KAPÍTULO 30

Roĩma piko romenda hag̃uáicha?

Areʼíma peñemoĩ hague de nóvio. Pejoayhu ha pehechakuaáma peñomoirũ porãtaha. Pepensáma voi pemendávo, péro ipahápe reñeporandu jey:

Roĩma piko romenda hag̃uáicha?

REHAYHÚRAMO jepe chupe, rekyhyje lénto avei remenda hag̃ua, koʼýte rehechávo oĩha heta ména ha tembireko ndojoguerahaporãiva ha ojopoi jeýva.  Péro oĩ avei umi omendasetereíva ha omoporãmbáva opa mbaʼe, ha amo ipahápe ndahaʼeiete upéicha. Upévare reñatendevaʼerã ha ani regueroviapa umi mbaʼe ojeʼéva jepi. Jahechamína umíva.

OJEʼÉVA “Ore rojoayhu, ha upéva la ovaléva.”

Añetegua: Ikatu ningo pejoayhueterei, péro upéva ndohupytýi pepagapa hag̃ua pene kuentakuéra. Umi investigasión ojejapóvape ojehecha heta omendáva oiko vaiha jepi plátare, ha oĩ voi ojedivorsiáva upevakuére. Upéicharõ, pemenda mboyvéma voi pehechavaʼerã mbaʼépa pejapóta peiporu porã hag̃ua pende pláta. Ndapejapóiramo upéicha, peikóta penenerviosoháre, peneprovlémata ha ivaiveha, ikatu peñemomombyry Ñandejáragui (1 Timoteo 6:9, 10).

La Biblia heʼi: ‘Pepensamína, mbaʼépa pejapóta pemopuʼãsérõ peteĩ óga yvate? Ndapeguapymoʼãipa pekalkula raẽ mboýpa ohupytýta peikuaa hag̃ua ikatútapa pejapopa?’ (Lucas 14:28, NM).

Konsého: Iporã peñeporandu ha pehecha oñondive koʼã mbaʼe: “Mbaʼe mbaʼépa ropagavaʼerã káda més? Mboýpa roganáta? Mávapa opagáta umi kuénta ha ohecháta mbaʼéichapa ojeporúta pe pláta? a Mboy pevépa ikatu rogasta roporanduʼỹre ojupe?”. Pemenda mboyve peñemongetamavaʼerã koʼã mbaʼére ha peñehaʼã peg̃uahẽ peteĩ ñeʼẽme (Proverbios 13:10; Eclesiastés 4:9, 10).

OJEʼÉVA “Oréngo ndoroikovaíri voi, opa mbaʼépe roñontende.”

Añetegua: Peneimperfékto rupi arakaʼeve napepensamoʼãi peteĩcha opa mbaʼépe, oĩta katuete pejoavyhápe. Ha oimevaʼerã napeñeʼẽguasúiti umívare, upéicha rupi  ndapeikovaíri, péro pemenda vove, peñeʼẽtamante umi mbaʼére (Romanos 3:23; Santiago 3:2). Mbaʼépa pejapóne ág̃a pejoavy vove? Peñemoĩtapa peiko vai? Pejogueraha porãséramo tekotevẽ peñemongetakuaa ha peñehaʼã pesolusiona umi provléma oñepresentáva peẽme.

La Biblia heʼi: “Ani peheja kuarahy oike jepe pendepochy poi hag̃ua” (Efesios 4:26).

Konsého: Epensami: Mbaʼépa rejapo jepi rejoavy jave peteĩ nde rogayguándi?. Embohovái hag̃ua upéva, ikatu rejapo peteĩ rrekuádro oĩháicha páhina 93-pe, térã Volúmen 2, páhina 221-pe. Ehai pype mbaʼérepa peiko vai jepi, mbaʼépa rejapo umícha jave ha mbaʼépa iporãve vaʼerã rejapo. Pór ehémplo, reiko vai jave ne ermáno térã nde tuvakuérandi, rejepokuaápa reñembotýntema voi nde kotýpe pochykuérehe? Ikatúpa reñehaʼã rekambia upévape?. Resolusionakuaáramo koʼãichagua provléma, upéva tuicha nepytyvõta ág̃a remenda vove.

OJEʼÉVA “Amenda vove ningo arekóta rrelasión sexual che aipotaha óra.”

Añetegua: Remenda haguére ndeʼiséi reĩtaha ne ména térã ne rembirekóndi oñantoha jave ndéve. Heta vése haʼe ikatu noñeñanduporãi ha nde  nembaʼerechakuaavaʼerã. Remenda hague hese nomeʼẽi ndéve derécho rejopy hag̃ua chupe oreko hag̃ua nendive rrelasión sexual (1 Corintios 10:24). Ojapoháicha umi soltéro, umi omendáva ojejokokuaavaʼerã avei (Gálatas 5:22, 23).

La Biblia heʼi: ‘Ha peteĩteĩ taipuʼaka hetére, [térã tojejokokuaa], anítei imbaʼepota ni hembiapo vaise’ (1 Tesalonicenses 4:4, 5, NM).

Konsého: Eñeporandumína koʼã mbaʼe: “Mbaʼéichapa che ahecha umi kuña térã kuimbaʼépe? Amombaʼetereípa voi pe sexo? Aikópa ajejavyky terãpa ahecha taʼanga tieʼỹ? Amaña jave peteĩ kuña térã peteĩ kuimbaʼére, apensápa itieʼỹvarente voi?”. Oimérõ upéicha, tekotevẽ reñatende. Koʼág̃ama voi nderejejokokuaáiramo, reimoʼã piko upéva okambiataha remenda rire? (Mateo 5:27, 28). Reñeporanduvaʼerã avei: “Ajepokuaápa anovillea térã amakanea ape ha pépe?”. Remenda vove rehechaukavaʼerã rerrespetaha ne ména térã ne rembirekópe, ha ndereikoveimavaʼerã reñembojaruʼihína ótrondi (Proverbios 5:15-17).

OJEʼÉVA “Amendárõ añoite avyʼáta.”

Añetegua: Revyʼa hag̃ua odepende nderehe, natekotevẽi remenda katuete. Umi isoltéro aja oikóva ombovai opa mbaʼe ha ichiʼõitereíva, upéichatante avei omenda rire, otopa jeýta ombovai hag̃ua iména térã hembirekóre, ha ndovyʼamoʼãi. Upévare, ndesoltéro aja reñehaʼãvaʼerã rejesareko umi mbaʼe porãre ha ani ivaívarente (Proverbios 15:15). Péicha, remenda vove remombaʼéta  opa mbaʼe rehasáva ne ména térã ne rembirekóndi, ha upéva nembovyʼáta.

La Biblia heʼi: ‘Iporãve revyʼa erekóvare, reipotaiterei rangue umi mbaʼe rehupytyʼỹva’ (Eclesiastés 6:9, ÑÑB).

Konsého: Heta omendáva ou ndovyʼavéi ndoikói rupi umi mbaʼe haʼekuéra ohaʼarõ haguéicha. Upévare iporã rejepyʼamongeta reikuaa hag̃ua mbaʼépa rehupytyse remenda vove. Pór ehémplo, ikatu rehai peteĩ kuatiápe mokõi térã mbohapy mbaʼe ha upéi eñeporandu: “Amenda rire, aikosépa umi novéla ha pelíkulape ojehechaukaháicha? Noiméipa apensa chejehénte ha amendase naĩsevéi rupi cheaño, arekoségui rrelasión sexual térã ajehechauka  hag̃uánte che amigokuérape?”. Oimérõ upéicha, rehechaukahína repensaha ndejehénte. Péro tekotevẽterei rehecha avei mbaʼe mbaʼépa oikotevẽ ha oipota ne menarã térã ne rembirekorã. Upearã ikatu voi rejapo peteĩ lísta ha ehai umi mbaʼe porã pehupytýtava mokõivéva pemenda vove.

Upéicharõ, reiko rangue regueroviaparei umi mbaʼe ojeʼéva, rehecha porã vaʼerã reĩmapa remenda hag̃uáicha. Umi porandu oĩva páhina 216 ha 217-pe nepytyvõta upearã. Mokõivéva pemombaʼéramo pe ñemenda peñehaʼãta pegueropuʼaka opa mbaʼe oúva, peñomoĩrũ porãta ha akóinte pevyʼáta (Deuteronomio 24:5; Proverbios 5:18).

PE KAPÍTULO OÚVAPE

Oimevaʼerã ni nderegueroviaséi ndereja hague. Mbaʼépa ikatu rejapo regueropuʼaka hag̃ua?

[Nóta]

TÉYSTO OĨVA LA BÍBLIAPE

“Upévare kuimbaʼe oheja itúva ha isýpe, ojoaju [hag̃ua] hembirekóndi, ha oiko mokõivégui [peteĩntema].” (Génesis 2:24)

PETEĨ KONSÉHO

Eñemongeta umi aréma omendávandi ha eporandu chupekuéra mbaʼépa tekotevẽ ojapo umi omenda ramóva ovyʼa ha hiʼare hag̃ua oñondive (Proverbios 27:17).

REIKUAÁPARAʼE?

Ovyʼasérõ oñondive, umi omendáva oñoamigovaʼerã ha ojoechavaʼerã oñoirũramo oikove aja pukukue. Tekotevẽ avei oñemongeta ha osolusionakuaa iprovlemakuéra ojoavy jave.

UMI MBAʼE AJAPÓTAVA!

Mbaʼépepa tekotevẽ akambia amenda mboyve? ․․․․․

Mbaʼépa aporanduse che ru térã che sýpe ko témare? ․․․․․

NDÉPA MBAʼE ERE?

● Oĩ tetã oĩháme hetaiterei ojedivorsiáva, mbaʼérepa oiméne oiko upéva?

● Mbaʼérepa ndovaléi remenda redipara hag̃uánte umi provlémagui oĩva nde rógape?

● Remenda vove, mbaʼéichapa ou porãta ndéve rejapo meméramo la Biblia heʼíva?

[Komentário oĩva páhina 220-pe]

“Ñemenda ningo ndahaʼéi vyrorei. Upévare reikuaa porã vaʼerã la rejapóva, ha ndahaʼéi upévante, reñatendevaʼerã avei mávarepa reñakaramahína”. (Adriana)

 [Taʼanga ha rrekuádro oĩva páhina 216 ha 217-pe]

Rekompleta hag̃ua

Ikatúmapa remenda?

Embohovái koʼã porandu. Ikatu voi rejapo upéva upe remendátavandi. Eheka avei umi téysto oñemoĩva koʼápe.

Pláta rehegua

◻ Rehechápa hekópe pe pláta, térãpa remombaʼeterei? (Hebreos 13:5, 6.)

◻ Mbaʼéichapa rehechauka reiporukuaaha pe pirapire? (Mateo 6:19-21.)

◻ Redeve hetápa? Mbaʼéichapa repagapáta umíva? (Proverbios 22:7.)

◻ Pejapótarõ peteĩ fiésta pemenda vove, mboýpa osẽta peẽme? Pepytátapa pedeve? Oimérõ upéicha, mboy pevépa ikatu pedeve? (Lucas 14:28.)

◻ Pembaʼapótapa mokõivéva pemenda rire? Mbaʼéichapa pemohendáta pene rembiapokuéra pehasa hag̃ua tiémpo oñondive? (Proverbios 15:22.)

◻ Moõpa peikóta? Mboýpa ohupytýta peẽme alkilér, tembiʼu, ao ha umícha? Mbaʼéichapa pepagapáta umívare? (Proverbios 24:27.)

 Nde rogaygua

◻ Mbaʼéichapa rejogueraha ne ermáno ha nde tuvakuérandi? (Éxodo 20:12; Romanos 12:18.)

◻ Rejoavýramo hendivekuéra, mbaʼépa rejapo resolusiona hag̃ua? (Colosenses 3:13.)

◻ Oimérõ nde peteĩ kuñataĩ, mbaʼéichapa ikatu rehechauka neakãguapy ha ‘ndepyʼaporãha’? (1 Pedro 3:4.)

◻ Perekótapa mitã? (Salmo 127:3.) Oimérõ ndaupéichai, peikuaámapa mbaʼépa pejapóta pono penefamília?

◻ Oimérõ nde peteĩ mitãkariaʼy, mbaʼépa rejapóta reipytyvõ hag̃ua ne famíliape akóinte oĩ porã hag̃ua Ñandejára renondépe? (Mateo 5:3.)

Nde lája

◻ Rejepokuaápa rembaʼapo? Mbaʼéichapa rehechauka upéva? (Proverbios 6:9-11; 31:17, 19, 21, 22, 27.)

◻ Mbaʼéichapa rehechauka rejepyʼapyha nde rapicháre? (Filipenses 2:4.)

◻ Oimérõ nde peteĩ mitãkariaʼy, remandaséntepa voi térãpa reñehaʼã rehaʼanga Jesucrístope? (Efesios 5:25, 28, 29.)

◻ Oimérõ nde peteĩ kuñataĩ, rerrespetápa umi nemoakãvape? (Efesios 5:22-24.)

[Taʼanga oĩva páhina 219-pe]

Reikuaa raẽ vaʼerã reĩmapa remenda hag̃uáicha, ha ani rejepoíntema