Jülüjüsü naaʼin wanee wayuu tü nukuwaʼipainjatkat watta kaʼi. Eeshi nümüle: «¿Aneetche nakuwaʼipa tachonnii watta kaʼi? ¿Ajaʼtteetche eera tü Mmakat? ¿Kasache taainjüinjatka süpüla anainjatüin takuwaʼipa?». Wainma na wayuu makana anüiki süka keeʼireein naaʼin anain nakuwaʼipa. Watüjaalejeʼe saaʼu tü kasa alateetkat mapeena, eesüjeʼe waaʼin süpüla.

¿Kaseetka alatüin wamüin watta kaʼi? ¿Eeshiche chi atüjaakai saaʼu tia? Na wayuu achajaakana sukuwaʼipa süpüla natüjaain saaʼu tü alateetkat mapeena, eesia najatüin, akatsaʼa wainmain tü noʼtchejaakalü amaa. Nütüjaapejeʼe aaʼu Maleiwa tü kasa alateetkat watta kaʼi. Müsü tü Wiwüliakat: «Nia chi aküjatüjüikaʼaya tü kasa alatüinjatkat. Nüküjatüjülia saainjünüinjatüin wanee kasa süpülapünaa saainjünüin» (Isaías 46:​10, NM). ¿Ekeraajüirü tü nüküjakat achiki Maleiwa?

¿Jamüsü wanoujüinjatka sünain tü pütchi nüküjatüjütkat Maleiwa sümaiwa paala? Jamüshijaʼa eere wanee alijuna eekai tütüin maʼin süpüleerua aküjaa shiʼitüinjatüle juya jee nnojoluinjatüle shiʼitüin, punoujüinje tü nümakat. Müinjatia wakuwaʼipa nünainmüin Maleiwa, watüjaale saaʼu nikeraajüin tü nümakat, keeʼireejeerü waaʼin watüjaain saaʼu tü naainjeetkat mapeena.

AKÜJÜNÜSÜ SAJAʼTTINNAJATÜIN NÍNIVE:

Nüküjüle paala wanee wayuu sajaʼttinnajatüin wanee pueulo  eekai washirüin otta shikeraajüle tü nümakat, ponusüjeʼe maʼin saaʼin wayuu. Nüküjüin Maleiwa nakajee na nünüikimaajanakana, sajaʼttinnajatüin Nínive (Sofonías 2:13-15). ¿Ekeraajüsüche tü nümakat Maleiwa? ¿Kasa naküjaka na ashajüliikana süchiki kasa alatüirü? Soʼutpünaa juyaka 600 süpülapünaa wakalia, poloo jaʼralimüin juya süchikijee süküjünüin sajaʼttinnajatüin Nínive, ashutüna aaʼu shia natuma na babiloniokana otta na medokana. Naashin Maleiwa nnojoluinjatü kasain apütaain süchikijee Nínive. Mayaainjeʼe miyoʼuin maʼin tü pueulokot Nínive otta anain maʼin shia, nnojotsü nakaʼalirajüin shia na ashutüshiikana saaʼu. Nnojorüleesia kasain apütaain süchikijee. ¿Eeshiche wanee wayuu atüjakai maʼin maʼaka naaʼin Maleiwa?

WANEE WAYUU AʼAJÜINJACHIKAI SHIIPÜSEE WAYUU:

Nnojoishi eein wanee wayuu ainkakai aküjaa süchiki wanee kasa 300 juya süpülapünaa shikeraajüin. Nüküjüle shia otta shikeraajüle, eʼraajünüshije maʼin nia. Naainjapajaʼa tia Maleiwa nükajee wanee wayuu nünüikimaajachi aküjakai nünülia wanee wayuu aʼajüinjachikai shiipüse wayuu, nüküjaleeinya jaralinjachin kapüshin otta jalainjatüin naʼajüin tü jiipükat. Naashin chi nünüikimaajachikai Maleiwa, eeinjachi wanee nuuʼuliwoʼu David, Josías nünülia. Naʼajüinjatü shiipüse wayuu chaa Weteet (1 Reyes 13:​1, 2). 300 juya süchikijee tia, aikkalaashi sünain aluwatawaa Josías wanee nuuʼuliwoʼu David. Nnojoishi eʼraajünüin nia soʼutpünaa tia. Ekeraajüsü tü ashajünakat nüchiki Josías, Weteet sünülia eejatüle naʼajüin shiipüse wayuu (2 Reyes 23:14-16). ¿Nüküjalache süka naaʼin nümüiwaʼa tia? ¿Nüküjalataapa shia Maleiwa nümüin?

ASHUTUNÜINJATÜ AAʼU WANEE MMA:

Jamüshijaʼa eere wanee wayuu aküjakai süchiki nünülia wanee wayuu ashutajachikai saaʼu wanee mma otta nüküjüle süchiki tü sukuwaʼipainjatkat nutuma, ponusüjeʼe maʼin saaʼin wayuu. Tia, shia tü naainjakat Jeʼwaa. Nüküja achikirü Maleiwa niainjachin Ciro ashutaka saaʼu wanee mma. Nüküjataain  joʼoyaa nüjütüinjanain na judíokana chaa noumainpaʼamüin otta nukumajirüin tü aʼwaajüleekat Maleiwa. Aküjünüsü itüinjatüin nutuma Ciro tü wüin pasanainkalü anain tü mma nushutüinjatkalü aaʼu otta jutatüinjatü tü miichoʼukat nüpüla (Isaías 44:27–45:2). ¿Ekeraajüsüche süpüshuaʼa tia pütchikat? Ekeraajüsü tia naashin na ashajüliikana süchiki kasa alatüirü. Ashutüshi Ciro saaʼu Babilonia, nukumajüin wanee süpüna wüin süpüla nojunujeʼerüin tü süchikat. Apütünüsü napüla jutatüin tü piichoʼukat, nekerotaka süpüla nashutüin saaʼin Babilonia. Süchikijee tia, nüjütüin Ciro na judíokana chaa noumainpaʼamüin otta nukumajirüin tü aʼwaajüleekat Maleiwa. Ponusü maʼin saaʼin wayuu tia süka manoujüin Ciro (Esdras 1:1-3). Nia neʼe Maleiwa atüjaka süpüleerua nüküjüin süchiki tia kasa alatakat.

Tü apünüinsü pütchi waashajaaitpakalü achiki, shia süpüshi tü pütchi nüshajirakat paala Maleiwa süpüla shikeraajüinjatüin. Nnojotsü jeketüin namüin na israeliitakana nikeraajüin Maleiwa tü nünüikikat. Müshi Josué namüin: «Jütüjaashanta aaʼu shikeraajüin süpüshuaʼa tü nümakat jümüin chi Jümaleiwasekai Jeʼwaa. Jiʼrüin shikeraajüin süpüshuaʼa tü nümakat. Nnojotsü eein waneesiaakaijeʼe pütchi eekai nnojoluin shikeraajüin» (Josué 23:​1, 2, 14, NM). Natüjaa aaʼu na israeliitakana nikeraajüin Maleiwa süpüshuaʼa tü nümakat. ¿Jamüshi matüjüinka Jeʼwaa oʼtchejawaa sümaa wanee pütchi? Aluʼusa wayuule nia süpüla nuʼtchejaain sümaa. Watüjaainjatü aaʼu tia süka eeyülüinya waneeirua pütchi nüküjaka Jeʼwaa nnojoyütka ekeraajüin, tü anainjatkalü atuma sukuwaʼipa wayuu.

Na wayuu aküjakana süchiki wanee kasa alatüinjatka, naküjüin wanee pütchi sünainjee tü namakat na atüjüshiikana maʼin, tü neʼrakat sünain nakuwaʼipa na wayuukana otta süka pülain naya naashin. Naʼatapaja namüsia shikeraajüin tü namakat (Proverbios 27:1).

Nütüjaa aaʼu Maleiwa süpüshuaʼa tü kasa alatakat. Nütüjaa aaʼu jamüin naainjaka na wayuukana wanee kasa otta nütüjaa aaʼu kasain keeʼireein naaʼin. Makalaka nütüjaain saaʼu kaseerüin naainjüin na wayuukana. Otta eesü süpüla nuʼunirüin nakuwaʼipa sünain aainjaa wanee kasa süpüla shikeraajüinjatüin tü nüküjakat paala. Müshi nia: «Meeria sukuwaʼipa tü tanüiki tojuʼitirakat, tekeraajeerü shia» (Isaías 55:​11, NM). Tü pütchi nüküjakat paala Maleiwa, ekeraajüinjatü shia.

¿Jameetche wakuwaʼipa watta kaʼi? ¿Jameetche nakuwaʼipa na kasayuukana wanain? Paapüle süchiki sülatüinjatüin wanee wawai eepünaale kepiain pia, nnojoishijeʼe atunkajaʼalüin pia, ¿aashimüin? Eejüinjatü waaʼin süpüla tü kasa antajatkat nutuma Maleiwa. Nüküja achikirü Maleiwa nüntireerüin soʼu palitchon kaʼi wainma kasa anasü. Ekeraajeerü shia süka nnojoluin sünüikin shia wayuu. (Paashajeʼera tü pütchikat: « Tü alateetkat mapeena naashin Maleiwa».)

Wanta anainrü suluʼu tü Wiwüliakat kojuyasü pütchi ekeraajüinjatka naashin Maleiwa. Sünainpünaasü shia nakuwaʼipa na wayuukana otta eesü süpüla watüjaain saaʼu. Naashin Maleiwa, niashi chi aküjatüjüikaʼaya tü kasa alatüinjatkat. Matüjüinsat aʼwüinjawaa tü nümakat. Naainjeerü tü nüchekakat süpüleerua naainjüin (Isaías 46:10). Anashanteerü maʼin sukuwaʼipa wayuu soʼu palitchon kaʼi. ¿Pütüjawee aaʼu jameerüin sukuwaʼipa wayuu soʼu palitchon kaʼi? Püsakira na aküjüliikana pütchi nüchiki Jeʼwaa. Ekirajaashii naya sünain tü Wiwüliakat makalaka naküjeerüin pümüin tü kasa nüntireetkat Maleiwa soʼu palitchon kaʼi. Nnojoishii psíquicoin naya, nnojoishii aʼyataain sümaa tü yolujaakalüirua otta nnojoishii pülain naya.