Peteĩ paréha ifamília ramóva ovyʼaiterei, péro ikatu avei ohasa heta mbaʼe ijetuʼúva. Ohechakuaa hikuái oñangareko hag̃ua peteĩ mitãre oikotevẽha heta tiémpo ha omokaneʼõha chupekuéra. Avei ndopytuʼuvéi rupi ikatu ipirepererĩve hikuái ha oñepyrũma oñokarãi mimi. Upévare mokõivéva tekotevẽ omohenda porã itiémpo oñangareko hag̃ua pe mitãre ha avei imatrimóniore. ¿Mbaʼéichapa umi konsého oĩva la Bíbliape ikatu penepytyvõ pembohovái hag̃ua ko situasión?

MBAʼÉPA HEʼI LA BIBLIA: “Pe mborayhu ipasiénsia ha imbaʼeporã [...] nopensái ijehénte, ndaipochyreíri” (1 Corintios 13:4, 5). Oiméramo nde peteĩ sy primerísa katuete reñangareko porãsetereíta ne membýre ha reipurupaite léntota ne tiémpo hese. Upéicha rupi ne ména ikatu opensa redeskuidaha chupe. Upévare, aníkena nderesarái haʼe oikotevẽha avei reñemotiémpo chupe g̃uarã. Nepasiénsiakena ha nembaʼeporã, ha ehechauka chupe reikotevẽha hese ha remombaʼeha haʼe ojapóva oñangareko hag̃ua avei pe mitãre.

“Peẽ menakuéra pentende porã vaʼerã pene rembirekópe.” (1 Pedro 3:7.) Ména, rentende vaʼerã koʼág̃a ne rembireko oipurutaha heta tiémpo oñangareko hag̃ua pe mitãre, ha ikatuha ikaneʼõ, oñedeprimi térã oñeñandu vai. Upéicha rupi sapyʼánte ikatu ijarhél ndéve. Péro ani ndepochy, síno reñehaʼã vaʼerã ndepyʼaguapy ha ejejokokuaa (Proverbios 16:32). Eñehaʼãkena entende ne rembirekópe, embojerovia ha eipytyvõ chupe oikotevẽvape (Proverbios 14:29).

EJAPOMÍNA KO MBAʼE:

• Túva: Eipytyvõ ne rembirekópe reñangarekóvo pe mitãre pyharekue avei. Eñehaʼã emboyke umi mbaʼe rejapo vaʼekue yma, rehasave hag̃ua tiémpo ne rembireko ha ne famíliandi

• Sy: Ne ména heʼi jave ndéve oñangarekoseha pe mitãre, reheja vaʼerã chupe tojapo. Ndojapoporãiramo ani rejaʼo, síno pyʼaguapýpe porãnte ehechauka chupe mbaʼéichapa ojapo vaʼerã

MBAʼÉPA HEʼI LA BIBLIA: “Mokõivégui oikóta peteĩntema” (Mateo 19:5). Koʼág̃a perekóramo jepe peteĩ mitã, ani nderesarái nde ha ne rembiayhu siémpre ‘peteĩnteha’. Eñehaʼãmbaitékena ani hag̃ua ikangy ne matrimónio.

Tembireko, eagradesékena ne ménape nepytyvõ haguére. Umi mbaʼe eréva ikatu omonguera chupe “pohãmeguáicha” (Proverbios 12:18). Ména, erékena ne rembirekópe rehayhuha chupe ha remombaʼetereiha opa mbaʼe ojapóva pene família rehehápe (Proverbios 31:10, 28).

“Káda uno jasegi vaʼerã jajapo pe ideprovéchotava ñande rapichápe.” (1 Corintios 10:24.) Ejapókena siémpre umi mbaʼe ou porãtava ne ména térã ne rembirekópe ha emombaʼe opa mbaʼe ojapóva. Eñemotiémpokena avei reñemongeta ha rehendu hag̃ua chupe. Pe rrelasión sexuál iñimportánte avei pene matrimóniope, upévare emeʼẽkena ne rembiayhúpe oikotevẽva. La Biblia heʼi voi: “Ani penega ojuehegui upéva, noiméirõ peñemoĩ peteĩ ñeʼẽme ha pedesidi ndapekemoʼãiha oñondive peteĩ tiémpore” (1 Corintios 7:3-5). Upévare peñemongeta porã vaʼerã upe témare. Penembaʼerechakuaa ha penepasiénsiaramo, katuete pejogueraha porãta ha pejoayhuvéta.

EJAPOMÍNA KO MBAʼE:

• Ehasa tiémpo ne rembiayhúndi peneañohápe

• Ehechauka ne ména térã ne rembirekópe rehayhuha chupe, ikatu reskrivi chupe peteĩ notíta térã remeʼẽ chupe rregalíto

MBAʼÉPA HEʼI LA BIBLIA: “Nde reikuaa ne mitã guive Ñandejára Ñeʼẽ, ikatúva nemoarandu rejesalva hag̃ua” (2 Timoteo 3:15). Repensa porãma vaʼerã mbaʼéichapa rehekomboʼéta ne família. Umi mitã ningo onase mboyve jepe ikatúma oaprende heta mbaʼe. Por ehémplo, oĩ aja gueteri isy retepýpe, ikatúma oikuaa isy ha itúva oñeʼẽvo chupe ha okuʼe ohendúvo chupekuéra. Upévare onase guive releéma vaʼerã ne famíliape ikatu hag̃uáicha ojepokuaa, ha nontendéiramo jepe umi mbaʼe eréva, upéva ikatu oipytyvõ chupe okakuaapa rire oleese hag̃ua avei.

Ani repensa ne memby michĩetereiha gueteri reñeʼẽma hag̃ua chupe Ñandejárare. Reñemboʼe vaʼerã Jehovápe hovake, ikatu hag̃uáicha ohendu avei (Deuteronomio 11:19). Rehuga jave hendive, emombeʼu chupe umi mbaʼe Ñandejára ojapo vaʼekue (Salmo 78:3, 4). Okakuaavévo ohóvo, ne família ohechakuaáta mbaʼeichaitépa rehayhu Jehovápe ha haʼe avei ohayhúta chupe.

EJAPOMÍNA KO MBAʼE:

• Eñemboʼe Ñandejárape tanemoarandu rehekomboʼe porã hag̃ua ne famíliape

• Errepeti jey jey vaʼerã nde veveʼípe umi palávra térã fráse iñimportánteva, ikatu hag̃uáicha michĩ reheve oaprendéma umíva