1, 2. a) ¿Mbaʼépa heʼise pe palávra testígo? b) ¿Mbaʼépa nomombeʼúi umi médio de komunikasión? c) ¿Mbaʼérepa Jehová noikotevẽi umi médio de komunikasión rehe?

¿MBAʼÉPA heʼise pe palávra testígo? Peteĩ diksionário heʼi haʼeha “pe tapicha ohecha térã ohendúva peteĩ mbaʼe ha okonfirmáva oiko hague”. Por ehémplo, peteĩ siuda sudafricánape hérava Pietermaritzburg, oĩ peteĩ diário hérava The Witness (El Testigo), ojapómava 160 áño rasa osẽ hague oikóvo. Jaʼekuaa ko téra opyta porãha, pórke umi diário oĩ oinforma hag̃ua umi héntepe opa mbaʼe oiko hagueichaite. Pe oguenohẽ ypy vaʼekue ko diário opromete kuri nosẽmoʼãiha pype mbaʼeveichagua japu, siémpre heʼitaha siertogua.

² Péro ñambyasýramo jepe, umi médio de komunikasión sapyʼánte nomeʼẽi umi informasión oĩhaichaite, térã ijapu voi ha omokañy umi mbaʼe iñimportantevéva. Por ehémplo nomombeʼúi la verda oñeʼẽ jave Ñandejárare ni umi mbaʼe ojapo vaʼekuére. Péro Jehová, pe governánte Ipuʼakapáva ha tuichavéva oĩva ko univérsope, noikotevẽi koʼã médio de komunikasión rehe. Haʼe heʼi proféta Ezequiel rupive: “Umi tetã oikuaáta che haʼeha Jehová” (Ezeq. 39:7, NM). Jehová oreko ocho millón rupi Testígo omombeʼúva opárupi mávapa añetehápe haʼe, mbaʼépa ojapo vaʼekue yvyporakuéra rehehápe ha mbaʼépa ojapo koʼág̃a. Avei omombeʼu hikuái umi mbaʼe porã koʼẽrõitéma ojapótava. Isaías 43:10 heʼi: “Peẽ hína che testígo,  che siérvo aiporavo vaʼekue”. Upéicharõ, japredika jave, jahechauka ñaína ñande haʼeha Itestígo.

3, 4. a) ¿Arakaʼe guivépa umi Estudiánte de la Biblia okambia héra, ha mbaʼéichapa oñeñandu upe haguére? (Ehecha pe taʼanga oĩva iñepyrũme.) b) ¿Mbaʼe porandúpa oñembohováita ko artíkulope?

³ Jehová ningo “Rréi opa ára g̃uarã”. Haʼe heʼi: “Kóva hína che réra opa ára g̃uarã, ha péicha opavave imanduʼáta cherehe opa árare” (1 Tim. 1:17; Éx. 3:15, NM; ekompara Eclesiastés 2:16 rehe). Añetehápe tuichaiterei priviléhio jaipuru Jehová réra. Áño 1931 guive, umi Estudiánte de la Biblia oipuru pe téra testígo de Jehová. Heta oĩ ijapyteguikuéra oskrivi vaʼekue kárta oagradese hag̃ua oñehenói haguére chupekuéra péicha. Por ehémplo peteĩ kongregasión Canadagua oskrivi: “Ko téra pyahu testígo de Jehová orembovyʼaiterei. Koʼág̃a rojedesidi roñehaʼãmbaitetaha ani hag̃ua romongyʼa ore réra pyahu”.

⁴ ¿Mbaʼéichapa ikatu rehechauka remombaʼeha pe priviléhio reñehenói haguére testígo de Jehová? ¿Ikatúpa reexplika mbaʼérepa lívro de Isaíaspe Jehová heʼi ñanderehe haʼeha Itestígo? Ñahesaʼỹijomína koʼã porandu.

5, 6. a) ¿Mbaʼéichapa umi túva isrraelítagui oiko vaʼekue Jehová testígo? b) ¿Mbaʼépa iñimportánte avei ojapo umi túva isrraelíta? c) ¿Mbaʼérepa umi túva kristiáno omboʼe vaʼerã avei ifamíliape?

⁵ Isaías tiémpope, umi isrraelíta haʼe vaʼekue Jehová “testígo”, ha pe tetã kompletoite katu Ñandejára “siérvo” (Is. 43:10, NM). Umi túva isrraelíta omboʼe ifamíliape umi mbaʼe Jehová ojapo vaʼekue ymave ipuévlo rehehápe. Péicha jave haʼekuéra ohechauka haʼeha Ñandejára testígo. Por ehémplo, ojapo jave hikuái pe Páskua káda áño, osegi vaʼerã avei ko mandáto Jehová omeʼẽva chupekuéra: “Pende raʼykuéra oporandu jave peẽme: ‘¿Mbaʼére piko pejapo koʼã mbaʼe?’, peẽ peje vaʼerã  chupekuéra: ‘Kóva hína pe sakrifísio ojejapóva Páskuape Jehovápe g̃uarã. Haʼe omondo vaʼekue plága umi ehípsiope, péro ohasa rei entéro isrraelíta róga’” (Éx. 12:26, 27, NM). Oiméne umi túva omombeʼu avei ifamiliakuérape mbaʼéichapa faraón orreaksiona Moisés ojerurérõ guare chupe ohejami hag̃ua umi isrraelítape oho pe desiértope oadora hag̃ua Jehovápe. Upérõ pe mburuvicha heʼi: “¿Máva piko aipo Jehová ajapo hag̃ua haʼe heʼíva ha apoi hag̃ua Israélgui?” (Éx. 5:2, NM). Umi túva isrraelíta oiméne omombeʼu avei ifamíliape Jehová ombohovái hague faraónpe omboúvo umi 10 plága, ha upéi osalva chupekuéra pe mar Rójope. Upéicha Jehová ohechauka haʼeha pe Ipuʼakapáva. Enterove isrraelíta ohecha kuri Jehová haʼeha pe Dios verdadéro ha katuete okumpliha ipromésa.

⁶ Heta isrraelíta omombaʼeterei vaʼekue pe priviléhio oiko haguére Ñandejára testígoramo. Upévare omombeʼu hikuái itaʼyrakuérape ha hembiguaikuéra ótro tetãyguápe umi mbaʼe tuichaite Jehová ojapo vaʼekue. Péicha avei iñimportánte vaʼekue omboʼe ifamiliakuérape hekopotĩ hag̃ua. Jehová heʼi: “Che, Jehová pende Jára chemarangatu, peẽ avei penemarangatu vaʼerã” (Lev. 19:2, NM; Deut. 6:6, 7). Koʼág̃a avei tuvakuéra kristiáno omboʼe vaʼerã ifamíliape ikatu hag̃uáicha hekopotĩ, ha péicha ombotuicha hag̃ua hikuái Ñandejára réra porãite (elee Proverbios 1:8 ha Efesios 6:4).

7. a) ¿Mbaʼépa oiko vaʼekue umi isrraelíta iñeʼẽrendu jave? b) ¿Mbaʼe rresponsavilidápa jareko entéro testígo de Jehová?

⁷ Umi isrraelíta iñeʼẽrendu jave ohechauka omombaʼeha Jehová réra, ha umi tetã oĩva ijerére ohechakuaa upéva. Chupekuéra ojeʼe vaʼekue: “Tetãnguéra yvy arigua ohechakuaáta [Jehová] ndeporavo hague hetã teerã ha okyhyjéta ndehegui” (Deut. 28:10). Péro ñambyasýramo jepe, hetave vése naiñeʼẽrendúi hikuái. Pyʼỹinte umi isrraelíta oadora umi diós fálso, por ehémplo umi Canaanguápe. Upéicha rupi ou hikuái ipyʼahatã, osakrifika itaʼyrakuérape ha omaltrata umi imboriahúvape. Añetehápe, ñande ndajajoguaséi chupekuéra, upévare jasegi vaʼerã pe Imarangatuetéva ehémplo ha ñañehaʼã ñanderekopotĩ.

8. a) ¿Mbaʼe tembiapópa Jehová omanda Isaíaspe? b) ¿Mbaʼéichapa orreaksiona pe proféta?

⁸ Jehová oavisa vaʼekue umi isrraelítape proféta Isaías rupive, Jerusalén oñehunditaha ha ipuévlope ojeguerahataha tembiguairã. Péro avei oprofetisa ojapotaha “peteĩ mbaʼe ipyahúva”: oliveráta ipuévlope oñeimoʼãʼỹháicha (Is. 43:19, NM). Jehová oikuaáma vaʼekue umi isrraelíta noñarrepentimoʼãiha, upéicharõ jepe omanda Isaíaspe omeʼẽ hag̃ua chupekuéra imensáhe. Isaías kapítulo 1 guive kapítulo 6 peve oñeʼẽve umi mbaʼe vai oikótavare Jerusalén rehe ha umi siuda oĩvare ijerére. Pe proféta nontendéi mbaʼérepa Jehová osegi ojapouka chupe upéva, ha oikuaase arakaʼe pevépa pe puévlo idesovediénteta. Ñandejára heʼi chupe: “Umi siuda oñehundipa ha opyta peve henteʼỹre, umi óga nandipa peve, ha upe lugárgui oiko peve peteĩ desiérto” (elee Isaías 6:8-11).

9. a) ¿Arakaʼépa oñekumpli Isaías oprofetisa vaʼekue Jerusalén rehe? b) ¿Mbaʼéicha rupípa koʼág̃a ñañatende porã vaʼerã?

⁹ Isaías omeʼẽ pe mensáhe umi isrraelítape 46 áñorupi. Oñepyrũ oprofetisa áño 778-pe a.C., pe último áño ogovernahápe rréi Uzías, ha osegi áño 732 a.C. pevérupi. Upérõ orreináma kuri Ezequías. Jehová katu osegi oavisa ipuévlope áño 607 a.C. peve, oñehundírõ guare Jerusalén. Upéicha jahecha Jehová de antemáno  oavisáma hague umi isrraelítape mbaʼépa oikóta. Ñane tiémpope avei, Jehová oipuru ipuévlope oavisa hag̃ua mbaʼépa oikóta. Ojapo 135 áñoma ko rrevísta omombeʼu hague oikóvo umi héntepe koʼẽrõitéma oñehunditaha Satanás goviérno, ha hendaguépe ogovernataha Jesucristo mil áñore (Apoc. 20:1-3, 6).

10, 11. ¿Mbaʼe profesíapa ohecha oñekumpliha umi isrraelíta oĩ vaʼekue Babilóniape?

¹⁰ Umi hudío iñeʼẽrendúva Jehovápe oheja ojegueraha chupekuéra Babilóniape, ha upéicha rupi nomanói Jerusalén oñehundírõ guare (Jer. 27:11, 12). Ohasa rire 70 áño, Jehová puévlo ohecha mbaʼéichapa oñekumpli ko profesía: “Jehová pende Livertadór, Imarangatuetéva Israélpe, heʼi: ‘Penderehehápe amondóta peteĩ ehérsito Babilóniape ha ahejáta nandi hokẽnguéra’” (Is. 43:14, NM).

¹¹ Jehová okumpli ko profesía oñeimoʼãʼỹháicha. Peteĩ pyharépe, oñepyrũre octubre áño 539 a.C., pe rréi Babiloniagua ha umi kuimbaʼe iñimportánteva irréinope oñembyaty pe palásiope ha ojapo peteĩ karuguasu. Upépe haʼekuéra hoʼu avei víno umi váso ojepuru vaʼekuépe Jehová témplope, ha oadora idioskuérape. Upe aja pe ehérsito Media ha Persiagua ojagarráma ohóvo Babilonia. Áño 538 térã 537-pe, Ciro omondo umi hudíope Jerusalénpe omopuʼã jey hag̃ua Ñandejára témplo. Isaías oprofetisa kuri upéva, ha avei Jehová oñangarekotaha ipuévlore ohokuévo Jerusalénpe. Ñandejára heʼi hesekuéra: “Pe puévlope che amopuʼã vaʼekue chembaʼerã, ikatu hag̃uáicha omombeʼu umi mbaʼe ajapo vaʼekue” (Is. 43:21, NM; 44:26-28). Umi hudío oho jey vaʼekue hetãme ha omopuʼã jey pe témplo, ohecha Jehová siémpre okumpliha oprometéva.

12, 13. a) ¿Mávapa oñeuni umi isrraelíta ndive oadora hag̃ua Jehovápe? b) ¿Mbaʼéichapa “ambue ovechakuéra” omoirũ pe ‘Israel Ñandejára mbaʼévape’? c) ¿Mbaʼe esperánsapa oreko “ambue ovechakuéra”?

¹² Umi isrraelíta ou jeýrõ guare hetãme, hetaiterei hénte ndahaʼéiva hudío oñeuni hendivekuéra oadora hag̃ua Jehovápe. Upe rire katu hetave extranhéro oñeuni avei hendivekuéra (Esd. 2:58, 64, 65; Est. 8:17). Ñane tiémpope, “ambue ovechakuéra” omoirũ hína umi kristiáno unhídope, haʼéva pe “Israel Ñandejára mbaʼéva” (Juan 10:16; Gál. 6:16; Apoc. 7:9, 10). Umi oĩva pe ‘aty guasúpe’ oipuru avei pe téra Ñandejára omeʼẽva ipuévlope: testígo de Jehová.

¹³ Koʼág̃a ñañehaʼãmbaite vaʼerã ñanderekopotĩ hag̃ua ha jaiko Jehová oipotaháicha. Upéicharõmante Jesucristo goviérno de Mil Áñope ikatúta ñamombeʼu umi oikove  jeýtavape jareko hague pe priviléhio jaservívo Jehovápe itestígoramo koʼã ára pahápe. Péro ñañehaʼãmbaitéramo jepe jajapo opa mbaʼe Jehová ojeruréva, pyʼỹinte jajavy. Upévare ñarrekonose vaʼerã ñande haʼeha pekadór ha káda día jajerure Ñandejárape tañaneperdona. Añetehápe, tuichaiterei priviléhio jaiko Jehová Testígoramo ha jaipuru héra imarangatuetéva (elee 1 Juan 1:8, 9).

14. ¿Mbaʼépa heʼise Jehová réra?

¹⁴ Ikatu hag̃uáicha ñamombaʼeve ñañehenói haguére testígo de Jehová, ñantende porã vaʼerã mbaʼépa osignifika Ñandejára réra. Pe téra “Jehová” ningo ou peteĩ palávra evréagui heʼiséva “ojapo” térã “oiko”. Upéicharõ, ikatu hína jaʼe Jehová heʼiseha “Haʼe Ojapo Oipotáva Oiko”. Ko fráse ohechauka porã ñandéve mokõi mbaʼe. Primero, Jehová haʼeha pe Kreadór ojapo vaʼekue ko univérso ha opa mbaʼe oikovéva. Ha segundo, haʼe siémpre okumpliha ipromésa. Ohasávo pe tiémpo, haʼe ojapo tekotevẽva guive ojejapo hag̃ua ohóvo ivolunta. Upévare, Jehová heʼíramo ojapotaha peteĩ mbaʼe, ndaipóri ojoko vaʼerã chupe, ni Satanás.

15. ¿Mbaʼéichapa Jehová omyesakãve Moiséspe mbaʼépa heʼise avei héra? (Ehecha pe rrekuádro “ Mbaʼépa heʼise Jehová réra”.)

¹⁵ Jehová heʼírõ guare Moiséspe onohẽ hag̃ua ipuévlope Egíptogui, omyesakãve chupe mbaʼépa heʼise avei héra. La Biblia heʼi: “Ñandejára heʼi Moiséspe: ‘Chehegui Oikóta Che Aipotáva’. Ha heʼive chupe: ‘Ere vaʼerã Israel raʼykuérape: “Chehegui Oikóta chembou pene rendápe”’” (Éx. 3:14, NM). Péicha Jehová ohechauka mbaʼeichagua persónapa haʼe ha oikotaha chugui oñekotevẽva guive okumpli hag̃ua hembipota. Por ehémplo, umi isrraelíta esklávo vaʼekue, péro Jehová omosãso, oprotehe, ogia ha omeʼẽ chupekuéra opaite mbaʼe oikotevẽva.

16, 17. a) ¿Mbaʼéichapa ikatu jahechauka jaagradeseha oiko haguére ñandehegui testígo de Jehová? b) ¿Mbaʼépa jahecháta pe artíkulo oúvape?

¹⁶ Jehová ningo nokambiái. Héra ñanemomanduʼa haʼe ojapotaha tekotevẽva guive oñangareko hag̃ua ipuévlore. Por ehémplo, haʼe omeʼẽ ñandéve ñane remikotevẽ ha opaite mbaʼe ñaikotevẽva ñamombarete hag̃ua ñande jerovia. Ñandejára réra ñanemboʼe avei ótra kósa: Jehová ikatu ojapo tekotevẽva guive ikreasióngui oñekumpli hag̃ua hembipota. Por ehémplo oipuru Itestigokuérape ojapo hag̃ua haʼe oipotáva. Ñantende porãramo koʼã mbaʼe, jasegíta jaiko Ñandejára oipotaháicha ani hag̃ua ñamongyʼa héra. Peteĩ Testígo Noruegagua hérava Kåre, orekóva 84 áño ha oservímava Jehovápe ojapo 70 áño, heʼi: “Tuichaiterei mbaʼe ningo chéve g̃uarã aservi Jehovápe, pe Rréi opa ára g̃uarã. Avyʼa aime haguére ipuévlope, oñehenóiva hérarupi. Amombaʼeterei ikatu haguére amboʼe la Biblia che rapichakuérape, koʼýte ahechávo mbaʼéichapa ovyʼa ontende jave Jehová heʼíva. Chemoñeñandu porãiterei amyesakãvo chupekuéra mbaʼérepa Jesucristo ojesakrifika ñanderehehápe, ha mbaʼéichapa haʼe rupive ikatúta jaiko pyʼaguapýpe opa ára g̃uarã peteĩ múndo pyahúpe”.

¹⁷ Jaikuaaháicha, koʼág̃arupi saʼive oĩ oikuaaséva Ñandejárape. Upéicharõ jepe, oĩ gueteri umi ñanerendu porãva. Ha oiko haguéicha Kåre rehe, katuete javyʼaiterei ñamboʼe jave umi héntepe mbaʼépa heʼise Jehová réra. Péro, ¿mbaʼérepa jaʼekuaa ñande haʼeha Jehová testígo ha avei Jesús testígo? Upéva jahecháta pe artíkulo oúvape.