Wanee kasa akaaliinjeenaka waya süpüla wachecherüin waaʼin suʼunnaa ayuulin waya, shia namüliarüle waaʼin na wapüshikana, waʼaleewainyuu ooʼulaka na anoujakana wanaa wamaa.

Atalatalaasü waaʼin anale nünüiki wamüin wanee waʼaleewain (Prov. 16:24; 18:24; 25:11). Nnojotpejeʼe shiain neʼe keeʼireein waaʼin wamüliajünüin sülatapa kasa mojusü wamüin. Wachajaainya sukuwaʼipa süpüla «wamüliajüin naaʼin na müliakana sutuma tü kasa mojusü alatakat namüin. Wamüliajüin naya maʼaka nümüliajüin waya Maleiwa» (2 Cor. 1:​4, NM; Luc. 6:31). Eesü wanee kasa alataka nümüin Antonio, wanee wawala alapalaakai naaʼu na wawalayuukana chayaa México, eeʼiyataka sünain shiimain tia pütchikat.

Mojushaatasü maʼin naaʼin chi wawalakai wanaa sümaa süküjünüin nümüin kaanserüin nüsha. Aapüsü nümüin wanee ayuulii linfoma sünülia. Nüchajaapejeʼe sukuwaʼipa süpüla nnojoluinjatüin mojuin maʼin naaʼin saaliijee ayuulin nia. Eeshi niiʼirajapuʼule tü jayeechiirua eeʼirajünakat nümüin Maleiwa sümaa jülüjüin naaʼin tü sümakat. Wanee kasa amülialaapuʼuka atuma naaʼin shia oʼuraajaa sümaa müleʼuin nünüiki otta aashajeʼeraa tü Wiwüliakat.

Naashin Antonio, naya akaaliinjaka maʼin nia na anoujiraakana wanaa nümaa. Müshi nia: «Suʼunnaa mojuin maʼin taaʼin otta mojuin maʼin saaʼin taʼwayuuse, weenaküin wepialuʼumüin wanee laülaashi süpüla nuʼuraajüinjachin wapüleerua, kasaichijaʼa nia wanain. Anasü waaʼin sutuma nuʼuraajüin wapüleerua. Sutuma nakaaliinjüin waya na wapüshikana ooʼulaka na wawalayuukana, eejiraashii waya sümaa tü mojuukalü aaʼin». Talatashaatashi maʼin Antonio sutuma aipüraliin jee amüliajüliin na naʼaleewainyuukana.

Wanee kasa akaaliinjaka waya suʼunnaa mojuin waaʼin nia chi naaʼinkai Maleiwa. Naashin chi aluwataaushikai Pedro, shia wanee «asülajuushi naapaka wamüin» Maleiwa (Aluw. 2:​38, NM). Atüjaana aaʼu tia sünain tü Pentecostés eejatkat soʼu juyaka 33, wanaa sümaa nüshakatüin chi naaʼinkai Maleiwa naaʼu na nikirajüinkana Jesuu. Müsia maaʼulu, wachuntüle chi naaʼinkai Maleiwa nümüin, naapeechi wamüin. Makalaka eein süpüla wachuntüin nümüin Maleiwa katsüinjachin waaʼu chi naaʼinkai (Is. 40:​28-31).

Wainma kasa mojusü eejiraaka amaa chi aluwataaushikai Pablo. Wainmatua najachajuuin jee ouktajachia nia naajüin (2 Cor. 1:​8-10). Nnojoipejeʼe mmoluin nia seema ouktaa. Nütüjaa aaʼu nükaaliinjeechin nia Jeʼwaa sülatapa kasa mojusü nümüin. Müsü nünüiki Pablo: «Waʼwaaja chi Maleiwakai, chi Nüshikai chi Wasenyotsekai Jesukürisüto. Nia chi Maleiwa amüliajüikai, chi amüliajakai waya suʼunnaa müliaa» (2 Cor. 1:​3, 4, NM). Nnojotsü shiain maʼin jülüjüin naaʼin Pablo nümüliala. Shia alanaʼaleeka nümüin namüliala na waneeinnua. Sutuma naainjüin tia, atüjüshi maʼin nia amüliajaa naaʼin na müliakana.

Anapa Antonio suulia tü ayuulii nünainjatkat, aʼyataashi nia nüchikuaʼa sünain alapalaa naaʼu na wawalayuukana. Mayaapejeʼe aipuʼuin nüpüla na nuwalayuukana, kooʼomüinreeipaʼaya maʼin tü naaliinkat nüpüla. Awaraijaashi nia sümaa nuʼwayuuse naaʼu na wawalayuu ayuuikana süpüla natütüleʼerüinjatüin naaʼin. Eeshi wanee wawala nuwaraijaaka aaʼu Antonio, ayuuishi maʼin nia otta nnojoishi oʼuneein sünain outkajawaaka. «Aishi Jeʼwaa nüpüla otta aishii na wawalayuukana nüpüla. Shiajasaʼa müitchipain neʼe nia sutuma tia ayuuliikat, mojusü maʼin naaʼin otta nnojoishi kasain anain apüla nia naashin», nümakalaka Antonio.

Chajachinka chia wawalakai sünain wanee jutkatiraa, niasaʼa Antonio süpüla joo nütütüleʼerüin naaʼin «anashi müleka piale oʼuraajüin wapüleerua tawala» nümaka nümüin. Mayaapejeʼe nnojolin kettaain nia süpüla tia naashin, oʼuraajüshi. «Anashaatasü nünüiki soʼu tia, pounuataayai neʼe shia. Shiasaʼa kettaapa nünüiki, akatsüinraasü naaʼin otta anaitpa naaʼin», müshi Antonio.

Soteesü waaʼin shiʼrüin sümüliala wayuu süpüshuaʼa. Naashin Pablo, amülialaasü waaʼin naaliin na wayuu müliakana sutuma weʼrüirüin müliaa. Makalaka anain wamüliajüle naaʼin na wawalayuu müliakana aaʼin maʼaka naainjüin shia Jeʼwaa.