1, 2. ¿Mbaʼépa ojehupytýta Ñandejára Rréino rupive, ha mbaʼérepa jaʼekuaa pe Rréino outaha katuete?

PE PRIMAVÉRA áño 31-pe, peteĩ sérrope oĩva Capernaum ypýpe, Jesús omboʼe idisipulokuérape ojerure hag̃ua Ñandejárape: “Tou ne Rréino” (Mat. 6:10). Koʼág̃arupi heta hénte ndogueroviái pe Rréino outaha. Péro ñande jaikuaa porã Ñandejára ombohovaitaha upe ñemboʼe.

² Jehová oiporúta Irréino ouni hag̃ua ifamília, tahaʼe anhelkuéra ha yvypóra. Upéicha oñekumplíta Ñandejára rembipota (Is. 55:10, 11). Añetehápe, Jehovágui oikóma Rréi ñane tiémpope. Ha umi mbaʼe oiko vaʼekue umi 100 áño ohasávape ohechauka upeichaha. Ñandejára ojapo hetaiterei mbaʼe tuicháva ha ndaijojaháiva hembiguaikuéra rehehápe (Zac. 14:9; Apoc. 15:3). Jaikuaaháicha, Jehovágui oikóma Rréi ñane tiémpope, péro upéva ndeʼiséi og̃uahẽmaha pe Rréino Jesús omboʼe vaʼekue ojejerure hag̃ua. ¿Mbaʼépepa idiferénte koʼã mokõi mbaʼe, ha mbaʼérepa iñimportánte ñandéve g̃uarã?

3. a) ¿Arakaʼépa Jesús oñepyrũ ogoverna, ha moõpa? b) ¿Mbaʼéichapa nde remyesakãta Ñandejára Rréino oñepyrũ hague ogoverna 1914-pe? (Ehecha pe nóta.)

³ Opakuévo síglo 19, hesakãvéma peteĩ profesía oñemeʼẽ vaʼekue Daniel rupive ojapóma 2.500 áño rasa: “Oisãmbyhy aja koʼã mburuvicha, Ñandejára yvagapegua omoĩta peteĩ goviérno  noñehundimoʼãiva arakaʼeve” (Dan. 2:44, NM). Umi Estudiánte de la Biblia ohechakuaáma vaʼekue áño 1914-pe oikotaha peteĩ mbaʼe tuicháva. Umi hénte upe tiempopegua nohaʼarõi voi ivaíva, síno opensa iporãtaha entéro mbaʼe. Por ehémplo peteĩ eskritór ohai: “Áño 1914-pe entéronte ohaʼarõ oñekumpli heta promésa ha tuicha iñesperánsa hikuái”. Péro peichaháguinte oñepyrũ pe primera gérra mundiál upe áñope voi. Umi profesía oĩva la Bíbliape oñekumplipaite. Upe riremi oñepyrũ oĩ ñembyahýi ápe ha pépe, hetave mbaʼasy ha yvyryrýi. Koʼã mbaʼe ohechauka porã áño 1914-pe Jesucristo oñepyrũ hague ogoverna Ñandejára Rréino yvágape. * Ha jaʼekuaa Jehovágui oiko jey hague Rréi, onombrárõ guare Itaʼýrape Rréi Mesiániko.

4. ¿Mbaʼépa ojapo Jesús oñenombra riremi chupe Rréi, ha mbaʼépa ojapo avei upe rire?

⁴ ¿Mbaʼépa ojapo Jesús oñenombra riremi chupe Rréi? Oñorairõ Satanás ndive, haʼéva hína Itúva enemígo. Jesús ha hiʼanhelkuéra omosẽ yvágagui Satanás ha idemoniokuérape. Upévare ojevyʼaiterei yvágape, péro ko yvy ape ári oñepyrũ oiko heta mbaʼe vai arakaʼeve oikoʼỹ haguéicha (elee Apocalipsis 12:7-9, 12). Upe rire pe Rréi oñepyrũ omopotĩ, ombokatupyry ha oorganisa umi oĩvape ipoguýpe ko yvy ape ári, ikatu hag̃uáicha ojapo hikuái Ñandejára rembipota. Jahechamína mbaʼéichapa haʼekuéra iñeʼẽrendu pe Rréipe koʼã mbohapy mbaʼépe ha mbaʼéichapa iñehémplo ñanepytyvõ koʼág̃a.

5. ¿Mbaʼe tembiapópa ojejapo áño 1914 guive 1919 oñepyrũ riremi peve?

⁵ Oñemosẽ rire yvágagui Satanás ha idemoniokuérape, Jehová omanda pe Rréipe ohecha hag̃ua mbaʼéichapa umi kristiáno oservi hína chupe ha heʼi avei omopotĩ hag̃ua chupekuéra. Proféta Malaquías heʼi ko tembiapo haʼeha peteĩ limpiésa (Mal. 3:1-3). Oĩ heta mbaʼe ohechaukáva upéva oiko hague 1914 guive 1919 oñepyrũ riremi peve. * Ikatu hag̃uáicha ñaime Jehová famíliape tekotevẽ ñanepotĩ (1 Ped. 1:15, 16). Ndajahejái vaʼerã ñanemongyʼa umi rrelihión japu omboʼéva ha ndajajeheʼái vaʼerã polítikare.

6. ¿Mávapa omeʼẽ ñandéve umi hiʼupy ñaikotevẽva, ha mbaʼérepa iñimportantete umíva ñandéve g̃uarã?

⁶ Upéi Jesús oiporu ijautorida onombra hag̃ua “pe tembiguái jeroviaha ha iñarandúva”. Ko tembiguái osegi omeʼẽ hiʼupy opavave oĩvape Jesús ‘ovecha atýpe’, ikatu hag̃uáicha omombarete hikuái ijerovia (Mat. 24:45-47; Juan 10:16). Áño 1919 guive, peteĩ grúpo michĩva oĩháme umi ermáno unhído, akóinte omeʼẽ hiʼupy umi ‘ótro tembiguaikuérape’. Koʼã hiʼupy omboúva ñandéve pe tembiguái jeroviaha, omombarete ñande jerovia ha ñanepytyvõ jasegi hag̃ua ñanepotĩ umi mbaʼe ñapensávape, jajapóvape, jaadorávo Jehovápe ha opa mbaʼépe. Avei ñanerekomboʼe ha ñandeprepara jajapo hag̃ua pe tembiapo iñimportantevéva ko yvy ape ári: pe predikasión. ¿Jaaprovechapaitépa jaikóvo pe hiʼupy oñemeʼẽva ñandéve?

7. ¿Mbaʼe tembiapópa Jesús omoñepyrũ vaʼekue oĩrõ guare ko yvy ape ári, ha arakaʼe pevépa ojejapo vaʼerã upéva?

⁷ Oñepyrũrõ guare hembiapo ko yvy ape ári, Jesús heʼi: “Amombeʼu [vaʼerã] umi marandu porã oñeʼẽva Ñandejára Rréinore. Upearã ningo añembou vaʼekue”  (Luc. 4:43). Tres áño imédio oñemeʼẽmbaite opredika hag̃ua, ha heʼi idisipulokuérape ojapo hag̃ua avei upéicha: “Pehokuévo, pepredika pehóvo ha peje: ‘Pe Rréino yvagapegua hiʼag̃uimbaitéma’” (Mat. 10:7). Oikove jey rire, Jesús oprofetisa isegidorkuéra omog̃uahẽtaha pe marandu porã “mombyryvehápe ko yvy tuichakuére” (Hech. 1:8). Ha opromete haʼe voi oipytyvõtaha chupekuéra ojapo hag̃ua upe tembiapo oñehundi peve ko múndo aña (Mat. 28:19, 20).

8. ¿Mbaʼéichapa pe Rréi omokyreʼỹ umi oĩvape ipoguýpe opredika hag̃ua?

⁸ Áño 1919 guive, pe “marandu porã oñeʼẽva Ñandejára Rréinore” iñimportantevéntema (Mat. 24:14). Pe Rréi ogovernáma yvágape ha ombyatýma ko yvy ape ári peteĩ grúpo oĩháme kristiáno haʼe omopotĩmava Jehová renondépe. Ko grúpo iñeʼẽrendu ha kyreʼỹme opredika opárupi pe marandu porã, omombeʼúva pe Rréino oñepyrũmaha ogoverna yvágape (Hech. 10:42). Por ehémplo, septiembre de 1922-pe ojejapo peteĩ asambléa internasionál Cedar Póintpe (Ohio, Estados Unidos) ha oho haimete 20.000 persóna. Ñapensamína mbaʼeichaitépa ovyʼáne raʼe hikuái ermáno Rutherford ojapórõ guare pe diskúrso hérava “Pe Rréino yvagapegua hiʼag̃uimbaitéma”, ha heʼi: “¡Péina, pe Rréi ogovernáma! Peẽ peñeʼẽ vaʼerã hérape. Upévare, tapeho peikuaauka, peikuaauka, peikuaauka mávapa pe Rréi ha irréino”. ¿Mbaʼépa ojapo heta tapicha ohendu vaʼekue upe diskúrso? Dos mil persóna osẽ pe día espesiál de predikasiónpe hérava “Día de Servísio”, ha opredika hikuái pe lugár de asambléa jerére 72 kilómetro peve. Peteĩ ermáno heʼi: “Ndacheresaraimoʼãi voi roñeinvitárõ guare romomarandu hag̃ua pe Rréino. Opavavénte ningo ikyreʼỹjoa”. Heta ermáno oñeñandu avei haʼéicha.

9, 10. a) ¿Mbaʼe mbaʼépa ojejapo oñembokatupyry hag̃ua umi maranduhárape? b) ¿Mbaʼéichapa ndéve nepytyvõ koʼã eskuéla?

⁹ Áño 1922-pe oĩ 17.000 ári maranduhára 58 tetãme. Péro upérõ guare ofalta kuri oñembokatupyry chupekuéra. Síglo primérope, Jesús omboʼe vaʼekue hemimboʼekuérape mbaʼépa opredika vaʼerã, ha avei moõrupipa ha mbaʼéichapa ojapo vaʼerã pe tembiapo (Mat. 10:5-7; Luc. 9:1-6; 10:1-11). Péicha avei koʼág̃a Jesús osegi ohekomboʼe opavave opredikávape, ha omeʼẽ chupekuéra tekotevẽva guive ojapo porã hag̃ua hembiapo (2 Tim. 3:17). Pe kongregasión kristiána rupive oprepara umi maranduhárape. Por ehémplo, oiporu pe Eskuéla Jaiporukuaa Hag̃ua la Biblia ojejapóva mas de 111.000 kongregasiónpe oĩva ko yvy apére. Ko Eskuéla rupive 7 millón ári puvlikadór oñembokatupyry opredika ha omboʼe hag̃ua “opaichagua tapichápe” (elee 1 Corintios 9:20-23).

¹⁰ Avei ojejapo heta eskuéla vívlika ombokatupyrýva ansianokuérape, prekursórpe,  kuimbaʼe soltérope, umi omendávape, umi oĩvape Komite de Sukursálpe ha hembirekokuérape, umi superintendénte ha hembirekokuérape ha umi misionérope. * Peteĩ grúpo oho vaʼekue pe Eskuéla Vívlika umi Omendávape g̃uarãme oagradeseterei ha oskrivi: “Pe preparasión neporãva oñemeʼẽ vaʼekue oréve orepytyvõ rohayhuve hag̃ua Jehovápe ha orembokatupyry roipytyvõ porãve hag̃ua ore rapichápe”.

11. ¿Mbaʼépa oipytyvõ umi maranduhárape oaguanta hag̃ua Satanás oñemoĩ jave hesekuéra?

¹¹ Satanás ohechakuaa ñande ñañehaʼãmbaiteha japredika ha ñamboʼe umi héntepe pe marandu porã oñeʼẽva pe Rréino rehe. Upévare ojapo ikatúva guive ñandejoko hag̃ua, por ehémplo oñemoĩ mbarete ñanderehe, térã omoĩ ñuhã ñandereity hag̃ua. Péro oñehaʼãvéramo jepe ndohupytymoʼãi oipotáva. Jehová ningo “omoĩ [Itaʼýrape] yvateve opaichagua goviérno, autorida, mburuvicha ha opa téragui” (Efes. 1:20-22). Ha Jesús oiporu upe autorida oñangareko ha ogia hag̃ua idisipulokuérape. Péicha haʼe oñenkarga ojejapo hag̃ua Itúva rembipota. * Koʼág̃a peve ojepredika meme pe marandu porã, ha hetaiterei hénte ipyʼaporãva oikuaa ohóvo Jehovápe. ¡Ajépa javyʼaite jareko haguére ko priviléhio!

12. ¿Mbaʼéichapa pe Rréi oorganisa oúvo umi oĩvape ipoguýpe?

¹² Pe Rréi oñepyrũ guive ogoverna áño 1914-pe, oorganisa porãve ohóvo umi oĩvape ipoguýpe ikatu hag̃uáicha ojapo hikuái Itúva rembipota (elee Isaías 60:17). Áño 1919-pe oñemoĩ peteĩ direktór de servísio káda kongregasiónpe oorganisa hag̃ua pe predikasión. Upéi 1927-pe oñepyrũ ojepredika ogahárupi domingokue. Ha oiméne ovyʼaite umi ermáno oñeanunsiárõ guare 1931-pe ñañehenoitaha testígo de Jehová, peteĩ téra oñeguenohẽva la Bíbliagui (Is. 43:10-12). Áño 1938 guive katu ndojeporavovéima vóto rupive umi ansianorã, síno oñenombra umi ermáno okumplívape umi rrekisíto oĩva la Bíbliape. Áño 1972-pe ojedesidi pe kongregasión oĩtaha ansianokuéra poguýpe, oĩ rangue peteĩ siérvo de kongregasión kárgopente. Upéi avei ojeʼe umi ermáno okumplívape umi rrekisíto oservi hag̃ua siérvo ministeriál térã ansiánoramo, toipytyvõ ‘oñeñangareko’ hag̃ua “Ñandejára ovechakuérare” (1 Ped. 5:2). Áño 1976-pe pe Kuérpo Governánte oñeorganisa seis komitépe ikatu hag̃uáicha oñatende porã umi tembiapo ojejapóva pe Rréino rehehápe ko yvy tuichakuére. Jahechaháicha,  pe Rréi onombra vaʼekue Jehová, oorganisa porã oúvo isiervokuérape Ñandejára oipotahaichaite.

13. ¿Mbaʼéichapa ndéve nepytyvõ umi mbaʼe ohupytýva pe Rréino koʼã 100 áño ogovernávape?

¹³ Epensamíntena mbaʼe mbaʼépa ohupytýma pe Rréi Mesiániko koʼã 100 áño ogovernávape. Omopotĩma peteĩ grúpope ikatu hag̃uáicha ogueraha Ñandejára réra. Omoakã pe predikasión ojegueraha hag̃ua pe marandu porã 239 tetãme ha oipytyvõma hetaiterei tapichápe oikuaa hag̃ua Jehovápe. Ombyatýma mas de 7 millón persónape oĩ hag̃ua ipoguýpe, ha entéronte koʼãva oñemeʼẽ ipyʼaite guive ojapo hag̃ua Itúva rembipota (Sal. 110:3). ¡Ajépa tuicha ha ndaijojahái umi mbaʼe Jehová ojapóva pe Rréino Mesiániko rupive! Ha oĩ gueteri hetave mbaʼe ojapótava.

14. a) ¿Mbaʼépa jajerure Ñandejárape jaʼévo “Tou ne Rréino”? b) ¿Mbaʼe téxtopa ojeporu ko áño 2014-pe, ha mbaʼérepa opyta porãite upéva?

¹⁴ Jehová ningo onombra Itaʼýrape Rréi Mesiániko 1914-pe, péro upéva ndeʼiséi upérõ guare oñekumplipamaha pe jajeruréva jaʼévo “Tou ne Rréino” (Mat. 6:10). La Bíbliape ojeprofetisáma vaʼekue Jesús ‘ogovernataha iñenemigokuéra apytépe’ (Sal. 110:2, NM). Ñane tiémpope umi goviérno oĩva Satanás poguýpe, oñemoĩ gueteri pe Rréinore. Ha jajerure jave tou pe Rréino, añetehápe jajerure hína Ñandejárape pe Rréi Mesiániko ha umi 144.000 ogovernátava hendive, tou tohundi umi yvypóra goviérno ha entéro oñemoĩvape pe Rréinore ko yvy ape ári. Upéicha oñekumplíta ko promésa: “Ohundietéta opavave koʼã goviérno”. Jahechaháicha, pe Rréi ohundipaitéta umi polítikope (Dan. 2:44, NM; Apoc. 6:1, 2; 13:1-18; 19:11-21). Añetehápe ningo ndajahapukuvéima upearã. Ko 2014-pe oñekumpli 100 áño Ñandejára Rréino oñepyrũ hague ogoverna. ¡Ajépa ou porãite pe téxto ojeporúva ko áñope oĩva Mateo 6:10-pe: “Tou ne Rréino”!

15, 16. a) ¿Mbaʼe mbaʼépa oikóta pe Rréino de Mil Áño aja? b) ¿Mbaʼépa ojapóta ipahaite pe Rréi Mesiániko? c) ¿Mbaʼéichapa oñekumplíta Ñandejára rembipota?

¹⁵ Pe Rréi Mesiániko ohundi rire Ñandejára enemigokuérape, oitýta Satanás ha idemoniokuérape pe yvykua pypukúpe ha opytáta hikuái upépe mil áñore (Apoc. 20:1-3). Oipeʼa rire koʼã enemígo iñañaitévape, pe Rréino oipytyvõtama umi héntepe ohupyty hag̃ua umi mbaʼe porã oñemeʼẽva Jesús sakrifísio rupive, ha oipeʼáta avei opa mbaʼe operhudikáva yvypórape Adán opeka rupi. Pe Rréi omoingove jeýta hetaiterei omano vaʼekuépe ha oorganisáta peteĩ prográma oñehekomboʼe hag̃ua chupekuéra ikatu hag̃uáicha oikuaa Jehová (Apoc. 20:12, 13). Ko Yvýgui oikóta peteĩ lugár neporãmba jepéva, ojoguáva pe hardín de Edénpe. Ha umi yvypóra iñeʼẽrendúva katu ohupytýta perfeksión.

¹⁶ Opávo pe Rréino de Mil Áño oĩtava Cristo poguýpe, oñekumplipaitétama umi mbaʼe ohupytyse vaʼekue pe Rréino Mesiániko. Upe rire Jesús ontregáta pe Rréino Itúvape (elee 1 Corintios 15:24-28). Upérõ natekotevẽmoʼãvéima yvyporakuéra ojevale peteĩ mediadór rehe oñemoag̃ui hag̃ua Jehováre. Enterove Ñandejára raʼykuéra, tahaʼe oĩva ko Yvýpe térã yvágape, oĩ porãta Itúva yvagayguándi peteĩ famíliaicha.

17. ¿Mbaʼépa jajedesidi vaʼerã jajapo?

¹⁷ Umi mbaʼe porãita Ñandejára Rréino ohupytýmava koʼã 100 áño ogovernávape, ohechauka Jehová osegiha omanda ha katuete oñekumplitaha hembipota ko Yvýpe g̃uarã. Upévare, akóintekena ñañemoĩ pe Rréino poguýpe ha jaikuaauka mávapa pe Rréi ha Irréino. Añetehápe Jehová koʼẽrõitéma ombohováita pe jajeruréva chupe ñane ñemboʼépe: “Tou ne Rréino”.