Mateo 17:1-27
17 Upéi 6 día haguépe, Jesús ogueraha Pedro, Santiago ha Juánpe, haʼéva hína Santiago ermáno, ha ojupi hikuái peteĩ montáña ijyvatévape, ikatutahápe oĩ haʼekuéra año.+
2 Ha upépe Jesús oñepyrũ okambiapa henondepekuéra, pe hova kuarahýicha omimbi ha ijao avei omimbipa.+
3 Ha upeichaháguinte ohecha avei hikuái Moisés ha Elíaspe oñemongetaha Jesús ndive.
4 Upémarõ Pedro osẽ heʼi Jesúspe: “Che Ruvicha, iporãiterei ningo oréve g̃uarã roime koʼápe. Reipotáramo amopuʼãta koʼápe mbohapy óga kárpa, peteĩ nembaʼerã, ótro Moiséspe g̃uarã, ha pe ótro katu Elíaspe g̃uarã”.
5 Haʼe oñeʼẽ aja gueteri, peteĩ arai omimbipáva okuvri chupekuéra. Ha peichaháguinte pe araígui oñehendu peteĩ heʼíva: “Kóva hína che Raʼy ahayhuetéva ha aguerohorýva,+ pehendúke chupe”.+
6 Ohendúvo upéva, umi disipulokuéra oñesũ ha oñakãity, ha okyhyjeterei hikuái.
7 Upémarõ Jesús oho oĩháme hikuái, opoko hesekuéra ha heʼi: “Pepuʼã katu ha ani pekyhyje”.
8 Upépe haʼekuéra omaña jey yvate gotyo ha ndohechavéima avavépe, síno Jesúspentema.
9 Oguejývo hikuái pe montáñagui Jesús omanda chupekuéra: “Aníke pemombeʼu avavépe la pehecha vaʼekue, ág̃a che, pe Yvypóra Raʼy, apuʼã jey peve umi omanóva apytégui”.+
10 Idisipulokuéra katu oporandu chupe: “¿Mbaʼére piko upéicharõ umi mboʼehára leipegua heʼi Elías raẽ ou vaʼerãha?”.+
11 Haʼe okontesta chupekuéra: “Elías añetehápe ou hína ha omoĩ porãta opa mbaʼe.+
12 Ha che haʼe peẽme Elías oúma hague, péro haʼekuéra ndohechakuaái, síno ojapo hese umi mbaʼe vai ojaposéva.+ Péicha avei che, pe Yvypóra Raʼy, katuete ahasa asýta ipoguypekuéra”.+
13 Upépe idisipulokuéra opilla Jesús oñeʼẽ hague Juan el Bautístare.
14 Upéi og̃uahẽ hikuái umi hénte oĩháme,+ upépe oñemboja Jesús rendápe peteĩ kuimbaʼe, oñesũ henondépe ha heʼi:
15 “Che Ruvicha, eiporiahuverekomína che raʼýpe, haʼe ningo oreko epilépsia ha oĩ vaietereíma, pyʼỹinte hoʼa tatápe, ha hoʼa jepi avei ýpe.+
16 Aguerúma chupe nde disipulokuéra rendápe, péro haʼekuéra ndaikatúi omonguera chupe”.
17 Upémarõ Jesús osẽ heʼi: “Peẽ henerasión aña ha ndapejeroviaietéva,+ ¿arakaʼe peve piko aime vaʼerã penendive pejerovia hag̃ua? ¿Arakaʼe peve piko asegi vaʼerã aaguanta la pejapóva? Pegueru chéve koʼápe pe mitãkuimbaʼe”.
18 Upéi Jesús ojaʼo pe demóniope, ha pe demónio osẽ pe mitãkuimbaʼégui, ha upepete haʼe okuera.+
19 Upémarõ idisipulokuéra oho Jesús rendápe haʼeñoháme, ha heʼi: “¿Mbaʼére piko ore ndaikatúi kuri romosẽ pe demóniope?”.
20 Haʼe heʼi chupekuéra: “Pórke pejeroviaʼieterei. Añetehápe haʼe peẽme: pende jerovia ojoguáramo peteĩ mostása semíllape jepe, pejéta ko montáñape: ‘Tereho koʼágui amoite’, ha ohóta, ha ndaiporimoʼãi mbaʼeve ndaikatumoʼãiva pejapo”.+
21 * ——
22 Oĩ aja hikuái Galiléape, Jesús heʼi idisipulokuérape: “Pe Yvypóra Raʼýpe oñetraisionáta ha oñentregáta iñenemigokuérape.+
23 Haʼekuéra ojukáta chupe, péro 3 día haguépe oñemopuʼã jeýta”.+ Ha idisipulokuéra ombyasyeterei upéva.
24 Upéi, og̃uahẽ hikuái Capernaúmpe ha oñemboja Pedro rendápe umi kuimbaʼe okovráva pe impuésto templopegua* ha heʼi: “¿Pene mboʼehára piko ndopagái pe impuésto templopegua?”.+
25 Haʼe heʼi: “Si, opaga”. Upéi Pedro og̃uahẽre pe ógape, Jesús raẽ oñeʼẽ ha heʼi chupe: “Mbaʼépa ere Simón, ¿mávapa opaga impuésto umi rréipe? ¿Itaʼyrakuéra térãpa umi ótro hénte?”.
26 Haʼe heʼi: “Umi ótro hénte”, upépe Jesús heʼi chupe: “Upéicharõ pe rréi raʼykuéra natekotevẽi opaga umi impuésto.
27 Péro ani hag̃ua ñaofende chupekuéra,+ tereho epoi ne pinda pe márpe, ha reikutu vove peteĩ pira, retopáta ijurúpe peteĩ monéda de pláta.* Egueraha upe monéda ha emeʼẽ chupekuéra, cherehe ha nderehe”.
