Jesús omboʼe ha omonguera heta héntepe oĩva Judea ha Jerusalénpe. Upéi okrusa rrío Jordán osegi hag̃ua oporomboʼe umi siuda oĩvare Peréape. Péro upéi oho jey vaʼerã Jerusalénpe.

Oĩ aja Peréape, peteĩ kuimbaʼe oporandu Jesúspe: “Che Ruvicha, ¿añetehápe piko saʼi oĩta la ojesalváva?”. Oime vaʼerã pe kuimbaʼe oikuaa oĩha líder rrelihióso heʼíva mbovymínte ojesalvataha, ha oĩha heʼíva hetataha. Péro Jesús ndeʼíri pe kuimbaʼépe mboýpa la ojesalvátava, síno mbaʼépa ojapo vaʼerã pe ojesalvaséva. Haʼe heʼi: “Peñehaʼãmbaitéke peike pe okẽ poʼírupi”. Péicha Jesús omyesakã peteĩ persóna tekotevẽha oñehaʼãmbaite ikatu hag̃uáicha ojesalva. Upéi heʼi avei: “Heta oĩta upéi oikeséva péro ndaikatumoʼãi oike” (Lucas 13:23, 24).

Jesús ontendeka hag̃ua umi héntepe tekotevẽha oñehaʼã hikuái, heʼi: “Pe ogajára opuʼã vove ha otranka hokẽ, peẽ pepytáta peñemboʼy okápe ha peñepyrũta pembota pe okẽ, ha peje: ‘Karai, eavrimína oréve’. [...] Péro haʼe oñeʼẽta ha heʼíta peẽme: ‘Che ndaikuaái moõguápa peẽ. ¡Tapeho koʼágui, peẽ mbaʼe vai apoha!’” (Lucas 13:25-27).

Upéva ohechauka mbaʼe situasiónpepa oĩ umi persóna og̃uahẽva tárde. Amalisia opyta hikuái okápe pórke ou ouseha órante. Péro upérõ g̃uarã oñemboty ha oñetrankáma la okẽ. Haʼekuéra ou vaʼerã kuri voive, ndopytaporãiramo jepe chupekuéra upe óra. Upéva oiko heta persóna nopenáivare Jesús omboʼévare. Operde hikuái pe oportunida oadora hag̃ua Jehovápe. La majoría umi hudío orrechasa pe médio Ñandejára oipurúva oporosalva hag̃ua. Upévare Jesús heʼi haʼekuéra ‘hasẽ soro ha ipyahẽtaha ñembyasýgui’ oñemosẽ vove chupekuéra. Péro oúta avei “heta hénte kuarahyresẽ ha kuarahyreikéguio, nórte ha súrguio”, opa tetãgui “oguapy hag̃ua mesápe Ñandejára Rréinope” (Lucas 13:28, 29).

Upéi Jesús omyesakãve: “Oĩ umi itapykuéva opytátava tenonde, ha oĩ umi tenonde oĩva opytátava tapykuépe” (Lucas 13:30). Umi “itapykuéva” haʼe hína umi ndahaʼéiva hudío, ha avei umi hudío ojereko asýva. “Umi tenonde oĩva” katu, haʼe umi líder rrelihióso hudío opensáva iñimportanteveha ótrogui haʼe haguére Abrahán desendiénte. Ojeʼévo ‘opytataha tapykue’, heʼise hína umi imalagradesídova noĩmoʼãiha Ñandejára Rréinope.

Koʼág̃a umi fariséo ou heʼi Jesúspe: “Esẽ tereho koʼágui, cháke Herodes [Antipas] ndejukase”. Oiméne rréi Herodes voi omoherakuã upéva ikatu hag̃uáicha Jesús oho upégui. Jaikuaaháicha, ko rréi ojukaukáma kuri Juan el Bautístape, ha ikatu hína okyhyje ojejukárõ g̃uarã Jesúspe ha oñekomplika chupe. Péro Jesús heʼi umi fariséope:  “Herodes ningo iletradove aguaraʼígui. Tapehóna peje chupe: ‘Amosẽ umi demónio, amonguera hasývape, ajapo koʼã mbaʼe koestedía, ajapóta koʼẽrõ, ha tres día haguépe ajapopáta che rembiapo’” (Lucas 13:31, 32). Upéicharõ, Herodes ni avave ndojokomoʼãi Jesúspe ojapo hag̃ua pe traváho Itúva onkarga vaʼekue chupe. Jesús osegíta okumpli pe tembiapo Ñandejára heʼi hagueichaite chupe.

Ojapopa rire hembiapo, Jesús oho Jerusalén gotyo. Haʼe heʼi: “Ndovaléi ningo peteĩ proféta ojejuka Jerusalén okárape” (Lucas 13:33). Ndaipóriramo jepe ni peteĩ profesía heʼíva Jesús omano vaʼerãha Jerusalénpe, haʼe heʼi ojejuka vaʼerãha chupe upépe. ¿Mbaʼérepa? Pórke Jerusalén haʼe hína pe kapitál ha upépe oĩ pe trivunál tuichavéva hérava Sanedrín, oĩháme 71 miémbro. Ko siudápe ojehusga umi ojeakusávape kómo fálso proféta. Avei Jerusalénpe oñekuaveʼẽ umi animál sakrifísioramo. Opa umívare, Jesús ohechakuaa upépente voi ojejukataha chupe.

Jesús oñembyasy ha heʼi: “Jerusalén, Jerusalén, rejukáva umi proféta ha rejapíva itápe umi Ñandejára remimboúpe..., ¡hetaite ningo añehaʼã ambyaty ne membykuéra, pe ryguasu ombyatyháicha imembykuéra ipepo guýpe! Péro peẽ ndapeipotái. ¡Péina! Pende róga ojeheja reíma peẽme” (Lucas 13:34, 35). Umi oikóva Jerusalénpe orrechasa Ñandejára Raʼýpe, upéicha rupi opagáta hikuái upévare.

Jesús og̃uahẽ mboyve Jerusalénpe, peteĩ fariséo ruvicha oinvita chupe hógape okaru hag̃ua. Upérõ sábado ha upépe oĩ peteĩ kuimbaʼe hasýva, ijyva ha hetyma rurupáva, upévare umi oĩva pe fariséo rógape omañajoa Jesúsre jahecha mbaʼépa ojapo. Upémarõ haʼe oporandu umi fariséo ha umi oikuaa porãvape pe Léi: “¿Iporãpa oñemonguera umi hasývape sabadokue, térãpa nahániri?” (Lucas 14:3).

Avave ndeʼíri mbaʼeve. Jesús omonguera pe kuimbaʼépe ha upéi oporandu jey: “¿Mbaʼépa pejapóne pende raʼy térã pene rymba tóro hoʼáramo yvykuápe peteĩ sábado? ¿Napenohẽmoʼãipa pyaʼe porã?” (Lucas 14:5). Péro ndaipóri heʼíva mbaʼeve.