1. ¿Kasa talataka atumaa naaʼin Jesuu? (Piirakaa sümüin tü ayaakuaakat.)

NULUWATAAIN Jesuu akaratshishii nekii nikirajüin sünain aküjaa pütchi süchiki Nuluwataaya Maleiwa. Kapüleepünaasü tia namüin süka eejiraain naya namaa na fariseokana jee namaa na karalouktamaajanakana. Sutuma natüjüin karaloukta naya wayuukana, keeʼireesü naaʼin mojutüinjatüin amüinyüü tü nikirajakalü anain Jesuu süka niʼyataalin neʼe sümaa taapüla (Mar. 6:3) Naapülijüinjana naaʼinruʼu na nikirajüinkana Jesuu süka nnojoluin natüjüin maʼin karaloukta otta süka «wayuuin wayuwaʼata naya» naashin (Aluw. 4:13). Nütüjawee aaʼu Jesuu jamüin nakuwaʼipa na nikirajüinkana sünain aküjaa pütchi. Shiasaʼa naleʼejapa, niʼrüin naya sünain talatashaatain naaʼin. Mayaapejeʼe eejiraain na nikirajüinkana Jesuu sümaa yolujaa, ayatüsia naaʼinrüin tü nuluwataakalü anain naya Jesuu. Naleʼejapa nachikuaʼa, nakuentajüin nümüin Jesuu sünain anain maʼin nakuwaʼipa sünain aküjaa pütchi. Talatashaatasüjeseʼe naaʼin Jesuu wanaa sümaa naapüin tia pütchikat. ¿Kasa talataka atuma naaʼin na nikirajüinkana Jesuu? ¿Jara akaaliinjaka naya süpüla yalayalainjatüin naaʼin? (Paashajeʼera Lucas 10:1, 17-19, 21.)

2. (1) «Na wayuu kamaneekana», ¿jamüshi nümaka Jesuu namüin na nikirajüinkana? (2) ¿Jamüshii nükaaliinjaka Jeʼwaa na nikirajüinkana Jesuu?

 ² Müsü nünüiki Jesuu nümüin Jeʼwaa: «Taataa, taʼwaajüin pia, pia Aluwataashikai chaʼaya iipünaa ooʼulaka yaʼaya mmoluʼu. Tü paaʼinrüinjatkat, nnojotsü piiʼiyatüin sümüin wayuu eekai kekiin saashin, piiʼiyatüitpa namüin na wayuu kamaneekana pümüin». Mapüleesat sukuwaʼipa nikirajia Maleiwa naashin Jesuu (Mat. 11:25, 26). Nnojotsü yaletüin naaʼin na nikirajüinkana Jesuu maʼaka nnojoluin yaletüin naaʼin na tepichikana. Müshijeseʼe «na wayuu kamaneekana» nümüin Jesuu namüin. Aluʼuinjaʼa na fariseokana jee na karalouktamaajanakana yaleta aaʼinchii naya, atüjashii maʼin naashin (Mat. 18:1-4). Na nikirajüinkana Jesuu, nayaawatüin saaʼu tü kasa kapüleekat suluʼu tü Wiwüliakat süka nnojoluin yaletüin naaʼin. Nükaaliinjain naya Jeʼwaa nükajee chi naaʼinkai. Nnojotpejeʼe müin nakuwaʼipa na fariseokana jee na karalouktamaajanakana, süka jamüin, yaletüin naaʼin maʼaka naaʼin Satanaa.

3. ¿Kasa wekirajaainjatka anain sünain ekirajaayakat tüü?

³ Naapüin Jeʼwaa chi naaʼinkai namüin na wayuu nnojoliikana yaletüin aaʼin süpüla nayaawatüinjatüin saaʼu tü kasa kapüleekat maʼin suluʼu tü Wiwüliakat. Talatashaatasü naaʼin Jesuu sutuma tia. Ayatüsia müin sukuwaʼipa wayuu nutuma Jeʼwaa maaʼulu yaa. ¿Jamüsü watüjaaka saaʼu sünain shiimain tia? Wekirajaajeerü anain tia sünain ekirajaayakat tüü.

4. ¿Jamüsü anaka maʼin tü rewiisüta lenguaje sencillo münakat?

⁴ Maaʼulu yaa, mapüleechonsat ayaawataa saaʼu tü pütchi nekirajakalü anain na wawalayuukana suluʼu tü karalouktakalüirua. Anuu tü apünüinsü kasa mapüleekalü aaʼujee shia. Palajana nakumajüin tü rewiisütakat Aapiria Wayuu. Tia shia tü lenguaje sencillo münakat. * Anasü maʼin tia rewiisütakat süka müpüleechoin shia, nayaawatamaata aaʼu na wawalayuukana tü pütchi suluʼukat. Jee müsia neʼrüin na wayuu kachonshiikana mapüleein napüleerua na tepichikana, nayaawatüin saaʼu jamaluʼuluin tü pütchi suluʼukat tü rewiisütakat. Sutuma tia, wainma na wawalayuu aluwataakana karaloukta Weteetmüin süpüla naapüin analuʼut saaʼu tia rewiisütakat. Eesü wanee wawala motpuʼuka seema ayaleraa sajapü shiʼipajee tü asakinnakalü anain, maaʼulu yaa ayalerüitpa maʼin shia sajapü süka shikirajaʼawalin sünain tü rewiisüta lenguaje sencillo münakat.

5. ¿Kasa tü anakat suluʼu tü Traducción del Nuevo Mundo de las Santas Escrituras ojuʼitakat suluʼu inkülee?

⁵ Nanouktüin na wawalayuukana waneeirua pütchi suluʼu Traducción del Nuevo Mundo de las Santas Escrituras suluʼu inkülee. Kettaasü shia natuma oʼutuupüroʼu 5 soʼu juyakat 2013. * Mayaapejeʼe paliʼirüin tü pütchi suluʼukat, nnojotsü aʼwanajaanüin tü nünüikikat Jeʼwaa. Akaʼaya shia mapüleechonsü. Sümaiwa paala sünain Job 10:1 eepuʼusü 27 pütchi, maaʼulu yaa eeitpa neʼe 19. Jamüsüjaʼa sünain Proverbios 8:6, eepuʼusü 20 pütchi, maaʼulu yaa eeitpa 13 pütchi. Mapüleeitpa shia süpüla ayaawatünaa aaʼu. Naashin wanee wawala chainjachikai aluwataain nümaa Jesuu, nnojotpuʼusü niyaawatüin saaʼu sünüiki tü karalouktakat Job, eereje kakaliaichin nia sünain anoujaa.  Shiasejeʼe naashajeʼerapa tü jeketkat, niyaawatamaata aaʼu shia. Wainma na wawalayuu makana anüiki.

6. ¿Jamüsü pünüiki süchiki tü pütchi apansaajinnakat suluʼu Mateo 24:45-47?

⁶ Anaitpa maʼin süpüla ayaawataa saaʼu waneeirua wetsiikulo suluʼu tü Wiwüliakat, süka jamüin, nanouktüin shia na wawalayuukana. Jamüsüjaʼa suluʼu tü rewiisütakat Aapiria Wayuu ojuʼitaka juulioʼu soʼu 2013, apansaajinnüsü tü sümakat Mateo 24:45-47. Aküjünüsü yala nayain na Laülaashii Jülüjakana Aaʼin na Aküjüliikana Pütchi sainküin Mma «chi achepchiee oonookai otta kekiikai maʼin». Jee müshiʼiya «na achepchiakana», naya na wawalayuu aluwataainjanakana chaa iipünaa nümaa Jesuu otta na wawalayuu yaainjanakana yaa mmapaʼa, süka jamüin, saapünüin namüin tü choʼujaakat sümüin nanoula (Juan 10:16). Anataʼaleeshiijaʼa maʼin waya watüjaaka saaʼu tia otta wekirajüinjanaka na wayuukana sünain. Shiimain mapüleein nikirajia Jeʼwaa, anuu sooʼomüin sukuwaʼipa.

7, 8. Püküja kasain kayaakuayaain waneeirua kasa eeka suluʼu tü Wiwüliakat.

⁷ Anaitpa maʼin shikirajia natuma na wawalayuukana tü kasa alatakat saashin tü Wiwüliakat. Sümaiwa paala, aküjünapuʼusü wamüin eein tü kasa kayaakuakat tü alatakat namüin na wayuu saashajaakana achiki tü Wiwüliakat. ¿Müinjatchejeʼe sukuwaʼipa tia atumawaa? Aa, müinjatia sukuwaʼipa, mapuʼusia sukuwaʼipa nutuma Jesuu. Jamüshijaʼa soʼu nikirajüin süchiki chajachin Jonás süleʼeruʼu tü jimekat, shiyaakuasü chainjachin Jesuu suluʼu tü woowirakat (paashajeʼera Mateo 12:39, 40).

⁸ Anuutaa joo wanee suwalaʼatayaa. Nikirajüin Pablo shiyaakuayaain nukuwaʼipa Jeʼwaa namaa na israeliitakana jee na aluwataainjanakana iipünaa, tü nukuwaʼipakat Abraham sümaa Agar otta Sara (Gal. 4:22-26). Naashin Pablo tü piichi aʼwaajüleekat, tü Kaʼi saʼajünakat oʼu mürüt juyawai nümüin Jeʼwaa jee müshia chi laülaashikai napüleerua na sacerdootekana, shiyaakuasü neʼe tü kasa antajatkat mapeena (Heb. 9:23-25; 10:1). Akatsüinraasü wanoula sutuma tia watüjaapa saaʼu jamaluʼuluin shia. ¿Shiyaakuayaasüche wanee kasa jee wanee wayuu süpüshuaʼa tü kasa suluʼukat tü Wiwüliakat?

9. ¿Kasa kayaawaseka tü alatakat nümüin Nabot sümaiwa paala?

⁹ Shiapuʼusü ekirajünakalü anain waya tia. Wanee kasa ekirajünapuʼuka anain waya shia tü sümakat 1 Reyes 21:1-16. Saashin tia pütchikat, suʼutira aaʼinchi Jezabel wanee wayuu Nabot anülia süpüla saapüinjatüin tü naʼapainsekat nümüin Acab chi suʼwayuusekai. Saashin tü rewiisüta Aapiria wayuu ojuʼitakat soʼu juyakat 1932, niyaakuayaashi Satanaa Acab otta Jezabel tü nümaajatkalüirua. Nabot niyaakuayaashi Jesuu, shiasejeʼe soʼu nuʼutünüin aaʼin Nabot shiyaakuayaasü nuʼutünajachin aaʼin Jesuu. Sunouktünaka joo mapa tia suluʼu tü karalouktakat «Santificado sea tu nombre» suluʼuka inkülee, ojuʼitüsü shia soʼu tü juyakat 1961. Saashin tia karalouktakat, Nabot nayaakuayaashii na aluwataainjanakana chaa iipünaa. Shiasejeʼe Jezabel nayaakuayaasü napüshuaʼa na anoujakana nünain Kürisüto naashin. (Ojuʼitüsü tia karalouktakat alijunaikiruʼu soʼu juyakat 1964.) Müsia soʼu müliain atumawaa naaʼin Nabot shiyaakuayaasü müliainjatüin naaʼin atumawaa na wawalayuu aluwataainjanakana iipünaa. Katsüinsü wanoula sutuma tia nekirajakalü  anain waya na wawalayuukana. Maaʼulu yaa, waneejatüitpa shikirajia natuma. ¿Jamüsü suʼwanajaanaka sukuwaʼipa?

10. (1) ¿Jamüsü sukuwaʼipa natuma na wawalayuukana süpüla anainjatüin tü nekirajiakat? (2) ¿Jamüsü sukuwaʼipa atumawaa maaʼulu yaa shikirajünapa anain wanee pütchi?

¹⁰ Kapüleepuʼusü süpüla wayaawatüin saaʼu jamaluʼuluin wanee pütchi, nnojotsü sotuin waaʼin jee kapüleesü süpüla weʼitaain suluʼu wakuwaʼipa. Maaʼulu yaa, anaitpa maʼin sukuwaʼipa nutuma «chi achepchiee oonookai otta kekiikai maʼin» süka kaaliin nia nüpüla Jeʼwaa, kayaawatiasü wanee pütchi nutuma müleka süküjüle shia tü Wiwüliakat. Maaʼulu yaa, shikirajünapa anain wanee pütchi suluʼujee tü karalouktairua ayuʼnnaka suluʼujee tü Wiwüliakat, mapüleesat shia atumawaa otta süpülajatü kooʼomüin wanoula, eejiraainjanain waya sümaa tü kasakalüirua, alinjachin Jeʼwaa wapüla otta wekirajaain sünain waneeirua akuwaʼipaa. *

11. (1) ¿Jamüsü shikirajia maaʼulu yaa tü alatakat nümüin Nabot? (2) ¿Kasa shikirajaka anain waya nukuwaʼipa Nabot?

¹¹ Mapüleeitpa shikirajia tü alatakat nümüin Nabot. Sümaiwa paala, wanaa sümaa nuʼutünüin aaʼin Nabot shiyaakuayaasü tü kasa alatajatkat nümüin Jesuu ooʼulaka na wawalayuu aluwataainjanakana chaa iipünaa. Maaʼulu yaa, waneejatüitpa sukuwaʼipa, ouktüshi Nabot süka niain noonooin amaa anüiki Jeʼwaa. Ayatshia waneepiain Nabot nümaa Jeʼwaa mayaapejeʼe müliain nia nutuma wanee aluwataai (Núm. 36:7; 1 Rey. 21:3). ¿Kasa shikirajaka anain waya nukuwaʼipa Nabot? Ayatüinjana waya oonooin sümaa nünüiki Jeʼwaa jaʼitashii müliain waya atumawaa (paashajeʼera 2 Timoteo 3:12). Wayaawata aaʼu tia süka mapüleein shia, soteerü shia waaʼin jee washateerü tia nukuwaʼipakat. Shiimain katsüin wanoula sutuma tia.

12. (1) ¿Kasa tü nnojoluinjatkat jülüjüin waaʼin süchiki tü alatakat saashin tü Wiwüliakat? (2) ¿Kasa akaaliinjaka waya süpüla wayaawatüin saaʼu wanee pütchi kapüleeka suluʼu tü Wiwüliakat? (Paashajeʼera tü nootakat.)

¹² Nnojotsü jülüjüinjatüin waaʼin nnojoluitpain kasain anain apüla tü kasa alatakat saashin tü Wiwüliakat, eesü kayaawasere  shia otta eesü tü shikirajakalü anain waya. Mayaapejeʼe müin tia, nnojotsü shiain ekirajünüin maʼin anain kayaakuayaain wanee kasa. Shia ekirajünaka maʼin anain jamüin wanaawaka nukuwaʼipa wanee wayuu sümaa tü alatakat nümüin waneʼeya otta washatüinjatüin tü nukuwaʼipakat. Jamüsüjaʼa waashajeʼerapa waneepiain Nabot nümaa Maleiwa, müsia neʼe nukuwaʼipa Jesuu ouktaleepa nia jee müsia neʼe nakuwaʼipa na wawalayuu chainjanakana aluwataain iipünaa. Akaataajaʼa nakuwaʼipa na wawalayuu yaainjanakana kepiain mmapaʼa. Mapüleesüjeseʼe nikirajia Jeʼwaa süka wayaawatüin saaʼu tia. *

13. ¿Kasa tü mapüleechonkat natuma na wawalayuukana sünainjee tü nikirajakalü anain Jesuu?

¹³ Mapüleesat süpüla wayaawatüin saaʼu wanee kasa müleka kayaawasere shia atumawaa. Müshii wayakai aaʼin alatüin amüin wanee kasa müleka kayaawasere shia atumawaa. Nia atüjaka maʼin Jesuu süpüla tia, nikirajüin tü wayuukalüirua süka tü kasa eʼnnaajünakat sainküin tü mmakat (Mat. 13:34). Mapüleechonsat natuma na wawalayuukana sukuwaʼipa nikirajia Jesuu. Jamüsüjaʼa sünain tü rewiisütakat Aapiria Wayuu ojuʼitaka juulioʼu 15 soʼu 2008, aküjünüsü wamüin kasain kayaakuayaain tü soolojiakat pan, tü süʼükat mostaza otta tü kusukat. Tia kasakalüirua shiyaakuayaasü Nuluwataaya Maleiwa otta wainmain na wayuu aʼyataakana nümüin sutuma.

14. (1) ¿Jamapuʼusü sukuwaʼipa shikirajia tü naainjakat chi wayuu Samaariajeʼewaikai? (2) ¿Jamüsü shikirajia maaʼulu yaa?

¹⁴ Eesü wainmale kasa sünain wanee pütchi naashajaakalü achiki Jesuu. Eesü shiale nikirajüin achiki wanee kasa alatajatka jee shiale wanee kasa washatüinjatka akuwaʼipa. ¿Jamüsü süpüla wayaawatüin saaʼu jetsüin tü alatajatkat otta jetsüin tü washatüinjatkalü akuwaʼipa? Aküjünawaisü wamüin jetsüin shia. Anuu sukuwaʼipapuʼuka shikirajia tü nüchikikat wanee wayuu Samaariajeʼewai (Luc. 10:30-37). Soʼu tü juyakat 1924, aküjünüsü suluʼu tü rewiisütakat Aapiria Wayuu niyaakuayaain Jesuu chi wayuu samariajeʼewaikai. Tü wopukot shiyaakuasü sumojujaain maʼin sukuwaʼipa tü wayuukalüirua nükalioʼujee Adán sümaa Eva. Na kaʼruwarannuukana shiyaakuayaashii tü konpainyiiakalüirua sümaʼaleʼeya tü oikkaannuukalüirua. Chi sacerdootekai nümaa chi leviitakai nayaakuayaashii na anoujakana nünain Kürisüto naashin. ¿Jamüsü sukuwaʼipa shikirajia maaʼulu yaa? Saashin tü karaloukta weitajakat nnojotsü wayoujüinjatüin wayuu saaʼu naatain suumain, shiʼiruku otta sukuwaʼipa. Tü nakuwaʼipainjatkat watuma shia wekirajüinjanain naya nüchiki Jeʼwaa. Talatüsiaʼaya maʼin waaʼin sutuma süpansaajinnüin wamüin tü shikirajakat anain tü Wiwüliakat.

15. ¿Kasa wekirajaainjatka sünain tü wanee ekirajaayakat?

¹⁵ Sünain tü wanee ekirajaayakat, wekirajaajeerü anain süchiki poloosü majayünnüü naashajaakalü achiki Jesuu (Mat. 25:1-13). ¿Jamüsü sukuwaʼipa nutuma Jesuu süpüla wayaawatüinjatüin saaʼu tia nüküjakalü achiki maaʼulu? Tia poloosükat majayünnüü, ¿shiyaawasüche wanee kasa? ¿Shiataapa nüküjüin achiki washatüinjatüin sukuwaʼipa? Wekirajaa sünain tia.