Isaías 3:1-26
3 Ñande Ruvicha Jehová hína umi ehérsito yvagapegua ruvicha,haʼe oipeʼa Jerusalén ha Judágui opa mbaʼe oikotevẽva.
Oipeʼa chuguikuéra tembiʼu ha y.+
2 Avei umi kuimbaʼe ipoderósova ha umi soldádo,hués, proféta,+ adivíno ha umi kuimbaʼe orekóva autorida.
3 Ñandejára oipeʼáta pe héfe de 50,+ pe governánte iñimportánteva, pe konsehéro,pe ikatupyrýva ojapóvo máhia ha pe echiséro vale.+
4 Haʼe omoĩta umi imitãvape ogoverna hag̃ua,umi okambiapa reíva la opensáva omandáta hesekuéra.
5 Umi hénte ojotrata vaíta,omaltratáta hikuái hapichápe,+umi imitãva opuʼãta umi ijedávare,ha pe ndahaʼéiva mbaʼeve odesafiáta pe orekóvape autorida.+
6 Káda uno ojagarráta iñermánope hógape ha heʼíta:
“Nde ningo nde ao porã, emandána orerehe.
Eñenkarga ko siuda oñehundipa vaʼekuére”.
7 Péro haʼe heʼíta upe díape:
“Ko puévlo ningo hasypaite, mbaʼe piko che aikóta aipohãno umi erída.
Che namandamoʼãi ko puévlore,che rógape ndarekói mbaʼeve haʼu vaʼerã ni ndacheaói”.
8 Péicha oikóta pórke Jerusalén oho tape vaíre,Judá katu hoʼáma voi.
Umi mbaʼe ojapóvare ha heʼívare ohechauka hikuái oñemoĩha Jehová kóntrape.
Ñandejára ningo tuichaiterei, ha henondépe haʼekuéra ojapo ivaíva ha péicha odesafia chupe.+
9 Hovarekuéra ningo ojekuaa ojapoha ivaíva.
Otĩ rangue la ojapóvare,oiko omombeʼu mbaʼeveʼỹrõguáicha umi hénte Sodomapeguáicha.+
Haʼekuéra voi ojeperhudika ha heta ohasa asýta.
10 Péro umi ihústovape peje vaʼerã oho porãtaha chupekuéra.
Oñemyengoviáta chupekuéra umi mbaʼe porã ojapo vaʼekuére.+
11 Umi iñañávape katu ojehúta heta mbaʼe vai,oúta hiʼári heta provléma.
Ojerepa jeýta hesekuéra umi mbaʼe vai ojapo vaʼekue.
12 Che puévlope umi orekóva autorida otrata vai umi héntepe,ha kuñanguéra omanda hesekuéra.
Umi governánte ningo la pendegueraha vaipáva,haʼekuéra pendegueraha tape vaíre.+
13 Jehová oñemboʼýma opresenta hag̃ua ikáso,haʼe opuʼãma ohusga hag̃ua ipuévlope.
14 Jehová ohusgáta umi governánte ha umi orekóvape autorida ipuévlope.
Haʼe heʼíta chupekuéra: “Peẽ pehapy che parralty,*
pemonda umi imboriahúvape, ha pegueraha pende rógape ikosakuéra”.+
15 Jehová hína umi ehérsito yvagapegua ruvicha ha Ñandejára ogovernáva opa mbaʼe,haʼe heʼi: “¿Mbaʼéicha piko peñanima pemaltrata che puévlope? Peẽ ningo petrata vaieterei umi osufrívape”.+
16 Jehová heʼi avei: “Umi mitãkuña Siongua ijejapo,nopyrũmbái ha yvaténte voi omaña ohóvo,ha omaña lájare ojekuaa ohekaha umi kuimbaʼépe.
Oguata koni koni ombohyapu hag̃ua umi itovilléra.
17 Che hína Jehová, ha akastigáta umi mitãkuña Sionguápe, umi iñakã opytáta ikurupa.
Che hína Jehová, ha amoakã perõta chupekuéra.+
18 Che hína Jehová, ha aipeʼáta chuguikuéra umi tovilléra porã porã,umi sínta omoĩva iñakãre ha umi adórno* omoĩva ijehe,+
19 umi namichãi, pulséra ha ivelokuéra.
20 Aipeʼáta chuguikuéra umi téla porã porã omoĩva iñakãre, umi kadenaʼi orekóva itovilléra, isínto,iperfumekuéra ryru ha iñamuléto.
21 Avei umi namichãi omoĩva itĩre ha umi kuãirũ,
22 ivestidokuéra oipurúva fiestahápe, umi ijao joʼaha, imánto ha ikartéra,
23 umi ijespehoʼi,+ ijao de líno,umi turvánte* ha umi vélo.
24 Oñehetũ rangue umi mitãkuñáre aséite perfumádo,*+ hyakuã vaíta hikuái, itujupávaicha.
Omoĩ rangue peteĩ sínto, orekóta ijehe peteĩ pióla.
Oreko rangue umi peinádo porã porã, iñakã perõta hikuái.+
Oreko rangue umi ao hepýva, omoĩta hikuái ao ohechaukáva oñembyasyha.+
Ojehecha rangue iporãha hikuái, ojekuaáta hesekuéra peteĩ márka ojejapóva iérro akúpe.
25 Umi kuimbaʼe oikóvape ko siudápe ojejukáta espádape,ha umi soldádo ipoderósovape ojejukáta gerrahápe.+
26 Pe siuda entráda oñembyasýta ha oñelamentáta,+haʼetéta peteĩ kuña ojepeʼapáva chugui ikosakuéra ha oguapýva pe yvýpe”.+
