Pe primer kuimbaʼe Adán haʼe hína ñande túa ypykue, upévare enterove ñande haʼe hína peteĩ famíliante. Ha umi oĩva peteĩ famíliape ojoayhu ha ojorrespeta vaʼerã, upéicharõ jepe koʼág̃arupi oĩ hetaiterei ndojapóiva upéva. Péro Ñandejára ndoipotái jaiko upéicha.

“Rehayhu vaʼerã nde rapichápe nde voi rejehayhuháicha” (LEVÍTICO 19:18).

“Pesegi vaʼerã pehayhu pene enemigokuérape” (MATEO 5:44).

Emañamína mbaʼéichapa Ñandejára oexplika upéva 1 Corintios 13:4-7-pe:

“Pe oporohayhúva ipasiénsia ha imbaʼeporã”.

Epensamína: ¿Mbaʼéicha reñeñandu umi ótro ipasiénsia, imbaʼeporã ha ndaipochýiramo nendive?

“Naiñenvidiósoi”.

Epensamína: ¿Mbaʼéicha reñeñandu umi ótro siémpre opensa vaíramo nderehe térã neenvidia?

“Nopensái ijehénte”.

Epensamína: ¿Mbaʼéicha reñeñandu umi ótro orrespetáramo ipyʼaite guive nde repensáva, ha noñemohatãiramo heʼívape?

“Ndaipyʼarói”.

Epensamína: Ñandejára oĩ operdona hag̃uáicha umi ojapóvape peteĩ mbaʼe vai oiméramo oñarrepenti. La Biblia heʼi voi: “Haʼe ndoikomoʼãi imanduʼa tódo el tiémpo ñande pekádore, ni ndopytamoʼãi ipochy ñanderehe pára siémpre” (Salmo 103:9). Javyʼaiterei ningo peteĩ ñande rapicha ñaneperdonáramo jafalla jave. Upéicha avei, siémpre ñaime vaʼerã ñaperdona hag̃uáicha ñande rapichakuérape (Salmo 86:5).

“Ndovyʼái umi mbaʼe vai ojejapóvare”.

Epensamína: Oikóramo ñanderehe peteĩ mbaʼe vai, ndaigústoi oĩrõ oñembohory térã opukáva ñanderehe. Upéicha avei, ndovaléi javyʼa oikóramo peteĩ mbaʼe vai ótrore, lomímonte oiméramo upe persóna ñandetrata vai rakaʼe.

Ñandejára ñanevendesi hag̃ua, jajapo vaʼerã entéro koʼã mbaʼe ha jahayhu opaichagua persónape. Ha upéva ikatu jajapo heta hendáicha, peteĩva haʼe hína ñaipytyvõ umi oikotevẽvape ajúda.