Saúl raʼy ypykue héra vaʼekue Jonatán. Haʼe ningo peteĩ gerréro katupyry vaʼekue. David heʼi voi Jonatán ipyaʼeveha peteĩ ágilagui ha imbareteveha peteĩ leóngui. Peteĩ día, Jonatán ohecha unos kuánto soldádo filisteo oĩha hína peteĩ sérrope, upémarõ haʼe heʼi ijeskudérope, haʼéva hína pe oñenkargáva ogueraha hag̃ua chupe hiʼárma: “Jehová ohechaukáramo añoite ñandéve peteĩ señál jaatakáta chupekuéra. Umi filisteo heʼíramo ñandéve jajupi hag̃ua haʼekuéra oĩháme ñañorairõ hag̃ua, upéva haʼéta la señál jaataka hag̃ua chupekuéra”. Upéi umi filisteo osapukái sapyʼa ha heʼi chupekuéra: “¡Peju ápe ñañorairõ hag̃ua!”. Upépe Jonatán ha ijeskudéro ojupi oataka umi filistéope ha sapyʼaitépe ojuka hikuái 20 soldádope.

Jonatán haʼe vaʼekue Saúl raʼy ypykue, upévare haʼe ojupi vaʼerã kuri rréiramo itúa omano vove. Péro Jonatán oikuaa Jehová oiporavóma hague Davídpe ogoverna hag̃ua Israélpe, upéicharõ jepe haʼe noenvidiái Davídpe upévare. David ha Jonatán oñoamigoite vaʼekue. Haʼekuéra opromete voi  ojupe ojoprotehe ha oñodefendetaha. Ohechauka hag̃ua oñoamigoiteha hikuái, Jonatán orregala Davídpe ijao puku naimángaiva, ijespáda, hiʼárko ha isinturón.

David okañýrõ guare oikóvo Saúlgui, Jonatán oho ovisita Davídpe ha heʼi chupe: “Ani rekyhyje, Jehová ndeporavóma Israel rreirã ha che túa jepe oikuaa porã upéva”. ¿Ndépa ndereipotái avei peteĩ amígo peichagua?

Jonatán heta vése ojapeligra vaʼekue oipytyvõ hag̃ua Davídpe. Haʼe oikuaa itúa ojukaseha Davídpe, upévare heʼi itúape: “Tuichaiterei ningo repekáta rejukáramo chupe. Haʼe ningo ndojapói mbaʼeve ivaíva”. Saúl ipochyeterei upévare Jonatán ndive. Tiémpo rire, Saúl ha Jonatán omano oñondive peteĩ gerrahápe.

David oikuaa Jonatán orekoha peteĩ itaʼýra hérava Mefibóset, upévare Jonatán omano rire omondo peteĩ isirviéntepe ogueru hag̃ua Mefibósetpe ha heʼi chupe: “Reikove aja pukukue che añangarekóta nderehe, pórke nde túa che amigoite vaʼekue. Reikóta chendive che palásiope ha reguapýta chendive che mesápe rekaru hag̃ua”. David núnka ndahesaráiri iñamígo Jonatángui.