Mbaʼérepa hetaite mbaʼe vai ojapo la hénte?

ENTEROVÉNTE jahechakuaa ñaneimperfektoha, upévare opavave jajapo jajapoʼỹvaʼerã ha upe rire ñambyasy. Upéicharamo jepe ndaikatúi jaʼe yvyporakuéra iñimperfékto rupínte ojapoha hetaite mbaʼe vai. Káda día jahecha térã ñahendu ojejapoha hetaiterei mbaʼe vai.

Enterovénte ohechakuaa heta mbaʼe ojejapóva ivaietereiha, péro káda uno ikatu odesidi ojapótapa avei upéicha térãpa nahániri. La hénte ohechakuaa avei idiferenteha peteĩ iñeʼẽʼavýnteva ha peteĩ ijapúva, térã idiferenteha peteĩ olastimáva hapichápe ojaposeʼỹre ha peteĩ ojukaségui voi ojukáva hapichápe. Ha heta vése umi ñaimoʼãʼỹvéva la ojapóva jepi umi mbaʼe vai. Péro, mbaʼérepa la hénte ojapo koʼã mbaʼe?

 La Biblia omyesakã mbaʼérepa heta hénte ojapo mbaʼe vai oikuaáramo jepe ivaiha. Jahechamína mbaʼérepa.

▪ ‘Jejopy vai ombotavyrai iñarandúvape jepe.’ (ECLESIASTÉS 7:7)

La Biblia ohechauka voi ojejopy vai jave peteĩ tapicha ikatuha ojapo umi mbaʼe opensaʼỹva jepe. Oĩ avei ojapóva heta mbaʼe oimoʼãgui upéicha osolusionataha iprovléma, térã ombohovaitaha umi inhustísia. Pe lívro Urban Terrorism heʼi: “Heta vése umi terrorísta ojapo mbaʼe vai ndaikatúigui ojapo mbaʼeve oñesolusiona hag̃ua umi provléma ombohasa asýva la héntepe”.

▪ ‘Pe pláta rayhu ogueru heta mbaʼe vai.’ (1 TIMOTEO 6:10)

La hénte heʼi voi ndaiporiha kuimbaʼe oñevendeʼỹva. Péicha ohechauka heta tapicha hekoporãva jepe ikatuha ojapo ivaíva pláta rehehápe. Ha peteĩ tapicha hory ha imbaʼeporãva jepi, ikatu ijarhél ha oporotrata vai pláta rehehápe. Jahecha hetaiterei delíto ojejapoha pláta rayhúgui, umíva apytépe oĩ omondáva, oporombotavýva, oporosekuestráva ha oporojukáva.

▪ ‘Ndojekastigapyaʼéi rupi umi hembiapo vaívape, yvyporakuéra ojaposejoaite ivaíva.’ (ECLESIASTÉS 8:11)

Yvyporakuéra oimoʼã jepi ikatuha ojapo ojaposévante ndojepillamoʼãima guive. Upéicha rupi oĩ oiko hatãitereíva imbaʼyrúpe, okopiáva orrendi jave, oiporu vaíva pe goviérno pláta ha hetave mbaʼe vai ojapóva. Ha peteĩ tapicha oikuaáramo jepe la léi heʼíva, ikatu ojapose umi mbaʼe vai ohechávo ndojekastigaiha hembiapo vaívape. Pe rrevísta Arguments and Facts heʼi: “Umi mbaʼe vai apoha ndojekastigái voi, upévare heta oĩ ojapóva umi mbaʼe ivai vaivéva”.

▪ ‘Oiméramo oñandúva ojaposeha ivaíva, ha oñembohapo ipyʼapýpe. Upéi pe mbaʼe vai orekóvagui ipyʼapýpe osẽ pekádo.’ (SANTIAGO 1:14, 15)

Ára ha ára oĩ ñande raperãme mbaʼe vai, ha sapyʼánte ikatu voi ñande jajapose avei. Umi kristiáno ypykuépe ojeʼemavaʼekue voi: ‘Umi jepyʼaraʼã oúva pende ári ou avei opavave yvypóra ári’ (1 Corintios 10:13). Upéicharõ jepe káda uno odesidivaʼerã oipeʼátapa iñakãgui upe mbaʼe vai térãpa osegíta opensa hese. Heʼi haguéicha Santiago, nañañatendéiramo, umi mbaʼe vai jajaposéva ikatu oñembohapo ñande pyʼapýpe ha upéi jajapóma upéva.

▪ ‘Pe oikóva iñarandúvandi, iñarandúta, péro pe ojeheʼáva umi ivýrova rehe katu oho vaíta.’ (PROVERBIOS 13:20)

Aníkena ñanderesarái ñande rapichakuéra ikatuha ñanepytyvõ térã ñandereraha vai. Pyʼỹinte la hénte ojapo umi mbaʼe ñaimoʼãʼỹva ojopýgui chupekuéra hapicha  térã ijúnta vaígui. Péicha jahecha jajeheʼáramo umi ‘ivýrova’ rehe katuete ñasẽ vaitaha. Ñanemanduʼavaʼerã oñeñeʼẽ jave la Bíbliape umi ‘ivýrova’ rehe, ndeʼiseiha umíva itavyha, heʼise guei ndojapoiha Ñandejára Ñeʼẽ heʼíva. Upévare enterove, imitãva ha kakuaáva ñañehaʼãvaʼerã jaheka ñane amigorã umi ojapóva la Biblia heʼíva. Ndajajapóiramo upéicha katuete ñasẽ vaíta.

Koʼa peve jahecháma mbaʼéichapa la Biblia omyesakã mbaʼérepa la hénte ojapo umi mbaʼe vaieta. Ha oiméne ñañeporandu, oñesolusionánepa koʼã provléma? La Biblia omombeʼu mbaʼérepa ojejapo umi mbaʼe vai, ha opromete avei og̃uahẽtaha peteĩ ára opataha koʼã mbaʼe vai. Ha ndépa reikuaase mbaʼépa Ñandejára opromete? Og̃uahẽnepa upe ára opa hag̃ua mbaʼe vai? Pe artíkulo oúvape jahecháta upéva.