Números 11:1-35
11 Umi israelita oñepyrũ ojeplagea Jehová renondépe ohasa asy haguére. Ha Jehová orrenegaiterei ohendúvo chupekuéra, upévare Jehová ombou hiʼarikuéra tata ha ojuka unos kuánto oĩvape pe kampaménto jerére.
2 Upéi umi hénte ojerure asy Moiséspe oipytyvõ hag̃ua chupekuéra. Upémarõ haʼe oñemboʼe Jehovápe+ ha ndouvéi hiʼarikuéra pe tata.
3 Upéicha rupi upe lugárpe oñembohéra Taberá,* pórke upépe Jehová ombou hiʼarikuéra tata.+
4 Umi extranhéro oĩva ijapytepekuéra+ oñepyrũ opensa ijehénte ha tembiʼúrente voi ojepyʼapy.+ Umi israelita avei oñepyrũ hasẽ jey ha heʼi: “¡Máva piko omeʼẽta oréve soʼo roʼumi hag̃ua!+
5 ¡Rohechagaʼuete ningo umi pira gratiete roʼúmi vaʼekue Egíptope, avei umi pepíno, umi sandía, umi sevollíta de óha,* umi sevói ha áho!+
6 Péro koʼág̃a katu orekangypáma ha ndaigustovéima oréve mbaʼeve. Maná añoitémante la rohecháva koʼárupi”.+
7 Ha pe maná+ ojogua kuratũ raʼỹime+ ha ikolór ojogua yvyra aysýpe.*
8 Umi hénte isarambi ha ombyaty pe maná, upéi oipuru hikuái peteĩ molíno de máno omonguʼi hag̃ua, térã ojoso hikuái peteĩ anguʼápe omonguʼi porã meve. Upéi ombojy hikuái óllape térã ojapo chugui pan apuʼa,+ ha heʼẽngue ojogua pan heʼẽ oñembojeheʼa vaʼekue aséitere.
9 Pyharekue pe serrasón oguapývo pe kampaménto ári, oguapy avei pe maná.+
10 Moisés ohendu umi héntepe hasẽmba, káda família ha káda uno hasẽ hóga renondépe. Jehová katu ipochyeterei+ upévare ha Moisés avei ipochyeterei.
11 Upémarõ Moisés heʼi Jehovápe: “¿Mbaʼére piko chembohasa asyete? ¿Aime vaiete mbaʼe piko ne renondépe ajeve reheja chéve añenkarga ko puévlore?+
12 ¿Ko puévlo piko che memby mbaʼe? ¿Che piko isykuéra mbaʼe ajeve ere chéve: ‘Egueraha chupekuéra nde jyva ári, ku mitãrerekua oguerahaháicha peteĩ mitãraʼýpe’? Ha reipota voi ajapo péicha rog̃uahẽ meve pe yvy repromete vaʼekuépe remeʼẽtaha ituakuéra ypykuépe.+
13 ¿Moõgui piko reipota che anohẽ soʼo ameʼẽ hag̃ua koʼã héntepe? Haʼekuéra osegínte hasẽ chéve ha heʼi joa: ‘¡Emeʼẽ oréve soʼo roʼu hag̃ua!’.
14 Ndaikatumoʼãi aaguanta ko puévlope chejehegui reínte, ndachepuʼakamoʼãi hesekuéra.+
15 Ha la péichante cheguerekótarõ, chejukántemana koʼag̃aite.+ Ha oimérõ aime porã ne renondépe, anivéna epermiti chéve ahecha koʼã mbaʼe vaiete”.
16 Ha Jehová heʼi Moiséspe: “Eiporavo 70 kuimbaʼe umi omoakãva* apytégui, umi kuimbaʼe reikuaáva odirihi ha omoakãha pe puévlope.+ Egueraha chupekuéra pe tavernákulope* ha toñemboʼy hikuái upépe nendive.
17 Che aguejýta+ ha añeʼẽta nendive upépe+ ha aipeʼáta ndehegui michĩmi pe espíritu sánto+ oĩva nde ári ha ameʼẽta chupekuéra. Haʼekuéra nepytyvõta reñenkarga hag̃ua pe puévlore ha ani hag̃ua nde aripaite opyta pe kárga.+
18 Ere vaʼerã pe puévlope: ‘Koʼẽrõ g̃uarã peñesantifika+ vaʼerã Ñandejára renondépe, pórke oñemeʼẽta peẽme la soʼo peʼu hag̃ua. Jehová ohendu kuri penerasẽ+ hague ha peje: “¿Máva piko omeʼẽta oréve soʼo roʼu hag̃ua? Egíptope ningo roiko porãve kuri”.+ Jehová omeʼẽta katuete peẽme la soʼo peʼu hag̃ua.+
19 Peʼúta ndahaʼéi un díante, ni 2 día, ni 5 día, ni 10 día, ni 20 día,
20 síno un mes aja entéro peʼúta la soʼo ha pene tĩnguárupi jepe osẽmbáta, penembopyʼajerepa peve peʼúta,+ pórke perrechasa kuri Jehovápe, oĩva hína pende apytépe. Peẽ peiko kuri avei penerasẽ henondépe ha peje: “¿Maʼerã voi piko ñasẽ raʼe Egíptogui?”’”.+
21 Upépe Moisés heʼi: “Chéngo aime ko puévlope ha ijapytepekuéra oĩ hína 600.000 kuimbaʼe+ ikatúva oho gerrahápe, péro nde ere: ‘¡Ameʼẽta peẽme heta porã la soʼo, ha peʼúta un mes aja entéro!’.
22 Umi ovecha, kavara ha umi vakakuéra oĩva guive oñekarneambáramo jepe, ndohupytypamoʼãi chupekuéra, térã ojepeska ha oñeguenohẽmbáramo umi pira oĩva guive pe márpe, ndohupytypamoʼãi avei chupekuéra”.
23 Upémarõ Jehová heʼi Moiséspe: “¿Nde piko reimoʼã Jehová ndaikatumoʼãiha mbaʼe ojapo upéva?+ Koʼág̃a rehecháta oñekumplípa la haʼe vaʼekue ndéve térãpa nahániri”.
24 Upéi Moisés osẽ ha omombeʼu pe puévlope mbaʼépa heʼi Jehová. Ha oiporavo pe puévlogui 70 kuimbaʼe umi omoakãva apytégui, ha ogueraha chupekuéra pe tavernákulo jerére ha opyta oñemboʼy hikuái upépe.+
25 Upéi Jehová oguejy peteĩ araípe+ ha oñeʼẽ chupe,+ ha oipeʼa chugui michĩmi pe espíritu sánto+ oĩva hiʼári ha omeʼẽ umi 70 kuimbaʼe omoakãvape. Ha omeʼẽmírente chupekuéra pe espíritu sánto, haʼekuéra oñekomporta umi profétaicha,+ péro upéi ndojapovéi upéicha.
26 Péro opyta kuri mokõi kuimbaʼe pe kampaméntope, peteĩ héra Eldad ha pe ótro héra Medad. Ha pe espíritu sánto oguejy avei hiʼarikuéra, pórke chupekuéra ojeporavo kuri avei péro ndohói pe tavernákulope. Haʼekuéra oñepyrũ avei oñekomporta profétaicha pe kampaméntope.
27 Ha peteĩ mitãrusu odipara oho Moisés rendápe ha heʼi chupe: “¡Oime Eldad ha Medad oñekomporta hína profétaicha pe kampaméntope!”.
28 Upémarõ Josué+ Nun raʼy, haʼéva hína Moisés ajudánte imitãite guive, osẽ heʼi chupe: “¡Moisés, che ruvicha, ejokóna chupekuéra!”.+
29 Péro Moisés heʼi chupe: “¿Nde piko ndeselóso hína cherehe? Ndovaléi ningo upéicha. ¡Hiʼãite chéve ko puévlo kompletoitégui oiko Jehová proféta ha Jehová tomeʼẽ chupekuéra ijespíritu!”.
30 Upéi Moisés ha umi kuimbaʼe omoakãva Israel oho jey pe kampaméntope.
31 Jehová ombou peteĩ yvytu atã pe márguio ha ogueru heta kodornís. Ha umi kodornís oñepyrũ hoʼa pe kampaménto jerére+ ha iñasãi mombyryeterei peve, un día ojeguata vaʼerã ojehasapa hag̃ua umi kodornís oĩha. Haimete voi 1 métro* pe yvy ape ári iñanambusu.
32 Upéicha rupi umi hénte opuʼã ombyaty umi kodornís upe día pukukue, upe pyhare ha al ótro día entéro avei. Pe saʼive ombyaty vaʼekue ombyaty 10 mbaʼyru guasu renyhẽ,* ha osegi omosarambi hikuái umi kodornís reʼongue pe kampaménto jerére omboséko hag̃ua.
33 Péro haʼekuéra oisuʼu ha oreko aja gueteri ijurúpe pe soʼo, Jehová orrenegaiterei hesekuéra. Upémarõ Jehová ombou peteĩ mbaʼasy vai ha ojuka hetaitereípe.+
34 Upéicha rupi ombohéra hikuái upe lugár Quibrot-Hataavá,*+ pórke upépe oñeñotỹ umi hénte iñembyahyirekoite vaʼekuépe.+
35 Ha Quibrot-Hataavágui pe puévlo osẽ oho Hazerótpe, ha opyta hikuái Hazerótpe.+
Nóta
^ Heʼiséva: “Tatarendy, ojehapýva, okáiva”.
^ Hebréope: “puérro”.
^ Hebréope: “ansianokuéra”.
^ Heʼiséva: “Lugár oñeñotỹ hague umi iñembyahyirekóvape”.
