Che família oiko vaʼekue peteĩ puévlo héravape Tellancourt, opytáva noréste de Fránciape. Che túva onase vaʼekue Fránciape, ha che sy katu Itáliape. Arekórõ guare 8 áño, rova Rómape (Italia). Upépe roho roiko peteĩ vílla oĩháme umi hénte imboriahuvéva. Ivai vaʼekue la ore pórte, ha upévare che túva ha che sy manterei ojodiskutími ha osapukái ojupe.

Arekórõ guare 15 áño, che sy heʼi chéve asẽ hag̃ua aheka che amigorã. Upémarõ aiko pe kállere ha ndapytaguasuvéi ógape. Sapyʼaitérõ g̃uarã añepyrũma chejúnta vai. Peteĩ díape, peteĩ karai haʼetévaicha ikalidáva oñemboja che rendápe ha oofrese chéve dróga. Che aasepta pórke aimoʼã péicha ahechaukataha chekariaʼymaha. Añepyrũ aipuru dróga ha cherekovai, ha heta vése oĩ vaʼekue chevioláva. Nacheimportavéi voi mbaʼeve, nacheinteresái aikovépa térã nahániri ha añeñandu cheañoite. Arekópe 16 áño ajesuisidamoʼã, amboyʼu peteĩ votélla de whisky ha ajepoi peteĩ lágope. Apyta en kóma 3 díare.

Upéi añepyrũ amombaʼe che rekove, péro avei cheviolénto ha aporombotavy. Ajeofrese umi héntepe, ha aime rire hogapekuéra, adroga chupekuéra ha amondapa la orekomíva. Umi mafióso ojevalémi cherehe otrafika hag̃ua dróga Italia tuichakuére ha upévare manterei añaprovlemámi umi polisíandi. Naisentídoi chéve mbaʼeve ha desástre la che rekove. Upéicharõ jepe, che aguerovia ikatuneha ajapo álgo iporãva che rekovégui. Upémarõ añemboʼe Ñandejárape ha ajerure chupe un áñonte avyʼami hag̃ua ha aiko hag̃ua pyʼaguapýpe.

Arekórõ guare 24 áño, adesidi ava Inglatérrape. Che aikuaa ajapeligraha pe aikohápe pórke umi trafikánte chejukase. Ava mboyve aha avisita che sýpe, ha kavalete oĩ hína kuri upépe peteĩ karai hérava Annunziato Lugarà ha oñemongeta che sýndi la Bíbliare. * Che añesorprendeterei pórke aikuaa mbaʼeichagua persónapa vaʼekue haʼe yma, upévare akyhyje ha aporandu chupe mbaʼépa haʼe ojapo upépe. Haʼe omombeʼu chéve mbaʼeichaitépa okambia oiko hag̃ua chugui  testígo de Jehová, ha oprometeka chéve añeʼẽtaha umi Testígondi ag̃uahẽ rire Inglatérrape. Che apromete chupe, péro ag̃uahẽmírente upépe, asegi jey aha tape vaíre.

Peteĩ vuéltape, atopa Lóndrespe peteĩ Testígore oofrese jave rrevísta Ñemañaha ha ¡Despertad!, peteĩ kálle ohasahárupi heta hénte. Upépe chemanduʼa la apromete vaʼekuére Annunziátope ha aporandu pe Testígope ndaikatuichénepa chemboʼe la Biblia.

Chembovyʼaiterei umi mbaʼe aaprendéva la Bíbliagui. Por ehémplo, opokoiterei cherehe la heʼíva 1 Juan 1:9-pe: “Ñandejára ijeroviaha ha ihústo, upévare ñamombeʼúramo ñande pekádo haʼe ñaneperdonáta, ha ñanemopotĩta”. Ko versíkulo tuichaiterei chepytyvõ pórke che añeñandu vaieterei vaʼekue umi mbaʼe ajapóvare ha apensa chekyʼaha Ñandejára renondépe. Pyaʼe voi añepyrũma aha umi rreunión ojejapóvape pe Salón del Reino de los testigos de Jehovápe, ha umi Testígo cherresivi porãiterei. Ahecha mbaʼéichapa haʼekuéra oñoamigoite ha ojoayhu oñoermánoicha. Che ningo upéva la ymaite guive aipotáva, upévare aimese pe kongregasiónpe.

Ndahaʼéi vaʼekue la ijetuʼuetereíva chéve aheja hag̃ua pe dróga ha anive hag̃ua cherekovai. Péro ijetuʼu de ótro chéve akambia hag̃ua che lája. Ahechakuaa arrespeta vaʼerãha che rapichakuérape ha chembaʼerechakuaa vaʼerãha. Ha añetehápe koʼag̃aite peve añehaʼã gueteri amehora. Péro Jehová chepytyvõ, ha péicha rupi tuicháma akambia. Áño 1997-pe, astudia rire 6 mésere la Biblia, ajevautisa ha oiko chehegui testígo de Jehová.

Ajevautisa rire, amenda peteĩ kuñataĩ héravare Barbara, ojevautisa ramo léntova avei upérõ. Peteĩ che amígo yma guare ohechávo mbaʼeichaitépa che akambia oñepyrũ avei ostudia la Biblia. Kon el tiémpo, haʼe ha iñermána ojevautisa avei ha oiko chuguikuéra testígo de Jehová. Upéi, che avuéla ermána orekóma vaʼekue mas de 80 áño oñepyrũ avei ostudia ha ojevautisa omano mboyve.

Koʼág̃a che aservi kómo ansiáno peteĩ kongregasión oĩvape Lóndrespe, ha che rembireko ha che ropredika 70 órarupi káda mes ha romboʼe la Biblia umi hénte oñeʼẽvape italiano. Sapyʼánte añedeprimi apensávo umi mbaʼe ajapo vaʼekuére yma, péro Barbara tuichaiterei chepytyvõ péicha jave. Koʼág̃a avyʼaiterei che rogapýpe, ha Ñandejára oñangareko cherehe peteĩ Túvaicha. Che ningo siémpre aipotáva koʼã mbaʼe. Ajerure vaʼekue Ñandejárape un áñonte avyʼa hag̃ua ha aiko hag̃ua pyʼaguapýpe, péro haʼe omeʼẽ chéve hetaiteve mbaʼe.