Jeremías 17:1-27
17 “Judá pekádo ojeskrivi punsón* de iérrope.
Peteĩ erramiénta orekóva púnta de diamántepe ojeskrivi ikorasõre,ha umi vaka ratĩ joguaháre oĩva umi ijaltarkuérare.
2 Upe aja katu umi itaʼyrakuéra imanduʼa umi ijaltarkuérare ha umi póste sagrádore,+peteĩ yvyramáta guasu ypýpe, umi sérro yvate ári,+
3 ha umi ñúme umi montáña ári.
Ahejáta oñemondapaite ndehegui umi mbaʼerepy reguerekóva, kompletoite umi nde tesóro.+
Ojesakeáta avei ndehegui umi nde lugár yvate, umi nde pekádo káusare rejapo vaʼekue nde território tuichakuére.+
4 Ha ndejeheguiete rentregáta pe erénsia ameʼẽ vaʼekue ndéve.+
Ha ahejáta reservi umi ne enemigokuérape peteĩ yvy reikuaaʼỹvape,+pórke peẽ chembopochy, ha tatáicha pemyendy che pochykue,*+
ha hendýta kontinuadoite”.
5 Péicha heʼi Jehová:
“Toñemaldesi pe kuimbaʼe* ojeroviávape yvypóra reírente,+ha okonfiáva yvypóra podér rehe,+ha ikorasõ oñemomombyrýva Jehovágui.
6 Oikóta chugui peteĩ yvyramáta oĩva haʼeño rei pe desiértope.
Ndohasamoʼãi mbaʼeve iporãva,síno oikóta umi lugár hakuetereihápe pe desiértope,peteĩ yvy orekóvape heta juky ha avave ndaikatuihápe oiko.
7 Toñevendesi pe kuimbaʼe* ojeroviávape Jehováre,haʼe okonfia hína Jehováre.+
8 Haʼe ojoguáta peteĩ yvyramáta oñeñotỹvape y rembeʼýpe,ha umi hapo oho pe ysyry gotyo.
Noñandumoʼãi ou vove arahaku,síno siémpre hogue vérde asýta,+ha ndoikomoʼãi hese mbaʼeve pe áño séka aja,ha haʼe osegíta hiʼa.
9 Yvypóra korasõ itraisionerove* oimeraẽ mbaʼégui ha ojedesespera* rupi ikatu ojapo oimeraẽ mbaʼe.*+
¿Máva piko oikuaa porãne chupe?
10 Che, Jehová, ahesaʼỹijo hína yvypóra korasõ,+aipyguara hína yvypóra pensamiénto ipypukuvéva,*
apaga hag̃ua káda únope asegún pe hape,asegún umi mbaʼe ojapo vaʼekue.+
11 Pe ynambu oñenoháicha umi ndahaʼéiva hupiʼa ári,péicha hína umi oñemborríkova ombotavy rupi hapichápe.*+
Peteĩ tiémpo rire umi rrikésa ohejapáta chupe,ha ipahápe haʼe opytáta peteĩ ivýrovaramo”.
12 Iñepyrũ guive Ñandejára tróno omimbipáva oñemombaʼeguasu,ha upe tróno hína ñane santuário.+
13 Jehová, nde ningo Israel esperánsa,ha enterove umi ndereja reíva oñemotĩta.
Umi osẽva nde rapégui* réra ojeskrivíta yvýre,+pórke ndereja hikuái Jehová, nde hína upe omeʼẽva pe y oporomoingovéva.+
14 Chemongueramína Jehová, akueraite hag̃ua.
Chesalvamína, upéicharõ ajesalváta,+pórke che ningo ndéve romombaʼeguasu.
15 Oĩ ningo umi heʼíva chéve:
“¿Mbaʼére piko noñekumplíri gueteri Jehová ñeʼẽ?+
¡Toñekumpli katu!”.
16 Péro che ndorohejái, ha siémpre roservi ojapoháicha peteĩ pastór,che ndahechaséi kuri pe día oikotaha sarambi.
Ñandejára, nde reikuaa porã entéro mbaʼe osẽva che jurúgui.
¡Entéro mbaʼe haʼe vaʼekue oĩ ne renondépe!
17 Anína chemongyhyjeterei.
Nde ningo peteĩ lugár isegúro porãva chéve g̃uarã pe oikotaha díape umi mbaʼe vai.
18 Toñemotĩ umi chepersegívape,+péro anína reheja che añemotĩ.
Haʼekuéra tokyhyjeterei opytávo,péro anína chéve chereja akyhyjeterei.
Eguerúna pe día oikotahápe hesekuéra mbaʼe vai,+emonguʼi ha ehundiete chupekuéra.*
19 Péicha heʼi chéve Jehová: “Tereho eñemboʼy pe okẽ prinsipálpe* oike ha osẽhárupi umi rréi de Judá, ha upéi tereho enterove umi okẽ oĩvape Jerusalénpe.+
20 Ere vaʼerã chupekuéra: ‘Pehendu Jehová ñeʼẽ, peẽ rréi de Judá, enterove umi oikóva Judápe, ha enterove umi oikóva Jerusalénpe oikéva koʼã okẽrupi.
21 Péicha heʼi Jehová: “Peñatendéke pendejehe,* ha ani pegueraha mbaʼeveichagua kárga sabadokue ni pemoinge Jerusalén rokẽnguérarupi.+
22 Aníke peguenohẽ mbaʼeveichagua kárga pende rógagui sabadokue, ha ndapejapói vaʼerã mbaʼeveichagua traváho.+ Peguereko vaʼerã sagrádoramo pe sábado, haʼe haguéicha umi pende tuakuéra ypykuépe.+
23 Péro haʼekuéra nohendúi ni nopenái la haʼévare, hovaʼatã ha naiñeʼẽrendúi chéve ha ndohejái akorrehi chupekuéra”’.+
24 ‘Jehová heʼi: “Péro peẽ peneñeʼẽrendúramo chéve opa mbaʼépe, ha napemoingéi mbaʼeveichagua kárga ko siuda rokẽrupi sabadokue, ha peguereko sagrádoramo pe sábado ha ndapejapói mbaʼeveichagua traváho upe díape,+
25 upéicharõ umi rréi ha prínsipe oguapýva David trónope+ oikéta avei ko siuda rokẽnguérarupi. Oikéta hikuái kárro de gérrape ha kavaju ári, umi rréi ha iprinsipekuéra, umi kuimbaʼe Judagua ha umi oikóva Jerusalénpe,+ ha siémpre oĩta oikóva ko siudápe.
26 Ha umi hénte oúta umi siuda de Judágui, umi lugár oĩvagui Jerusalén jerére, Benjamín territóriogui,+ umi yvy ivahovehágui,+ umi montañahágui ha pe Néguebgui,* ha oguerúta hikuái Jehová rógape umi ofrénda ojehapypaitéva,+ umi sakrifísio,+ umi ofrénda de semílla,+ olívano ha umi sakrifísio oagradese hag̃ua Ñandejárape.+
27 Péro peẽ napeneñeʼẽrendúiramo chéve ha ndaperrespetái pe sábado sagrádo, ha pegueraha kárga ha pemoinge Jerusalén rokẽnguérarupi sabadokue, upéicharõ che ambojáta tata umi hokẽnguérare, ha pe tata ohapypaitéta umi tórre isegúro porãva oĩva Jerusalénpe,+ ha ndoguemoʼãi”’”.+
Nóta
^ Ikatu avei: “pórke tatáicha peẽ penerendýma che pochykuépe”.
^ Térã: “kuimbaʼe imbaretéva”.
^ Térã: “kuimbaʼe imbaretéva”.
^ Térã: “ijapuve, oporombotavyve”.
^ Ikatu avei: “naipohãvéima”.
^ Térã: “ipeligróso”.
^ Térã: “umi mbaʼe ipypukuvéva oñandúva”. Hebréope: “umi rriñón”.
^ Térã: “ndaihústoi rupi, ikorrúpto rupi”.
^ Térã: “Umi apóstata opuʼãva nderehe”. Hebréope: “cherehe”, koʼápe amalisia oñeñeʼẽ hína Jehováre.
^ Térã: “ehundi chupekuéra 2 vése”.
^ Hebréope: “umi hénte raʼykuéra rokẽme”.
^ Térã: “pene álmare”.
^ Térã: “pe súrgui”.
