1, 2. (1) ¿Kasa eejeetka sutuma Nuluwataaya Maleiwa? (2) ¿Jamüsü watüjaaka saaʼu nüntireerüin Maleiwa tü Nuluwataayakat?

WANAA sümaa chajachin Jesuu namaa na aluwataaushiikana süʼütpaʼa tü pueulokot Capernaum soʼu juyaka 31, nikirajüin naya sünain oʼuraajaa mayaa: «Taata Maleiwa, [...] püntira tü puluwataayakat» (Mat. 6:​10, NM). Maaʼulu yaa, mainma wayuu nnojotka eʼitaain saaʼin sünain nüntireerüin Maleiwa tü Nuluwataayakat. Aluʼusaʼa wayakana, weʼitaain waaʼin sünain nüntireerüin shia.

² Sutuma tü Nuluwataayakat Jeʼwaa, waneesüinjatü nakuwaʼipa na nüpüshikana: na aapieekana otta na wayuukana. Nikeraajeerü Jeʼwaa tia (Is. 55:​10, 11). Sutuma tü kasa anasü alatakat suʼunnaa tü sien juya alatüitpakat, watüjaa aaʼu Nuluwataaichipain Jeʼwaa. Mainma tü kasa anashaatasü naainjakat Jeʼwaa napüleerua na nuluwataakana aaʼu (Zac. 14:9; Alat. Map. 15:3). Tü aküjünakat süchiki Nuluwataaichipain Jeʼwaa, naata suulia tü nümakat Jesuu süchiki nüntirüinjatüin Maleiwa tü Nuluwataayakat. ¿Kasa naataka atuma shia? ¿Jamüsü wanainpünaaka tia?

3. (1) ¿Joujachi oʼttüin Jesuu sünain aluwatawaa? ¿Jalajachi nia oʼttüin sünain Aluwatawaa? (2) ¿Jamüsü watüjaaka saaʼu nuʼttüin Jesuu sünain Aluwatawaa soʼu juyaka  1914? (Paashajeʼera tü nootakat.)

³ Maʼaka piama shikii juya süpülapünaa juyaka 1900, ayaawatüna aaʼu tü pütchi nüshajakat Daniel sümaiwa paala, tü makat mayaa: «Soʼutpünaa  naluwataaya na wayuukana, niʼitaajeerü chi Maleiwakai wanee aluwataaya nnojoluinjatka ajaʼttinnüin» (Dan. 2:​44, NM). Na Ekirajaaliikana sünain tü Wiwüliakat, kakalia maʼin naya sünain aküjaa süchiki kasain sünainpünaainjatüin tü juyakat 1914. Anouktaainjatia naaʼinruʼu na wayuukana tü nakuwaʼipakat wanaa sümaa tia: «Aʼatapüshii kasa anasü na wayuu eejanakana soʼu juyaka 1914», müshi wanee wayuu ashajüi süchiki kasa alatüirü. Akatsaʼa oʼttüin tü kasachiki kanüliakat Primera Guerra Mundial soʼu juyakat tia. Süchikijee, müliasü wayuu sutuma jamü, ayuulii otta akutkujaasü tü mmakat. ¡Ekeraajüsü tü sümakat tü Wiwüliakat! Sutuma tia, watüjaa aaʼu nuʼttüin Jesuu sünain Aluwatawaa chaa iipünaa soʼujee juyaka 1914. * Niiʼiyatüin Jeʼwaa niain Aluwataain sükajee niʼitaain chi Nüchonkai süpüla Aluwatawaa.

4. (1) ¿Kasa naainjaka Jesuu palajana wanaa sümaa nuʼttüin sünain Aluwatawaa? (2) ¿Kasa naaʼinraka Jesuu süchikijee tia?

⁴ Tü naainjakat Jesuu palajana wanaa sümaa nuʼttüin sünain Aluwatawaa, shia nütkaain nümaa Satanaa, chi nüʼünüükai Maleiwa. Ojutünüshi nia otta na yolujaakana chejee iipünaajee yaa saaʼumüin tü Mmakat nutuma Jesuu otta na aapiee nümaajanakana. Makalaka talatüin naaʼin napüshuaʼa na chakana iipünaa nümaa Maleiwa. Akanasaʼa na kepiakana sainküin mmaka süpüshuaʼa, müleʼu maʼin tü müliaa neʼrakat (paashajeʼera Alateetkat Mapeena 12:7-9, 12). ¿Kasa naaʼinraka Jesuu süchikijee tia? Wuleesü nutuma nakuwaʼipa na aʼyataashiikana nümüin Maleiwa, nikirajüin naya otta nukumajüin nakuwaʼipa süpüla naaʼinrüinjatüin tü keeʼireekat naaʼin Maleiwa. Oonooshii na aʼyataakana nümüin Maleiwa nümaa Jesuu. ¿Kasa shikirajaka anain waya tia?

5. ¿Kasa aluwataanaka anain Jesuu soʼujee juyaka 1914 sünainmüin juyaka 1919?

⁵ ¿Kasa naainjaka Jesuu süchikijee nujutüin Satanaa otta na yolujaakana chejee iipünaajee? Aluwataanüshi nia nutuma Jeʼwaa yaa mmapaʼamüin süpüla nünaʼlüin nanoula na anoujüshiikana otta süpüla wuleinjatüin tü nakuwaʼipakat nutuma. Naashin Malaquías, shia wuleinjatka nutuma Jesuu nanoula na anoujüshiikana (Mal. 3:1-3). Tü alatakat sümaiwa, shiiʼiyatüin naainjüin Jesuu tia soʼujee juyaka 1914 sünainmüin juyaka 1919. * Süpüla nüpüshinjanain waya Jeʼwaa choʼujaasü wuleinjatüin wakuwaʼipa otta wanoula (1 Ped. 1:​15, 16). Süpüla wuleinjatüin tü wanoulakat, nnojoliinjana waya sünainpünaain tü iküleesia nnojotkat shiimain otta tü poliitikakat.

6. (1) ¿Jarai chi aapakai wamüin tü kasa choʼujaakat sümüin wanoula? (2) ¿Jamüsü choʼujaaka maʼin tia wamüin?

⁶ Süka Nuluwataaichipain Jesuu, nüneeküin chi achepchiee oonookai otta kekiikai maʼin süpüla naapüinjatüin tü kasa choʼujaakat sümüin nanoula na chainjanakana iipünaa otta na yaainjanakana mmapaʼa (Mat. 24:45-47, NM; Juan 10:16). Soʼujee juyaka 1919, eeshii na wawalayuu chainjanakana iipünaa aapaka tü kasa choʼujaakat sümüin nanoula na nawalayuukana. ¿Jamüsü choʼujaaka tia wamüin? Süpüla wuleinjatüin wanoula, wakuwaʼipa, waaʼin, watapaʼa sümaa wepiapaʼa otta katsüinjatüin wanoula. Tü naapakat chi achepchieekai shikirajüin otta kettaashii waya sutuma süpüla wekeraajüinjatüin tü aküjaakat pütchi. Makalaka anain wekirajaale sünain tü naapakat wamüin chi achepchieekai.

7. (1) ¿Kasa naainjaka Jesuu wanaa sümaa yaajachin nia saaʼu tü Mmakat? (2) ¿Joujaleerü sajaʼttaka tü aküjaakat pütchi?

⁷ «Acheküshi taküjüinjachin tü pütchi anasükat suluʼupünaa tü pueulokat süpüshua, süchiki nukuaippa Maleiwa sünain aluwatawaa, süka shiain ajütünüin apüla taya», müshi Jesuu wanaa sümaa nuʼttüin sünain tü aküjaakat pütchi (Luc. 4:43). Naaʼinmaasü Jesuu tü aküjaakat pütchi soʼu apünüin shikii juya shiatapünaamüin. Müshi nia namüin na aluwataaushiikana: «Juʼuna süpüla jüküjainjatüin namüin sünain maa namüin: ‹Alüʼütsü  nükalia chi Maleiwakai süpüla aluwatawaa› » (Mat. 10:7). Süchikijee nüsoʼireʼennüin aaʼin Jesuu, nüküjüin noʼunajanain na aluwataaushiikana «suluʼupünaa süpüshuaʼa mma wattapünaa maʼi» süpüla naküjüinjatüin tü pütchikat (Aluw. 1:8). Naashin Jesuu nükaaliinjüinjana naya sünain tü aküjaakat pütchi. Waneʼereʼeya sajaʼttüin süntaleepa tü kaʼi sajaʼlajaweetkalü oʼu kasa mojusü (Mat. 28:​19, 20).

8. ¿Kasa naainjaka Jesuu süpüla naküjüinjanain maʼin pütchi na wayuu nüneekakana yaa saaʼu tü Mmakat?

⁸ Soʼu juyaka 1919 ayaawatüna aaʼu kasain sünainpünaain aküjaa tü pütchi anasükat (Mat. 24:14). Chashi aluwataain Jesuu iipünaa soʼu juyakat tia otta nüneeküinnapa na wayuu wulekana akuwaʼipa nutuma. Wayuukana naainnua naaʼinrüin tü nuluwataakalü anain naya sümaa talatüin naaʼin. Aküjüshii naya pütchi sainküin Mmaka süchiki nuluwataaichipain Jesuu chaa iipünaa (Aluw. 10:42). Jamüsüjaʼa soʼu juyaka 1922, eejana maʼaka 20.000 wayuu sünain wanee outkajawaa miyoʼu chajatka Cedar Point (Ohio, Estados Unidos). Sünain tia outkajawaakat nüküjüin Joseph F. Rutherford, nuluwataaitchipain Jesuu otta nüküjüin namüin na jutkatüshiikana nayainjanain aküjüin maʼin tü pütchikat nüchiki Jesuu otta süchiki tü nuluwataayakat. ¿Kasaka naainjüin na jutkatüshiikana sutuma tia? Oʼunüshii 2.000 wayuu sünain aküjaa tü pütchikat, kaʼyata yalejee suulia eejanale noutkajaain. Müshi wanee wawala: «¡Nnojoleerü motuin taaʼin tü aluwataanakalü anain waya sünain tia outkajawaakat. Waküjüinjanain maʼin tü pütchikat süchiki Nuluwataaya Maleiwa. Talatüsü maʼin naaʼin na wayuu eejanakana sünain!». Mainma na makana anüiki.

9, 10. (1) ¿Kasa ekirajawaa eʼitaanaka napüla na aküjüliikana pütchi süchiki Nuluwataaya Maleiwa? (2) ¿Jamüshi sükaaliinjaka pia tia ekirajawaakat?

⁹ Alatüshii suulia 17.000 aküjülii pütchi nüchiki Maleiwa suluʼu 58 mma soʼujee juyaka 1922. Shiajaʼa neʼe choʼujaain nekirajünüin süpüla aküjaa pütchi wanaa sümaa tia. Nükalioʼu Jesuu, pansaasü maʼin nekirajia na aluwataaushiikana sünain jamüinjatüin sukuwaʼipa tü aküjaakat pütchi otta jalainjatüin süküjünüin (Mat. 10:5-7; Luc. 9:1-6; 10:1-11). Müsia neʼe maaʼulu yaa, nikirajüin otta naapüin Jesuu tü kasa choʼujaakat namüin na wayuu aʼyataakana sünain tü aküjaakat pütchi süpüla anainjatüin maʼin sukuwaʼipa (2 Tim. 3:17). Nikirajüin naya sükajee tü outkajawaakat. Suluʼu tü 111.000 outkajaalee eekat yaa saaʼu tü mmakat, ekirajünüshii na wawalayuukana sükajee Ekirajawaa süpüla Aküjaa Pütchi. Sükajee saainjünüin tia, alatüshii suulia siete miyoone aküjülii pütchi atüjakana süpüleerua aküjaa pütchi sümüin wayuu süpüshuaʼa (paashajeʼera 1 Corinto 9:20-23).

¹⁰ Eʼitaanüsü wanee ekirajawaa napüla na laülaashiikana suluʼu tü outkajaaleekat, Ekirajawaa napüla na Pürekutsootkana, Ekirajawaa sünain tü Wiwüliakat napüla na Tooloyuu Maʼwayuusekana, Ekirajawaa sünain tü Wiwüliakat napüla na Anoujüshii Kaʼwayuusekana, Ekirajawaa napüla na Shikiipüʼükana Weteet sümaa naʼwayuuse, Ekirajawaa napüla na Alapalaakana waaʼu sümaa Naʼwayuuse otta Ekirajaalee Galaad sutuma Watchtower. * Müshii noʼutku na wawalayuu aleʼejüinnakana  sünainjee Ekirajawaa sünain tü Wiwüliakat napüla na Anoujüshii Kaʼwayuusekana: «Sutuma wekirajünüin aishi maʼin Jeʼwaa wapüla otta kettaashii waya süpüla wakaaliinjüin na waneeinnua».

11. ¿Kasa akaaliinjaka na aküjüliikana pütchi süchiki nuluwataaya Maleiwa suulia tü kasa naainjakat Satanaa?

¹¹ Süka niʼrüin Satanaa waküjüin pütchi otta wekirajüin maʼin wayuu süchiki Nuluwataaya Maleiwa, mainma kasa naainjaka süpüla nümalajeʼereein tü aʼyatawaakat nümüin Maleiwa. Nnojotpejeʼe nümalajeʼerüin shia. Kojutüshi maʼin nutuma Jeʼwaa chi Nüchonkai noulialeʼeya na laülaayuukana napüshuaʼa yaa saaʼu mmaka otta na aluwataakana maaʼulu yaa (Éf. 1:20-22). Süka nuluwataaichipain Jesuu, nuʼunirüin jee naaʼinmajüin na aluwataaushiikana. Tia, naainjüin süpüla shikeraajüinjatüin tü keeʼireekat naaʼin chi Nüshikai. * Ayatüsü aküjünüin maʼin tü pütchi anasükat. Mainma na wayuu eʼraajakana Jeʼwaa. ¡Talatüshii maʼin waya süka waʼyataajiraain sünain tü aküjaakat pütchi!

12. ¿Kasa tü akumajünakalü akuwaʼipa soʼujee juyaka 1914?

¹² Soʼujee juyaka 1914, nukumajüin Jesuu nakuwaʼipa na wayuu nuluwataakana aaʼu süpüla naaʼinrüinjatüin tü keeʼireekat naaʼin chi Nüshikai (paashajeʼera Isaías 60:17). Jamüsüjaʼa soʼu juyaka 1919, aneekünüshi wanee wawala suluʼu tü outkajaaleekat süpüla nukumajüinjatüin sukuwaʼipa tü aküjaakat pütchi. Shiasaʼa soʼu juyaka 1927, oʼttüsü tü aküjaakat pütchi sainküin miichi rimiinkoʼuluwai. ¡Talatakajasaʼa maʼin naaʼin na wawalayuukana sutuma süneekünüin suluʼujee tü Wiwüliakat tü anülieekat Aküjülii pütchi nüchiki Jeʼwaa soʼujee juyaka 1931! (Is. 43:10-12.) Soʼu 1938, nnojoluichipa aneekünüin wanee wawala sükajee nüwotaajünüin aaʼu süpüla niainjachin oʼunirüin nakuwaʼipa na wawalayuukana. Soʼujeʼereʼeya tia, aneekünüshi wanee wawala müleka nikeraajüle tü sümakat tü Wiwüliakat. Jee soʼu 1972, eʼitaanüshii na wawalayuukana najapuluʼu na laülaashiikana süpüla naaʼinmajüinjanain naya, nnojoluichipa waneeshin chi aaʼinmajakai. Atütüleʼennüsü naaʼin na wawalayuu kettaakana süpüla laülaainjanain suluʼu tü outkajaaleekat jee shiale naʼyataainjanain neʼipajee na laülaashiikana, süpüla naaʼinmajüinjanain na anoujüshii eʼitaaushiikana najapuluʼu nutuma Maleiwa (1 Ped. 5:2). Soʼu juyaka 1976, na Laülaashii Jülüjakana Aaʼin na Aküjüliikana Pütchi, nakumajüin sukuwaʼipa tü naʼyataainkat süpüla jülüjüinjatüin naaʼin tü aküjaakat pütchi süchiki Nuluwataaya Maleiwa sainküin tü mmakat. Aipiruasü shiʼipapaʼa tü naʼyataainkat. Sükajee tia, wayaawata aaʼu niain Jesuu oʼunirüin sukuwaʼipa naʼyataain na nuluwataakana aaʼu otta nüküjüin Jeʼwaa nümüin Jesuu jamüinjatüin sukuwaʼipa tia nutuma.

13. ¿Jamüsü pukuwaʼipa sutuma tü naainjakat Jesuu soʼu tü sien juya alatüitpakat?

¹³ Jamüsüjaʼa soʼu tü sien juya alatüitpakat,  wulesü nutuma Jesuu nakuwaʼipa na wayuu nuluwataakana aaʼu. ¿Kasa apüla? Süpüla nünüliamaainjanain naya chi Maleiwakai. Nia oʼuniraka sukuwaʼipa tü aʼyatawaakat süpüla süküjünüinjatüin tü pütchi anasükat suluʼu 239 mma. Mainma na wayuu eʼraajakana Jeʼwaa nutuma Jesuu. Akotchiraashii maʼaka 7.000.000 wayuu nuluwataakana aaʼu süpüla naainjüinjatüin sümaa talataa aaʼin tü keeʼireekat naaʼin chi Nüshikai (Sal. 110:3). Anashaatasü maʼin tü naainjakat Jeʼwaa sükajee Nuluwataaya Jesuu. Mainmayütpejeʼe tü aʼyatawaa choʼujaakat.

14. (1) ¿Kasache wachuntaka wanaa sümaa wamüin: «Taata Maleiwa, püntira tü puluwataayakat»? (2) ¿Jarat tü pütchi aneekünakat süpüla tü juyakat 2014? ¿Jamüsü süneekünaka tia pütchikat?

¹⁴ Mayaainjeʼe nüikkaleʼerüin Jeʼwaa Chi Nüchonkai sünain aluwatawaa soʼujee juyaka 1914, isayülia sükalia süpüla nusouktaleeinjachin shiʼipajee tü pütchi makat: «Püntira tü puluwataayakat» (Mat. 6:​10, NM). Aküjünatüjülia paala suluʼu tü Wiwüliakat sünain nuluwataainjachin Jesuu naʼaka na nüʼünüükana (Sal. 110:2). Maaʼulu yaa, ayatayülia nnojoluin nacheküin tü Nuluwataayakat Maleiwa na wayuu sülaülakana mma. ¿Kasache wachuntaka wanaa sümaa wamüin: «Taata Maleiwa [...], püntira tü puluwataayakat»? Shia wachuntaka nüntüinjachin Jesuu otta na 144.000 wayuu aluwataainjanakana nümaa süpüla najaʼttirüinjatüin suluwataaya wayuu otta na nnojoliikana acheküin tü Nuluwataayakat Maleiwa. Makalaka shikeraajeerüin tü ashajünakat suluʼu tü karalouktakat Daniel 2:44: «Sajaʼttireerü [Nuluwataaya Maleiwa] süpüshuaʼa tü aluwataayakalüirua». Shiimain tia, ajaʼttinneerü naluwataaya na sülaülashiikana mma (Alat. Map. 6:​1, 2; 13:1-18; 19:11-21). Palitchon neʼe tü kaʼi apütaakat süpüla sülatüin tia. Soʼu juyaka 2014, ekeraajüsü sien juya süchikijee nuʼttüin Jesuu sünain Aluwatawaa chaa iipünaa. Makalaka süneekünüin tü pütchi suluʼukat Mateo 6:10 süpüla juyaka 2014: «Taata Maleiwa, püntira tü puluwataayakat».

15, 16. (1) ¿Kasa alateetka soʼutpünaa tü miitkat juya Nuluwataainjatka oʼu Jesuu? (2) ¿Kasa naainjeetka Jesuu sajaʼttapa tü Nuluwataayakat soʼu tü miitkat juya? (3)  ¿Jameerü sukuwaʼipa shikeraajia tü keeʼireekat naaʼin Jeʼwaa?

¹⁵ Süchikijee najaʼttirüin Jesuu na nüʼünüükana Maleiwa yaa mmapaʼa, nujuteechi Satanaa namaa na yolujaakana suluʼumüin tü ishikat soʼu miit juya (Alat. Map. 20:1-3). Naainjapa Jesuu tia, nnojoleerü jaralüin eʼikeʼerüin na wayuukana, aneerü nakuwaʼipa süka sülaʼajaaneerüin tü naainjalakat noulia. Loteerü nakuwaʼipa maʼakaapuʼu nukuwaʼipa Adán sümaa Eva. Asoʼiraweerü saaʼin mainma wayuu nutuma Jesuu otta nukumajeerü sukuwaʼipa süpüla nekirajünüinjanain nüchiki Jeʼwaa (Alat. Map. 20:​12, 13, NM). Paʼaraiiseerü tü Mmakat süpüshuaʼa maʼaka saaʼin tü apainkat Edén. Loteerü maʼin nakuwaʼipa napüshuaʼa na wayuu oonookana nümaa Maleiwa.

¹⁶ Nikeraajeerü Jesuu tü keeʼireekat naaʼin Maleiwa sajaʼttapa tü Nuluwataayakat soʼu tü miitkat juya. Otta nüleʼejireerü süchikuaʼa tü Aluwataaya naapakat paala chi Nüshikai nümüin (paashajeʼera 1 Corinto 15:​24, 25, 28 *). Nnojoleerü choʼujaain nasouktünüin apüleerua na nüchonniikana Maleiwa süpüla anajiraainjanain naya nümaa. Waneesüinjatü nakuwaʼipa na wayuukana otta na aapieekana sünain aʼwaajaa Maleiwa.

17. ¿Kasa ayatüinjatka waaʼinrüin waneepia?

¹⁷ Sutuma tü kasa anasü alatakat suʼunnaa tü sien juya alatüitpakat, watüjaa aaʼu Nuluwataaichipain Jeʼwaa otta shikeraajeerüin tü keeʼireekat naaʼin süpüleerua tü Mmakat. Makalaka ayatüinjanain waya waneepia nümaa Jesuu otta waküjüinjanain pütchi nüchiki otta süchiki tü Nuluwataayakat. Watüjaa aaʼu nülüʼülüin maʼin Jeʼwaa süpüla nusouktüinjachin shiʼipajee tü wachuntakat nümüin, tü makat: «Taata Maleiwa, püntira tü puluwataayakat».