SEM ningo Noé raʼy ha ohecha oñehundírõ guare pe múndo aña itiémpope, upéi ohecha avei pe múndo pyahu oñepyrũva upe rire. Reikuaasépa mbaʼéichapa haʼe ha ihentekuéra ojesalvarakaʼe? a... Jahechamína upe oikovaʼekue.

Sem imitãrõ guare ningo la hénte iñañaiterei. La Biblia heʼi voi ‘mbaʼeichaite pevépa yvyporakuéra heko aña ko yvy apére ha opaite mbaʼe ipyʼapýpe heñóiva guive mbaʼe vai memeteha’. Mbaʼépa nde ere Jehová ojapo hague upévare?... Ombou peteĩ ama guasu ha ohundipaite umi hénte iñañávape. Apóstol Pedro heʼi: ‘Ko yvy ári oĩvaʼekue upéramo oñehundi ama guasu oikovaʼekue rupi’ (Génesis 6:5; 2 Pedro 3:6).

Rehechakuaápa mbaʼérepa Jehová ohundi umi héntepe?... Pórke umi hénte iñañaiterei ha umi mbaʼe ivaívante voi ojapose hikuái. Jesús oñeʼẽrõ guare hesekuéra, heʼi: ‘Pe ama guasu mboyve, umi hénte oikovaʼekue okaru, omboyʼu ha omenda’. Opavavénte omotenonde vyʼarã ha ‘naiñeʼẽrendúi, ou pe ama guasu ha ohundi opavavetépe’ (Mateo 24:37-39).

Péro mávapepa iñeʼẽrenduvaʼerã umi hénte?... La Biblia heʼi Sem túva, Noé ‘omombeʼu hague opavavépe mbaʼéichapa Ñandejára oipota ojeiko’. Péro la hénte naiñeʼẽrendúi Jehovápe, oiko iñakãrente ha Jehová omboúrõ guare pe ama guasu ojahogapaite hikuái. Noé katu iñeʼẽrenduvaʼekue Ñandejárape ha ojapo peteĩ árka ojesalva hag̃ua ifamília ndive. Péicha jahecha umi mbovymi iñeʼẽrenduvaʼekue Jehovápe nomanói hague. Umíva hína Noé, hembireko, umi mbohapy itaʼýra Sem, Cam, Jafet ha hembirekokuéra (2 Pedro 2:5; 1 Pedro 3:20).

Sem ha ihentekuéra ningo oikevaʼekue pe árkape ou mboyve pe ama guasu. Ha oiméne un áño rire mbaʼe osẽ hikuái pe árkagui yvy isekohápe. Ovyʼaiténeraʼe hikuái ndaiporivéima haguére umi hénte iñañáva! Péro ndohasapukúi oĩ jeýma hag̃ua provléma. Upéva omoñepyrũ Cam raʼy hérava Canaán, haʼe ningo Sem sovríno. Canaán ojapo peteĩ mbaʼe ivaietereíva ha ombopochyeterei Noépe, upévare haʼe heʼi: “Nde Canaán repyta maldesído”. Ha Cam níeto hérava Nemrod ningo iformaletereivaʼekue avei. Haʼe opuʼã Ñandejárare ha ojapouka pe tórre de Babel. Haʼe heʼi voi la héntepe: ‘Ñamopuʼã peteĩ tórre yvate og̃uahẽva yvága peve ha tañandekuaa  la hénte mombyryvehápe jepe’. Mbaʼéichapa nde ere oñeñandúne hague Sem ha Noé?... (Génesis 9:25, ÑÑB; 10:6-10; 11:4, 5.)

Haʼekuéra ningo ombyasyeterei la oikóva ha Jehová avei. Ha mbaʼépa Jehová ojapo upévare?... Okambia iñidióma umi omopuʼãvagui pe tórre ha oñepyrũ oñeʼẽ hikuái diferénte idiómape. Upéicha rupi noñontendevéi hikuái ha oheja rei upe ojapóva. Upéi umi oñeʼẽva guive peteĩ idiómape oñombyaty ha oho oiko ambue hendápe (Génesis 11:6-9). Péro Ñandejára nokambiái iñidióma Sem ha ifamiliakuéragui. Upévare haʼekuéra osegi oñondivepa ha oñopytyvõ oservi hag̃ua Ñandejárape. Sem ningo oikove are ha akóinte iñeʼẽrenduvaʼekue Jehovápe. Reikuaasépa mboy áñopa Sem oikovevaʼekue?...

Sem ningo oikove 600 áño. Orekórõ guare 98 áño Jehová ombou pe ama guasu ha upe rire osegi oikove 502 áño. Katuete oipytyvõnerakaʼe Noépe ojapo hag̃ua pe árka ha omombeʼu avei la héntepe Ñandejára omboupotaitemaha pe ama guasu. Péro osegínepa Sem iñeʼẽrendu Ñandejárape oikove aja entéro pe ama guasu rire?... Peteĩ jey Noé heʼivaʼekue Jehová haʼeha “Sem Jára”. Upéicharõ oiméne Sem akóinte iñeʼẽrenduvaʼekue Jehovápe ha upévare avei oiméne ifamiliakuéra oservi Ñandejárape. Umíva apytépe jaikuaa oĩ hague Abrahán, Sara ha Isaac (Génesis 9:26; 11:10-31; 21:1-3).

Ñapensamíntena umi mbaʼe oikóvare koʼág̃a rupi. Ajépa la hénte iñañaitereive yma guarégui? Mbaʼépa oikóta ko múndogui?... La Biblia heʼi ko múndo oñehundipotaitemaha. Péro opromete avei umi ‘ojapóva Ñandejára rembipota oikovetaha opa ára g̃uarã’. Jajapóramo Ñandejára heʼíva ikatúta jaikove vyʼápe opa árare ko yvy ape ári peteĩ múndo pyahúpe. Reikosépa avei nde upépe? (1 Juan 2:17; Salmo 37:29; Isaías 65:17.)