Remenda vove reformáma peteĩ família pyahu. Siémpre ningo resegíta rehayhu ha rerrespeta nde tuvakuérape, péro remenda rire, ne rembiayhu haʼe vaʼerã pe persóna iñimportantevéva ndéve g̃uarã. Ñepyrũrã ikatu ne hentekuérape ndogustapái upéva. Péro umi konsého oĩva la Bíbliape ikatu nepytyvõ ani hag̃ua reiko vai hendivekuéra upévare, ha nepytyvõta avei remombarete hag̃ua ne matrimónio.

MBAʼÉPA HEʼI LA BIBLIA: “Emombaʼe nde ru ha nde sýpe” (Efesios 6:2). Rekakuaapámarõ jepe, siémpre remombaʼe ha rerrespeta vaʼerã nde tuvakuérape. Ha nembaʼerechakuaa vaʼerã avei ne rembiayhúndi, haʼe avei tekotevẽta ohasa mimi tiémpo ituvakuérandi. La Biblia ningo heʼi voi: “Pe mborayhu ndaiselósoi”. Upévare, aníkena repensa ne ména térã ne rembireko nemboykemaha ojogueraha porã haguérente ihentekuérandi (1 Corintios 13:4, nóta; Gálatas 5:26).

EJAPOMÍNA KO MBAʼE:

• Eñatende ani ere: “Ne hentekuéra siémpre otaky cherehe”, térã “Arakaʼeve voi nameʼẽi gústo nde sýpe”

• Eñemoĩ ne ména térã ne rembireko lugárpe rentende hag̃ua chupe

MBAʼÉPA HEʼI LA BIBLIA: “Pe kuimbaʼe ohejáta itúva ha isýpe, ojoajúta hembirekóre, ha mokõivégui oikóta peteĩntema” (Mateo 19:5). Sapyʼánte, remenda rire jepe ikatu hína nde tuvakuéra opensa reimeha gueteri ipoguypekuéra ha oñentremete mimi ne matrimóniope.

Upévare reñemongeta porã vaʼerã ne rembiayhúndi ha pedesidi moõ pevépa pepermitíta chupekuéra upéva. Ha tekotevẽramo, peñeʼẽ hendivekuéra pyʼaguapýpe porãnte upe témare (Proverbios 15:1). Napendepochyreíri vaʼerã, péicharõmante pesegíta pejogueraha porã pene hentekuérandi. Iporãvéta ningo peneumílderamo, penepasiénsia ha “mborayhúpe peñoaguanta oñoermánoicha” (Efesios 4:2).

EJAPOMÍNA KO MBAʼE:

• Nandegustáiramo pene hentekuéra oñentremete pene matrimóniope, eñeʼẽ ne rembiayhúndi upe témare penetrankílo porã jave

• Peñemoĩ peteĩ ñeʼẽme pesolusiona hag̃ua upe provléma