa, waapüinjatüin tü analuʼutkat nümüin otta wachuntajanain kaaliinwaa nümüin.

4. ¿Jamüshi waʼwaajüinjachika Jeʼwaa waneepia woʼuraajapa?

⁴ Wainma kasa waʼwaajüinjachika anainjee Jeʼwaa woʼuraajapa. Wanee shia süka naainjüin kasa pülasü otta miyoʼushaatain maʼin nia (paashajeʼera Salmo 150:1-6). Poloo apünüintua süshajünüin suluʼu Salmo 150 sünain waʼwaajüinjachin Jeʼwaa. Müsü nünüiki wanee eeʼirajüi: «Akaratshitua sukua taʼwaajüin pia soʼuleʼeya wanee kaʼi. Süka jamüin, lotusü sukuwaʼipa tü puluwataakalü anain» (Sal. 119:164, NM). Aʼwaajüneeshi Jeʼwaa sutuma tü naaʼinrakat. ¿Jamaluʼulu nuʼwaajünüinjachin Jeʼwaa «akaratshitua sukua» soʼuleʼeya wanee kaʼi? Tia maluʼulu waʼwaajüinjachin nia waneepia.

5. ¿Kasa sükaaliinjaka anain waya aapaa analuʼut nümüin Maleiwa woʼuraajapa?

⁵ Choʼujaasü maʼin waapüinjatüin tü analuʼutkat nümüin Jeʼwaa woʼuraajapa. Müshi Pablo namüin na anoujüshii chejeʼewaliikana Filipos: «Nnojo jüshapataain aaʼin sooʼopünaa wane kasa. Shia jaaʼinra achuntaa nümüin Maleiwa sooʼopünaa kasa süpüshua. Jüküja nümüin tü shapaakat atüma jaaʼin. Otta nnojo motüin jaaʼin aapaa analuʼut nümüin saaʼu tü anasü naaʼinrakat jümüin» (Filip. 4:6). Alüʼütsü süpüla sajaʼlajaain tü kasa nuluwataakalü aaʼu Satanaa otta kepiashii waya saʼaka wayuu matüjüinka «aapaa analuʼut». Makalaka choʼujaain maʼin waapüin tü analuʼutkat nümüin Jeʼwaa süka süpüshuaʼa waaʼin. Waainjüle tia, nnojoleerü washatüin nakuwaʼipa na manoujüinsaliikana (2 Tim. 3:1, 2). Aapaa analuʼut nümüin Maleiwa sükaaliinjüin waya süpüla talatüinjatüin waaʼin otta nnojoluin younakuʼu wamüin sutuma sülatüin kasa mojusü wamüin ( Jud. 16). Naapüle tü analuʼutkat wanee wayuu nümüin Maleiwa nuʼuraajapa sümaa nuʼwayuuse otta nüchonnii, eeshii süpüla kiʼrain naya sünain aaʼinraa tiayaa.

6, 7. Wanaa sümaa woʼuraajüin nümüin Jeʼwaa süpüla wachuntajanain kaaliinwaa, ¿kasa waküjaka nümüin? ¿Kasa maa wachuntüinjatka nümüin Jeʼwaa?

⁶ Wanaa sümaa woʼuraajüin nümüin Jeʼwaa süpüla wachuntajanain kaaliinwaa nümüin, waküjüin nümüin tü keeʼireekat waaʼin jee shiale tü mojukalü atuma waaʼin. ¿Jouja wachuntaka kaaliinwaa nümüin? Achuntajana waya kaaliinwaa weʼrüle mülia jee ayuuire maʼin waya. Nnojotsü mojuin waainjüle tia. Akatsaʼa eein waneeirua kasa wachuntüinjatka woʼuraajapa.

⁷ Wanaa sümaa niʼiküin Jesuu na nikirajüinkana sünain tü sukuwaʼipainjatkat nanüiki noʼuraajapa, aashajaashi nia süchiki nünülia Maleiwa, Nuluwataaya otta tü keeʼireekat naaʼin Maleiwa (paashajeʼera Mateo 6:9, 10 *). Joutsü maʼin wayuu kaainjarannuu saaʼu tü mmakat otta isasü nachiki na aluwataashiikana naapüin tü choʼujaakat sümüin wayuu. Makalaka wachuntajanain süpüla wuleinjatüin nünülia chi Washi Iipünaajachikai otta süntajatüin tü Nuluwataayakat süpüla sajaʼlajeʼerüinjatüin nuluwataaya Satanaa. Wanee kasa anaka süpüla wachuntüin shia saainjünüinjatüin tü keeʼireekat naaʼin Maleiwa yaa saaʼu tü Mmakat maʼaka saainjünüin chaa sirumatuʼu. Sutuma tü wekirajaaitpakalü anain, watüjaaitpa aaʼu choʼujaain eejüinjatüin waaʼin sünain oʼuraajaa otta nnojoluinjatüin wachuntüin neʼe tü choʼujaakat wamüin.

8, 9. ¿Jamüsü nnojoluinjatka mojuin wanüiki nüchiki Pedro otta na wanee aluwataaushiikana saaʼu natunküin?

⁸ Mayaapejeʼe nüshajüin Pedro namüin na anoujüshiikana süpüla eeinjatüin naaʼin «sünain achuntaa nümüin Maleiwa», nnojotsü eejüin naaʼin Pedro. ¿Jamüsü nnojotka eejüin naaʼin? Atunküshi nia wanaa namaa na nümaajanakana sujuuna nuʼuraajüin Jesuu chaa Getsemaní. Nümakalaka Jesuu namüin: «Anakaja müleka eere jaaʼin süpüla jüchuntüin nümüin Maleiwa». Akanasaʼa atunküin naya nüpüla (paashajeʼera Mateo 26:40-45).

⁹ Nnojotsü mojuinjatüin wanüiki nüchiki Pedro  otta na wanee aluwataaushiikana saaʼu natunküin. Soteesü waaʼin mapüsain maʼin naya soʼu aikat tia. Süka jamüin, aʼyataashii maʼin naya süpüla yapainjatüin natuma tü kasa choʼujaakat süpüla tü Pascuakat. Süchikijee, niʼitaain Jesuu shikii tü Ekawaa Aipaʼajatkat süpüla nashatüinjatüin shia (1 Cor. 11:23-25). Müsü tü Wiwüliakat: «Shiasa süchikijee neeʼirajüin wane jayeechi naʼwaajakat aka Maleiwa, oʼunüshii naya yalajee saaʼumüin tü wutai kanüliakat olivos». Kaʼyatüsü napüleerua jee oʼunüshii naya suluʼupünaa sükaayein Jerusalén (Mat. 26:30, 36). Makalaka kalein aikat naaʼu. Müleka yalalejee waya naʼaka eeshiijaʼa süpüla watunküin wanaa namaa. Nnojotsü mojuin nünüiki Jesuu namüin na aluwataaushiikana, müshi nia: «Mayaainje keeʼireein jaaʼin tü tachekakat jüpüleerua, isasü jüchiki».

10, 11. (1) ¿Kasa nütüjaka Pedro sünainjee tü alatakat nümüin wanaa sümaa nutunküin chaa Getsemaní? (2) ¿Kasa shikirajaka anain pia tü alatakat nümüin Pedro?

¹⁰ Eesü wanee kasa anasü maʼin nütüjaka Pedro sünainjee tü alatakat wanaa sümaa nutunküin chaa Getsemaní. Matüjüiya Jesuu süpülapünaa tia: «Oʼuneena jia jüpüshua tamaʼanajee soʼu aikat tüü, otta jüpüteechi taya tamüiwa süka mmoleenain jia sheema tü kasa mojusü alateetkat tamüin». Shiasaʼa nümaka Pedro nümüin: «Mayaashiije napüteechin pia na waneeirua sütüma tü kasa mojusü alateetkat pümüin, nnojoireejaʼa tapütüinjachin pia pümüiwa». Wanaa sümaa nüküjüin Jesuu nümüin naattajaainjachin naaʼu, ayatshia müin Pedro nümüin: «Jaʼitakajeʼe ouktajachin taya pümaa, nnojoireejaʼa süpüla taattajaainjachin paaʼu» (Mat. 26:31-35). ¿Kasa naainjaka Pedro mapa? Aattanajaashi nia naaʼu Jesuu. Niyaawatapa saaʼu mojuin maʼin tü naainjakat, «miyoʼu maʼi niʼira sünain aʼyalajaa» (Luc. 22:60-62).

¹¹ Sutuma tia alatakat nümüin Pedro, nunoukteʼerüin nukuwaʼipa. Nnojoluitpa niʼitaain naaʼin nünainjiraa. Eesüjaʼa süpüla sükaaliinjüin nia tü oʼuraajaakat. ¿Jamüsü watüjaaka saaʼu tia? Sutuma tü nümakat, müshi nia: «Anakaja müleka laülaale jaaʼin süpüla eeinjatüin jaaʼin sünain achuntaa nümüin Maleiwa». ¿Oonooshiiche waya sümaa tia pütchikat? Woʼuraajüle waneepia weeʼiyatüin choʼujaain wamüin nükaaliinjüin waya Jeʼwaa. ¿Waainjüinche tia? (Sal. 85:8.) Sotuinjatü waaʼin tü nümakat chi aluwataaushikai Pablo, tü makat: «Nnojo juʼwaataain suluʼu jukuaippa sünain nnojoleenain jaaʼinrüin kasa mojusü jaajüin. Jalia jia, kaainjalashii taa jia» (1 Cor. 10:12).

12. ¿Jamüsü anaka maʼin washatüle nukuwaʼipa Nehemías?

¹² Wanee wayuu anakai süpüla ashatünaa akuwaʼipaa nia Nehemías. Aapajüi nüsüin Artajerjes, chi aluwataakai saaʼu tü mmakat Persia, soʼutpünaa juyaka 450 süpülapünaa wakalia. Oʼuraajüshi nia nümüin Maleiwa süka süpüshuaʼa  naaʼin. Kojuya kaʼi nia sünain aamajaa otta oʼuraajaa nümüin Maleiwa sutuma mojuin maʼin tü alatakat namüin na judío kepiakana Jerusalén (Neh. 1:4). Wanaa sümaa nüsakirüin nia Artajerjes jamüin mojuka maʼin naaʼin otta kasain nuchunteein nümüin, oʼuraajamaatüshi nia nümüin Jeʼwaa (Neh. 2:2-4). ¿Kasa alataka süchikijee tia? Asouktüshi Jeʼwaa nümüin Nehemías otta nükaaliinjüin tü nupueulosekat (Neh. 2:5, 6). ¡Akooʼomüinraakajasaʼa nunoula Nehemías sutuma tia!

13, 14. ¿Kasa waainjüinjatka süpüla nnojoluin nümalajeʼerüin wanoula Satanaa?

¹³ Woʼuraajüle waneepia maʼaka naainjüin Nehemías, icheerü maʼin tü wanoulakat. Mojulaashi maʼin Satanaa otta ashutüshi maʼin nia waaʼu wanaa sümaa matsüin wanoula. Jamüshiijaʼa eejiraale waya sümaa wanee ayuulii jee shiale sümaa tü mojuukalü aaʼin, eesü shiale jülüjüin waaʼin mojutüin nümüin Maleiwa tü waʼyataainkat nümüin kashiwai. Eesü ayatüle mojuin waaʼin sutuma tü kasa mojusü waainjakat. Najayatüin tia Satanaa süpüla nunoujirüinjanain waya sünain wayuuin mojutsalii waya otta nümalajeʼereein wanoula. ¿Kasakaʼa waainjüinjatüin süpüla eejiraainjanain waya sümaa tia? Eejüinjatü waaʼin sünain oʼuraajaa. Saashin tü Wiwüliakat, tü wanoulakat müsü aka saaʼin «wane taapüla najapuluʼukat wane surulaat suulia sülanüin najatü na nüʼünüükana nünainmüin». Wachecherüle waaʼin sünain anoujaa wayoukteerü tü nüchekakat Satanaa (Éf. 6:16).

¹⁴ Müleka eejüle waaʼin sünain oʼuraajaa, yapeena waya süpüla eejiraainjanain waya sümaa tü ooʼulakünakalü aka wanoula. ¿Kasa waaʼinrajatka suuʼulakünapa waaʼin sünain anoujaa? Oʼuraajamaatüinjana waya maʼaka naainjüin Nehemías. Nia neʼe Maleiwa akaaliinjeenaka waya süpüla wachecherüinjatüin waaʼin otta eejiraain waya sümaa tü ooʼulakünakalü aka wanoula.

15. ¿Kasa pütchi jülüjüinjatka waaʼin woʼuraajüinjanapa?

¹⁵ Achuntüshi Jesuu nümüin Maleiwa süpüla  nüchecherüinjatüin naaʼin Pedro sünain tü nunoulakat (Luc. 22:32). Epafras, wanee anoujüshi eejaika nakalioʼu na aluwataaushiikana, nüshatüin nukuwaʼipa Jesuu. Oʼuraajüshi nia naaʼu na nuwalayuu chejeʼewaliikana Colosas. Müshi Pablo nüchiki: «Achuntüshi nia waneepia jaaʼu nümüin chi Maleiwakai süka süpüshua naaʼin süpüla jüchecherüinjanain jaaʼin sümaa laülaainjatüin jaaʼin sünain anoujaa. Achuntüshi süpülamüin joonooinjanain waneepia sümaa tü nüchekakat chi Maleiwakai jüpüleerua» (Col. 4:12). Anasü jülüjüle waaʼin pütchikalüirua tüü: «¿Oʼuraajüshiche taya naaʼu na tawalayuukana napüshuaʼa sainküin tü mmakat? ¿Achuntüshiche taya naaʼu na tawalayuu müliakana sutuma wawai otta sukutkujaain mma? ¿Joujachi taya oʼuraajüin naaʼu na tawalayuu aʼyataakana maʼin suluʼu nupueulose Jeʼwaa? ¿Oʼuraajüshiche taya naaʼu na tawalayuu toutkajaakana amaa alataka amüin kasa mojusü?».

16. Püküja jamüin anaka oʼuraajaa naaʼu na wawalayuukana.

¹⁶ Aneerü maʼin nakuwaʼipa na wawalayuukana woʼuraajüle naaʼu (paashajeʼera 2 Corinto 1:11). Eepajaʼa wanee kasa jülüjüinjatka waaʼin. Jaʼitainna wainmain na anoujüshii achuntakana nümüin Jeʼwaa sümaa kojuyatuain naainjüin shia, nnojotsü shiain nusouktüin atuma tia. Süpülapünaa nusouktüin namüin jülüjüsü naaʼin müleka shiimainre tü nachuntakat napüleerua na nawalayuukana. Makalaka kojutüinjatüin wamüin oʼuraajaa naaʼu na wawalayuukana. Washatüinjatü nukuwaʼipa Epafras. Oʼuraajüinjana waya naaʼu na wawalayuukana süka alin naya wapüla otta keeʼireein waaʼin anain nakuwaʼipa. Waainjüle tia, talateena maʼin waya. Müsü tü Wiwüliakat: «Anakuaippaʼireʼeya chi wayuu aapakai nuulia chi aapünakai amüin» (Aluw. 20:35).

17, 18. ¿Jameerü wakuwaʼipa eejüle waaʼin sünain achuntaa nümüin Maleiwa?

¹⁷ «Kaʼlesü maʼin aika; alüʼütsü süpüla jaʼyuuwaa» müshi Pablo. Süchikijee tia nümaka: «Jütüja aaʼulu tü kaʼi kepiakalü oʼu jia. Makalaka, jüchijiraainjanain. Süka jamüin, pejereesia maʼin maaʼulu tü kaʼi woʼtteʼennajatkalü oʼu suulialeʼeya woʼttaiwaʼaya sünain anoujaa» (Roma 13:11, 12, NM). Alüʼütsü maʼin süpüla eeinjatüin tü mma jeketkat nutuma Maleiwa otta pejesü maʼin tü kaʼi woʼtteʼennajatkalü oʼu. Makalaka nnojoluinjanain watunküin sünain tü wanoulakat. Nnojo wooʼulaain suulia oʼuraajaa nümüin Jeʼwaa sutuma jülüjaa aaʼin tü kasa keejiakat wamüin. Shia anaka aluʼu eejüle waaʼin sünain achuntaa nümüin. ¿Kasa apüla? Süpüla wuleinjatüin watuma tü wakuwaʼipakat otta waaʼinrüinjatüin tü kasa talatakalü atuma naaʼin Maleiwa sümaʼinruʼu waʼatapajüin tü nükaliakat (2 Ped. 3:11, 12, NM). ¿Kaseerü weeʼiyataka sükajee tia? Weeʼiyateerü nnojoluin watunküin sünain tü wanoulakat otta weeʼiyateerü wanoujüin sünain sülüʼülüin tü kaʼi sajaʼttajatkalü oʼu süpüshuaʼa tü kasa mojusükat. Ayata waya sünain achuntaa waneepia nümüin chi Maleiwakai (1 Tes. 5:17). Washata nukuwaʼipa Jesuu. Wachajaa sukuwaʼipa süpüla wamüiwaʼainjanain waya sünain oʼuraajaa nümüin Jeʼwaa. Nnojoishii ashapajaainjanain waya waashajaapa nümaa. Müle shia watuma arütkaajeena maʼin waya nünainmüin (Sant. 4:7, 8). ¿Eesüche wanee kasa analeeka suulia tia? Nnojorüleejaʼa.

¹⁸ Müsü tü Wiwüliakat: «Kataiwaʼaya noʼu Jesús yaa mmoluʼu, achuntapüʼüshi nümüin Maleiwa sünain niʼyalajüin sümaa emetuluin nünüiki shiiʼiree nükaaliijain nia suʼutpünaa tü müliaa niʼrüinjatkat naapapa nukuaippa sünain ouktaa. Je shiimüin sünain nükaaliijain, süka jüüjüüin nia nümüin chi Maleiwakai otta kojutüin nia nütüma» (Heb. 5:7). Achuntapuʼushi maʼin kaaliinwaa Jesuu nümüin chi Nüshikai otta waneepiashi nia nümaa waneʼereʼeya ouktapa nia. Sutuma tia, asoʼireʼennüsü naaʼin nutuma Jeʼwaa otta naapüin nümüin kataa oʼu süpüla kaʼika süpüshuaʼa chaa sirumatuʼu. Eeshii süpüla müin waya waneepiain nümaa chi Washi iipünaajachikai jaʼitairü kasain ooʼulakünüin aka wanoula. Müleka eejüle waaʼin sünain achuntaa nümüin Maleiwa, kateerü woʼu waneepia.