1. Jehová haʼéramo jepe Dios Todopoderóso, ¿mbaʼe invitasiónpa omeʼẽ isiervokuérape?

JEHOVÁ hína pe Dios Todopoderóso, ojapo vaʼekue opa mbaʼe. Haʼe ningo pe persóna iñaranduvéva ko univérsope. Job oikuaa porã vaʼekue upéva, upéicha rupi Ñandejára oñeʼẽrõ guare chupe pe kreasiónre, haʼe heʼi: “Koʼág̃a aikuaa nde ikatuha rejapo opaite mbaʼe, ha umi mbaʼe rejaposéva guive katuete rejapóta” (Job 42:2, NM). Jahechaháicha, Jehová ikatu ojapo oimeraẽ mbaʼe ojaposéva ha noikotevẽi avave oipytyvõ chupe. Upéicharõ jepe, haʼe oporohayhúgui oinvita isiervokuérape ombaʼapo hag̃ua hendive.

2. ¿Mbaʼe tembiapo iñimportantetereívape Jehová omeʼẽ Jesúspe?

² Jehová okrea vaʼekue Jesúspe raẽvete, ha upéi ojerure chupe ojapo hag̃ua hendive opa mbaʼe oĩva yvágape ha ko yvy ape ári (Juan 1:1-3, 18). Apóstol Pablo heʼi vaʼekue Jesúsre: “Ñandejára ojevale hese ojapo hag̃ua opa mbaʼe oĩva yvágape ha yvy ape ári, umi mbaʼe ojehecháva ha umi ojehechaʼỹva, tahaʼe tróno, mburuvicha, goviérno térã autorida. Opa mbaʼe ojejapo haʼe rupive  ha imbaʼerã” (Col. 1:15-17). Jehová oheja Jesús oipytyvõ chupe ojapo hag̃ua umi tembiapo ijojahaʼỹva, ha oikuaauka upéva enterovépe. ¡Ajépa tuichaite priviléhio omeʼẽ chupe!

3. a) ¿Mbaʼe invitasiónpa orresivi Adán? b) ¿Mbaʼérepa Jehová oinvita chupe ombaʼapo hag̃ua hendive?

³ Jehová oinvita avei yvyporakuérape ombaʼapo hag̃ua hendive. Por ehémplo, onkarga Adánpe ombohéra hag̃ua entéro umi animalkuéra (Gén. 2:19, 20). Ñañeimahinamíntena: Oiméne Adán ostudia porã raʼe káda animálpe ha heta okalkula rire, omoĩ káda únope herarã. ¡Ajépa iporãite upe traváho! Péro ñapensa porãramo, Jehová ikatúnte avei kuri ombohéra umi animalkuérape, ha katuete ojapo porãta upéva pórke haʼe la Ijapohare. Upéicharõ jepe, omeʼẽ pe priviléhio Adánpe, ha péicha ohechauka ojeroviaha hese. Avei omeʼẽ chupe oportunida ojapo hag̃ua ko yvýgui peteĩ paraíso (Gén. 1:27, 28). Péro ñambyasýramo jepe, Adán orrechasa upe traváho, ha upe guive sarambíma oiko (Gén. 3:17-19, 23).

4. ¿Máva mávapa oipytyvõ avei Jehovápe okumpli hag̃ua ivolunta?

⁴ Jehová oinvita vaʼekue avei hetave persónape ombaʼapo hag̃ua hendive. Por ehémplo, Noé ojapo vaʼekue peteĩ árka ikatu hag̃uáicha haʼe ha ifamília ojesalva oúrõ guare pe Dilúvio. Moisés oguenohẽ umi isrraelítape Egíptogui, ha Josué katu omoinge chupekuéra pe Tiérra Prometídape. Salomón omopuʼã kuri pe témplo Jerusalénpe. Ha María haʼe vaʼekue Jesús sy. Jehová ojevale koʼã kuña ha kuimbaʼe iñeʼẽrendúvare, ikatu hag̃uáicha okumpli hembipota.

5. a) ¿Mbaʼe tembiapópepa Jehová oipota ñaipytyvõ chupe? b) ¿Oikotevẽpa Jehová ñaipytyvõ chupe? (Ehecha pe taʼanga oĩva iñepyrũme.)

⁵ Koʼág̃a Jehová ñaneinvita avei ñambaʼapo meme hag̃ua hendive Irréino rehehápe, ha ikatu jajapo upéva heta hendáicha. Péro oĩta umi mbaʼe ndaikatumoʼãiva jajapo, upéicharõ jepe enterovetéva ikatu japredika. Añetehápe ningo Ñandejára noikotevẽi ñanderehe ojapo hag̃ua upe tembiapo. Haʼe voi ikatu oñeʼẽ direktoite yvypórape, térã ikatu omoñeʼẽka umi itápe, Jesús heʼi haguéicha (Luc. 19:37-40). Upéicharõ jepe, haʼe oheja ñande ñaipytyvõ chupe. Heʼiháicha la Biblia, ñande “Ñandejára ajudánte” (1 Cor. 3:9). Apóstol Pablo oskrivi vaʼekue: “Ore rombaʼapo Ñandejára ndive ha roʼe jey jey peẽme: aníkena perresivi Ñandejára mbaʼeporã ijojahaʼỹva ha upéi ndapejapói chugui mbaʼeve” (2 Cor. 6:1). Tuichaiterei mbaʼe ningo ñambaʼapo Ñandejárandi, ha nañamereséiramo jepe, javyʼa vaʼerã omeʼẽ haguére ñandéve ko priviléhio. Jahechamína mbaʼérepa ñanembovyʼaite upéva.

6. ¿Mbaʼéichapa oñeñandu vaʼekue Jesús ombaʼapóvo Itúvandi?

⁶ Ñandejára siervokuéra siémpre ovyʼa ombaʼapo jave hendive. Por ehémplo Jesús, Jehová Raʼy, vyʼápe ombaʼapo hendive. La Biblia omombeʼu haʼe ou mboyve ko yvy ape ári, heʼi hague: “Chéve raẽ cheapo vaʼekue Jehová opa mbaʼégui [...]. Aiméma vaʼekue ijykére peteĩ ajudánte ikatupyrývaicha [...] ha haʼe koʼẽ koʼẽre ohechauka chéve cherayhuha, ha vyʼápe aime hendive tódo el tiémpo” (Prov. 8:22, 30, NM). Jesús kyreʼỹme ombaʼapo Ñandejárandi, oñeñandu porã umi mbaʼe ohupytývare, ha ovyʼa Itúva ohayhu haguére chupe.

7. ¿Mbaʼérepa javyʼa japredika jave?

⁷ Jesús heʼi vaʼekue javyʼaha ñameʼẽ ha jarresivi jave (Hech. 20:35). Katuete ningo javyʼaiterei kuri jaikuaa ypýrõ guare Jehovápe. Avei javyʼa ñamombeʼúvo umi héntepe umi mbaʼe ñaaprendéva. Heta persóna  oikuaaséva Ñandejárape oñepyrũ ostudia la Biblia. Upéi, mbeguekatúpe ontende ha ovalorave umi mbaʼe oaprendéva, ha okambia ohóvo. ¡Ajépa ñanembovyʼaite upéva! Pe predikasión ningo iñimportanteterei, pórke omeʼẽ oportunida umi héntepe oñemoĩ porã hag̃ua Ñandejárandi ha oikove hag̃ua opa árare (2 Cor. 5:20). Añetehápe, ndaipóri ótro traváho ñanembovyʼavéva upévagui.

8. ¿Mbaʼéichapa oñeñandu Marco ha Franco ombaʼapo haguére Jehovándi?

⁸ Javyʼa ningo jahechávo oĩha persóna oikuaaséva pe añetegua. Péro katuete javyʼave jaikuaa rupi jajapoha Ñandejára volunta, ha haʼe ovalora haguére umi mbaʼe jajapóva hesehápe (elee 1 Corintios 15:58). Marco, oikóva Itáliape, heʼi: “Ndaikuaái ni mbaʼéichapa haʼéta avyʼaitereiha añehaʼãmbaite haguére ameʼẽ lo mejor Jehovápe. Aikuaa porã haʼe núnka ndahesaraimoʼãiha umi mbaʼe ajapóvagui hesehápe”. Franco, oikóva avei Itáliape, heʼi: “Káda día Jehová oipuru la Biblia, umi puvlikasión ha ñane rreunionkuéra ñanemomanduʼa hag̃ua mbaʼeichaitépa ñanderayhu. Sapyʼánte ikatu ñapensa sonseraitereiha la jajapóva Jehová servísiope. Péro Jehovápe g̃uarã iñimportánte hína umíva. Upévare avyʼaiterei voi Jehová ojevale haguére cherehe, ha añemeʼẽ enkuénta aipuru porãha che rekove”.

9. a) ¿Mbaʼéichapa ojogueraha Jehová ha Jesús? b) ¿Mbaʼéicha rupípa haʼekuéra oñoamigoite?

⁹ Ñambaʼapo jave peteĩ persóna jahayhúvandi, katuete ñañemoag̃uive hese. Péicha jaikuaa porãve chupe, jaikuaa mbaʼe métapa oreko ha mbaʼépa ojapo hína ikatu hag̃uáicha ohupyty. Upéva oiko vaʼekue Jehová ha Jesús rehe. Hetaiterei tiémpore haʼekuéra ombaʼapo oñondive, upéicha rupi oñoamigoite ha ojoayhueterei hikuái. Haʼekuéra ojokuaa porãiterei, upévare Jesús heʼi vaʼekue: “Che ha pe Túva ningo peteĩnte” (Juan 10:30). Jehová ha Jesús oĩ peteĩ ñeʼẽme ha ojapo opa mbaʼe oñondive.

10. ¿Mbaʼérepa jaʼe pe predikasión ñanemoag̃uiveha Jehováre ha ñane ermanokuérare?

¹⁰ Jesús ojerure vaʼekue Itúvape oñangareko hag̃ua idisipulokuérare. ¿Maʼerãpa? Haʼe heʼi: “Oiko hag̃ua chuguikuéra peteĩnte, ñande peteĩnteháicha avei” (Juan 17:11). Ñaneñeʼẽrendúramo Jehovápe ha japredika pe marandu porã, jaikuaa porãve chupe. Jehechakuaa ikuentaveha jajerovia hese ha jasegi umi konsého omeʼẽva. Amáske ñañemoag̃ui Jehováre, haʼe avei oñemoag̃uive ñanderehe (elee Santiago 4:8). Ñaneñeʼẽrendúvo Jehovápe ha japredika, ñañemoag̃uive avei ñane ermanokuérare. ¿Mbaʼérepa jaʼe upéva? Pórke umi provléma jahasáva, ohasa avei ñane ermanokuéra, ha umi mbaʼe ñanembovyʼáva ombovyʼa avei chupekuéra. Avei entéronte ñañehaʼã jahupyty la mísma méta. Peteĩ ermána hérava Octavia oikóva Gran Bretáñape heʼi:  “Ambaʼapo rupi Jehovándi, añemoag̃uive hese ha che ermanokuérare. Ha ndahaʼéi vyroreínte la oreuníva umi ermanokuérandi, síno enterovéva rombovyʼase Jehovápe”. ¿Ndépa reñeñandu avei upéicha? Jahechávo ñane ermanokuéra oñehaʼãjoaha ombovyʼa hag̃ua Jehovápe, koʼytevéntema ñañemoag̃uive hesekuéra.

11. ¿Mbaʼérepa jaʼekuaa pe paraísope koʼytevéntema ñaneag̃uitaha Jehováre ha ñane ermanokuérare?

¹¹ Añetehápe ningo koʼág̃ama voi ñaime unído Jehovándi ha ñane ermanokuérandi, péro pe paraísope koʼytevéntema ñaneag̃uivéta ojuehe. Epensamíntena umi mbaʼe jahasátava oñondive. Jarresivíta umi oikove jeýtavape ha ñamboʼéta chupekuéra ojapo hag̃ua Jehová oipotáva. Avei jajapóta ko yvýgui peteĩ hardín neporãva. Jarekóta hetaiterei traváho, péro entéronte vyʼapópe ñambaʼapóta ñane ermanokuérandi. Cristo goviérno poguýpe, oñondivepa jahupytýta pe perfeksión. Entéro yvypóra ñaiméta peteĩ ñeʼẽme ha Jehová oñemoag̃uivéta ñanderehe. Añetehápe, haʼe ‘oavríta ipo omeʼẽ hag̃ua entérope opa mbaʼe oipotáva’ (Sal. 145:16, NM).

12. ¿Mbaʼéichapa pe predikasión ñandeprotehe?

¹² Ñande jaservíva Jehovápe ñanerakateʼỹ vaʼerã pe amista jarekóvare hendive. Entéronte ñaneimperfékto ha jaiko peteĩ múndo oĩvape Satanás poguýpe. Upéicha rupi ndahasyiete ova hag̃ua ñanderehe umi hénte opensa lája ha oiko lája. Umi mbaʼe ojejapóva ko múndope haʼete peteĩ rrío osyry hatãva, ha ikatúva ñandegueraha ha ñanembojahoga. Ndajaipotáiramo pe y ipuʼaka ñanderehe, tekotevẽ jayta ha ñasẽ upégui. Peichaite avei ñañehaʼãmbaite vaʼerã ani hag̃ua ipuʼaka ñanderehe ko múndo, ha ombyai ñane amista Jehovándi. Japredika jave, ñañekonsentra umi mbaʼe ideprovéchovare ñandéve, ndahaʼéi umi mbaʼe omokangývare ñande jerovia (Filip. 4:8). Avei upéicha jajeroviave Jehová promesakuérare ha jahayhuve Iléi. Ha upéva ñandeprepara porãve ikatu hag̃uáicha ñambohovái Satanáspe ha imúndo (elee Efesios 6:14-17).

13. ¿Mbaʼéichapa pe predikasión oipytyvõ Joélpe?

¹³ Iporã jaipuruve ñane tiémpo japredika, jastudia ha ñaipytyvõ hag̃ua umi ermáno ñane kongregasionguápe. Péicha nahembýi ñandéve tiémpo jajepyʼapyeterei hag̃ua ñane provlemakuérare, ha upéva ñandeprotehe avei. Peteĩ ermáno oikóva Austráliape hérava Joel omombeʼu: “Pe predikasión chepytyvõ ahechakuaa hag̃ua mbaʼéichapa oiko umi hénte ko múndope. Añemeʼẽ enkuénta ajehekýi hague heta akãrasýgui asegi rupi umi konsého oĩva la Bíbliape. Avei pe predikasión chepytyvõ cheumílde hag̃ua ha ikatu hag̃uáicha ajerovia Jehováre ha che ermanokuérare”.

14. ¿Mbaʼérepa jaʼekuaa Jehová ñanepytyvõha ijespíritu sánto rupive japredika hag̃ua?

¹⁴ Pe predikasión ñanepytyvõ avei jehechakuaa hag̃ua jarekoha Ñandejára espíritu sánto. Ñamoĩmi peteĩ ehémplo: Eñeimahinamína ojejerureha ndéve resẽ hag̃ua rerreparti pan nde várriore. Ojeʼe ndéve nandesueldomoʼãiha ha ndepaite reñenkargataha umi gástore. Upéicharõ jepe, nde reasepta upe traváho ha reñepyrũ rerreparti umi pan. Péro upéi rehechakuaa umi héntepe ndogustaiha nde prodúkto, ha oĩ voi umi ipochýva nderehe nderecha haguéntema. ¿Mboy tiémporepa reaguantáne peichagua traváhope? Ajépa sapyʼaitépe rejedeháta. Pe predikasión ningo ojogua lénto peichagua traváhope. Péro oĩ peteĩ diferénsia: ñande jasegi japredika jaipurúramo jepe ñane tiémpo, japaga umi gásto ñande  volsíllogui, ha oĩramo jepe oñembohorýva ñanderehe ha ñandetrata vaíva. Ko tembiapo ndaikatumoʼãi kuri jajapo Jehová nomeʼẽirire ñandéve ijespíritu sánto.

15. ¿Mbaʼérepa pe predikasión rupive oñekumpli Ñandejára volunta?

¹⁵ Pe predikasión rupive oñekumpli avei Ñandejára volunta. Jehová oipota kuri yvyporakuéra oikove opa árare, péro Adán ojerreveláramo jepe ikóntrape, Ñandejára nokambiái hembipota (Is. 55:11). Jehová ndohejareíri yvyporakuérape, síno ojapo tekotevẽva guive ñandepeʼa hag̃ua pekádo ha ñemanógui. Por ehémplo, ombou Jesúspe omeʼẽ hag̃ua hekove ñanderehehápe. Ha ikatu hag̃uáicha ideprovécho ñandéve upe sakrifísio, ñaneñeʼẽrendu vaʼerã Ñandejárape. Péro upearã jaikuaa vaʼerã mbaʼépa haʼe ojerure ñandehegui. Jesús omboʼe vaʼekue upéva idisipulokuérape ha omanda chupekuéra omboʼe hag̃ua avei ótrope. Upéicharõ, japredika jave umi héntepe ha ñaipytyvõ chupekuéra oñemoag̃ui hag̃ua Ñandejárare, ñambaʼapo hína Jehovándi ikatu hag̃uáicha umi hénte osẽ pekádo ha ñemano poguýgui.

16. ¿Mbaʼéichapa pe predikasión ñanepytyvõ ñakumpli hag̃ua umi mokõi mandamiénto iñimportantevéva?

¹⁶ Ñaipytyvõvo umi héntepe ohupyty hag̃ua pe jeikove opaʼỹva, jahechauka hína jahayhuha chupekuéra ha Jehovápe. “Haʼe oipota opaichagua tapicha ojesalva ha oikuaa porã pe añetegua.” (1 Tim. 2:4.) Peteĩ okasiónpe oñeporandu Jesúspe mbaʼépa pe mandamiénto iñimportantevéva oñemeʼẽ vaʼekue Israélpe, ha haʼe heʼi: “‘Rehayhu vaʼerã Jehová nde Járape nde pyʼaite guive, ne álma rugua guive, ha opa ne arandukue reheve’. Kóva hína pe mandamiénto tuichavéva ha tenondegua. Pe segundo ojoguáva avei chupe heʼi kóicha: ‘Rehayhu vaʼerã nde rapichápe nde rejehayhuháicha’” (Mat. 22:37-39). Japredika jave, ñakumpli hína koʼã mokõi mandamiénto (elee Hechos 10:42).

17. ¿Mbaʼéichapa reñeñandu repensávo pe priviléhio rerekóvare ikatu haguére repredika?

¹⁷ Pe tembiapo Jehová omeʼẽva ñandéve ñanembovyʼaiterei, ñanemoag̃ui hese ha ñane ermanokuérare, ha omombarete ñande fe. Avei omeʼẽ ñandéve oportunida jahechauka hag̃ua jahayhuha Jehovápe ha ñande rapichakuérape. ¡Ajépa iporãite ko priviléhio! Káda kristiáno jahasa diferénte situasión rehe. Péro tove tañanemitã térã ñandeeda, ñandepláta térã ñanemboriahu, ñanekangy térã ñanembarete, lomímonte ikatu ñañeʼẽ oimeraẽvape ñande kreénsiare. Katuete ñapensa peteĩ ermána Franciagua opensaháicha. Haʼe heʼi: “Pe Persóna iñimportantevéva ko univérsope, ojapo vaʼekue opa mbaʼe, ha haʼéva pe Dios ovyʼaitéva, heʼi chéve: ‘Tereho eñeʼẽ nde rapichakuérape cherehe. Eñeʼẽ ne korasõ mbytete guive umi héntepe. Che romombaretéta ha ameʼẽta ndéve che Ñeʼẽ. Amondóta umi ánhelpe nepytyvõ hag̃ua ha avei ameʼẽta ndéve ne irũrã. Romboʼéta mbaʼéichapa repredika vaʼerã ha rohekomboʼéta reikotevẽ jave’. Jehová omeʼẽ ñandéve oportunida ñakumpli hag̃ua ivolunta ha ñambaʼapo hag̃ua hendive. Upéva ningo peteĩ priviléhio tuichaitereíva”.