Ñande Apohare ningo iñaranduve ñandehegui, ha peteĩ túa oporohayhúvaicha, haʼe ojepyʼapy ñanderehe. Haʼe ndoipotái ñande jaiko ñane akãre (Jeremías 10:23). Umi mitã oikotevẽháicha ituakuéra ogia chupekuéra, ñande avei ñaikotevẽ Ñandejára ñandegia (Isaías 48:17, 18). Umi enseñánsa oĩva la Bíbliape ñandegia, umíva hína peteĩ rregálo omeʼẽva ñandéve Ñandejára.​—Elee 2 Timoteo 3:16.

 Jehová léi ha umi enseñánsa bíblica ñanemboʼe mbaʼéichapa ikatu jaiko vyʼápe koʼág̃a. Avei ohechauka ñandéve mbaʼéichapa ikatu ñakonsegi heta mbaʼe porã opytátava pára siémpre. Ñandejára ningo ñande Apohare, upévare oĩ porãta vyʼápe jasegíramo iléi ha ikonsého.​—Elee Salmo 19:7, 11 ha Apocalipsis 4:11.

 Umi enseñánsa oĩva la Bíbliape ohechauka ñandéve mbaʼépa Ñandejára oipota jajapo heta situasiónpe. Umi léi katu heʼi ñandéve mbaʼépa jajapo vaʼerã peteĩ situasión espesífikape (Deuteronomio 22:8). Upévare tekotevẽ ñapensa porã ñantende hag̃ua mbaʼéichapa peteĩ enseñánsa oĩva la Bíbliape ohechauka ñandéve la jajapo vaʼerã (Proverbios 2:10-12). Por ehémplo, la Biblia omboʼe ñande rekove haʼeha peteĩ rregálo oúva Ñandejáragui. Upe enseñánsa ñaguenohẽva chugui ñandegia heta situasiónpe, por ehémplo ñande travahohápe, ñande rógape ha javiaha jave. Jahecháramo ñande rekove peteĩ rregáloicha ñanepytyvõta ani hag̃ua jajapeligra rei.​—Elee Hechos 17:28.

 Jesús oñeʼẽ mokõi enseñánsa iñimportantevévare. Pe primero ohechauka maʼerãpa jaikove: jaikuaa  hag̃ua Ñandejárape, jahayhu ha jaservi hag̃ua chupe añoite. Upe enseñánsa jareko vaʼerã enkuénta entéro mbaʼe jadesidívape (Proverbios 3:6). Umi persóna orekóva enkuénta ko enseñánsa oreko Ñandejára amista, añetehápe ovyʼa, ha oikovéta pára siémpre.​—Elee Mateo 22:36-38.

 Pe segunda enseñánsa ñanepytyvõ jajogueraha porã hag̃ua ótrondi (1 Corintios 13:4-7). Jasegi hag̃ua ko segunda enseñánsa ñañehaʼã vaʼerã jatrata ñande rapichápe Ñandejára ñandetrataháicha.​—Elee Mateo 7:12 ha 22:39, 40.

 Umi enseñánsa oĩva la Bíbliape oipytyvõ umi famíliape ojoayhu ha oiko hag̃ua unído (Colosenses 3:12-14). Ñandejára Ñeʼẽ oprotehe umi famíliape pórke omboʼe pe ména ha tembireko opyta vaʼerãha oñondive oikove aja.​—Elee Génesis 2:24.

 Umi enseñánsa bíblica ñanepytyvõta ñande traváhope térã jahekáramo hína ñande travahorã. Por ehémplo la Biblia ñanemboʼe ñaneonrrádo ha ñandeguápo hag̃ua, ha umi patrón oipota ipersonalrã peichagua hénte (Proverbios 10:4, 26; Hebreos 13:18). La Biblia ñanemboʼe avei javyʼa hag̃ua jahupytývo umi mbaʼe ñaikotevẽva ha javalora hag̃ua ñane amista Ñandejárandi ñamotenonde rangue pe pláta.​—Elee Mateo 6:24, 25, 33 ha 1 Timoteo 6:8-10.

 Umi enseñánsa oĩva la Bíbliape ñanepytyvõ ñaneresãi hag̃ua (Proverbios 14:30; 22:24, 25). Por ehémplo Ñandejára Ñeʼẽ oproivi jakaʼu, ha upéva ñandeprotehe umi mbaʼasýgui ha heta aksidéntegui (Proverbios 23:20). Jehová ningo opermiti jaʼu umi vevída, péro ndoipotái jaʼu rasa (Salmo 104:15; 1 Corintios 6:10). Ñandejára enseñánsa ñanepytyvõ ñañatende hag̃ua umi mbaʼe jajapóvare ha avei umi mbaʼe ñapensávare (Salmo 119:97-100). Umi kristiáno osegi Ñandejára heʼíva ndahaʼéi ou porãguinte chupekuéra, síno ojapo avei omombaʼeguasu hag̃ua Jehovápe.​—Elee Mateo 5:14-16.