1. ¿Mbaʼéicha javépa ikatu hína oñemeʼẽ ñandéve peteĩ konsého, ha mbaʼérepa iñimportanteterei jajapo la ojeʼéva ñandéve?

 ENTEROVÉVA ningo ñaikotevẽ káda siérto tiémpo oñemeʼẽ ñandéve konsého. Sapyʼánte ikatu ñande voi jajerure peteĩ ermánope ojapo hag̃ua upéva, osino katu álgien ojepyʼapýgui ñanderehe omeʼẽ ñandéve peteĩ konsého pono jaha “tape vaíre” (Gál. 6:1). Avése katu oñemeʼẽmante vaʼerã ñandéve peteĩ konsého pórke jajavy peteĩ mbaʼépe. Tahaʼe haʼeháicha, iñimportanteterei jajapo la ojeʼéva ñandéve pórke upéva ikatu hína ñandesalvaite (Prov. 6:23).

2. Ohechaukaháicha Proverbios 12:15, ¿mbaʼérepa ñahendu vaʼerã umi konsého oñemeʼẽva ñandéve?

² Pe téxto ñaanalisáva ko artíkulope heʼi: “Ehendu porãkena umi konsého omeʼẽva ndéve umi iñarandúva” (Prov. 22:17). Ndaipóri ningo peteĩ persóna oikuaáva entéro mbaʼe, siémpre jatopáta álgien ikatupyryvéva ñandehegui térã iñexperiensiavéva ñandehegui (elee Proverbios 12:15). Upévare ñahendúramo umi konsého oñemeʼẽva ñandéve jahechaukáta hína ñaneumildeha, ñarrekonoseha umi mbaʼe ndaikatúiva jajapo, ha ñaikotevẽha álgien ñanepytyvõ jajapo hag̃ua umi mbaʼe jahupytyséva Jehová servísiope. Rréi Salomón heʼi vaʼekue voi: “Oĩhápe heta omeʼẽva konsého porã, ojehupyty heta mbaʼe” (Prov. 15:22).

3. ¿Mbaʼéichapa ikatu hína oñemeʼẽ ñandéve peteĩ konsého?

³ Sapyʼánte ikatu hína oñemeʼẽ ñandéve peteĩ konsého direktoite. Por ehémplo ikatu hína peteĩ ansiáno térã peteĩ ermáno iñakãguapýva ohechauka ñandéve álgo tekotevẽhápe ñakambia. Peteĩ ermáno omeʼẽramo ñandéve algún konsého oñemopyendáva la Bíbliape, jaagradese vaʼerã chupe ha ñañehaʼãmbaite jajapo la heʼi vaʼekue ñandéve. Péro sapyʼánte ikatu avei jarresivi peteĩ konsého ndahaʼéiva direktoite. Por ehémplo jalee jave álgo oĩva la Bíbliape térã umi puvlikasiónpe, ha japyta ñapensa hese jahechakuaágui tekotevẽha ñakambia álgope (Heb. 4:12).

4. Ohechaukaháicha Eclesiastés 7:9, ¿mbaʼépa ndovaléi jajapo oñemeʼẽ jave ñandéve peteĩ konsého?

 ⁴ ¿Serápa ifásil ñahendu umi konsého ha jajapo la ojeʼéva ñandéve? Legálmente nahániri, ha sapyʼánte ikatu voi ñañeñandu vai upéicha jave. ¿Mbaʼérepa? Segúramente enterovévape g̃uarã ifásil ñarrekonose ñaneimperfektoha, péro ndaigústoi ojeʼe jave ñandéve oĩha peteĩ mbaʼe ndajajapoporãiva ha tekotevẽha ñakambia (elee Eclesiastés 7:9). Ikatu voi ñañemoĩ ñañedefendese, térã ñapensa pe omeʼẽ vaʼekue ñandéve konsého ojapo hague upéva opensa vaíguinte ñanderehe, térã nañandegustái la heʼi lája ñandéve. Avei ikatu ñañemoĩ ñapensa pe ermáno voi orekoha heta defékto, por ehémplo ikatu hína jaʼe: “Mávaiko haʼe omeʼẽ hag̃ua chéve konsého, haʼéngo ojavýnte avei”. Amo ipahápe ñapensáramo nañaikotevẽiha pe konsého oñemeʼẽ vaʼekue ñandéve, posívlemente nañapenamoʼãinte hese. Térã katu jajerurétante ótra persónape omeʼẽ hag̃ua ñandéve peteĩ konsého si ñandegustátava.

5. ¿Mbaʼépa ñaanalisáta ko artíkulope?

⁵ Ko artíkulope ñaanalisáta unos kuánto ehémplo oĩva la Bíbliape, umíva apytépe umi nohenduséi vaʼekue umi konsého oñemeʼẽva chupe ha umi si oasepta vaʼekue. Avei ñaanalisáta mbaʼépa ñanepytyvõta ñahendu hag̃ua umi konsého ha ideprovécho hag̃ua ñandéve.

6. ¿Mbaʼépa ñaaprende la oiko vaʼekuégui Rehoboam rehe?

⁶ Ñaanalisamína rréi Rehoboam ehémplo. Haʼe oñepyrũmíre ogoverna, umi israelita ou vaʼekue ojerure chupe peteĩ mbaʼe. Haʼekuéra oipota kuri ombovevyive pe puévlope umi mbaʼe rréi Salomón ojerure vaʼekue chupekuéra. Ha oikoite la ojapo vaʼekue primerorã Rehoboam, pórke haʼe oho ojerure konsého umi kuimbaʼe ijedavéva oĩvape Israélpe. Ha haʼekuéra heʼi chupe iporãtaha openáramo pe puévlore, pórke upéicha haʼekuéra siémpre oapojáta chupe (1 Rey. 12:3-7). Péro posívlemente Rehoboámpe ndogustái kuri pe konsého omeʼẽva chupe koʼã kuimbaʼe, ha upémarõ ohónte oporandu umi ijaveguávape. Koʼã kuimbaʼe oiméne orekóma raʼe mas de 40 áño, ha upévare jaʼekuaa iñexperiénsiama hague hikuái (2 Crón. 12:13). Péro haʼekuéra omeʼẽ Rehoboámpe peteĩ konsého naiporãietéva, heʼi chupe hikuái oexihivéntema vaʼerãha pe puévlope (1 Rey. 12:8-11). Oñemeʼẽ rire Rehoboámpe koʼã mokõi konsého idiferentetéva, iporãta kuri haʼe oñemboʼe Jehovápe ha oporandu chupe mbaʼépa haʼe opensa, ha togia chupe odesidi porã hag̃ua. Péro upéva rangue haʼe oaseptánte pe konsého omeʼẽ vaʼekue chupe umi kuimbaʼe imitãvéva. Ha ojapo rupi upéva, amo ipahápe Rehoboam tuichaiterei ojeperhudika ijupe voi ha avei Israélpe. Ha upéva ikatu avei hína oiko ñande kásope, pórke sapyʼánte a lo mehór nañandegustamoʼãi peteĩ konsého jarresivíva. Péro pe konsého oñemopyendáramo la Bíbliape, jaasepta vaʼerã upéva.

7. ¿Mbaʼépa ñaaprende rréi Uzías ehémplogui?

⁷ Pe rréi Uzías nohenduséi vaʼekue avei umi konsého. Una vuéltape haʼe oike vaʼekue pe témplope, peteĩ párte ikatuhápe oike sólamente umi saserdóte, ha ojeprepara voi oofrese hag̃ua insiénso upépe. Upévare umi Jehová saserdóte heʼi chupe: “¡Uzías, nde ndovaléi rehapy insiénso Jehovápe! Umi saserdóte añoite ohapy vaʼerã insiénso”. ¿Mbaʼéichapa orreaksiona raʼe rréi Uzías? Haʼe iñumílderire oaseptáta kuri pe konsého ha upepete osẽ pe témplogui. Upéicharire ikatu kuri Jehová operdona chupe. Péro haʼe “ipochyeterei”. ¿Mbaʼérepa Uzías nohenduséi raʼe pe konsého oñemeʼẽ vaʼekue chupe? Oiméne haʼe opensa raʼe haʼe rupi pe rréi, orekoha derécho ojapo hag̃ua oñantoháva chupe. Péro Jehová nopensaiete upéicha. Uzías ijorgullóso rupi ojagarrapaite chupe lépra, ha opyta upéicha “omanoha día peve” (2 Crón. 26:16-21). Rréi Uzías ehémplo ñanemboʼe álgo iñimportantetereíva: Tahaʼe haʼéva umi priviléhio jarekóva, nañapenáiramo umi konsého oñemopyendávare la Bíbliape, Jehová nañandeguerohorymoʼãi.

8. ¿Mbaʼéichapa orreaksiona kuri Job oñeakonsehárõ guare chupe?

⁸ Angete ñaanalisa mokõi ehémplo naiporãietéva, péro la Biblia ohechauka oĩ hague avei umi oaseptáva umi konsého ha upéicha rupi heta Jehová ovendesi chupekuéra. Ñapensamína por ehémplo Job rehe. Haʼe ningo ojerovia vaʼekue Jehováre péro iñimperfékto vaʼekue, ha upéicha rupi heʼi vaʼekue heta mbaʼe noiporãiva. Upévare peteĩ vuéltape tekotevẽmante kuri okorrehi chupe Elihú ha avei Jehová. ¿Ha mbaʼéichapa orreaksiona raʼe Job? Haʼe iñumílde ha oasepta pe konsého oñemeʼẽ vaʼekue chupe, upévare heʼi upéi: “Che ningo ndaikuaáiguinte añeʼẽ kuri. [...] Ambyasyeterei la haʼe vaʼekue ha atĩ apytávo. Koʼág̃a aguapy yvýpe tanimbu apytépe, ahechauka hag̃ua añarrepentiha”. Ha Jehová heta ovendesi Jóbpe haʼe iñumílde rupi (Job 42:3-6, 12-17).

9. ¿Mbaʼéichapa Moisés orreaksiona raʼe Jehová okorrehírõ guare chupe, ha mbaʼérepa peteĩ ehémplo porã ñandéve g̃uarã upéva?

⁹ Moisés oheja vaʼekue avei ñandéve peteĩ ehémplo iporãitereíva, pórke peteĩ vuéltape tekotevẽ kuri ojekorrehi chupe ojavy rupi. Upérõ guare ningo Moisés ipochyeterei vaʼekue ha nomombaʼeguasúi Jehovápe, ha upévare haʼe heʼi chupe ndoikemoʼãiha pe Tiérra Prometídape (Núm. 20:1-13). Moiséspe ndogustái kuri la Jehová odesidi vaʼekue, ha upévare oporandu chupe ndaikatuichénepa okambia upéva. Péro Jehová orresponde Moiséspe: “Anivetéke reñeʼẽ chéve ko mbaʼére” (Deut. 3:23-27). ¿Oñamargápa raʼe Moisés la oiko vaʼekuére? Nahániri. Haʼe oasepta la Jehová heʼíva chupe ha upévare haʼe osegi ojevale hese omoakã hag̃ua Israel (Deut. 4:1). Moisés ha Job ningo oasepta vaʼekue ojekorrehírõ guare chupekuéra, ha iporãitereíta ñande ñañehaʼãmbaitéramo jasegi iñehemplokuéra. Job okambia vaʼekue la opensa lája ha ndoikói oñedefendesénte. Ha Moisés katu oasepta la Jehová heʼi vaʼekue chupe ha osegi ifiél operdéramo jepe peteĩ priviléhio haʼe omombaʼetereíva.

10. a) ¿Mbaʼéichapa Proverbios 4:10-13 ohechauka jahupytytaha heta mbaʼe porã jaaseptáramo umi konsého? b) ¿Mbaʼe ehémplo porãpa omeʼẽ ñandéve ñane ermanokuéra?

¹⁰ Jasegíramo umi ehémplo porã oheja vaʼekue ñandéve Ñandejára siervokuéra ifiélva, jahupytýta hetaiterei mbaʼe porã (elee Proverbios 4:10-13). Ha heta ermáno ha ermanakuéra oĩva ko múndo tuichakuére ojapóma voi hína upéva. Epensamína por ehémplo la omombeʼúvare Emmanuel. * Haʼe ningo oiko Cóngope ha heʼi mbaʼépa oiko vaʼekue hese una vuéltape: “Heta ermáno iñakãguapýva che kongregasionpegua oñemoag̃ui cherehe ha omeʼẽ chéve konsého pono ajapo álgo ivaíva. Che ajapo la heʼi vaʼekue chéve hikuái, ha upéicha rupi ajehekýi hetaiterei provlémagui”. Peteĩ prekursóra oikóva Canadápe hérava Megan katu heʼi: “Heta vése ndachegustái umi konsého arresivíva, péro ahechakuaa legálmente aikotevẽ hague umíva”. Ha ótro ermáno Croaciagua hérava Marko katu heʼi: “Che aju vaʼekue voi aperde che priviléhio, péro apensávo la oiko vaʼekuére añemeʼẽ enkuénta umi konsého arresivi vaʼekue tuichaiterei chepytyvõ hague amombarete jey hag̃ua che amista Jehovándi”.

11. ¿Mbaʼépa heʼi vaʼekue ermáno Klein orresivírõ guare peteĩ konsého?

¹¹ Ótro ehémplo iporãitereíva oheja vaʼekue ñandéve peteĩ ermáno hérava Karl Klein. Haʼe ningo oĩ vaʼekue pe Kuérpo Governántepe ha haʼe vaʼekue ermáno Rutherford amigoite. Peteĩ vuéltape ermáno Rutherford tekotevẽ vaʼekue okorrehi chupe. Ermáno Klein katu orrekonose primerorã ndogustái hague chupe upéva, ha norreaksionaporãi ojekorrehírõ guare chupe. Haʼe omombeʼu la oiko vaʼekue: “Al día sigiénte rojotopa ermáno Rútherforndi ha haʼe chesaluda porãiterei heʼívo chéve: ‘¿Mbaʼe la pórte Karl?’. Péro che katu añeñandu vaíti pe konsého omeʼẽ vaʼekuére chéve, ha  upévare apenamínte asaluda chupe. Haʼe opilla upéva ha heʼi chéve: ‘¡Eñatendéke Karl, háke Satanás ndereityse hína peteĩ trámpape!’. Legálmente atĩeterei chugui ha arresponde: ‘No, trankílo ermáno Rutherford, ndahaʼéingo mbaʼeve’. Péro haʼe opilla la ojehu vaʼekue chéve, ha upévare heʼi jeýnte chéve: ‘Oĩ porã, ani ejepyʼapy. Péro eñatendéke, pórke Satanás ndereityse hína peteĩ trámpape’. Ha siertoite la heʼi vaʼekue chéve. Ikatu peteĩ ermáno oñemoñeʼẽ mbarete ñandéve orekógui derécho upearã, péro ñande japytáramo ñandepyʼaro hendive jajapeligra hína. Pe Diablo ikatu ojevale upévare ñandereity hag̃ua” (Efes. 4:25-27). * Ermáno Klein oasepta pe konsého omeʼẽ vaʼekue chupe ermáno Rutherford, ha upéicha rupi haʼekuéra ikatu vaʼekue osegi oñoamigoite.

12. ¿Mbaʼépa ñanepytyvõta jaasepta hag̃ua umi konsého oñemeʼẽva ñandéve? (Salmo 141:5).

¹² ¿Mbaʼépa ñanepytyvõta jaasepta hag̃ua umi konsého? Tekotevẽterei ningo ñaneumílde ha ñanemanduʼa ñaneimperfektoha, ha upéicha rupi heta vése jajapoha vyrorei. Jahecháma haguéicha angete, Job tuichaiterei ojavy kuri peteĩ vuéltape péro upéi haʼe okambia la opensa lája. ¿Mbaʼérepa ojapo kuri upéva? Pórke Job iñumílde ha ohechauka upeichaha ohendúrõ guare la konsého Elihú omeʼẽ vaʼekue chupe, hiʼarive haʼe imitãitereive kuri Jóbgui. Ha Jehová ovendesi chupe la péicha ojapo rupi (Job 32:6, 7). Ñaneumílderamo jaaseptáta avei umi konsého oñemeʼẽva ñandéve ñapensáramo jepe nañaikotevẽi hague upéva, térã katu la persóna omeʼẽva ñandéve pe konsého imitãvéramo ñandehegui. Peteĩ ansiáno oikóva Canadápe heʼi voi: “Ndaikatumoʼãi ningo japrogresa avave nomeʼẽiramo ñandéve konsého”. Jahechaháicha, ñarrekonose vaʼerã enterovéva tekotevẽha jasegi japrogresa jahechauka hag̃ua umi kualida oúva Jehová espíritugui, ha jajapo porãve hag̃ua la haʼe omandáva ñandéve (elee Salmo 141:5).

13. ¿Mbaʼe rehepa ñanemanduʼa vaʼerã jarresivi jave peteĩ konsého?

¹³ Ñantende vaʼerã umi konsého jarresivíva en rrealida ohechaukaha Jehová ñanderayhuha. Haʼe ningo oipota iporãvante ñandéve g̃uarã (Prov. 4:20-22). Upévare ñaneakonseha jave Iñeʼẽ rupive, umi puvlikasión rupive, térã peteĩ ermáno iñexperiénsiava rupive, en rrealida ohechauka hína haʼe ñanderayhuetereiha. Hebreos 12:9, 10 heʼi voi haʼe ñandekorrehiha “ñane venefisiorã”.

14. ¿Mbaʼe rehepa ñañekonsentra vaʼerã oñemeʼẽ jave ñandéve peteĩ konsého?

¹⁴ Ñañekonsentra vaʼerã la ojeʼévare ñandéve, ha ndahaʼéi la ojeʼe lájare. Sapyʼánte ikatu hína nañandegustapái la oñemeʼẽ lája ñandéve peteĩ konsého. Upévare oiméramo ñaakonseháta álgienpe, ñañemoĩ vaʼerã ilugárpe ha ñapensa mbaʼéichapa ikatu jaʼe porãnte chupe la  jaʼeséva (Gál. 6:1). * Péro oiméramo ñande hína la jarresivíva peteĩ konsého, iporãta ñañekonsentráramo la ojeʼévare ñandéve oiméramo jepe nañandegustái la ojeʼe lája kuri. Ikatu voi ñañeporandu koʼã mbaʼe: “Ndachegustáiramo jepe la oñemeʼẽ lája chéve ko konsého, ¿noiméi piko irrasón raʼe? ¿Ikatúpa aaprende álgo ko konséhogui, iñimperféktoramo jepe pe persóna cheakonseha vaʼekue?”. Jahupytýta ningo hetaiterei mbaʼe porã ñañehaʼãmbaitéramo jasegi umi konsého oñemeʼẽva ñandéve (Prov. 15:31).

15. ¿Mbaʼérepa iporã jajerure konsého?

¹⁵ La Biblia ñanemokyreʼỹ jajerure hag̃ua ótrope tañaneakonseha. Heʼi voi umi iñarandúva ojerureha konsého (Prov. 2:3). Umi ojeruréva konsého ótrope normálmente odesidi porãve jepi heta mbaʼépe ha pyaʼeve oprogresa. Upéicha rupi ñañehaʼãmbaite vaʼerã ñande voi jajerure ermanokuérape tomeʼẽ ñandéve umi konsého ñanepytyvõtava.

16. ¿Mbaʼéicha javépa iporã jajerure konsého?

¹⁶ ¿Mbaʼéicha javépa iporãta jajerure konsého ñane ermanokuérape? Epensamína koʼã mbohapy situasiónre: 1) Peteĩ ermána ojerure peteĩ puvlikadóra iñexperiensiavévape oho hag̃ua hendive ojapo hag̃ua peteĩ estúdio bíblico, ha upéi ojerure chupe konsého ikatu hag̃uáicha omboʼe porãve la héntepe. 2) Peteĩ ermána soltéra ojoguase ijaorã, ha oporandu peteĩ ermána iñexperiensiavévape mbaʼépa opensa pe ao oelehi vaʼekuére. 3) Peteĩ ermánope oñeasigna ojapotaha primera ves peteĩ diskúrso púvliko. Upémarõ haʼe ojerure peteĩ ansiáno iñexperiénsiavape omeʼẽ hag̃ua chupe konsého ikatu hag̃uáicha ojapo porã pe diskúrso. Umi ermáno heta áñorema ojapóva diskúrso jepe iporãta ojeruréramo suherénsia ótro iñexperiénsiavape, ha upéi osegi umíva ikatu hag̃uáicha omehora omboʼe lája.

17. ¿Mbaʼépa jajapo vaʼerã ideprovécho hag̃ua ñandéve umi konsého?

¹⁷ Amo gotyove ningo katuete jasegíta jarresivi heta konsého. Ág̃a oiko vove upéva, nemanduʼákena umi mbaʼe ñaanalisa vaʼekuére ko artíkulope. Eñehaʼãmbaitékena esegi hag̃ua neumílde. Eñekonsentra la ojeʼévare ndéve, ha ndahaʼéi la ojeʼe lájare ndéve. Ha ultimoite, esegíkena umi konsého oñemeʼẽva ndéve. Ndaipóri ningo ni peteĩ persóna oikuaapámava voi entéro mbaʼe onase guive. Péro Ñandejára opromete ñandéve ‘ñahendúramo umi konsého ha jaasepta oĩ jave ñandekorrehíva’ katuete ñanearandutaha (Prov. 19:20).