“Menakuéra ohayhu vaʼerã hembirekópe, haʼekuéra ojehayhuháicha. Pe ohayhúva hembirekópe ojehayhu ijupe voi. Pórke ndaipóri ningo kuimbaʼe ndochaʼéiva hetére, upéva rangue mborayhúpe oñangareko hetére” (EFESIOS 5:28, 29).

Pe ména ningo omoakã hogapy (Efesios 5:23). Péro upéva ndeʼiséi ikatuha ijarhél hembirekópe térã iñexihenteterei hendive. Upéva rangue omombaʼe chupe, okuida porã hese ha siémpre oreko enkuénta umi mbaʼe oñandúva. Avei oñehaʼãmbaite ombojerovia hembirekópe ha noñemohatãi haʼe heʼívapente (Filipenses 2:4). Siémpre oñemongeta porã hendive ha ojapysaka la heʼívare chupe. Ha ni mbaʼevéicharõ ndojahéiri hembirekóre ni nomaltratái chupe ‘orrenega vaipa’ rupi (Colosenses 3:19).

‘Pe tembireko orrespeta vaʼerã iménape ipyʼaite guive’ (EFESIOS 5:33).

Pe tembireko orrespetáramo iménape ha oapojáramo umi mbaʼe odesidíva, oipytyvõta ifamília oiko hag̃ua pyʼaguapýpe. Oiméramo ofalla peteĩ mbaʼépe ndoapoʼíri la iménape, síno osegi orrespeta ha oapoja chupe pyʼaguapýpe porãnte (1 Pedro 3:4). Ha tekotevẽramo oñemongeta iménandi peteĩ provlémare oiporavo porã mbaʼe moméntopepa ojapóta upéva, ha umi mbaʼe heʼíva rupive siémpre ohechauka orrespetaha chupe (Eclesiastés 3:7).

“Pe kuimbaʼe [...] opytáta hembirekóndi, ha mokõivégui oikóta peteĩntema” (GÉNESIS 2:24).

Peteĩ kuimbaʼe ha kuña omenda vove, omoñepyrũ peteĩ família. Haʼekuéra oñehaʼãmbaite vaʼerã oñemoag̃uive hag̃ua ohóvo ojuehe. ¿Mbaʼéichapa ikatu ojapo upéva? Siémpre omombeʼu vaʼerã ojupe umi mbaʼe oñandúva ha iñamávle vaʼerã oñondive umi mbaʼe michĩvape jepe. Avei ifiél vaʼerã ojupe ha ni mbaʼevéicharõ nomoakãratĩri vaʼerã hembiayhúpe. Pórke peteĩva ojapóramo upéva, pe iñinosénteva opytáta yvýre, ndaikatumoʼãvéima okonfia hese ha ikatu voi oñembyaiete pe família (Hebreos 13:4).

“Ehekomboʼe pe mitãme oho hag̃ua tape porãre, ha ijeda rire jepe nosẽmoʼãi upe tapégui” (PROVERBIOS 22:6).

Ñandejára onkarga umi sy ha túape ohekomboʼe vaʼerãha ifamíliape. Upéva heʼise tekotevẽha omboʼe chupekuéra mbaʼéichapa oñekomporta vaʼerã, ha omoĩ chupekuéra ehémplo porã (Deuteronomio 6:6, 7). Pe mitã ojeporta vaíramo umi sy ha túa iñarandúva norreaksionavaíri. Upéva rangue, “oĩ vaʼerã preparádo ohendu hag̃ua, péro ndojapurái vaʼerã oñeʼẽ ha ipochy hag̃ua” (Santiago 1:19). Ha tekotevẽramo ojekorrehi pe mitãme, pe túa térã pe sy ojapóta upéva mborayhúpe ha ndahaʼéi pochy reheve.

“Mitãnguéra, peneñeʼẽrendúkena pende tuakuérape [...]. ‘Emombaʼékena nde túa ha nde sýpe’” (EFESIOS 6:1, 2).

Umi mitã iñeʼẽrendu vaʼerã ituakuérape ha ohechauka vaʼerã orrespetaitereiha chupekuéra. Ohechaukáramo omombaʼeha ituakuérape, oipytyvõta hogapýpe ojeiko hag̃ua vyʼápe ha pyʼaguapýpe. Ha okakuaapa rire jepe osegi vaʼerã omombaʼe ituakuérape. ¿Mbaʼéichapa ikatu ojapo upéva? Por ehémplo, tekotevẽ ojasegura ojekuida porãha hesekuéra, oipytyvõ chupekuéra umi gásto orekóvape ha ojasegura oñemantene porãha hogakuéra (1 Timoteo 5:3, 4).