Isaías 44:1-28
44 “Jacob, nde ningo che siérvo.
Israel, ndéve che roiporavo vaʼekue. Koʼág̃a aipota cherendumi.+
2 Che ningo Jehová nde Apohare,che hína upe nemoldea vaʼekue,+añangareko nderehe renase guive.*
Che haʼe ndéve: ‘Ani rekyhyje che siérvo Jacob.+
Jesurún,*+ ndéve che roiporavo vaʼekue.
3 Che ameʼẽta y umi ijuhéivape,*+
ha umi lugár isekohárupi osyrýta peteĩ arrójo.
Ameʼẽta che espíritu ne familiakuérape,+avendesíta ne desendiéntepe.
4 Okakuaáta hikuái umi kapiʼipe vérde asýicha,+ojoguáta umi álamo máta oĩvape umi arrójo kóstare.
5 Oĩta heʼíva: “Che ningo Jehová mbaʼe hína”.+
Ótro heʼíta heraha Jacob,ótro katu oskrivíta ipóre: “Che Jehová mbaʼe hína”.
Oĩta oñembohérava Israel’.
6 Che ningo Jehová, ha che hína Rréi Israélpe,+ che apaga agueru jey hag̃ua che puévlope.+
Che hína Jehová, umi ehérsito yvagapegua ruvicha, ha che haʼe:
‘Che hína pe primero ha pe último,+ndaipóri ótro Dios cheichagua.+
7 ¿Oĩ piko ótro ikatúva oñekompara cherehe?+
Taipyʼaguasúna ha toñeʼẽ, topresentána pruéva ohechauka hag̃ua siertoha upéva.+
Tomombeʼu umi ótro dios umi mbaʼe oikótava koʼẽrõitémaha umi mbaʼe oikótava amo gotyove,che ajapo haguéicha aikóvo yma ajapo ypy guive che puévlope.
8 Peẽ che puévlo, ani pekyhyje,ani pepyta peryrýi pesusũ.+
Che ningo káda únope amombeʼu umi mbaʼe ajapótava.
Peẽ hína che testígo.+
¿Oĩ piko ótro Dios cheichagua?
No, ndaipóri. Ndaipóri ótro Ita Guasu ikatúva pendeprotehe.+ Che aikuaa porã ndaiporiha ótro’”.
9 Enterove umi ojapóva taʼanga ndahaʼéi mbaʼeve.
Umi mbaʼe haʼekuéra omombaʼeguasúva ndaideprovéchoi avavépe.+
Umíva ndohechái ni ndoikuaái mbaʼeve,+ upévare ndoikomoʼãi testigorã.
Enterove persóna ojapóva umi taʼanga, oñemotĩta.+
10 Mbaʼevépe ndaideprovéchoipe ojapóva dios térã taʼanga de metál.+
11 Haʼe ha enterove iñirũnguéra oñemotĩta.+
Umi ojapóva umi taʼanga ningo yvypóra rei.
Enterove toñepresenta ha toñemboʼy ilugárpe,haʼekuéra okyhyjéta ha oñemotĩta.
12 Pe erréro omoĩ pe iérro tatápeha oipuru iñerramiénta ombaʼapo hag̃ua hese,upéi ijyva imbaretévape omoldea pe iérro martíllope ha oñepyrũ ojapo pe taʼanga.+
Upéi oñepyrũ iñembyahýi ha ikangy,ndoyʼuvéi ha ikaneʼõ.
13 Pe artesáno ombaʼapóva madérare, oipyso pe madéra ári pe piolín omedi hag̃ua, upéi odivuha tísa pytãme.
Upéi oipuru pe eskofína omoldea hag̃ua, ha omarka ohóvo peteĩ erramiéntape.*
Omoldea pe yvyra ojogua peve peteĩ kuimbaʼépe,+pe taʼanga ojogua peteĩ persónape ha iporãiterei la itraváho.
Upéi ojegueraha oñemoĩ hag̃ua peteĩ témplope.*+
14 Oĩ avei peteĩ oitýva umi sédro máta.
Haʼe oho oiporavo peteĩ yvyramáta,peteĩ rróvle máta, ha oheja okakuaa imbarete porã peve pe kaʼaguýpe.+
Haʼe oñotỹ peteĩ laurél máta, upéi pe ama omongakuaa chupe.
15 Upéi upe yvyramáta ojepuru jepeʼarã.
Pe kuimbaʼe oipuru michĩmi ojepeʼe hag̃ua,ha avei oñekosina hag̃ua.
Péro avei pe yvyrágui ojapo peteĩ taʼanga ha oñesũ henondépe,ojapo chugui peteĩ dios ha oadora chupe.+
16 Upe yvyramátagui alamita oipuru jepeʼarã,upévape haʼe ombojy la isoʼo ha hoʼu hyg̃uatãha meve.
Avei oipuru pe yvyra ojepeʼe hag̃ua ha heʼi:
“Igustoite koʼápe tata ypýpe. Cherete aku porã amaña aja pe tatarendýre”.
17 Upe hembývagui ojapo peteĩ taʼanga ha oñesũ henondépe,ojapo chugui peteĩ dios ha oadora chupe.
Oñemboʼe chupe ha heʼi:
“Chesalvamína, nde ningo che jára”.+
18 Umi hénte ndoikuaái ha nontendéi mbaʼeve,+hesakuéra oñemboty ha ndohechái mbaʼeve,haʼekuéra* ndopillái mbaʼeve.
19 Avave ndojepyʼamongetái, ndoikuaái ha nontendéi mbaʼeve.
Upévare nopensái péicha:
“Peteĩ pedáso upe yvyrágui aipuru ajepeʼe hag̃ua.
Upéi ajapo pan ha ambojy che soʼo.
¿Aipurúta piko upe hembýva ajapo hag̃ua peteĩ mbaʼe ñanembojeguarúva?+
¿Aikóta piko amombaʼeguasu peteĩ yvyra pedáso?”.
20 Upe persónape oñembotavy,ha haʼe oheja ikorasõ ogueraha vai chupe, haʼete hoʼúva tanimbu rei.
Upe persóna ndaikatumoʼãi ojesalva ni ijupe.* Haʼe nopensái ha ndeʼíri:
“Che pópe areko peteĩ mbaʼe ndovaléiva mbaʼeverã”.
21 “Jacob, nemanduʼákena koʼã mbaʼére,Israel, ani nderesarái.
Nde ningo che siérvo, che rojapo vaʼekue.+
Che ndacheresaraimoʼãi ndehegui che siérvo Israel.+
22 Avorráta umi ne rembiapo vaikue ha nde pekadokuéra avei.
Ha aipurúta peteĩ arai amoʼã hag̃ua umíva.+
Eju jey che rendápe, che apagáta rogueru jey hag̃ua.+
23 Yvágape tojesapukái vyʼágui,pórke Jehová okumplíma la heʼi vaʼekue.
Tosapukái vyʼágui enterove oĩva ko yvy ape ári.
Tosapukái vyʼágui umi montáña,+pe kaʼaguy ha entéro umi yvyramáta,pórke Jehová opagáma ogueru jey hag̃ua Jacóbpe.
Israélpe ojehecháta Ñandejára podér tuichaitéva”.+
24 Che hína Jehová, ha che apagáma rogueru jey hag̃ua.+
Che rojapo vaʼekue nde sy retepýpe.
Upévare che haʼe ndéve:
“Che hína Jehová, pe ojapo vaʼekue opa mbaʼe.
Che aipyso pe yvága peteĩ télaicha,+ ha ajapo* avei ko yvy.+
¿Oĩ piko raʼe chendive álgien chepytyvõ hag̃ua?
25 Che ndahejái oñekumpli umi proféta japu* heʼíva,che ahechauka umi adivíno itavyha.+
Umi iñarandúva oñekonfundipa, che voi akonfundipa chupekuéra.
Che ahechauka vyroreiha umi mbaʼe oikuaáva hikuái.+
26 Che añenkarga oñekumpli hag̃ua umi mbaʼe heʼíva che siérvo,ha umi che mensahéro omombeʼúva che katuete akumpli.+
Che haʼe Jerusalén rehe: ‘Upe siudápe ojeiko jeýta’,+
che haʼe umi siuda oĩvare Judápe: ‘Umi siuda oñemopuʼãta,+ha che añenkargáta oñemyatyrõ jey hag̃ua’.+
27 Che hína upe heʼíva umi y ipypukúvape: ‘Kóva hypa vaʼerã,che ambosékota umi rrío’.+
28 Che hína upe heʼíva Ciro+ rehe: ‘Haʼe hína pe pastór che aiporavo vaʼekue,haʼe ojapopaitéta umi mbaʼe che aipotáva’.+
Che hína upe heʼíva Jerusalén rehe: ‘Ko siuda oñemopuʼã jeýta’,
ha pe témplore katu haʼe: ‘Isimiénto ojekoloka porãta’”.+
Nóta
^ Hebréope: “nde sy ryépe”.
^ Heʼiséva: “Upe hekojojáva”. Peteĩ título oñemoĩva Israélpe oñemombaʼe hag̃ua chupe.
^ Térã: “yvy isékovape”.
^ Hebréope: “ógape”.
^ Térã: “kompáspe”.
^ Hebréope: “ikorasõnguéra”.
^ Térã: “osalva hiʼálma”.
^ Hebréope: “aipyso”.
^ Hebréope: “ñeʼẽ rei”.
