2 Pedro 2:1-22
2 Upéicharamo jepe, yma oĩ haguéicha proféta japu Ñandejára puévlo apytépe, oĩta avei mboʼehára japu pende apytépe.+ Koʼãva ñemihaitépe omoñepyrũta umi sékta oporohundíva, ha hiʼarive orrechasáta hikuái pe ijára ojogua vaʼekuépe chupekuéra.+ Ha ojapo haguére upéicha, pyaʼeterei oñehundíta chupekuéra.
2 Avei oĩta heta haʼekuéraicha notĩriva hembiapo vai hag̃ua,*+ ha ikausarekuéra oñeñeʼẽ vaíta+ Ñandejára rapére.
3 Avei haʼekuéra ijapúta peẽme oipota tarovaitégui umi mbaʼe chupekuéra okonvenívante.* Péro pe kastígo chupekuéra g̃uarã ymaitereíma ojedesidi hague,+ ha upéva naimbeguéi hína, ha katuete oñehundíta chupekuéra.+
4 Añetehápe Ñandejára noponderái vaʼekue okastiga hag̃ua umi ánhel opeka vaʼekuépe,+ ha opoi chupekuéra pe Tártarope,*+ ha oenkadena chupekuéra* iñypytũetereihápe opyta hag̃ua upépe ojehusga peve chupekuéra.+
5 Haʼe noponderái vaʼekue avei okastiga hag̃ua pe múndo yma guarépe,+ péro osalva Noépe, haʼe ningo opredika vaʼekue umi mbaʼe ihústova.+ Ha osalva avei Noé ndive 7 persónape+ oguerúrõ guare pe dilúvio ko múndo henyhẽvape hénte añágui.+
6 Ñandejára okastiga avei ohapypaitévo umi siuda de Sodoma ha Gomorra, ha ikusugue opyta,+ ha péicha ohechauka mbaʼépa ohaʼarõ umi hénte añáme.+
7 Haʼe osalva Lótpe, peteĩ kuimbaʼe ihústova,+ haʼe ningo oñekevrantaiterei vaʼekue umi hénte aña notĩri haguére hembiapo vai hag̃ua*
8 (pórke ko kuimbaʼe ihústova ohecha ha ohendu umi mbaʼe vai ojapóva umi hénte aña oiko aja ijapytepekuéra, ha upéva okevrantaiterei chupe* káda día).
9 Upéicharõ, Jehová* oikuaa mbaʼéichapa osalváta jejopy vaígui umi hénte oadorávape chupe ipyʼaite guive,+ péro ohejáta ohundi* hag̃ua umi hénte iñinhústovape pe huísio árape.+
10 Koʼýte ojapóta upéva umi oikóvare orekose rrelasión sexuál ótrondi omongyʼa hag̃ua chupekuéra,+ ha umi oapoʼívare umi autoridápe.*+
Umíva ningo hovaʼatã ha ikaprichóso, haʼekuéra ndokyhyjéi oñeʼẽ vai hag̃ua umi Ñandejára omombaʼévare.
11 Umi ánhel katu imbareteve ha ipoderosovéramo jepe, noñeʼẽvaíri hesekuéra orrespeta rupi Jehovápe.*+
12 Péro koʼã kuimbaʼe ojogua umi animál onase vaʼekuépe ojejagarra ha oñehundi hag̃uánte, haʼekuéra oiko oñeʼẽ vai umi mbaʼe oikuaaʼỹvare.+ Ñandejára ohundíta chupekuéra umi mbaʼe vai ojapo vaʼekuére,
13 péicha ojeperhudika hikuái ijupe voi ojekastiga rupi hembiapo vaikuére.
Haʼekuéra ningo ovyʼaiterei oñemeʼẽgui de diakuépe jepe umi deséo vai orekóvape.+ Haʼekuéra ojogua umi máncha omongyʼávape pe kongregasión, haʼekuéra ovyʼaiterei ombotavy jave ótrope omboʼévo umi enseñánsa japu oĩ aja penendive vyʼápe.+
14 Haʼekuéra ningo oporomoakãratĩseterei,*+ ha ndaikatúi voi oheja ipekadokuéra, ha ombotavy umi ijerovia kangývape.* Ikorasõnguéra henyhẽ taryrýigui,* ha Ñandejára okastigáta chupekuéra.
15 Haʼekuéra oheja pe tape porã ha oho tape vaíre, oho hikuái Balaam+ rapére, haʼe hína Beor raʼy. Haʼe ojapo vaʼekue ivaíva, pórke oipotaiterei ojepaga chupe.+
16 Péro Balaámpe ojekorrehi hembiapo vaikuére.+ Peteĩ vúrro oñeʼẽʼỹva oñeʼẽ vaʼekue chupe yvypóraicha, ha oñehaʼã ojoko pe proféta tavyraípe.+
17 Koʼãva ningo ojogua ykua hypa vaʼekuépe, arai ojeguerahávape ápe ha pépe oĩ jave torménta vai, ha ojeheja chupekuéra g̃uarã peteĩ lugár hũ vera ha iñypytũetereíva.+
18 Haʼekuéra ningo heʼi umi mbaʼe tuichaitereíva guaʼu, péro ndovaléiva mbaʼeverã. Ha notĩri hikuái hembiapo vai hag̃ua* ha omomýi umi héntepe oreko jey hag̃ua umi deséo vai,+ ha omboliga chupekuéra ojapo hag̃ua umi mbaʼe vai, ramoiténte oheja vaʼekue.+
19 Koʼã mboʼehára japu opromete chupekuéra liverta, péro haʼekuéra voi oiko hína pekádo esklávoramo.+ Pórke oĩramo ohejáva odomina chupe ótra persóna, oiko chugui upe persóna esklávo.*+
20 Péro umi persóna ojapo jeýramo umi mbaʼe vai ha odomina chupekuéra umíva,+ ivaivéta la isituasión yma oikuaa mboyve guarégui umi enseñánsa añeteguáva.+
21 Pórke iporãvéta kuri chupekuéra ndoikuaaporãinterire pe tape porã, ha ani la oikuaa rire ohejaite hikuái Ñandejára léi orresivi vaʼekue.+
22 Upe oikóva hesekuéra ohechauka siertoha upe ñeʼẽnga heʼíva: “Pe jagua hoʼu jey ivomitokue, ha pe kure ojahupa vaʼekue ojapajeréi jey tujúpe”.+
Nóta
^ Térã: “itaryrýigui”.
^ Ikatu avei: “opoi chupekuéra yvykuápe”.
^ Térã: “hiʼálmape”.
^ Griégope: “oikytĩ”.
^ Térã: “umi oporomoakãvape”.
^ Térã: “hesakuéra henyhẽ ñemoakãratĩgui”.
^ Térã: “umi álma ipyʼamokõivape”.
^ Térã: “Ikorasõnguéra oñentrenáma itaryrýi hag̃ua”.
^ Térã: “ipuʼakáva hese álgo, oiko chugui upéva esklávo”.
