1. ¿Mbaʼérepa umi pilóto oiporu peteĩ lísta okontrola hag̃ua pe avión ojupi mboyve?

OĨ PETEĨ emprésa orekóva heta avión ojekuaáva opárupi ndofallaguasúi haguére. Haʼekuéra omeʼẽ umi pilótope peteĩ lísta oĩháme mbaʼe mbaʼépa okontrola vaʼerã ojupi mboyve pe avión. Orrevisa vaʼerã hikuái hetaiterei mbaʼe, amo treinta ári rupi. Nokontroláiramo peteĩteĩ, ikatu ndopillái oiméramo ofalla peteĩ mbaʼe, ha upéi oikokuaa peteĩ aksidénte. ¿Reikuaápa nde mbaʼeichagua pilótopepa ojejerure okontrola hag̃ua opa mbaʼe oĩva pe lístape? Umi arevéma omanehávape. ¿Mbaʼérepa? Umichagua pilóto sapyʼánte ojeroviaiterei ijehe ikatupyryeterei rupi, ha noñatendeporãi jepi orrevisa jave pe avión.

2. ¿Mbaʼépa pyʼỹinte ohecha vaʼerã opavave kristiáno?

² Pe pilóto ojapoháicha, ñande avei ikatu jaiporu peteĩ lísta jaikuaa hag̃ua imbaretétapa ñande jerovia ñaikotevẽve jave. Oiméramo aréma jajevautisa térã ramoiténte, tekotevẽ pyʼỹinte jahecha mbaʼeichaite pevépa jajerovia ha jahayhu Jehovápe. Ndajajapóiramo upéva, ikatu hína ñañemomombyry Ñandejáragui. La Biblia heʼi voi: “Pe opensáva oñemboʼyha hína, toñatendéke ani hoʼa” (1 Cor. 10:12, NM).

3. ¿Mbaʼépa tekotevẽ kuri ojapo umi kristiáno Galaciagua?

³ Umi ermáno Galaciagua tekotevẽ vaʼekue ohecha mbaʼeichaite pevépa ojerovia ha ohechauka vaʼerã omombaʼeha pe liverta orekóva kristianokuéra. Isakrifísio rupive, Jesús oavri pe tape ikatu hag̃uáicha opavave ojeroviáva hese oikuaa Jehovápe ha ohupyty peteĩ mbaʼe ijojahaʼỹva: ¡oiko chuguikuéra Ñandejára raʼy! (Gál. 4:9.) Ani hag̃ua operde hikuái upe priviléhio, koʼã kristiáno Galaciagua omboykete vaʼerã umi hudaisánte omboʼéva. Koʼã tapicha ojopy kristianokuérape okumpli hag̃ua pe Léi mosáika. Péro umi kristiáno ndahaʼéiva  hudío, noĩriva voínte pe Léi poguýpe. Ikatu hag̃uáicha oñakãrapuʼã opavave kristiáno, tahaʼe hudío, térã tetã ambuegua, orrekonose vaʼerã natekotevẽiha okumpli pe Léi mosáika hekojoja hag̃ua Ñandejára renondépe.

4, 5. ¿Mbaʼe konséhopa omeʼẽ Pablo umi gálatape, ha mbaʼéichapa ideprovécho ñandéve?

⁴ Pe konsého Pablo omeʼẽ vaʼekue umi Galaciaguápe ojehai la Bíbliape ideprovécho hag̃ua kristianokuérape oimeha tiémpope. Oipytyvõta chupekuéra ani hag̃ua omboyke umi mbaʼe porãita oĩva la Bíbliape, ha ojevy umi mbaʼe ohejáma vaʼekuépe. Ijespíritu sánto rupive, Jehová oiporu apóstol Páblope omokyreʼỹ hag̃ua, ndahaʼéi umi Galaciaguápente, síno opavave kristiánope ojerovia mbarete hag̃ua.

⁵ Enterovépe ñanepytyvõ ñanemanduʼávo mbaʼéichapa ñasẽ pytũmbýgui ha oiko ñandehegui testígo de Jehová. Por ehémplo, ñapensamína koʼã mbaʼére: ¿Nemanduʼápa mbaʼe mbaʼépa rejapo vaʼekue ikatu hag̃uáicha rejevautisa? ¿Nemanduʼápa mbaʼéicha reikuaa ypy vaʼekue Ñandejárape, ha haʼe avei ndekuaa? Oiméne katuete reñandu rakaʼe nesãsomaha.

6. ¿Mbaʼe lístapa ñahesaʼỹijóta?

⁶ Opavave kristiáno ñakumpli kuri umi nueve mbaʼe jatopáva pe rrekuádro heʼihápe  “Mbaʼe mbaʼépa jajapo jajevautisa ha jasegi hag̃ua ñañakãrapuʼã”. Ko lísta ñanepytyvõ jaikuaa hag̃ua mbaʼéichapa ñaime Jehová renondépe. Jajepyʼamongeta pyʼỹiramo koʼã mbaʼére, ikatúta ñanembareteve ha ndajajevymoʼãi umi mbaʼe oĩvape ko múndope. Peteĩ pilóto ikatupyrýva ha okontrola porãva pe avión peteĩ lísta rupive, omaneha kyhyjeʼỹre. Péicha avei jajepyʼamongetáramo umi nueve mbaʼére, ñande avei ñañeñandu porãta jaikuaágui jaserviha Jehovápe hekoitépe.

7. ¿Mbaʼépa jasegi vaʼerã ehémploramo, ha mbaʼérepa?

⁷ Pe lísta oiporúva umi pilóto omomanduʼa chupekuéra mbaʼe mbaʼépa tekotevẽ ojejapo okuʼe mboyve pe avión. Ñande avei ñakontrola vaʼerã mbaʼéichapa oĩ ñande jerovia ha mbaʼépa jajapo jajúvo jajevautisa rire. Pablo ohai vaʼekue Timotéope: “Esegíkena umi ñeʼẽ porãite oĩva ehémploramo, rehendu vaʼekue chehegui, rehechaukaháicha nde jerovia ha mborayhu reservi haguére Cristo Jesúspe” (2 Tim. 1:13, NM). Koʼã “ñeʼẽ porãite” jatopa hína Ñandejára Ñeʼẽme (1 Tim. 6:3). Peteĩ pintór ningo ojapo jepi peteĩ divúho oñepyrũ mboyve opinta, ha upépe ikatúma jahecha mbaʼéichatapa pe paisáhe. Péicha avei, “umi ñeʼẽ porãite” ñanepytyvõ jaikuaa hag̃ua mbaʼépa Ñandejára ohaʼarõ ñandehegui. Upévare, jahechami jeýna mbaʼe mbaʼépa jajapo raʼe ikatu hag̃uáicha jajevautisa ha ñakontrola jasegípa jaikóvo umi “ñeʼẽ porãite” ñakumplívo oñehaʼarõva ñandehegui.

8, 9. a) ¿Mbaʼérepa jaikuaave vaʼerã la Biblia heʼíva ha ñamombareteve ñande jerovia? b) ¿Mbaʼérepa iñimportánte ñañakãrapuʼã, ha mbaʼérepa jasegi vaʼerã jajapo upéva? Emoĩ peteĩ ehémplo.

⁸ Pe lístape ñepyrũrã jatopa tekotevẽha jaikuaa raẽ la Biblia omboʼéva. Upéi katu jajerovia vaʼerã. Péro ndovaléi japyta upépente, síno ñañakãrapuʼãve vaʼerã koʼã mbaʼépe (2 Tes. 1:3). Ñañakãrapuʼã hag̃ua ñakambia vaʼerã jahávo. Upearã tekotevẽ jaikuaave heta mbaʼe Ñandejáragui ha ñamombareteve ñande jerovia. Jahechaháicha, jajevautisa rire tekotevẽ ñañakãrapuʼãve jahávo.

⁹ Ñamoĩmína peteĩ ehémplo ñantende hag̃ua mbaʼéichapa ñañakãrapuʼã vaʼerã. Oĩ yvyramáta tuichaitereíva, koʼýte hapo guasu térã ipypukúramo. Por ehémplo, umi sédro Libanogua ikatu ijyvate peteĩ edifísio de doce písoicha, hapo ipypuku ha imbareteterei,  ha imáta ikatu ipoguasu haimete 4 métro (Cant. de Cant. 5:15). Peteĩ yvyramáta okakuaapáramo jepe yvate gotyo, osegi okakuaa péro ndajahechakuaái. Ohasávo umi áño imáta ipoguasuve ha hapo katu oñemombareteve. Peichaite avei oiko kristianokuérare. Ñepyrũrã jastudia la Biblia, ñañakãrapuʼã pyaʼe ha upéi jajevautisa, ha ikatu voi oiko ñandehegui prekursór térã jahupyty ambue priviléhio. Umi ermáno ohecha upéva ha katuete ovyʼa ñanendive. Péro ohasávo pe tiémpo ikatu ndojekuaaguasúi ñañakãrapuʼãha jahávo. Upéicharõ jepe, jasegi vaʼerã jaikuaave umi mbaʼe oĩva la Bíbliape ha jajeroviave “oiko peve ñandehegui kuimbaʼe tyarõ, okakuaa porãmba vaʼekue Crístoicha” (Efes. 4:13, Buenas Nuevas para el Paraguay). Péicha ñande kristiáno jajogua peteĩ yvyra raʼýpe upe rire okakuaáva ha oikóva chugui peteĩ yvyramáta tuicha ha imbaretéva.

10. ¿Mbaʼérepa umi kristiáno ijerovia mbaretéva jepe osegi vaʼerã oñakãrapuʼã?

¹⁰ Ñande ningo jasegi vaʼerã ñañakãrapuʼã. Tekotevẽ jaikuaa heta hetave mbaʼe Jehovágui ha ñamombareteve ñande jerovia, ikatu hag̃uáicha ñañakarama mbarete Ñandejára Ñeʼẽ heʼívare (Prov. 12:3). Heta kristiáno ojapóma upéva. Por ehémplo, peteĩ ermáno oservíva treinta áño árima ansiánoramo ohechakuaa koʼág̃a peve oñakãrapuʼãha ohóvo. Haʼe heʼi: “Amombaʼetereive koʼág̃a la Biblia. Ohasávo pe tiémpo ahecha mbaʼéichapa ikatu asegi umi konsého ha akumpli umi léi oĩva pype hetave hendáicha. Avei koʼýte amombaʼeve ahávo pe predikasión”.

11. ¿Mbaʼéichapa ikatu jaikuaa porãve Jehovápe ohasávo pe tiémpo?

¹¹ Ñañakãrapuʼã hag̃ua tekotevẽ avei ñañemoag̃ui Jehováre ha jareko chupe ñande Túva ha ñane Amígoramo. Haʼe oipota ñañandu ñandeguerohoryha, ñanderayhu ha oñangarekoha ñanderehe, ñañeñanduháicha peteĩ ñane amígo ijeroviapýva ndive, térã oñeñanduháicha peteĩ mitã itúva jyva ári. Péro ndahaʼéi ñanekoʼẽnteva ha jaikóma Ñandejára amígoramo. Upéva ningo ñakonsegi ohasávo pe tiémpo. Upévare, jaikuaa ha jahayhu hag̃ua Jehovápe, tekotevẽ jalee Iñeʼẽ káda día. Avei jaleepaite vaʼerã Ñemañaha ha ¡Despertad!, ha entéro umi ambue puvlikasión.

12. ¿Mbaʼépa jajapo vaʼerã akóinte jareko hag̃ua Jehovápe ñane amigoitéramo?

¹² Ñandejára amigokuéra oñakãrapuʼã avei oñemboʼe rupi ipyʼaite guive ha ojeheʼa haguére umi tapicha heko porãva ndive  (elee Malaquías 3:16). Jehová “ohendu chupekuéra ojerure asy jave” (1 Ped. 3:12, NM). Haʼe ojapysaka porã ñanderehe, ojapoháicha peteĩ túva ohayhúva itaʼýrape. Upévare, ‘ñañemboʼe memékena’ chupe (Rom. 12:12, NM). Jehová nañanepytyvõiramo, ndaikatumoʼãi jasegi ñañakãrapuʼã. Ko múndo ñandejopy heta hendáicha ha ndajagueropuʼakamoʼãi ñandejehegui reínte. Upévare, nañañemboʼevéiramo ndajahupytymoʼãi umi mbaʼe Jehová omeʼẽva ñandéve akóinte ñanembarete hag̃ua. ¿Reñeñandu porãpa umi ñemboʼe rejapóvare, térãpa rehechakuaa tekotevẽha reñemboʼe porãve? (Jer. 16:19.)

13. ¿Mbaʼérepa tekotevẽ jajeheʼa ermanokuérare ikatu hag̃uáicha ñañakãrapuʼã?

¹³ Jehová oguerohoryeterei umi “hese ojeroviávape”. Upévare, jaikuaa rire jepe Ñandejárape, jasegi vaʼerã jaha rreunionkuérape, oĩháme heta oikuaáva avei chupe (Nah. 1:7). Ko múndope henyhẽ umi mbaʼe ñandepyʼapýva, ha ojapo porãitereíta ñanderehe jajeheʼáramo umi kristiáno ñanemokyreʼỹvare. ¿Mbaʼe mbaʼépa jahupytýta? Kongregasiónpe jatopáta heta ermáno ñanemokyreʼỹva japorohayhu ha jajapo hag̃ua umi mbaʼe iporãva (Heb. 10:24, 25). Pablo heʼi vaʼekue jajoayhu vaʼerãha, ha upearã tekotevẽ ñaime peteĩ kongregasiónpe, ijatyhápe heta tapicha omombaʼeguasúva Ñandejárape peteĩ ñeʼẽme. Ha jahechauka hag̃ua peichagua mborayhu, ñaime vaʼerã umi ermáno ndive. Ñande lístape ñakontrola vaʼerã jaha memépa umi rreuniónpe ha ñakomenta.

14. ¿Mbaʼérepa jaʼekuaa tekotevẽha akóinte ñañearrepenti?

¹⁴ Oiko hag̃ua ñandehegui kristiáno, tekotevẽ kuri ñañearrepenti ha jajevy, térã jahejaite ñane rembiapo vaikue. Upéicharõ jepe, jaʼekuaa tekotevẽha akóinte ñañearrepenti. Ñande ningo ñaneimperfékto ha pe pekádo oĩ ñandereity hag̃uáicha, ku mbói ojepreparaháicha ñandesuʼu hag̃ua (Rom. 3:9, 10; 6:12-14). Jajesapeʼa porãkena ha ani ñaimoʼã vyroreiha umi mbaʼe vai jajapóva. Haʼetépe ningo Jehová ipasiénsia ñanderehe, upévare ñañehaʼã meme vaʼerã jagueropuʼaka hag̃ua umi mbaʼe ñandepyʼaraʼãva ha ñakambia tekotevẽhápe (Filip. 2:12; 2 Ped. 3:9). Tuicha ñanepytyvõta avei jaiporu porãramo ñane tiémpo ha umi mbaʼerepy jarekóva, ha ani jaiko jahupytyse umi mbaʼe ñandegustávante. Peteĩ ermána heʼi: “Che túva ha che sy chemongakuaa pe añeteguápe, péro che ndahechái Jehovápe ambue ermanokuéraicha. Akyhyje voi apensa hag̃ua jepe hese, ha aimoʼã arakaʼeve ndaikomoʼãiha chupe ogustaháicha”. Tiémpo rire, ko ermána ou ikangy heta iprovléma rupi. Haʼe heʼive: “Ndahaʼéi ningo ndahayhúiva Jehovápe, síno ndaikuaaporãinte chupe. Upéicharõ jepe, heta añemboʼe che pyʼaite guive ha upe rire ahechakuaa opa mbaʼe okambiaha ohóvo. Añandu Jehová cheguerahaha che pógui ku mitãicha, ha chepytyvõha ambohovái hag̃ua peteĩteĩ che provlemakuéra. Haʼe akóinte cherayhu ha ohechauka chéve mbaʼépa ajapo vaʼerã”.

15. ¿Mbaʼérehepa ojesareko Jesús ha Itúva?

¹⁵ “Akóinte peñeʼẽ umi héntepe” pe marandu porãre. Ñandejára ánhel heʼi vaʼekue péicha Pédrope ha umi ótro apóstolpe ojepoi rire chuguikuéra kárselgui peteĩ milágro rupive (Hech. 5:19-21, NM). Ñande lístape ñakontrola vaʼerã ñasẽpa ñaína káda semána ñamombeʼu pe marandu porã. Jesús ha Itúva ojesareko hína ñande jerovia ha ñane predikasión rehe (Rev. 2:19). Pe ansiáno ñañeʼẽma hague heʼi: “Pe predikasión ningo haʼe peteĩ mbaʼe jajapo vaʼerã jaikove aja pukukue”.

16. ¿Mbaʼérepa ndovaléi ñanderesarái ñañemeʼẽma hague Jehovápe?

¹⁶ Aníke ñanderesarái ñañemeʼẽma hague Jehovápe. Ñande ñaime porã vaʼerã Ñandejára ndive, ha ndaipóri iñimportantevéva upévagui. Haʼe oikuaa umi imbaʼévape  (elee Isaías 44:5). Eñemboʼe ha ehesaʼỹijo mbaʼéichapa reime Jehová ndive. Ani nderesarái avei arakaʼépa rejevautisa. Péicha akóinte nemanduʼáta ne vautísmo orrepresentaha pe kompromíso iñimportantevéva rejapovaʼekue.

17. ¿Mbaʼérepa ñaaguantakuaa vaʼerã ani hag̃ua ñañemomombyry Jehovágui?

¹⁷ Ohaírõ guare umi Galaciaguápe, apóstol Pablo heʼi vaʼekue umi kristiáno tekotevẽha oaguantakuaa (Gál. 6:9). Koʼág̃a rupi avei opavave ñaaguantakuaa vaʼerã. Ikatu ningo rehasa heta mbaʼe ijetuʼúva, péro Jehová katuete nepytyvõta. Ejerure memékena chupe tomeʼẽ ndéve ijespíritu sánto. Tuicha nekyreʼỹta rehechávo Ñandejára omeʼẽha ndéve vyʼa ha pyʼaguapy ha oipeʼaha ndehegui vyʼaʼỹ ha jehasa asy (Mat. 7:7-11). Epensamína ko mbaʼére: Jehová ningo oñangareko umi guyra mimíre, ¿ha piko noñeinteresamoʼãi nderehe, rehayhu ha reñemeʼẽ vaʼekue chupe? (Mat. 10:29-31.) Tahaʼe haʼéva umi mbaʼe jetuʼu rehasáva, aníkena rejevy umi mbaʼe reheja vaʼekuépe ni reñentrega. ¡Ajépa hetaite mbaʼe porã jahupyty Jehová ñandekuaa haguére!

18. Koʼág̃a ‘reikuaámarõ Ñandejárape’, ¿mbaʼépa rejapovaʼerã?

¹⁸ ¿Mbaʼépa rejapo vaʼerã oiméramo ramoiténte reikuaa Jehovápe ha rejevautisa? Resegi vaʼerã reikuaave chupe ha reñakãrapuʼã. Oimérõ aréma rejevautisa hague katu, resegi vaʼerã avei reaprende hetave mbaʼe oĩva la Bíbliape. Aníkena repensa natekotevẽveimaha rejapo mbaʼeve reñakãrapuʼã hag̃ua. Upéva rangue, pyʼỹinte rehecha vaʼerã nde lísta rekontrola hag̃ua oimépa koʼẽ koʼẽre reñemoag̃uive rehóvo Jehováre. Haʼe ningo ñande Ru, ñane Amígo ha Ñandejára ñanderayhuetéva (elee 2 Corintios 13:5, 6).