PÜTCHI SÜNAINKA SÜTA TÜ REWIISÜTAKAT | ¿JAMÜSÜCHE NÜNÜIKI MALEIWA SÜCHIKI TÜ ATKAWAAKAT?
¿Anasüche nümüin Maleiwa tü atkawaa eejatkat sümaiwa?
Kojuyatua maʼin nachuntüin kaaliinwaa na israeliitakana nümüin Maleiwa, nnojoipejeʼe nia asouktamaatüin namüin. Süka nachepchiain naya na egipciokana, müliashii maʼin naya atumawaa (Éxodo 1:13, 14). Kakaʼiya maʼin naʼatapajüin na israeliitakana süpüla nojuʼitinnüinjanain Egiptojee (Éxodo 3:7-10). Saashin tü Wiwüliakat, atkaashi Maleiwa napüleerua na israeliitakana. Nüntirüin Maleiwa poloosü kasa mojusü nanainmüin na Egipciokana; wüinsitshi Faraón nutuma Maleiwa namaa na nusurulaatsekana chayaa shiroku tü palaa Ishosükat (Salmo 136:15). Sutuma naainjain tia, atüjaana aaʼuchi Jeʼwaa sünain nütkaain napüleerua na aʼyataakana nümüin (Éxodo 15:3, 4).
Eejatü waneeirua atkawaa nnojotka niyouktüin Maleiwa, maʼaka saaʼin tü atkawaa eejatkat namaa na egipciokana. Nuluwataainya Maleiwa na israeliitakana süpüla natkaainjanain namaa na naʼünüükana. Atkaashii naya namaa na cananeokana, wayuu mojulaajüsüirua maʼin tiairua (Deuteronomio 9:5; 20:17, 18). Akaataajaʼa David, nuluwataain nia Maleiwa süpüla nütkaainjachin namaa na filisteokana jee müsia nüküjüin Maleiwa nümüin tü naaʼinrajatkat süpüla niyamülüin naya (2 Samuel 5:17-25).
Wanaa sümaa müliain na israeliitakana natuma na naʼünüükana, nüjütüin naya Maleiwa sünain atkawaa süpüla nnojoliinjanain najaʼlajeʼennüin ooʼulaka süpüla ayatüinjanain naʼwaajüin nia, süka jamüin, niain chi Maleiwa shiimainshikai. Süpüla watüjaain saaʼu jaralüin tü atkawaa anakat nümüin Maleiwa, wekirajaa sünain apünüinsü kasa akaaliinjeenaka waya sünain ayaawataa saaʼu tia.
-
NIA MALEIWA ANEEKAKA JARALIINJANAIN OʼUNÜIN SÜNAIN WANEE ATKAWAA. Müshinka Maleiwa namüin na israeliitakana: «Nnojoleena jia atkaain». Nüküjüin Maleiwa tia süka niainjachin atkaain napüleerua (2 Crónicas 20:17, TNM; 32:7, 8). Kojuyatua naainjain Maleiwa tia. Jamüshijaʼa Nia, nuluwataainka na israeliitakana süpüla najaʼttirüinjanain na wayuu kepiakana suluʼu tü mma naapajatkat namüin jee müsia süpüla naaʼinmajüinjatüin shia (Deuteronomio 7:1, 2; Josué 10:40).
-
NIA NEʼE MALEIWA ANEEKAKA JOUJAINJANAIN NATKAAIN. Süpülapünaa nashutüin na aʼyataakana nümüin Maleiwa saaʼu naʼünüü, naʼatapajüinjatü naluwataanüin nutuma Maleiwa jee nnojotsü ashapalaainjatüin naaʼin. «Jushuta naaʼu», nümüle Maleiwa, oʼunüshii naya sünain atkawaa. Noʼunajaale sümaa nnojoluin naʼatapajüin nünüiki Maleiwa, akanajuushii naya natuma na naʼünüükana. *
-
Mayaainjeʼe nütkaain Maleiwa namaa na cananeokana, nnojotsü nuʼutüin aaʼin Rahab sümaa süpüshi
NIYOUKTA ACHIKIT MALEIWA OUKTÜIN WAYUU. Nia kanainjeejachika Maleiwa tü kataakalü oʼu ooʼulaka nia kakumalaka wayuu süpüshuaʼa (Salmo 36:9). Niyoukta achikit Maleiwa ouktüin wayuu. Eesia wayuu mojulaasüirua maʼin jee achajaaka sukuwaʼipa süpüla noʼutüin saaʼin wayuu (Salmo 37:12, 14). Eeirü atkawaa nuuʼulaaka Maleiwa süpüla najaʼlajeʼerüin tü mojulaasükalüirua. Amülialaapejeʼe naaʼin Maleiwa naalii na naʼünüükana na israeliitakana otta nnojoishi nia aashichijaamaatüin namüin, sutuma tia nnojoishii nüjütamaatüin na israeliitakana sünain ashutaa saaʼu naʼünüü (Salmo 86:15). Naashin Jeʼwaa, aluwataainjana palajana nanüiki na israeliitakana namüin na naʼünüükana süpüla eeinjatüin anajirawaa (Deuteronomio 20:10-13). Anuu nünüiki Maleiwa: «Nnojotsü anain taaʼin sükajee ouktüin wanee wayuu kaainjarai, shia anaka atuma taaʼin niyaawajaale wanee wayuu suulia naainjala otta ayatüle katüin noʼu» (Ezequiel 33:11, TNM; 14-16). *
Wekirajaaitpa anain nnojoluin niyouktapuʼuin Maleiwa tü atkawaa eejatkat paala sümaiwa süpüla sajaʼttinnüin tü mojulaasükalüirua. Niapajaʼa Jeʼwaa aneekaka joujainjanain noʼunüin na wayuukana sünain wanee atkawaa jee jaraliinjanain oʼunüin. Tü nütkaakalü aaʼujee Maleiwa, nnojotsü shiain süka kamaʼüralin nia otta nnojoishi müin jameekai naaʼin süpüla nuʼutüin naaʼin na nüʼünüükana; üttüsü naaʼin Maleiwa sünain tü mojulawaakat saashin tü Wiwüliakat (Salmo 11:5). ¿Aʼwanajaasüche tü jülüjakat naaʼin Maleiwa süchiki tü atkawaakat soʼu yaajachin Jesucristo yaa mmapaʼa?
^ püt. 7 Nüküjüin Maleiwa namüin na israeliitakana sünain nnojoluinjanain nashutüin naaʼu na amalequitakana jee na cananeokana. Shiasaʼa sutuma macheʼein na israeliitakana, akanajuushii naya (Números 14:41-45). Wainma juya süchikijee tia, oʼunüshi Josías sünain wanee atkawaa mayaainjeʼe nnojolin nüjünalain nia Maleiwa. Saaʼujee tia, ouktüshi nia (2 Crónicas 35:20-24).
^ püt. 8 Wanaa sümaa nashutüin na israeliitakana naaʼu na cananeokana, nnojoishii aluwataain nanüiki süpüla eeinjatüin wanee anajirawaa namaa süka sülatüitpain maʼaka 400 juya süpüla nayaawajaain na cananeokana suulia naainjala. Sutuma mojulaajüin maʼin naya, ajaʼlajeʼennüshii (Génesis 15:13-15; 15:16, TNM). Eepejeʼe waneeinnua cananeo ayaawajaakana suulia naainjala, müshiijeseʼe nnojoluin noʼutünüin aaʼin (Josué 6:25; 9:3-27).
