“AÑETEHÁPE hetaiterei oĩ pe kóga oñemonoʼõ vaʼerã, umi omonoʼõva katu saʼi. Upévare, pejerurékena pe kóga Járape tombou hetave omonoʼõ vaʼerã ikóga” (Luc. 10:2). Ojapóramo jepe 2.000 áñorupi Jesús heʼi hague koʼã mbaʼe, ohechauka porã gueteri mbaʼe situasiónpepa oñeime koʼág̃a Myanmárpe. ¿Mbaʼérepa jaʼe upéva? Pórke upépe oĩ amo 4.200 puvlikadórupinte ha opredika vaʼerã 55 millón de persónape.

Péro Jehová, haʼéva hína pe kóga Jára, omomýi hetaiterei ermáno ha ermána de diferénte lugarguápe ova hag̃ua ko tetã oĩvape Ásiape, suréste gotyo. Haʼekuéra ova oipytyvõ hag̃ua pe kóga ñemonoʼõme. ¿Mbaʼéicha rupípa oñanima hikuái ova hetãgui? ¿Mbaʼépa oipytyvõ koʼã ermánope ikatu hag̃uáicha ojapo upéva? Ha, ¿mbaʼe vendisiónpa ohupyty hikuái? Jahechamína koʼã mbaʼe.

Ojapóma unos kuánto áño peteĩ prekursór Japongua hérava Kazuhiro oreko hague peteĩ atáke de epilépsia. Upérõ haʼe odesmaja kuri ha ojegueraha ospitálpe. Pe doktór oñatende vaʼekue hese heʼi nomanehavéi vaʼerãha 2 áñore. Kazuhiro nohaʼarõiete kuri upéva ha opensa: “¿Mbaʼéiko la ajapótava ko ndahejaseietéva che prekursorádo?”. Upémarõ oñemboʼe Jehovápe ipyʼaite guive, ha ojerure ohechaukamínte hag̃ua chupe mbaʼépa ikatu ojapo osegi hag̃ua oservi de prekursór.

Kazuhiro heʼi: “Un mes upe rire, peteĩ che amígo oservíva Myanmárpe ou oikuaa la che situasión. Haʼe cherenói ha heʼi chéve: ‘Myanmárpe ningo kolektívope la ojeikove. Nde rejúramo, ikatúta resegi nde prekursorádo ha nereikotevẽmoʼãi áutore’. Upémarõ aporandu che doktórpe ndojapovaimoʼãipa cherehe avárõ Myanmárpe. Nahaʼarõiete kuri la orrespondéva chéve. Haʼe heʼi: ‘Peteĩ neurólogo Myanmargua oĩ hína koʼág̃a Japónpe. Apresentáta ág̃a ndéve. Peichahágui ndeatáke jeýrõ, haʼe ikatúta oñatende nderehe’. Chéve g̃uarã koʼã mbaʼe oiko kuri pórke Jehová ombohovái la che ñemboʼe”.

Ensegidamíntema Kazuhiro omondo peteĩ korréo pe sukursál oĩvape Myanmárpe, omombeʼu hag̃ua chupekuéra haʼe ha hembireko ohoseha oservi upépe kómo prekursór. Upéi, 5 día riremíntema pe sukursál ja orrespondéma chupekuéra ha heʼi: “Pejumína, roikotevẽ ningo hetave prekursór”. Kazuhiro ha hembireko Mari ovende hiʼautokuéra, ohestiona ivísa ha ojogua umi pasáhe de avión. Koʼág̃a vyʼápe haʼekuéra oservi peteĩ grúpo de lenguáhe de séña pe lugár héravape  Mandalay. Kazuhiro heʼi: “Umi mbaʼe oikóva orerehe omombareteve ore jerovia Ñandejára promésare, oĩva Salmo 37:5-pe, heʼíva: ‘Eheja Jehová pópe opa mbaʼe redesidítava. Ejerovia hese ha haʼe katuete nepytyvõta’”.

Umi testígo de Jehová Myanmargua oreko kuri pe priviléhio oorganisa hag̃ua peteĩ asambléa espesiál áño 2014-pe. Heta ermáno ótro tetãygua oasisti upe asambléape. Ijapytépe oĩ vaʼekue peteĩ ermána Estados Unidosgua hérava Monique, orekóva 34 áño. Haʼe heʼi: “Aju rire pe asambléagui, añemboʼe Jehovápe ohechauka hag̃ua chéve mbaʼépa ikatu ajapove iservísiope. Avei, añeʼẽ che túa umíandi umi mbaʼe ahupytysévare. Mbohapyvévante ropensa iporãtaha aháramo aservi Myanmárpe, péro ajedesidi mboyve heta añemboʼe ha aheja ohasa peteĩ tiémpo”. Monique omombeʼu mbaʼérepa tekotevẽ kuri ojapo upéva.

Haʼe heʼi: “Jesús ningo omokyreʼỹ vaʼekue idisipulokuérape ‘okalkula hag̃ua mboýpa ogastáta’. Upévare añeporandu kuri: ‘¿Areko piko pláta ava hag̃uáicha? ¿Ikatúta piko aiko upe tetãme tekotevẽʼỹre ambaʼapoiterei añemantene hag̃ua?’”. Amo ipahápe Monique heʼi: “Pyaʼe voi ahechakuaa ndarekoiha sufisiénte pláta ava hag̃ua mombyryete”. ¿Mbaʼépa upéicharõ ojapo ko ermána ova hag̃ua? (Luc. 14:28).

Monique heʼi: “Peteĩ díape, che héfa heʼi oñeʼẽseha chendive. Ajepyʼapyeterei kuri pórke aimoʼã chemosẽtaha. Péro ndaupeichaiete, oagradese katu chéve ajapo porã haguére la che traváho. Heʼi avei ko vuéltape opagavetaha chéve. Pe pláta omeʼẽva chéve che suéldo ári kavalete ohupyty pe kantida aikotevẽva apaga hag̃ua che kuentakuéra”.

Monique oservi Myanmárpe diciembre de 2014 guive. ¿Mbaʼéichapa oñeñandu oservi rupi peteĩ lugár oñekotevẽvehápe umi opredikávare? Haʼe heʼi: “Avyʼaiterei ningo aime haguére koʼápe. Areko mbohapy estúdio bíblico. Por ehémplo astudia peteĩ kuñakarai orekóvandi 67 áño. Aha jave hendápe, ko kuñakarai vyʼápe cherresivi ha cheañuamba voi. Oaprendérõ guare Ñandejára heraha Jehová, hesay pororopa kuri. Upérõ heʼi chéve: ‘Koʼág̃a primera ves ahendu Ñandejára heraha Jehová. Nde ningo nemitãve chehegui, péro chemboʼe pe mbaʼe iñimportantevéva’. Ahendúvo upéva, cheresay pororopa kuri avei. Ãichagua experiénsia chepytyvõ avyʼaiterei hag̃ua aservi aja peteĩ lugár oĩvehápe nesesida”. Ndaʼareguasúi Monique oreko hague pe priviléhio ohóvo pe Eskuéla Oñembokatupyryve hag̃ua umi Opredikávape.

Pe Anuario de los testigos de Jehová 2013-pegua omokyreʼỹ vaʼekue avei unos kuánto ermánope oho hag̃ua oservi Myanmárpe. Peteĩ ermána hérava Li oreko mas de 30 áño. Haʼe oiko vaʼekue suréstepe Ásiape, ha oreko peteĩ traváho hoʼupaitéva chugui itiémpo. Péro umi mbaʼe oleéva pe Anuáriope omopensa chupe oho hag̃ua oservi Myanmárpe. Li heʼi: “Ahárõ guare pe asambléa espesiálpe Yangónpe 2014-pe, aikuaa peteĩ matrimónio oservívape Mandaláype kámpo chínope, oĩhápe heta nesesida. Che añeʼẽ chino, upévare ava Myanmárpe aipytyvõ hag̃ua pe grúpo chino oĩvape upépe. Rodesidi roiko oñondive Monique ndive Mandaláype. Jehová orevendesi pórke mokõivéva rotopa ore travahorã de médio tiémpo kómo maéstra la mísma eskuélape, ha rojuhu avei peteĩ lugár roiko hag̃ua namombyrýiva ore traváhogui. Ko tetãme ningo hakueterei, ha avei rombohovái unos kuánto provlemaʼi, upéicharõ jepe rovyʼaiterei ore servísiope. Umi hénte oĩva Myanmárpe ningo oiko sensillomínte, hory hikuái ha ohenduse pe marandu porã. Orembovyʼaiterei rohechávo mbaʼéichapa Jehová ovendesi pe predikasión. Ni michĩmi voi ndadudái Jehová oipotaha aservi Mandaláype”.

Heta ermáno oservíva umi lugár oñekotevẽvehápe opredikávare, ohechakuaa mbaʼeichaitépa ñanepytyvõ  pe orasión. Por ehémplo, Jumpei orekóva 37 áño ha hembireko Nao orekóva 35, oservi vaʼekue peteĩ kongregasión de lenguáhe de séñape Japónpe. ¿Mbaʼérepa ova hikuái Myanmárpe? Jumpei heʼi: “Che ha che rembireko siémpre ropensa vaʼekue rovávo peteĩ lugár oĩvehápe nesesida ótro tetãme. Peteĩ ermáno ore kongregasiongua ova kuri Myanmárpe. Ha ore avei rova mayo de 2010-pe, ndororekóiramo jepe heta aórro. Umi ermáno Myanmargua ningo orerresivi porãiterei kuri”. ¿Mbaʼépa opensa ko ermáno pe aktivida ojapóvare pe kámpo de lenguáhe de séñape? Haʼe heʼi: “Umi héntepe ointeresaiterei pe mensáhe oĩva la Bíbliape. Umi sórdo oñesorprende voi ohecha jave umi vidéo oĩva lenguáhe de séñape. Añetehápe rovyʼaiterei roju haguére roservi koʼápe”.

¿Mbaʼépa ojapo Jumpei ha Nao oñemantene hag̃ua? Jumpei heʼi: “Ohasa rire 3 áño roipurupa léntoma la ore aórro ha ndoroguerekovéima ropaga hag̃ua ore alkilér pe ótro áñope g̃uarã. Che ha che rembireko roñemboʼe meme ore pyʼaite guive Jehovápe. Upéi, rohaʼarõʼỹre rorresivi peteĩ kárta pe sukursálgui roñeinvitahápe roservi hag̃ua kómo prekursór espesiál temporál. Ore rojeroviaiterei kuri Jehováre, ha haʼe ndaorerejareíri. Haʼe ningo oñangareko orerehe entéro mbaʼépe”. Ndaʼareguasúi, Jumpei ha Nao oasisti pe Eskuéla Oñembokatupyryve hag̃ua umi Opredikávape.

Simone ningo peteĩ ermáno onase vaʼekue Itáliape ha orekóva 43 áño, hembireko Anna katu Nueva Zelandagua ha oreko 37 áño. ¿Mbaʼépa omomýi chupekuéra ova hag̃ua Myanmárpe? Anna heʼi: “Orekonvense kuri pe Anuario de 2013 oñeʼẽva Myanmar rehe”. Simone katu heʼi: “Añetehápe romombaʼeterei roservi rupi Myanmárpe. Koʼápe ojeiko sensillomínte ha upévare arekove tiémpo aservi hag̃ua Jehovápe. Rovyʼaiterei rohechágui mbaʼéichapa Jehová oñangareko orerehe roservi haguére peteĩ lugár oñekotevẽvehápe opredikávare (Sal. 121:5). Anna heʼi: “Arakaʼeve ndavyʼáiva peichaite peve. Avei ahasave tiémpo che ménandi, upévare roju roñemoag̃uive ojuehe. Roreko heta amígo pyahu ikalidaitereíva. Koʼápe umi hénte nopensavaíri Testigokuérare, ha rohecharamoiterei mbaʼeichaitépa ohenduse hikuái pe mensáhe”. ¿Mbaʼérepa ikatu jaʼe oñeinteresaha hikuái pe marandu porãre?

Anna heʼi: “Peteĩ vuéltape apredika kuri merkádope peteĩ mitãkuña ostudiávandi universidápe, ha apyta hendive rojotopa jey hag̃ua. Upéi aha jeýrõ g̃uarã avisita chupe haʼe ogueru peteĩ iñamígape. Upe rire ogueru unas kuántape, ha upéi katu hetavépema. Umíva apytégui koʼág̃a astudia 5 ndive”. Simone heʼi: “Umi hénte oĩva ore territóriope ningo hory ha oikuaase voi la romombeʼútava chupekuéra. Hetápe ointeresa pe mensáhe oĩva la Bíbliape. Añetehápe naoretiempovéima rovisita hag̃ua enterovévape”.

¿Mbaʼépa ojapo raẽ kuri heta ermáno ova mboyve Myanmárpe? Peteĩ ermána Japongua hérava Mizuho heʼi: “Che ha che ména Sachio siémpre roserviséva peteĩ tetã oĩvehápe nesesida, péro ndoroikuaái kuri moõpa ikatu roho. Upéi, rolee pe Anuario de 2013-pe umi  experiénsia porã porã ohasáva umi ermáno Myanmárpe, ha upéva opokoiterei orerehe. Upéi roñepyrũ ropensa ikatúpa roho roservi Myanmárpe”. Sachio heʼi: “Rodesidi ropyta una semána Yangónpe, haʼéva pe siuda iñimportantevéva oĩva Myanmárpe, ikatu hag̃uáicha rovichea pe yvy. Upe riremi roñekonvenséma rova hag̃ua upe tetãme”.

Rodney ha hembireko Jane oreko mas de 50 áño. Haʼekuéra ningo Australiagua ha oho oservi Myanmárpe 2010 guive. Oho avei hendivekuéra ifamiliakuéra, peteĩ kuimbaʼe hérava Jordan ha peteĩ kuña hérava Danica. Rodney heʼi: “Opokoiterei orerehe mbaʼéichapa umi hénte orrekonose oikotevẽha Ñandejárare. Amokyreʼỹ entéro famíliape oñehaʼã hag̃ua oservi peteĩ tetã ojoguávape Myanmárpe”. ¿Mbaʼérepa ko ermáno opensa upéicha? Haʼe heʼi: “Umi vendisión rorresivíva rova haguére koʼápe ndaijojahái. Koʼág̃arupi ningo heta mitãrusu ha mitãkuña ojepyʼapy iteléfonore, iveíkulore, itraváhore ha umícha. Péro ore familiakuéra oipuru itiémpo oaprende hag̃ua heta palávra pyahu ikatu hag̃uáicha opredika. Haʼekuéra oñehaʼã oexplika porãve hag̃ua umi héntepe mbaʼépa omboʼe la Biblia, ha avei okomenta hag̃ua rreunionhápe. Haʼekuéra omotenonde koʼã mbaʼe ha ambue aktivida espirituál omokyreʼỹva chupekuéra”.

Peteĩ ermáno Estados Unidosgua orekóva 37 áño ha hérava Oliver, oexplika mbaʼérepa orrekomenda ojeservi hag̃ua umi lugár oĩvehápe nesesida. Haʼe heʼi: “Heta mbaʼe ahupyty aservi rupi Jehovápe peteĩ lugár tekotevẽhápe ajesakrifikamie. Ava rupi ótro tetãme ajeroviave Jehováre ha siémpre adepende hese tahaʼe haʼéva pe situasión ahasáva. Avei aikuaa heta ermáno ha ermánape. Haʼekuéra oguerovia umi mbaʼe che agueroviáva, ha upéva ohechauka chéve ndaiporiha ótra kósa iñimportantevéva Ñandejára Rréinogui”. Koʼág̃a, Oliver ha hembireko Anna osegi oservi kyreʼỹme pe kámpo chínope.

Peteĩ ermána hérava Trazel oreko 52 áño. Haʼe oiko vaʼekue Austráliape, péro 2004 guive oservi Myanmárpe. Trazel heʼi: “Amokyreʼỹ entéro umi ikatúvape, oho hag̃ua oservi umi lugár oĩvehápe nesesida. Ahechakuaa Jehová ovendesiha umi oñehaʼãmbaitévape ojapo hembipota. Napensáiva arakaʼeve ahupytytaha koʼã mbaʼe porã. Núnka nañeimahinái kuri peichaite peve avyʼa ha añeñandu porãtaha”.

Hiʼãiterei ningo oréve koʼã experiénsia nemomýi rehecha hag̃ua ikatúpa nde avei reipytyvõ umi ipyʼaporãvape, oikóva umi lugár neʼĩrahápe gueteri ojepredika. Umi hénte ningo haʼete ojerure asýva hína: “¡Pehasána Myanmárpe orepytyvõmi!”.