1. Mbaʼe propósitopa Ñandejára oguereko ko Yvýpe g̃uarã?

 ÑANDEJÁRA oguereko peteĩ propósito iporãitereíva ko Yvýpe g̃uarã. Haʼe oipota ko Yvy henyhẽ hénte ovyʼa ha hesãivagui. La Biblia heʼi “Ñandejára oñotỹ peteĩ hardín Edénpe” ha “omoheñói pe yvýgui opaichagua yvyra máta iporãva ñande resa renondépe ha iporãva ojeʼu hag̃ua”. Ñandejára ojapo rire pe kuimbaʼe ha kuña ypykue, Adán ha Eva, omoĩ chupekuéra peteĩ lugár iporãitereívape ha heʼi: “Peñemboheta ha pemyenyhẽ ko yvy ha pemoĩ pende poguýpe” (Génesis 1:28; 2:​8, 9, 15). Ñandejára oipotavaʼekue yvyporakuéra ifamília, ombotuicha pe hardín ko Yvy tuichakue javeve, ha oñangareko umi mymbakuérare.

 2. a) Mbaʼérepa jaikuaa Ñandejára okumplitaha ipropósito ko Yvýpe g̃uarã? b) Mbaʼeichagua héntepa heʼi la Biblia oikotaha opa ára g̃uarã?

² Ndépa reguerovia Ñandejára okumplitaha ipropósito ojapóvo ko Yvýgui peteĩ paraíso? Ñandejára heʼi: “Haʼéma upéicha; upéicha avei oikóta” (Isaías 46:​9-11; 55:11). Upeichaite, Ñandejára ojapóta katuete pe heʼivaʼekue. Haʼe “ndojaporeirivaʼekue [ko Yvy]”, síno “ojapovaʼekue ojeiko hag̃ua ipype” (Isaías 45:18). Mbaʼeichagua héntepa oipotavaʼekue Ñandejára oiko  ko Yvy ape ári, ha arakaʼe pevépa? La Biblia omombeʼu: “Umi hekojojáva oguerekóta ko Yvy, ha oikóta ipype opa ára g̃uarã” (Salmo 37:29; Revelación 21:3, 4).

 3. Mbaʼe ivaívapa jahecha oikoha ko Yvy ape ári, ha mbaʼépa ñañeporandu upévare?

³ Añete, koʼã mbaʼe neʼĩra gueteri oiko. Koʼág̃a rupi yvyporakuéra hasy ha omano, oĩ katu oñorairõ ha ojojukáva. Upéicharõ, oĩ peteĩ mbaʼe nosẽporãivaʼekue. Katuete Ñandejára ndoipotaivaʼekue ko Yvy oĩ koʼág̃a oĩháicha. Mbaʼépa oikorakaʼe upéicharõ? Mbaʼérepa ndoikói pe Ñandejára oipotavaʼekue? Ndaipóri peteĩ lívro oñeʼẽva istóriagui okontestáva koʼã mbaʼe, pórke koʼã provléma oñepyrũvaʼekue yvágape voi.

 4, 5. a) Mávapa pe oñeʼẽvaʼekue Évape peteĩ mbói rupive? b) Mbaʼéichapa ikatu oiko peteĩ tapicha heko porãvagui peteĩ mondaha?

⁴ Pe primer lívro oĩva la Bíbliape omombeʼu oĩhague peteĩ opuʼãvaʼekue Ñandejárare pe hardín de Edénpe. Ojeʼe hese haʼeha “pe mbói”, péro ndahaʼéi peteĩ mymba reínte. Pe último lívro oĩva la Bíbliape heʼi haʼeha pe “oñehenóiva Diablo ha Satanás, ogueraha vaíva hína opa yvyporakuérape”. Oñehenói avei chupe “pe mbói ypykue” (Génesis 3:1; Revelación 12:9). Ko ánhel ipoderósova haʼe peteĩ espíritu ndajahecháiva. Haʼe oiporuvaʼekue peteĩ mbói oñeʼẽ hag̃ua Évape, ojapoháicha umi omoñeʼẽva peteĩ muñéko. Ko ánhel katuete oĩneraʼe Ñandejára ojapórõ guare ko Yvy yvyporakuérape g̃uarã (Job 38:​4, 7).

⁵ Ñandejára ojapovaʼekue opa mbaʼe perfékto, upéicharõ mávapa ojapo “Satanáspe”, oñehenóiva avei “Diablo”? Jaʼe porã hag̃ua, peteĩ Ñandejára raʼy espirituál ipoderósova ojapovaʼekue ijehegui voi Diablo. Mbaʼéichapa oikorakaʼe upéva? Ñande jaikuaa peteĩ ta picha heko porãvagui ikatuha oiko peteĩ mondaha. Mbaʼéichapa ojehu upéva? Ikatu pe tapicha oipota ipyʼapýpe peteĩ mbaʼe naiporãiva. Ha opensa meméramo hese, oipotavétantema. Ha upéi, oguerekóramo oportunida, ikatu ojapo pe mbaʼe vai opensavaʼekue (Santiago 1:​13-15).

 6. Mbaʼéichapa peteĩ Ñandejára raʼy espirituál ipoderósovagui oiko Satanás ha Diablo?

⁶ Upéva oikovaʼekue Satanás rehe. Haʼe oiméne ohendurakaʼe Ñandejára heʼírõ guare Adán ha Évape ifamília hag̃ua ha omyenyhẽ hag̃ua ko Yvy (Génesis 1:27, 28). Satanás oiméne opensáraʼe: “Iporãiténepa yvyporakuéra cheadorárõ chéve Ñandejárape rangue!”. Upéicha haʼe oipotavaʼekue ipyʼapýpe peteĩ mbaʼe naiporãiva. Ha oguereko hag̃ua pe oipotáva ombotavy Évape ha ijapu oñeʼẽvo Ñandejáragui (Génesis 3:​1-5). Upéicha oiko chugui “Diablo” heʼiséva peteĩ “ijapu vaíva hapicháre”, ha avei “Satanás” heʼiséva peteĩ “opuʼãva hapicháre”.

 7. a) Mbaʼérepa omano Adán ha Eva? b) Mbaʼérepa enterove ñande Adán raʼyrakuéra ñandetuja ha ñamano?

⁷ Japúpe Satanás ombotavy Adán ha Évape, ha upéicha haʼekuéra naiñeʼẽrendúi Ñandejárape (Génesis 2:17; 3:6). Upévare, haʼekuéra omano Ñandejára heʼihaguéicha (Génesis 3:17-19). Adán opeka rire iñimperféktoma, upévare ombohasa itaʼyrakuérape ipekádo (Romanos 5:12). Pe ojehuvaʼekue ikatu ñambojoja peteĩ móldere, ojeporúva pán ojejapo hag̃ua. Pe mólde ipéramo peteĩ hendápe, mbaʼéichapa osẽta umi pán ojejapóva ipype? Oguerekóta avei peteĩ márka pe móldeicha. Upéicha avei Adán ombohasa pe “márka” yvyporakuérape, pe imperfeksión. Upévare enterove ñandetuja ha ñamano (Romanos 3:23).

 8, 9. a) Mbaʼe desafíopa ojapovaʼekue Satanás? b) Mbaʼérepa Ñandejára ndojukairakaʼe upepete voi umi oñemoĩvape hese?

⁸ Omokyreʼỹrõ guare Adán ha Évape opeka hag̃ua  Ñandejára kóntrape, Satanás añetehápe omoakã peteĩ rrevelión. Haʼe oñeʼẽ vai Jehová sãmbyhy rehe. Upéicha ojapóvo añetehápe heʼivaʼekue: “Ñandejára ogoverna vai. Ijapu ha ndohejái oiko porã umi ipoguýpe oĩva. Yvyporakuéra noikotevẽi Ñandejára oisãmbyhy chupekuéra. Haʼekuéra ikatu odesidi ijehegui mbaʼépa iporã ha mbaʼépa ivai. Ha oiko porãvéta hikuái che aisãmbyhýramo chupekuéra”. Mbaʼéichapa Ñandejára  ombohováita ko mbaʼe vaiete ojeʼéva hese? Oĩ heʼíva mbaʼérepa Ñandejára ndojukairakaʼe umi oñemoĩvape hese. Péro, ohechaukátapa upéicha Satanás ijapuha? Ha ohechaukánepa upéva Ñandejára ogoverna porãha?

⁹ Jehová oguereko pe hustísia hendaitépe, upévare ndojukái upepete voi umi oñemoĩvape hese. Haʼe odesidi oñekotevẽha tiémpo ombohovái porã hag̃ua pe desafío ojapovaʼekue Satanás ha ohechauka ijapuhague. Upéicha Ñandejára oheja peteĩ tiémpore yvyporakuéra oñegoverna Satanás poguýpe. Ko lívro kapítulo 11-pe jahecháta mbaʼérepa Jehová oheja hetaite tiémpoma ohasa omyatyrõ hag̃ua koʼã mbaʼe. Epensami koʼág̃a ko mbaʼére: ojapo porãpa rakaʼe Adán ha Eva ogueroviárõ guare Satanáspe? Ojapoparakaʼe Satanás peteĩ mbaʼe iporãva hesekuéra? Ha ojapo porãpa hikuái ogueroviávo Jehová ijapuha, omeʼẽ rire chupekuéra hetaite mbaʼe porã? Ndépa mbaʼe rejapovaʼerãmoʼã?

 10. Mbaʼéichapa ikatu reñemoĩ Jehová ykére rembohovái hag̃ua pe desafío ojapovaʼekue Satanás?

¹⁰ Iporã ñapensa koʼã mbaʼére, enterove jahaságui koʼãichagua provlémare. Ha nde ikatu reñemoĩ Jehová ykére rembohovái hag̃ua pe desafío ojapovaʼekue Satanás. Rehejáramo Jehová nesãmbyhy rehechaukáta Satanás ijapuha (Salmo 73:28; Proverbios 27:11). Ha oĩramo jepe hetaiterei millones oikóva ko Yvy ape ári, ndahetái oĩ ojapóva upéva. Ko mbaʼe ñandegueraha peteĩ porandu iñimportántevape: omboʼépa añetehápe la Biblia Satanás ogovernaha ko múndo?

 11, 12. a) Mbaʼéichapa pe tentasión Jesús ombohovaivaʼekue ohechauka Satanás haʼeha ko múndo ruvicha? b) Mbaʼépa ohechauka avei Satanás ogovernaha ko múndo?

¹¹  Jesús oikuaa porã vaʼekue Satanás ogovernaha ko múndo. Peteĩ milágro rupi, Satanás ohechaukavaʼekue  Jesúspe “umi rréino oĩva ko múndope ha umi mbaʼe porãita oĩva ipype”. Satanás heʼi chupe: “Ameʼẽmbaitéta ndéve koʼã mbaʼe rejeitýramo cherenondépe ha remeʼẽ chéve adorasión sapyʼami” (Mateo 4:​8, 9; Lucas 4:​5, 6). Epensami ko mbaʼére. Ndahaʼéiramo Satanás mbaʼe umi rréino, haʼénepa peteĩ tentasión Jesúspe g̃uarã umi mbaʼe Satanás omeʼẽséva chupe? Jesús nonegái Satanás mbaʼeha umi goviérno oĩva ko múndope. Ha katuete heʼivaʼerãmoʼã upéva Satanás ndoguerekóirire umi goviérno ipoguýpe.

¹² Añetehápe, Jehová haʼe pe Ñandejára Ipuʼakapáva, ko univérso iporãitéva Apohare (Revelación 4:11). Upéicharõ jepe, la Biblia ndeʼíri ni peteĩ hendápe Ñandejára Jehová térã Jesucristo ogovernaha ko múndo. Jesús heʼi porã vaʼekue Satanás haʼeha “ko múndo ruvicha” (Juan 12:31; 14:30; 16:11). La Biblia heʼi avei Satanás, pe opuʼãvaʼekue Ñandejárare, haʼeha “ko sistéma jaikoha jára” (2 Corintios 4:​3, 4). Pe apóstol Juan oñeʼẽvaʼekue hese heʼírõ guare: “Ko múndo oĩmbaite pe aña poguýpe” (1 Juan 5:19).

 13. Mbaʼérepa ñaikotevẽ peteĩ múndo pyahu?

¹³ Káda áño ohasáva jahechakuaa ko múndo ipeligrosoveha ohóvo. Henyhẽ ehérsito oñorairõvagui, polítiko japúgui, líder rrelihióso hova mokõivagui, ha umi oporojukávagui. Ko múndo naipohãvéima. La Biblia ohechauka hiʼag̃uimaha pe tiémpo Ñandejára ohundi hag̃ua ko múndo aña, upéva oikóta pe ñorairõ hérava Armagedónpe. Upe rire oñemoĩta hekovia peteĩ múndo pyahu ihústova (Revelación 16:​14-16).

 14. Mávapepa oiporavo Ñandejára ogoverna hag̃ua Irréino, ha mbaʼépa heʼivaʼekue Jehová hese?

¹⁴ Ñandejára Jehová oiporavo Jesucrístope ogoverna  hag̃ua Irréino, térã igoviérno yvagapegua. Ymaitereíma Jehová heʼihague: “Onase ñandéve peteĩ mitã, peteĩ mitãkuimbaʼe oñemeʼẽ ñandéve, ha pe prínsipe sãmbyhy oĩta ijatiʼy ári. Ha herarã oñemoĩta chupe [...] Prínsipe Pyʼaguapy Reruha. Pe prínsipe sãmbyhy iñasãita ha pyʼaguapy ndopamoʼãi” (Isaías 9:​6, 7). Jesús oñeʼẽvaʼekue ko goviérnogui, omboʼérõ guare idisipulokuérape ojerure hag̃ua: “Tou ne rréino. Tojejapo ne rembipota, yvagapeguáicha, ko yvy ape ári avei” (Mateo 6:10). Ko lívrope jahecháta mbaʼéichapa Ñandejára Rréino koʼẽrõite oipeʼaitéta umi goviérno oĩva ko múndope, ha haʼe voi opytáta hekovia (Daniel 2:44). Ha upéramo Ñandejára Rréino ojapóta ko Yvýgui peteĩ paraíso.

 15. Mbaʼépa pe “yvy pyahu”?

¹⁵ La Biblia heʼi porã ñandéve: “Oĩ yvága pyahu ha yvy pyahu ñahaʼarõva [Ñandejára] heʼihaguéicha, ha koʼãvape oikóta pe hustísia” (2 Pedro 3:13; Isaías 65:17). La Biblia heʼi jave pe “yvy”, sapyʼánte oñeʼẽ yvyporakuérare (Génesis 11:1). Upéicharõ pe “yvy pyahu” ihústova heʼise umi yvyporakuéra oĩ porãva Ñandejára renondépe.

 16. Mbaʼe rregálopa Ñandejára omeʼẽta umi oĩ porãvape hendive, ha mbaʼépa jajapovaʼerã omeʼẽ hag̃ua ñandéve avei?

¹⁶ Jesús oprometevaʼekue pe múndo pyahúpe, hiʼag̃uímava koʼág̃a, Ñandejára omeʼẽtaha umi hendive oĩ porãvape peteĩ rregálo iporãitereíva: pe “jeikove opaʼỹva” (Marcos 10:30). Ehekamína Juan 3:16 ha 17:3, ha elee mbaʼépa heʼivaʼekue Jesús jajapovaʼerãha jaguereko hag̃ua pe jeikove opaʼỹva. Koʼág̃a jahecháta la Bíbliape mbaʼe vendisiónpa oguerekóta pe Paraísope umi ohupytýva ko rregálo porãite Ñandejáragui.

 17, 18. Mbaʼérepa ikatu jaguerovia oĩtaha pyʼaguapy ha kyhyjeʼỹ ko Yvy tuichakuére?

 ¹⁷ Ndaiporimoʼãvéima aña, ñorairõ guasu, jejuka ha violénsia. “Ndaiporimoʼãvéitama iñañáva [...]. Péro umi heko porãva oguerekóta ko yvy.” (Salmo 37:​10, 11.) Oĩta pyʼaguapy pórke Ñandejára “ojokopaite umi ñorairõ guasu yvy tuichakuére” (Salmo 46:9; Isaías 2:4). Upéramo “heñóita pe hekojojáva, ha henyhẽta pyʼaguapy ndaiporivéi peve pe jasy”, upéva heʼise oĩtaha pyʼaguapy opa ára g̃uarã! (Salmo 72:7.)

¹⁸ Umi iñeʼẽrendu ha oadoráva Jehovápe oikóta kyhyjeʼỹme. Umi isrraelíta ymaguare oikovaʼekue kyhyjeʼỹme iñeʼẽrendu aja Ñandejárape (Levítico 25:​18, 19). Ajépa javyʼaitéta jaiko vove upéicha kyhyjeʼỹme pe Paraísope! (Isaías 32:18; Miqueas 4:4.)

 19. Mbaʼérepa jaikuaa oĩtaha heta tembiʼu Ñandejára múndo pyahúpe?

¹⁹ Ndaiporimoʼãvéima ñembyahýi. Pe salmísta opuraheivaʼekue: “Oĩta hetaiterei kóga hiʼáva yvy ape ári, umi montáña ruʼãme hetaiterei rasa oĩta” (Salmo 72:16). Ñandejára Jehová ovendesíta umi hekojojávape, ha “yvy voi omeʼẽta hiʼa” (Salmo 67:6).

 20. Mbaʼérepa jaikuaa porã ko Yvýgui oikotaha peteĩ paraíso?

²⁰ Ko Yvy tuichakuégui oikóta peteĩ paraíso. Oñemopuʼãta óga iporãva ha umi lugár yvyporakuéra ohundivaʼekuégui ojejapóta peteĩ hardín (Isaías 65:​21-24; Revelación 11:18). Ha upéicha, umi lugár iporãva oñembotuicháta ohóvo oiko peve ko Yvýgui peteĩ lugár ojoguáva pe hardín de Edénpe. Ñandejára opa árare ‘oipeʼáta ipo ha omeʼẽmbaitéta pe oipotáva opa oikovévape’ (Salmo 145:16).

 21. Mbaʼérepa jaikuaa yvyporakuéra oiko porãtaha mymbakuéra ndive?

²¹ Yvyporakuéra oiko porãta mymbakuéra ndive. Umi mymba kaʼaguy ha umi mymba ogaha rupi oikóva oka rúta oñondive. Peteĩ mitãmi jepe ndokyhyjemoʼãi umi mymba ñarõgui (Isaías 11:​6-9; 65:25).

 22. Mbaʼépa oikóta umi mbaʼasýgui?

²² Opáta mbaʼasy. Jesucristo ogoverna vove Ñandejára Rréino yvagapegua, omongueráta hetaitereivépe ko Yvy ape ári oĩrõ guarégui (Mateo 9:35; Marcos 1:​40-42; Juan 5:5-9). Upérõ “avave ndeʼimoʼãi: ‘Cherasyʼaína’.” (Isaías 33:​24; 35:5, 6.)

 23. Mbaʼérepa javyʼaitéta oñemoingove jey vove umi omanovaʼekuépe?

²³ Umi jahayhúva omanovaʼekue oikove jeýta ha ikatúta oikove opa ára g̃uarã. Enterove umi omanovaʼekue oĩva Ñandejára memóriape oikove jeýta. Upeichaite, oĩta “ñemoingove jey hekojoja ha hekojojaʼỹvagui” (Hechos 24:15; Juan 5:​28, 29).

 24. Ndépa reikose pe paraísope ko Yvy ape ári?

²⁴ Ajépa hetaite mbaʼe porã ohaʼarõ umi oaprendesévape ñande Apoharégui, ha oservíva chupe! Oprometérõ guare Jesús pe kuimbaʼe hembiapo vaívape omanovaʼekue ijykére: “Reiméta chendive pe Paraísope”, oñeʼẽvaʼekue pe paraíso oĩtavagui ko Yvy ape ári (Lucas 23:43). Upévare iñimportanteterei ñaaprendeve Jesucrístogui, pórke haʼe rupi ojehupytýta koʼã vendisión.