‘Amaʼẽ ha ahecha peteĩ aty guasu avave ndaikatúiva oipapa, opaichagua ñeʼẽ, trívu ha tetãygua, [...] koʼãva ningo osẽvaʼekue pe jehasa asy guasúgui’ (REVELACIÓN [APOCALIPSIS] 7:9, 14, ÑÑB)

OĨMBAITÉMA oñepyrũ hag̃uáicha pe Armagedón. ¿Mbaʼéichapa jaikuaa upéva?

Koʼág̃a rupi oĩma hetaiterei tapicha oservíva Jehovápe ha oikóva la Biblia heʼiháicha. Ñandejára oipytyvõ rupi chupekuéra, koʼã tapicha opa tetãygua, trívu ha idióma, oiko mborayhu ha peteĩ ñeʼẽme oñondivepa. Péicha ningo oiko umi testígo de Jehová (Juan 13:35).

Koʼẽrõitéma Satanás ombyatýta ijehérsito ohundiete hag̃uáicha Ñandejára puévlope, oikóva pyʼaguapýpe ha haʼetévaicha ndorekóiva odefendevaʼerã chupekuéra (Ezequiel 38:8-12; Revelación 16:13, 14, 16). ¿Mbaʼérepa jaikuaa porã upeichataha? La Ñandejára Ñeʼẽ ohechauka mbaʼe mbaʼépa oikovaʼerã ha umíva ñanepytyvõ jaikuaa hag̃ua arakaʼépa oñepyrũta Armagedón, ha heta umíva apytégui jahecháma koʼág̃a oñekumpli.

Umi profesía oñekumplivahína

Peteĩ jey hemimboʼekuéra oporandu Jesúspe mbaʼéichapa umi hénte ohechakuaáta “ko múndo ára pahaite oñemoag̃uimaha” (Mateo 24:3, NM). Oñeʼẽvo umi mbaʼe oikótavare tenonderãme, Jesús heʼi chupekuéra: “Peteĩ tetã opuʼãta ambue tetãre, ha umi goviérno opuʼãta ojuehe. Avei oĩta ñembyahýi, yvyryrýi ápe ha pépe”. Upe rire heʼive: “Péro koʼã mbaʼe oikóvo oñepyrũta ramo hína pe jehasa asy” (Mateo 24:7, 8, NM). Apóstol Pablo ohenói avei koʼã tiémpope “ára paha” ha heʼi “ijetuʼueterei ha hasytaha jagueropuʼaka” (2 Timoteo 3:1, NM). ¿Rehechakuaápa umi mbaʼe oikóvare oñekumpliha koʼã profesía?

 Péro, ¿mbaʼérepa ijetuʼuetereíta umi ára paha? Apóstol Juan omyesakã mbaʼérepa heʼívo Satanás ha idemoniokuéra orekotaha peteĩ tiémpo ‘mbykýva’ ko yvy ape ári ojapo hag̃ua hembiapo. Heʼi avei Satanás ‘ipochyetereitaha’ (Revelación 12:7-12, ÑÑB). ¿Rehechakuaápa oparupiete la hénte ipochy ha iviolentoha?

Jesús heʼi avei umi ára ijetuʼuetévape ojejapotaha peteĩ tembiapo iñimportantetereíva: “Umi marandu porã oñeʼẽva Ñandejára Rréinore oñemombeʼúta oparupiete ko yvy ape ári, ojekuaa hag̃ua opa tetã rupi, ha upéi og̃uahẽta pe ára pahaite” (Mateo 24:14, NM). Umi testígo de Jehová opredika oikóvo pe marandu porã más de 235 tetã ha territóriope ha oguenohẽ puvlikasión 500 idióma rasápe. Ojapo mokõi rrevísta oñemopyendáva la Biblia rehe, Ñemañaha ha ¡Despertad!, koʼã rrevísta haʼe hína umi oñemosarambivéva oparupiete ko yvy ape ári. Otradusíma avei la Biblia amo 100 idiómape. Hembiapokuéra ojejapo kontrivusión voluntária rupive. ¿Okumplípa pe profesía Jesús heʼivaʼekue ko predikasión ojejapóva?

La Biblia omombeʼu avei umi mbaʼe oikótava Jehová oñepyrũta vove oñorairõ iñenemigokuéra ndive. Ñahesaʼỹijomína mbohapy profesía koʼẽrõitéma oñekumplítava.

Umi profesía koʼẽrõitéma oñekumplítava

Primera profesía. La Biblia omombeʼu umi mburuvicha ko mundopegua heʼitaha jaikomaha “pyʼaguapy ha kyhyjeʼỹme”, oimoʼãgui osolusiona potaitemaha yvyporakuéra provléma. Péro pe oikótava upe rire, ndahaʼemoʼãiete upéichatava (1 Tesalonicenses 5:1-3, JMP).

Segunda profesía. Upe rire umi goviérno opuʼãta umi rrelihión oĩvare ko múndope. La Biblia ombojoja koʼã goviérno mymba ñarõ rehe, ha umi rrelihión japúpe katu ombojoja peteĩ kuña oikóvare pe mymba ñarõ ári (Revelación 17:3, 15-18). Pe mymba ñarõ ohundi vove umi rrelihión japu heʼívape orrepresentaha Ñandejárape, oimoʼãʼỹetére okumplíta Jehová rembipota.

Apóstol Juan oñeʼẽ upe oikótavare, heʼívo: ‘Ha umi diez hatĩ rehechavaʼekue ha pe mymba ñarõ, ndaijaʼeveivaʼerã pe kuña rekovai rehe ha ohejavaʼerã chupe haʼeño ha opívo, okaruvaʼerã pe kuña roʼo rehe ha ohapyvaʼerã chupe tatápe. Ñandejára omoĩgui ipyʼapypekuéra ojapo hag̃ua pe haʼe oipotáva’ (Revelación 17:16, 17, BNP).

Tercera profesía. Umi goviérno ohundi rire umi rrelihión japúpe, Satanás omomýita chupekuéra opuʼã hag̃ua Jehová siervokuérare (Revelación 7:14; Mateo 24:21).

¿Mbaʼépa nde rejapóta?

Oiméramo neʼĩra restudia porã la Biblia, ikatu hasy ndéve reguerovia hag̃ua oikotaha koʼã mbaʼe. Péro oĩ ningo heta mbaʼe ohechaukáva ikatuha jajerovia koʼẽrõitéma oikotaha. Umi profesía oñekumplímava ohechauka oikotaha katuete Ñandejára heʼíva. a

¿Mbaʼérepa umi testígo de Jehová ojerovia mbarete ‘Ñandejára ipuʼakapáva ñorairõ guasu ára’ hiʼag̃uimbaitemaha? ¿Ha mbaʼépa oipytyvõ chupekuéra ani hag̃ua okyhyje? Iporãitereíta ningo reñemotiémporamo reikuaa porã hag̃ua upéva. Ejerure umi testígo de Jehovápe tohechauka ndéve mbaʼépa rejapovaʼerã reime hag̃ua umi tapicha Jehová osalvátava apytépe (Revelación 16:14). Umi mbaʼe reaprendéva ikatu okambia repensa lája tenonderãre.

[Nóta]

[Komentário oĩva páhina 8-pe]

¿Okumplípa umi testígo de Jehová rembiapo peteĩ profesía oĩva la Bíbliape?