Oñeporandúva jepi

Mbaʼérepa Ñandejára heʼi ikatuha jaikove opa ára g̃uarã?

▪ La Biblia ningo heʼi Ñandejára ikatuha omeʼẽ ñandéve “jeikove opaʼỹva” (Juan 6:40). Mbaʼérepa Jehová ojapo upéva? Oime piko ñande ñamerese mbaʼe jaikove opa ára g̃uarã?

Tekojoja ningo heʼise jatrata peteĩchapa ñande rapichakuérape ha ñameʼẽ káda únope omereséva. Péro jaʼe porãsérõ g̃uarã avavete nañamereséi pe jeikove opaveʼỹva. Ñandejára Ñeʼẽ heʼi voi: ‘Ndaipóri avave ko yvy ape ári akóinte ojapo porãva opa mbaʼe ha ndojavýiva arakaʼeve’ (Eclesiastés 7:20). Ñande jajapóramo ivaíva ningo jajekastigamantevaʼerã upévare. Ha mbaʼe kastígopa jahupytýta? Ñandejára heʼi porã vaʼekue Adánpe opekaha ára omanotaha (Génesis 2:17). Apóstol Pablo katu ohaivaʼekue: “Mbaʼe vai apo oporogueraha ñemanóme” (Romanos 6:23). Ñande ningo Adán familiare ha pekadór avei, upévare ñamerese ñamano. Péro mbaʼére piko upéicharõ Ñandejára heʼi ikatuha jaikove opa ára g̃uarã?

Ñandejára Ñeʼẽ ningo heʼi pe jeikove opaveʼỹva haʼeha peteĩ jopói oñemeʼẽva ñandéve. Ñandejára ñanderayhu ha imbaʼeporãitereígui omeʼẽse ñandéve upéva, ndahaʼéi ñamereségui. La Biblia heʼi voi: ‘Opavavete opeka ha ndaipóri hekoporãva Ñandejára renondépe. Opáichavo, ojerereko chupekuéra hekopotĩvaramo, Ñandejára mborayhu rupi, Cristo Jesús osalva rupi chupekuéra’ (Romanos 3:​23, 24, BNP).

Ñande yvypóra ningo ñamerese ñamano, péro Ñandejára oipota oikove opa ára g̃uarã umi ohayhúva guive chupe. Upéicharõ piko Ñandejára opyrũhína iñeʼẽre? La Biblia heʼi: ‘Jaʼéta piko upévare Ñandejára ndahekojojaiha? Nahániri katu! Ñandejára niko heʼivaʼekue Moiséspe: “Aiporiahuverekóta che aiporiahuverekosévape ha chepyʼaporãta chepyʼaporãséva ndive”. Ha nde yvypóra, máva piko nde rehovaʼapi hag̃ua Ñandejárape?’ (Romanos 9:​14-20).

Heta tetãme ningo umi hués ha mburuvichakuéra ikatu okambia térã ombovevuive ikondéna umi mbaʼe vai apohápe. Ha ikatu voi operdonaite chupe ohechakuaáramo ojapo vai hague ha oñehaʼãramo ojeporta porã. Péicha ojejapo jave ikatu jaʼe ojeporiahuverekoha pe mbaʼe vai apohápe nomereséiramo jepe.

Jehová ningo Mburuvicha Guasu avei ha ikatu operdona hembiapo vaikue umi operdonasévape. Haʼe ningo oporohayhúguinte omeʼẽse jeikove opaveʼỹva umi ohayhu ha iñeʼẽrendúvape chupe. Upévare la Biblia heʼi ‘Ñandejárape g̃uarã peteĩchanteha opavave, ha oimeraẽ tetãygua okyhyjéva chugui ha hembiapo porãvape haʼe oguerohoryha’ (Hechos 10:​34, 35).

Ñandejára ningo ohechauka ñanderayhuetereiha omboúvo Itaʼýra ohasa asy ha omano hag̃ua ñanderehehápe. Jesucristo voi heʼivaʼekue: ‘Ñandejára ohayhuetereígui opa yvypórape, omeʼẽvaʼekue Itaʼýra peteĩete, ani hag̃ua omano umi hese ojeroviáva, oikove hag̃ua uvei opa ára’ (Juan 3:16).

Péicha jahecha Jehovápe g̃uarã peteĩchanteha enterove ohayhu ha iñeʼẽrendúva chupe, oiméramo jepe jajaporakaʼe heta mbaʼe vai. Upéicharõ Jehová imbaʼeporã ha ñanderayhuetereíguinte omeʼẽse ñandéve jeikove opaveʼỹva, ndahaʼéi ñamereségui.

[Komentário oĩva páhina 29-pe]

Ñandejára ningo imbaʼeporã ha ñanderayhuetereíguinte oipota jaikove opa ára g̃uarã.