Eclesiastés 12:1-14
12 Upévare, nemitã aja nemanduʼa vaʼerã nde Apohare Ijojahaʼỹvare.+ Rejapo vaʼerã upéva og̃uahẽ mboyve pe tiémpo ijetuʼúva.+ Umi áño og̃uahẽ vove reikótama ere: “Ndaigustovéima chéve mbaʼeve”.
2 Nemanduʼákena Ñandejárare ohesape aja gueteri pe kuarahy, pe jasy ha umi estrélla,+ oñepyrũ mboyve ama tiémpo, pórke upéi tódo el día ijaraipáta ha okýta.
3 Upe tiémpope umi guárdia oñatendéva pe ógare oñepyrũtama oryryipa. Umi kuimbaʼe imbaretéva katu ikarẽtama. Ha umi kuña omolináva saʼipaitétama ha upévare nombaʼapomoʼãvéima. Ha umi kuñakarai omañáva ventánarupi ndohechamoʼãi mbaʼeve iñypytũmba rupi.+
4 Upe tiémpope, pe óga rokẽ oñembotýtama, ha pe molíno apenamíntema oñehendúta. Upérõ umi guyraʼi opuraheiʼimítante ha pe persóna ndaikatumoʼãvéima oke. Ha mbeguemíntema ohendúta umi músika pu rory.*+
5 Avei okyhyjétama pe altúragui, ha umi pelígro oĩva pe kállere oipyʼapýta chupe. Upérõ pe alméndro ipotýta,+ ha umi tuku otyryrýta. Upéi mbaʼevéma* ndoʼusemoʼãi. Haʼe oho hína pe lugár opytuʼutahápe heta tiémpore,+ ha umi oñelamentáva oho avei pe kállere.+
6 Nemanduʼákena Ñandejárare pe pióla de pláta oso mboyve, pe mbaʼyru de óro ha pe kambuchi oĩva pe ykua kóstare ojeka mboyve. Nemanduʼa vaʼerã hese oñehundi mboyve pe rrondána ojepurúva pe pósope.*
7 Upéi pe persóna ojejapo vaʼekue yvýgui oiko jey chugui yvy rei.+ Ha pe fuérsa omoingovéva chupe* oho jey Ñandejárape, haʼe voi ningo pe omeʼẽ vaʼekue chupe upéva.+
8 Pe mboʼehára*+ heʼi: “¡Pe vyrorei tuichavéva! Entéro mbaʼe ningo vyrorei”.+
9 Pe mboʼehára ndahaʼéi iñarandúnteva síno avei omboʼe umi héntepe umi mbaʼe oikuaáva guive.+ Haʼe ojepyʼamongeta, oinvestiga, ombyatypaite* ha oskrivi umi konsého porã.+
10 Pe mboʼehára oñehaʼã oipuru umi palávra porã porã, igústova ñahendu+ ha oñehaʼã oskrivi siertogua memete.
11 Umi iñarandúva heʼíva ñandegia peteĩ pikánaicha.+ Ha oñembyatypaitévo umi mbaʼe heʼíva hikuái, haʼete klávo oĩ hatã porãva, ndojeíriva péicha péichante. Entéro koʼã konsého porã, omeʼẽ peteĩ pastór añónte.
12 Che raʼy, haʼese ndéve ótra kósa: umi hénte oskrivi heta lívro, upéva núnka ndopamoʼãi. Péro nde nekaneʼõitereíta reikóramo tódo el día relee umíva.+
13 Jahecha rire entéro koʼã mbaʼe, peteĩ mbaʼénte la iñimportánteva: rerrespeta vaʼerã Ñandejárape+ ha ejapo imandamiénto heʼíva.+ Péva hína pe ovligasión entéro persóna orekóva.+
14 Pórke Ñandejára ohusgáta enterovépe umi mbaʼe ojapo vaʼekuére. Haʼe heʼíta oimépa oĩ porã térã oĩ vai pe jajapo vaʼekue ñemiháme jepe.+
Nóta
^ Hebréope: “músika membykuéra”.
^ Hebréope: “vája de alkapárra”. Péva hína peteĩ frúta ñanemoñembyahýiva.
^ Hebréope: “alhívepe”. Upéva hína yvykua oñembyatyhápe y.
^ Térã: “ijespíritu”.
^ Hebréope: “kongregadór”. Térã: “oporombyatýva”.
^ Térã: “omoĩ en órden”.
