‘Peñehaʼãmbaite peiko pyʼaguapýpe opavavéndi’

‘Ikatuha peve, peñehaʼãmbaite peiko pyʼaguapýpe opavavéndi.’ (ROM. 12:18.)

1, 2. a) Mbaʼépa Jesús heʼivaʼekue hemimboʼekuérape? b) Mbaʼépa ikatu ñanepytyvõ ñambohovái hag̃ua umi oñemoĩvape ñanderehe?

 JESÚS heʼivaʼekue hemimboʼekuérape oĩtaha heta oñemoĩva hesekuéra. Ha omano mboyve pyharépe haʼe omombeʼu chupekuéra mbaʼérepa. Jesús heʼi: ‘Peẽ peikórire haʼekuéraicha, penderayhuvaʼerãmoʼã hikuái ohayhuháicha umi heseguakuérape. Péro che poiporavomavaʼekue ijapyteguikuéra, ha upévare haʼekuéra ndaijaʼéi penderehe’ (Juan 15:19).

² Apóstol Pablo ohechakuaa añeteha upe Jesús heʼivaʼekue. Upévare ohaírõ guare iñirũ Timotéope pe kárta mokõiha, haʼe heʼi: ‘Nde katu Timoteo reikuaa porã umi mbaʼe che amboʼéva, mbaʼéichapa aiko, mbaʼépa pe ajaposéva ha mbaʼérepa ajerovia. Rehendu mbaʼéichapa aropuʼaka heta mbaʼe, mbaʼéichapa ahayhu che rapichakuérape, ajepersegi ha heta mbaʼe vai ahasa’. Upéi heʼive: ‘Opa umi ojeroviáva Ñandejárare Cristo Jesús rupi, heta ojepersegíta avei’ (2 Tim. 3:​10-12). Ha  Romanos kapítulo 12-pe katu jahechakuaa apóstol Pablo omeʼẽ hague heta konsého ñanepytyvõtava ñambohovái hag̃ua umi oñemoĩvape ñanderehe. Umi konsého ningo tuichaiterei ñanepytyvõta ko ára pahápe.

‘Peñehaʼã pejapo iporãva’

3, 4. Mbaʼéichapa ikatu ojapo Romanos 12:17 heʼíva umi testígo a) iména térã hembireko ndahaʼéiva testígo? b) ivesinokuéra ndive?

³ (Jaleemína Romanos 12:17.) Apóstol Pablo ohechauka porã ndovaleiha jajedeskita ñande rapicha ñandetrata vaívare. Ko konsého ohenduvaʼerã avei umi hembireko térã iména ndahaʼéiva testígo. Ñande jaservíva Ñandejárape ningo ndovaléi ñande arhél umi naimbaʼeporãivape ñanendive. Mbaʼevéko nañaguenohẽmoʼãi ñande avei jajapóramo ivaíva ñande rapicháre. Ñambyaivéta katu la káva raity.

⁴ Apóstol Pablo ningo heʼi voi: ‘Peñehaʼã pejapo iporãva opavave renondépe’. Peteĩ ermánape iñeʼẽpohýiramo iména ndahaʼéiva testígo, ikatu haʼe imbaʼeporãnte hendive ha upéicha noñorairõmoʼãi hikuái (Pro. 31:12). Peteĩ betelita hérava Carlos ningo imanduʼa yma imitãme mbaʼépa isy ojapovaʼekue. Haʼe omombeʼu isy iguápa hague hogapýpe ha akóinte imbaʼeporã hague iména ndive oñemoĩ mbaretéramo jepe hese. Haʼéko heʼi voi: “Che sy ningo heʼimivaʼerã oréve rorrespetavaʼerãha ore rúpe. Ha heʼi jey jey vaʼerã chéve ahuga hag̃ua che ru ndive peteĩ huégo ogustaitereíva chupe. Ha ndachegustáiramo jepe upéva, ahuga hendive”. Ha amo ipahápe Carlos túva oñepyrũ ostudia la Biblia ha upéi ojevautisa. Testigos de Jehová ningo hetáma oipytyvõ la héntepe okambia hag̃ua. Upearã haʼekuéra oñehaʼã ‘ojapo iporãva opavave renondépe’. Pór ehémplo, oipytyvõ hikuái ivesinokuérape oiko jave sarambi.

Ñambyaty tatapỹi ñande rapicha akã ári

5, 6. a) Mbaʼépa heʼise ‘ñambyaty tatapỹi rendy’ ñande rapicha akã ári? b) Emombeʼumína oiméramo reikuaa ojapovaʼekue Romanos 12:​20-pe heʼíva ha mbaʼépa ohupyty upévare.

⁵ (Jaleemína Romanos 12:20.) Apóstol Pablo ohaírõ guare ko versíkulo oiméne imanduʼarakaʼe Proverbios 25:​21, 22-pe heʼívare: ‘Upe nderehe ijaʼeʼỹva iñembyahýiramo, emongaru ha ijyuhéiramo emboyʼu. Tatapỹi hendývaicha remoĩta iñakã ári ne rembiapo porã, ha Ñandejára omyengoviáta ndéve’. Pablo ningo heta konsého porã omeʼẽ Romanos kapítulo 12-pe. Upévare ndovaléi jaʼe pe ‘tatapỹi hendýva’ heʼiseha ñamotĩ térã jajapovaʼerãha ivaíva umi oñemoĩvare ñanderehe. Amalisia ningo pe proverbio ha Pablo omombeʼuhína mbaʼéichapa yma oñembouykuvaʼekue umi metál. Peteĩ karai hérava Charles Bridges (1794-1869) ohai: “Ani pemoĩ tata pe metál atã guýpente, pemoĩna avei pe metál ári umi tatapỹi hendýva  ikatu hag̃uáicha haku yvatéguio ha iguýguio. Upéicha avei umi ipyʼahatãvéva jepe ikatu okambia jatratáramo chupekuéra mborayhúpe ha ñanepasiénsia hesekuéra”.

⁶ ‘Tatapỹi hendývaicha’ umi mbaʼe porã jajapóva ikatu omboyku umi mbaʼe vai oĩva ñande rapicha pyʼapýpe. Ikatu avei oipytyvõ chupekuéra omombaʼeve hag̃ua Jehová siervokuérape ha ohendu hag̃ua pe marandu porã. Upévare Apóstol Pedro heʼi voi: ‘Peiko porã umi ojeroviaʼỹva apyte rupi. Upéicharõ haʼekuéra oñeʼẽramo jepe koʼág̃a penderehe, peẽ mbaʼe vai apoharamoguáicha, ohechávo hikuái umi mbaʼe porãita pejapóva oguerohorýne Ñandejárape og̃uahẽvo ára haʼe oporandutaha chupekuéra hekovekuére’ (1 Ped. 2:12).

‘Peiko pyʼaguapýpe opavavéndi’

7. a) Mbaʼéichapa Jesús ñanembopyʼaguapy? b) Mbaʼérepa ñañehaʼã jaiko pyʼaguapýpe enterovéndi?

⁷ (Jaleemína Romanos 12:18.) Pe último pyhare Jesús oĩrõ guare ijapostolkuéra ndive, heʼi chupekuéra: “Aheja peẽme pyʼaguapy. Ameʼẽ peẽme pe che pyʼaguapy” (Juan 14:​27, BNP). Upe pyʼaguapy ningo ñande jareko jaikuaágui Jehová ha Itaʼýra ñanderayhuha ha ñaime porãgui hendivekuéra. Upévare ñande avei ñañehaʼãvaʼerã jaiko pyʼaguapýpe enterovéndi. Ñandejárape oservíva ningo ndahaʼéi omombaʼénteva pe pyʼaguapy, oñehaʼã voi katu oiko porã opavavéndi. Upévare ikatu ojeʼe hesekuéra ‘oporomoingo porãha’ (Mat. 5:9).

8. Mbaʼéichapa ikatu jaiko pyʼaguapýpe ñande rogapýpe ha kongregasiónpe?

⁸ Ikatu hag̃uáicha jaiko porã oñondive ñande rogapýpe, pyaʼe porã ñasolusionavaʼerã oimeraẽ provlemaʼi jarekóva (Pro. 15:18; Efe. 4:26). Ha upeichaite jajapovaʼerã avei kongregasiónpe. Apóstol Pablo heʼi jaiko hag̃ua pyʼaguapýpe tekotevẽha jajoko ñandejuru (1 Ped. 3:​10, 11). Santiago katu omombeʼu mbaʼépa ikatu oiko nañañatendéiramo ñaneñeʼẽrãre, ha heʼi avei ndovaleiha ñañemotenondese ñande rapicháre ha ñapuʼã oñoakãre. Upéi heʼive: ‘Umi oguerekóva arandu Ñandejáragui oúva katu hekopotĩ, ndaipochykuaái, ipyʼaporã ha iñeʼẽrendukuaa. Upéicha avei, oporoporiahuvereko, iñeʼẽ añete, ndahovamokõiri ha ojapo iporãva. Ha umi oñehaʼãva oporomoingo porã hag̃ua, ku oñotỹramoguáicha pyʼaguapy omonoʼõ chugui tekojoja’ (Sant. 3:​17, 18).

9. Mbaʼépa ndovaléi jajapo ñañehaʼãramo jepe jaiko porã opavavéndi?

⁹ Romanos 12:​18-pe apóstol Pablo ohechauka ‘opavavéndi jaikovaʼerãha pyʼaguapýpe’, ndahaʼéi ñande rogaygua ha kongregasionpegua ndive añónte. Haʼe heʼi voi jaiko porã vaʼerãha ñane vesínondi, ñane irũ eskuelapegua térã ñande travahohapegua ndive, ha umi ñanerendúva ndive  predikasiónpe. Péro apóstol Pablo heʼívo “peñehaʼãmbaite” ha ‘pejapo ikatuha peve’ heʼisehína jajapoha opa ikatumíva ‘jaiko hag̃ua pyʼaguapýpe opavavéndi’. Péro ni mbaʼevéicharõ ndovaléi ñamboyke Ñandejára Ñeʼẽ heʼíva ñaime porã hag̃ua rehehápe ñande rapichándi.

Jehová añoite ikatu oporokastiga

10, 11. Mbaʼérepa ndovaléi ñañevenga?

¹⁰ (Jaleemína Romanos 12:19.) Opavave Ñandejárape oservíva ningo ‘ndaipochyreíri’ ha pyʼaporãme otrata umi ‘oñemoĩvape’ hese, umi nohenduséipe jepe pe marandu porã (2 Tim. 2:​23-25). Ha apóstol Pablo heʼi rire umi ermánope ani hag̃ua oñevengase, heʼi: ‘Peheja Ñandejárape toporokastiga’. Ñande ningo jaikuaa porã jahejantevaʼerãha Jehová pópe opa mbaʼe, ndovaléi ñande ñañevenga. Pe salmísta ningo ohai voi: ‘Ndepochypoi katu ha eheja ndepyʼaro, ani reheja pe pochy ndereraha tape vaíre’ (Sal. 37:​8, ÑÑB). Salomón katu heʼi: ‘Ani erétei: Che añevengáta. Eheja umíva Jehová pópe, haʼe nepytyvõta’ (Pro. 20:​22, ÑÑB).

¹¹ Jahejavaʼerã Jehová pópe umi ojapóvape ñanderehe mbaʼe vai, ha tekotevẽramo Haʼe okastigáta chupekuéra. Apóstol Pablo heʼi voi: ‘Ñandejára Ñeʼẽ heʼi: “Che avengáta, akastigáta ha amyengoviáta enterovépe hembiapo vaikue”’ (embojojami Deuteronomio 32:35 heʼívare). Ha ñandete ñañevengaséramo, jajapotañaína peteĩ mbaʼe Jehová añoiténte ojapovaʼerã. Ha jahechaukáta avei ndajajeroviaiha haʼe heʼívare. Jehová voi ningo heʼi: ‘Che amyengoviáta enterovépe hembiapo vaikue’.

12. Mbaʼéichapa Jehová oporokastigáta ha mbaʼe tiémpopepa ojapóta?

¹² Apóstol Pablo ningo ohai ñepyrũvo ikárta umi Romayguápe heʼi: ‘Jaikuaa niko Ñandejára ombouha yvága guive kastígo ipohýiva yvyporakuéra hembiapo vai ha iñañáva ári, umíva iñaña rupi ndohejái ojekuaa pe añetegua’ (Rom. 1:18). Jehová ningo ‘oporokastigáta yvága guive’. Ha upéva ojapóta Itaʼýra Jesucristo rupive pe ‘jehasa asy guasu’ oñepyrũ vove (Rev. 7:14). Upépe ojehecháta ‘Jehová oporombojovakeha hekopete’, heʼi haguéicha Pablo: ‘Iporã ningo Ñandejára ombohasa asy umi penembohasa asývape. Ha peẽ pehasa asývape katu penemombytuʼu. Péicha Ñandejára ojapóta Jesucristo ojechaukávo hiʼangelkuéra ipoderósova ndive, oúvo yvágagui tatarendy mbytépe. Oúta okastiga hag̃ua umi oikuaaʼỹvape Ñandejárape ha Jesucristo marandu porã nohenduséivape’ (2 Tes. 1:​5-8).

Ñandepuʼaka ivaívare iporãva rupive

13, 14. a) Mbaʼérepa ndajahecharamói oĩramo opuʼãva ñanderehe? b) Mbaʼéichapa ikatu ñavendesi umi ñanembohasa asývape?

¹³ (Jaleemína Romanos 12:​14, 21.) Ñande ningo jajeroviaiterei Jehováre okumplipaitetaha opa mbaʼe oprometéva. Upévare ikatu jaiko pyʼaguapýpe ha kyreʼỹme ñamombeʼu pe ‘marandu porã opárupi ko yvy ape ári’ (Mat. 24:14). Jaikuaa ningo japredika haguére ipochytaha umi ndaijaʼéiva ñanderehe. Jesús heʼivaʼekue voi: ‘Opaite tetãnguéra oñemoĩta penderehe chemoirũ haguére’ (Mat. 24:​9, ÑÑB). Upévare ndajahecharamói ha nañanemokangýi umi hénte opuʼãva ñanderehe. Apóstol Pedro heʼi: ‘Che ryvykuéra ahayhuetéva, ani peñemondýi pehasa asýramo ku tata mbyte rupi pehasarõguáicha. Peñepyʼaraʼã hag̃ua ningo oiko penderehe umi mbaʼe pehaʼarõʼỹva, pevyʼa uvei ija rehe peẽme pehasa asy pe Cristo ohasa asy haguéicha’ (1 Ped. 4:​12, 13, BNP).

¹⁴ Ñande ningo nañandepyʼarói oĩramo ñandepersegíva. Upéva rangue ñañehaʼã ñamombeʼu ñande rapichápe pe marandu porã, heta véseko haʼekuéra ndoikuaáiguinte ojapo umi mbaʼe (2 Cor. 4:4). Jajapose avei Pablo heʼíva: ‘Pevendesi umi penembohasa asývape. Pejerure Ñandejárape tohovasa chupekuéra ha ani pejerure ivaíva chupekuéra g̃uarã’ (Rom. 12:​14, BNP). Ñande  ningo ñavendesiñaína umi ñanembohasa asývape, ñañemboʼévo hesehapekuéra. Pe Sermón del Móntepe Jesús heʼivaʼekue: ‘Pehayhu umi penderayhuʼỹvape, pejapo iporãva penderehe ijaʼeʼỹvare. Pevendesi umi penderehe oñeʼẽ vaívape, peñemboʼe umi pendejaʼóvare’ (Luc. 6:​27, 28). Apóstol Pablo oikuaa porã umi ñandepersegívagui jepe ikatuha oiko Jesús remimboʼe ha oservi ipyʼaite guive Jehovápe. Haʼe voi ningo upéicha vaʼekue (Gál. 1:​13-16, 23). Ha umi Corintoyguápe Pablo ohaivaʼekue: ‘Heta oĩ orejaʼóva ha ore katu rovendesi chupekuéra, ha orembohasa asýramo ore rohejareínte. Okaguaíramo orerehe, roñeʼẽ porã chupekuéra’ (1 Cor. 4:​12, 13, JMP).

15. Mbaʼépa ñanepytyvõta ñandepuʼaka hag̃ua umi mbaʼe vaíre?

¹⁵ Ñande ningo ñañehaʼã avei jajapo pe Romanos 12:21 heʼíva: ‘Ani reheja pe ivaíva ipuʼaka nderehe. Upéva rangue, nde puʼaka uvei pe ivaíva rehe iporãva rupive’. Jaikuaa ningo Satanásgui ouha opa mbaʼe vai (Juan 8:44; 1 Juan 5:19). Apóstol Juan rupive Jesús omombeʼu umi ungído ipuʼakamaha Satanás rehe ‘pe ovecharaʼy ruguy oñehẽvaʼekue ha pe marandu rupive’ (Rev. 12:11). Péicha jahecha ñamombeʼúramo pe marandu porã ñanepytyvõtaha ñandepuʼaka hag̃ua Satanás ha ko múndo ipoguýpe oĩvare. Ha péicha avei ñanembaʼeporãtañaína ñande rapichakuéra ndive.

Jaiko vyʼápe umi mbaʼe ñahaʼarõvare

16, 17. Romanos kapítulo 12-pe ñaaprende haguéicha, a) mbaʼéichapa jaikovaʼerã? b) mbaʼéichapa ñañehaʼãvaʼerã jaiko kongregasiónpe? c) mbaʼépa jajapovaʼerã oĩ jave oñemoĩva ñanderehe?

¹⁶ Ñahesaʼỹijo rupi Romanos kapítulo 12 ñaaprende heta mbaʼe. Jahecha ñande jajesakrifikavaʼerãha jaservívo Jehovápe. Ha ñande ningo jajapo upéva Ñandejára espíritu sánto ñanepytyvõ rupi ha jahechakuaágui Jehová oipotaha jajapo. Ñandejára espíritu sánto rupive avei ñanekyreʼỹ ha katupyrýpe ñaporopytyvõ. Ñaneumílde avei jaservívo Ñandejárape ha ñañehaʼãmbaite jaiko peteĩ ñeʼẽme kongregasiónpe. Ñanembaʼeporã ñande rapichakuérandi ha ñañehaʼã ñanembaʼerechakuaa hendivekuéra.

¹⁷ Romanos kapítulo 12 ñanemboʼe avei mbaʼépa jajapovaʼerã oĩ jave oñemoĩva ñanderehe. Animoʼãkena jajedeskita ñande rapicháre. Upéva rangue ñañehaʼãvaʼerã ñanembaʼeporã hendivekuéra. Jajapovaʼerã opa ikatúva jaiko hag̃ua pyʼaguapýpe opavavéndi, péro nañamboykeivaʼerã Ñandejára heʼíva. Ñañehaʼãkena avei jaiko pyʼaguapýpe ñande rogapýpe, kongregasiónpe, ñane vesinokuérandi, ñandetavahohápe, eskuélape ha predikasiónpe. Ha oĩramo jepe oñemoĩ mbaretéva ñanderehe, ñañehaʼã ñandepuʼaka ivaívare iporãvape. Arakaʼeve avei nañanderesaráiri Jehová añoite okastigavaʼerãha umi iñañávape.

18. Mbaʼe mbaʼépa heʼivaʼekue Pablo jajapo hag̃ua Romanos 12:​12-pe?

¹⁸ (Jaleemína Romanos 12:12.) Pablo omeʼẽ rire umi konsého porãite jahechavaʼekue, heʼi avei mbohapy mbaʼe tekotevẽva jajapo. Jaikuaa ningo Jehová ñanepytyvõramo añoite ikatutaha jajapo Romanos kapítulo 12-pe heʼíva. Upévare Pablo heʼi ñandéve: ‘Peñemboʼe memékena’. Ñañemboʼéramo ikatúta avei jajapo Pablo heʼíva: ‘Peropuʼaka pyʼaguasúpe umi mbaʼe penembohasa asýva’. Ha iporã avei akóinte ñanemanduʼa umi mbaʼe porã Jehová oprometévare ñandéve. Upéicha ‘jaikóta vyʼápe umi mbaʼe ñahaʼarõvare’, tahaʼe jaiko hag̃ua opa ára g̃uarã ko yvy ape ári térã yvágape.

Ñanemanduʼami jey hag̃ua

• Mbaʼéichapa ñambohovaivaʼerã umi oñemoĩvape ñanderehe?

• Moõ moõpa ñañehaʼãvaʼerã jaiko pyʼaguapýpe ha mbaʼéichapa ikatu jajapo upéva?

• Mbaʼérepa ndovaléi ñañevenga?

[Porandu ñahesaʼỹijóva]

[Nóta oĩva taʼanga ndive páhina 8]

Ñaipytyvõramo ñane vesínope ikatu okambia ha ohendu pe marandu porã

[Nóta oĩva taʼanga ndive páhina 9]

Ndépa reñehaʼã reiko pyʼaguapýpe enterovéndi kongregasiónpe?