Laura * og̃uahérõ guare Európape, oreko kuri la esperánsa ombaʼapóvo kómo pelukéra. Péro 10 día pukukue oñeinupã chupe, oñeamenasa ihentekuérape ha ojeovliga chupe ombaʼapo hag̃ua de prostitúta.

Laura odeve kuri 40.000 éuro ipatrónape, ha opaga hag̃ua upéva tekotevẽ kuri ogana de 200 a 300 éuro káda pyhare. * Haʼe omombeʼu: “Heta vése apensa ajeskapávo upégui. Péro akyhyje avei ojejapórõ g̃uarã álgo ivaíva che hentekuérare. Upévare ndarekói kuri opsión”. Péro ndahaʼéi Laura añónte la ohasáva koʼã mbaʼe, ko múndope mas de 4 millón tapichápe ojeovliga hína avei ombaʼapo hag̃ua umi prostivuloháre.

Ojapo 4.000 áñorupi peteĩ mitãrusu hérava José ojegueraha hague oservi hag̃ua esklávoramo peteĩ karai iplataitereíva rógape, ha umi iñermanokuéra voi la ovende vaʼekue chupe. Primerorã Josépe noñemaltratái vaʼekue Láurape oñemaltrata haguéicha. Péro ipatrón rembireko heʼírõ guare chupe oñenoseha hendive, haʼe oñenega ha pe kuña heʼi guaʼu hese oviolase hague chupe, upévare Josépe oñemondo anga kárselpe (Génesis 39:1-20; Salmo 105:17, 18).

José ningo peteĩ esklávo yma guare, Laura katu peteĩ eskláva ko ñane tiempopegua. Péro mokõivévapente oñevende kuri ombaʼapo hag̃ua ótro paíspe ha ojetrata chupekuéra merkaderíaicha. Umi ovendéva hapichápe ningo plátante ointeresa.

Umi tetã ningo okonsegi vaʼekue heta esklávo umi gérra rupive. Ojeʼe voi pe rréi de Egipto héra vaʼekue Tutmosis III okonsegi hague 90.000 esklávorupi oñorairõ rire Canaán kóntrape. Umi egipcio omombaʼapo kuri chupekuéra umi minaháre, omopuʼã hag̃ua umi témplo ha ojapo hag̃ua umi y rape tuicháva.

Roma omanda guasúrõ guare, heta esklávo ojeguereko umi gérra káusare, ha algúna vése oñemoñepyrũ  voi umi gérra ojeipotave rupi esklávo. Ojekalkula voi pe síglo 1-pe, la mitárupi umi oikóvagui Rómape haʼe hague esklávo. Roma ha Egíptope ningo hetaiterei anga oñemaltrata chupekuéra. Por ehémplo, umi esklávo ombaʼapóva umi minaháre Rómape, 30 áñorupinte oikove.

Ohasávo pe tiémpo, osegi gueteri oĩ heta esklávo. Por ehémplo, síglo 16 guive síglo 19 peve, ojegueru umi africánope ombaʼapo hag̃ua esklávoicha Américape, ha upéva peteĩ negósio tuichaitereíva kuri. Peteĩ infórme oguenohẽ vaʼekue pe UNESCO heʼi voi: “Ojekalkula 25 a 30 millón kuimbaʼe, kuña ha mitã ojesekuestra ha oñevende hague” upe tiémpope. Ojeʼe voi hetaiterei omano hague ohasárõ guare hikuái pe oséano Atlántico. Peteĩ esklávo osovrevivi vaʼekue hérava Olaudah Equiano, omombeʼu: “Ahendu jepi umi kuña hasẽ asývo ha umi omanombotáva mbaʼeichaitépa anga ipyahẽ. Legálmente ivaieterei umi mbaʼe rohasa vaʼekue”.

Ñambyasýramo jepe, oĩ gueteri hetaiterei esklávo ko ñane tiémpope. Pe Organización Mundial del Trabajo heʼi oĩha 21 millónrupi kuimbaʼe, kuña ha mitã ombaʼapóva esklávoicha, algúna vése saʼieterei ojepaga chupekuéra térã katu ndojepagái voi. Oñemombaʼapo jepi chupekuéra umi minaháre, fávrika ojejapohápe téla, oleríape, prostívulope ha empleádaicha. Jepe oĩ léi oproivíva oñemombaʼapo péicha umi héntepe, amasdía hetave oĩ ombaʼapóva esklávoicha.

Heta esklávope ningo oñemaltrata vaieterei ha upéva káusare oñemoĩ hikuái ipatronkuéra kóntrape oñemosãso hag̃ua chupekuéra. Por ehémplo, síglo 1-pe Jesús ou mboyve, peteĩ kuimbaʼe hérava Espartaco ha 100 mil esklávorupi opuʼã Rómare, péro osẽ vai hikuái. Ha síglo 18-pe, umi esklávo oikóva pe ísla La Españólape opuʼã avei ipatronkuérare. Haʼekuéra ningo ombaʼapo vaʼekue umi takuareʼẽndýpe ha upépe oñemaltrata vaieterei chupekuéra. Upéva káusare oiko peteĩ ñorairõ ipukúva 13 áño, ha upéicha rupi áño 1804-pe oñeindependisa Haití.

Péro pe liverasión tuichavéva oiko kuri umi israelíta oñemosãsórõ guare Egipto poguýgui. Upérõ ningo 3 millón de persónarupi voi oñemosãso. Haʼekuéra ningo omerese vaʼekue upe liverta. La Biblia omombeʼu mbaʼéichapa oiko vaʼekue umi israelíta Egíptope heʼívo: “Umi egipcio ojapoka umi israelítape opaichagua traváho pohýi, ha otrata vai chupekuéra umi esklávoicha” (Éxodo 1:11-14, TNM). Peteĩ faraón, haʼéva hína pe rréi de Egipto, omanda vaʼekue voi ojejukapa hag̃ua entéro mitãʼi  onasévape ani hag̃ua umi israelíta oñembohetaiterei (Éxodo 1:8-22).

Umi israelítape oñemosãso vaʼekue Egipto poguýgui, ha upéva ningo peteĩ mbaʼe ndaijojaháiva, pórke upérõ Ñandejára voi olivera chupekuéra. Haʼe heʼi vaʼekue Moiséspe: “Che ahechapaite hína mbaʼéichapa ohasa asy hikuái. Chete aguenohẽta chupekuéra umi egipcio poguýgui” (Éxodo 3:7, 8, TNM). Koʼag̃aite peve ningo umi hudío káda áño ofesteha pe Páskua ogueromanduʼa hag̃ua upe oiko vaʼekue (Éxodo 12:14).

La Biblia oasegura ñandéve Ñandejára Jehová ihústo ha nokambiaiha (2 Crónicas 19:7; Malaquías 3:6). Haʼe omanda vaʼekue Jesúspe omombeʼu hag̃ua umi héntepe “isãsotaha umi oñeñapytĩva” ha omosãsotaha umi ohasa asývape (Lucas 4:18). ¿Oñeñeʼẽpa koʼápe umi ombaʼapóvare esklávoicha? Amalisia nahániri. Jesús ningo oñembou vaʼekue olivera hag̃ua umi héntepe pe pekádo ha ñemano poguýgui. Haʼe heʼi avei: “Pe añetegua penemosãsóta” (Juan 8:32). Koʼág̃a avei pe añetegua Jesús omboʼe vaʼekue osegi gueteri olivera umi héntepe heta hendáicha. Reikuaaséramo mbaʼéichapa oiko upéva, ikatu rehecha pe rrekuádro: “ Pe añetegua chemosãso”.

Ñandejára ningo heta hendáicha oipytyvõ vaʼekue José ha Láurape isãso hag̃ua. Reikuaasevéramo Joségui ikatu relee Génesis kapítulo 39 al 41. Péro, ¿mbaʼéichapa Laura ou vaʼekue isãso?

Láurape oñemosẽ rire peteĩ país Européogui, oho oiko Espáñape. Upépe oikuaa umi testígo de Jehovápe ha oñepyrũ ostudia hendivekuéra la Biblia. Haʼe ojedesidi okambiataha oiko hag̃ua Ñandejára oipotaháicha, upévare okonsegi ótro traváho ha ojerure ipatronakuépe omomichĩmie hag̃ua chupe pe kuóta opagáva hína. Péro peteĩ día, pe kuñakarai ohenói Láurape ojerure hag̃ua chupe perdón ha heʼi avei chupe natekotevẽveimaha opaga upe odevéva. Péro, ¿mbaʼére piko ko kuñakarai tuichaite ou okambia? Avía sído haʼe oñepyrũ avei ostudia la Biblia umi testígo de Jehovándi. Laura heʼi: “Añetehápe pe añetegua ñanemosãso ñaimoʼãʼỹháicha”.

Ñandejára Jehová oñeñandu vaieterei kuri ohechárõ guare mbaʼeichaitépa umi egipcio ombosufri umi israelítape, upévare ikatu jaʼe peichaite avei oñeñanduha ohechávo koʼág̃arupi oĩha upeichagua inhustísia. Péro anivéma hag̃ua oĩ persóna ombaʼapóva esklávoicha, entéro oĩva ko yvy ape ári okambia vaʼerã ha oiko Ñandejára oipotaháicha. Péro haʼe oprometéma oguerutaha upe kámbio. La Biblia heʼi voi: “Haʼe opromete haguéicha, ñande ñahaʼarõ hína yvága ha yvy ipyahúva, ha umívape akóinte oĩta tekojoja” (2 Pedro 3:13).