Nuuntuin naaʼinrüin Maleiwa wainma kasa sükajee tü nüpülainkat (Miqueas 3:8, Lucas 1:35). Nikeraajüin Maleiwa süpüshuaʼa tü keeʼireekat naaʼin sükajee tü nüpülainkat (Salmo 104:30; 139:7).

 Tü pütchikat rúaj suluʼu hebreo otta pnéuma suluʼu griego, eesü shiale saashajaain achiki tü nüpülainkat Maleiwa (Génesis 1:2). Tü pütchikat rúaj otta pnéuma eesü kojuyale sukuwaʼipa, maʼaka saaʼin tüü:

•   Asanalawaa aaʼin (Habacuc 2:19; Alateetkat Mapeena 13:15, TNM).

•   Joutai (Génesis 8:1; Juan 3:8).

•   Tü katakalü atuma soʼu wayuu jee mürüt (Job 34:14, 15).

•   Tü nukuwaʼipakat wanee wayuu (Números 14:24).

•   Na meʼrujusaliikana maʼaka naaʼin Maleiwa jee na aapieekana (1 Reyes 22:21; Juan 4:24).

 Wanaawasü süpüshuaʼa tia, süka jamüin, nnojoluin süpüla shiʼrüin shia wayuu. Sütüjaapejeʼe saaʼu wayuu eein shia sutuma tü kasa eekat sünainjee. Tü nüpülainkat Maleiwa «müsü aka saaʼin tü joutaikat, meʼrujusat shia, nnojotsü süpüla saapaanüin jee wainma tü kasa naaʼinrakat Maleiwa sükajee» (Diccionario expositivo de palabras del Antiguo y del Nuevo Testamento exhaustivo, de William E. Vine).

 Saashin tü Bibliakat müsü aka saaʼin «najapü» Maleiwa tü nüpülainkat (Salmo 8:3; 19:1). Nuuntuin wanee wayuu naaʼinrüin wainma kasa süka najapü. Müshia neʼe chi Maleiwakai, nuuntuin naaʼinrüin wainma kasa sükajee tü nüpülainkat, maʼaka saaʼin tüü:

•   Nukumajüin tü kasakalüirua chaa iipünaa jee yaa mmoluʼu (Salmo 33:6; Isaías 66:1, 2).

•   Nüshajirüin tü Bibliakat (2 Pedro 1:20, 21).

•   Nükaalinjain na aʼyataakana nümüin sümaiwa paala süpüla naküjain pütchi jee naainjain kasa pülasü (Lucas 4:18, 19; Aluwataaushikana [Hechos] 1:8; 1 Corinto 12:4-11).

•   Nükaalinjain na wayuu oonookana sümaa nünüiki süpüla nashatüinjatüin nukuwaʼipa Maleiwa (Galacia 5:22, 23).

Tü sümakat tü Bibliakat süchiki tü nüpülainkat Maleiwa

 Saashin tü Bibliakat müsü aka saaʼin «najapü» jee «nujuula» Maleiwa tü nüpülainkat (Éxodo 15:8, 10). Eesü süpüla naaʼinrüin wanee wayuu wainma kasa süka najapü. Akaataajaʼa neʼe chi Maleiwakai, eesü süpüla naaʼinrüin wainma kasa sükajee tü nüpülainkat, jama müin aka saaʼin najapü shia (Lucas 11:13). Saashin tü Bibliakat nnojotsü müin aka naaʼin Maleiwa tü nüpülainkat, shia tü naaʼinrakalü akajee wanee kasa, shia tü naapakat nümüin wanee wayuu süpüla kanoulainjachin nia jee süpüla nütüjaainjatüin saaʼu tü nünüikikat (Isaías 44:3; Aluwataaushikana 6:5, TNM; 2 Corinto 6:6).

 Ashajünüsü suluʼu tü Bibliakat Jehováin nünülia Maleiwa otta Jesúin nünülia chi nüchonkai, nnojotpejeʼe aküjünüin kanüliain tü nüpülainkat Maleiwa (Isaías 42:8; Lucas 1:31). Jamüshijaʼa Esteban, chi nikirajüinkai Jesús, niʼrüin chi Maleiwakai nümaa Jesús chaa iipünaa. Müsü tü Bibliakat nüchiki: «Niirakaaka Esteban chaa sirumatuʼumüin, niʼrakalaka Maleiwa sümaa jorottuin maʼin nia jee müshia Jesús yaa nikialuʼujee Maleiwa. Niʼrüin tia süka eejatüin tü nüpülainkat Maleiwa naaʼu» (Aluwataaushikana 7:55, TNM). Niʼrüin Esteban tia süka eejatüin tü nüpülainkat Maleiwa naaʼu.

 Nanoujaka anain waneinnua wayuu: Eeshii wayuu eekai nanoujain sünain tü Trinidad münakat. Naashin nayakana apünüinshi Maleiwa suluʼu waneeshiain nia. Shia süküjeeka achiki tia waneirua Biblia suluʼu 1 Juan 5:7, 8, maʼaka saaʼin tü Bibliakat Torres Amat otta Reina-Valera.

 Tü shiimainkat: Müsü sünüiki 1 Juan 5:7, 8 suluʼu tü Bibliakat Torres Amat: «Apünüinshii na aküjakana pütchi chaa iipünaa: chi Nüshikai, tü Pütchikat otta chi kanüliakai espíritu santo. Na apünüinshiikana, waneeshia neʼe naya otta aküjashii pütchi saaʼu tü mmakat». Nayaawata aaʼu waneinnua wayuu ekirajaakana süchiirua tia, nnojoluin nüshajüin Juan tü pütchi makat mayaa: «chi Nüshikai, tü Pütchikat otta chi kanüliakai espíritu santo. Na apünüinshiikana, waneeshia neʼe naya otta aküjashii pütchi saaʼu tü mmakat». Pütchikat tia, akooʼomüinjuushi neʼe, müsüjeseʼe nnojoluinjatüin süshajünüin suluʼu tü Bibliakat. Anuu nünüiki Bruce M. Metzger, wanee wayuu ekirajaakai süchiirua sukuwaʼipa tü Bibliakat: «Nnojotsü nüshajalain Juan pütchikat tüü otta nnojotsü anain süshajünüle suluʼu tü Bibliakat» (Un comentario textual al nuevo testamento griego).

 Nanoujaka anain waneinnua wayuu: Woutiisapa wanee wayuu naaʼinrüin shia naaʼu chi kanüliakai espíritu santo, müshijeseʼe naatain nia nuulia Maleiwa naashin.

 Tü shiimainkat: Ashajünüsü suluʼu tü Bibliakat alijunaikiruʼu tü pütchikat «en el nombre de» süpüla shiyaawatünüin aaʼu saapünüin laülawaa nümüin wanee wayuu jee naaʼinrüinjatüin wanee kasa eʼitaanakat najapuluʼu (Deuteronomio 18:5, 19-22; Ester 8:10). Woutiisakaʼa wanee wayuu saaʼu nüpülain Maleiwa shia süka niyaawatüin saaʼu wainmain kasa eeka süpüla naaʼinrüin Maleiwa sükajee (Mateo 28:19).

 Nanoujaka anain waneinnua wayuu: Naashin na wayuukana, nanoujapuʼu anain na nikirajüinkana Jesús namaa na aluwataaushikana naatain nuulia Maleiwa tü nüpülainkat.

 Tü shiimainkat: Nnojotsü ashajünüin tia suluʼu tü Bibliakat otta nnojotsü pansaain shia sümaa tü namakat na wayuu ashajakana süchiki kasa alatüirü. Ashajünüsü suluʼu Encyclopædia Britannica, shiain anoujünüin anainjee naatain tü nüpülainkat Maleiwa nuulia sutuma tü aküjünakat sünain tü outkajawaa kanüliakat Concilio de Constantinopla, soʼu juyakat 381 soʼu wakalia. Tia outkajawaakat, aainjünüsü 250 juya süchikijee outuin napüshuaʼa na aluwataaushikana.