Ñandejára Rréino ningo peteĩ goviérno oĩva yvágape. Ko Rréino opytáta entéro umi goviérno umáno rendaguépe ha ko Rréino rupive ojejapóta Ñandejára volunta yvágape ha avei ko yvy ape ári. Ñandejára ojapótava Irréino rupive ningo peteĩ notísia iporãitereíva. Yvyporakuéra ymaitereíma oikotevẽ peteĩ goviérno ihústova, ha péva haʼe hína Ñandejára Rréino. Ko Rréino rupive enterove oikóta peteĩ ñeʼẽme ko yvy ape ári.​—Elee Daniel 2:44; Mateo 6:9, 10 ha 24:14.

 ¿Mávapa ogovernáta ko Rréinope? Jehová oelehíma Itaʼýra Jesucrístope ogoverna hag̃ua.​—Elee Apocalipsis 11:15.

 Ehecha pe vidéo ¿Mbaʼépa hína Ñandejára Rréino?

 Jesús ningo pe Rréi ikatupyryvéva pórke imbaʼeporã ha ojapóva guive oĩ porã (Mateo 11:28-30). Haʼe ipoderóso ha ikatúta oipytyvõ umi héntepe pórke ogovernáta yvága guive. Jesús oikove jey rire oho yvágape ha oguapy Jehová deréchape, ohaʼarõ Itúa omoĩ peve chupe kómo Rréi (Hebreos 10:12, 13). Upéi Ñandejára omeʼẽ chupe podér oñepyrũ hag̃ua ogoverna.​—Elee Daniel 7:13, 14.

 Ñandejára oiporavo peteĩ grúpo michĩva ogoverna hag̃ua Jesús ndive yvágape (Apocalipsis 5:10). Umi primeroite ojeporavo vaʼekue upearã haʼe vaʼekue Jesús apostolkuéra iñeʼẽrendúva. Ha koʼág̃a peve Jehová osegi oiporavo kuña ha kuimbaʼe iñeʼẽrendúva chupe ogoverna hag̃ua Jesús ndive. Jesúsre oiko haguéicha, haʼekuéra oikove jey rire ndorekói kuérpo umáno, síno oiko chuguikuéra espíritu.​—Elee Juan 14:1-3 ha 1 Corintios 15:42-44.

  ¿Mboýpa hína umi ohótava yvágape? Jesús ohenói chupekuéra “che ovecha mbovymíva” (Lucas 12:32). Oĩta 144.000 ohótava yvágape ogoverna hag̃ua ko yvy Jesús ndive.​—Elee Apocalipsis 14:1.

 Ñandejára Rréino oñepyrũ ogoverna yvágape áño 1914-pe. a Jesús oñepyrũrõ guare ogoverna primeroite voi omombo Satanás ha idemoniokuérape ko yvy ape ári. Satanás ipochyeterei ha omoñepyrũ heta provléma ko yvýpe (Apocalipsis 12:7-10, 12). Upe guive hetavéntema osufri yvyporakuéra. Umi gérra, ñembyahýi, mbaʼasy ha terremóto haʼe hína peteĩ “señál” ohechaukáva pe Rréino koʼẽrõitéma oñepyrũtaha ogoverna ko yvy ape ári.​—Elee Lucas 21:7, 10, 11, 31.

 Oñemombeʼu rupi ko yvy tuichakuére umi notísia porã, Ñandejára Rréino ombyaty hína peteĩ grúpo tuichaitereíva, koʼãva hína hénte opa tetãygua oikóva peteĩ ñeʼẽme. Hetaiterei persóna ipyʼaporãva oñemoĩma Ñandejára Rréino poguýpe, ha Jesús ogoverna chupekuéra. Ñandejára Rréino oñangarekóta hesekuéra ohundi vove ko múndo aña. Upéicharõ, enterove orresiviséva umi mbaʼe porã oguerúva Ñandejára Rréino iñeʼẽrendu vaʼerã Jesúspe ha oñemoĩ vaʼerã ipoguýpe.​—Elee Apocalipsis 7:9, 14, 16, 17.

 Jesús ogovernáta 1.000 áñore, ha upe aja oñekumplíta Ñandejára volunta ko yvýpe g̃uarã. Ko yvy kompletoitégui oikóta peteĩ paraíso. Upe rire Jesús ontrega jeýta pe Rréino Itúape (1 Corintios 15:24-26). ¿Mávapepa remombeʼuse ko notísia porã oñeʼẽva Ñandejára Rréinore?​—Elee Salmo 37:10, 11, 29.