Peteĩ mbaʼe tuicha ñanepytyvõva haʼe hína pe konsuélo omeʼẽva ñandéve ñane hénte, ñane amigokuéra ha umi ermáno kongregasiongua.

Peteĩ amígo oñeʼẽramo ñandéve tory ha mborayhúpe, haʼete voi peteĩ pohã ñanemombytuʼu ha ñanemongueráva (Prov. 16:24; 18:24; 25:11). Péro ñande ndajaipotái ótronte ñanekonsola, síno ñande voi jajapo tekotevẽva “ikatu hag̃uáicha pe konsuélo Ñandejára omeʼẽva ñandéve rupive, ñande avei ñakonsola umi ohasávape opaichagua jehasa asýre” (2 Cor. 1:4, NM; Luc. 6:31). Antonio, peteĩ superintendénte de distríto Mexicogua, ohecha añeteha heʼíva ko téxto.

Haʼe oñeñandu vaieterei oikuaávo ojagarraha chupe peteĩ kánser huguýpe, hérava linfóma. Upéicharõ jepe, oñehaʼãmbaite opensa meme umi mbaʼe iporãvare. ¿Mbaʼéichapa ojapo upéva? Oñehaʼã imanduʼa umi kántikore, opurahéi ha ojepyʼamongeta umi mbaʼe heʼívare pype. Avei tuicha ipyʼaguapy oñemboʼévo ohendu hag̃uáicha ha oleévo la Biblia.

Péro Antonio ohecha tuichaitereive oñeñandu porãha umi ermáno oipytyvõ jave chupe. Haʼe heʼi: “Sapyʼánte che ha che rembireko roñeñandu vai; upéicha jave rojerure peteĩ ore pariéntepe, haʼéva avei ansiáno, ou hag̃ua ore rendápe ha oñemboʼe orendive. Upéva orembyetiaʼe ha orembopyʼaguapy. Ermanokuéra ha ore hénte orepytyvõ rupi, pyaʼeve rombohovái umi mbaʼe oremoñeñandu vaíva”. ¡Mbaʼeichaitépa ovyʼa ko ermáno oreko haguére amígo oporohayhu ha ipyʼaporãva!

Peteĩ mbaʼe ikatúva avei ñanepytyvõ ñañeñandu vai jave, haʼe hína pe espíritu sánto oñemeʼẽva ñandéve “rregáloramo”, heʼi haguéicha Pedro (Hech. 2:38, NM). Upéva ojekuaa porã Pentekostés áño 33-pe, ojeporavórõ guare heta kristiánope oho hag̃ua yvágape. Koʼág̃a avei pe espíritu sánto oĩ ñanepytyvõ hag̃uáicha opavavépe. Upévare, jajerure meme vaʼerã Jehovápe tomeʼẽ ñandéve (Is. 40:28-31).

Pablo ohasa vaʼekue hetaiterei mbaʼe ijetuʼúva, ha heta vése haimetemete omano (2 Cor. 1:8-10). Péro haʼe ndokyhyjéi omanórõ g̃uarã oikuaágui Jehová akóinte oipytyvõha chupe. Upévare ohai: “Toñembotuicha Ñandejárape, ñande Ruvicha Jesucristo Túva. Haʼe ningo peteĩ Túva oporoporiahuverekóva ha Ñandejára omeʼẽva opaichagua konsuélo. Haʼe ñanekonsola opa umi ñande jehasa asýpe” (2 Cor. 1:3, 4, NM). Pablo ningo ndoikói oñembyasyháre ohasa asy haguére. Upéva rangue, oñehaʼãmbaite oñemoĩ hapichakuéra lugárpe, oikuaa rupi mbaʼérehepa ohasa hikuái. Umi mbaʼe jetuʼu ohasáva oipytyvõ chupe okonsola porãve hag̃ua umi oikotevẽvape.

Okuera rire, Antonio oservi jey superintendénteramo. Haʼe ningo akóinte oñeinteresáva umi ermánore, péro koʼág̃a koʼýte oñehaʼã hembirekóndi ovisita umi hasývape ha omokyreʼỹ chupekuéra. Por ehémplo, ohórõ guare ovisita peteĩ kristiáno hasývape, oikuaa ko ermáno ndohoseveiha rreunionhápe. Antonio heʼi: “Ndahaʼéi ndohayhúiva Jehovápe térã ermanokuérape, péro imbaʼasy ojapo vaieterei hese ha oñandu ndovaleveiha mbaʼeverã”.

Omokyreʼỹ hag̃ua ko kristiánope, Antonio ojerure chupe tojapo pe ñemboʼe ermanokuéra ijatýrõ guare ohasa porã hag̃ua oñondive. Haʼe oimoʼã noĩriha oñemboʼe hag̃uáicha; upéicharõ jepe ojapo. Antonio heʼi: “Oñemboʼe porãiterei ningo, ha upe rire haʼete ótra persóna. Oñandu ideprovechoha gueteri”.

Ñanemanduʼa vaʼerã opavavénte jahasa asyha, michĩmi jepe. Péro apóstol Pablo heʼi haguéicha, koʼã mbaʼe ñanepytyvõ ikatu hag̃uáicha ñaporokonsola. Upévare, jahechaukákena jajepyʼapyha ñane ermanokuéra ohasa asývare ha ñahaʼanga Jehovápe ñakonsolávo opa oikotevẽvape.