Nínive haʼe vaʼekue Asiria kapitál. Oguereko vaʼekue palásio ha témplo tuicha ha hepýva, umi kálle ipe ipe ha imurálla tuichaicha. Proféta Nahúm ohai: “Nde, Nínive, reñohẽ vaʼekue heta tuguy” (Nahúm 3:1 ÑÑB).

Opyta porãiterei Nínive rehe Nahúm heʼi vaʼekue. Pe rréi Senaquerib palásio murállare por ehémplo oĩ umi taʼanga ohechaukáva mbaʼeichaitépa ipyʼahatã umi asírio. Peteĩ hendápe oĩ umi torturadór raʼanga ojopýva hína peteĩ prisionérope yvýre ha oikũʼo. Pe murállare oĩ avei umi taʼanga ohechaukáva mbaʼéichapa ogueraha hikuái umi héntepe hembiguairã, ojagarra rire chupekuéra omosã itĩ térã hembégui peteĩ kadénape ha ogueraha ojoapykueripa. Umi funsionáriope katu omosãingo ijajúrare umi irréi akãngue oñembohory hag̃ua hesekuéra.

Pe istoriadór Archibald Henry Sayce ostudiáva Asiria ha Babilonia rembiasakue omombeʼu umi mbaʼe vaieta ojapóva umi asírio ojagarra rire peteĩ siuda: “Hapykuerépe oheja hikuái atyraite ojoʼaripa umi hapicha akãngue; umi mitãrusu térã mitãkuña katu ojehapy hekovéreve térã ojeheja ojejapo hag̃ua hese ambue mbaʼe ivaivéva; umi kuimbaʼépe ojehesy, ojepiro, ojehesaʼo, oñekytĩ chugui ipo, ipy, inambi térã itĩ ”.

Ñandejára omanda umi hudíope: “Remopuʼãvo nde róga pyahu, pe óga técho jerére emopuʼã múro karape. Péicha rejapóramo, noñembojamoʼãi nderehe oĩramo hoʼáva upégui ha omano” (Deuteronomio 22:8, NM). Yma umi hudío ojepokuaámi ojapo heta mbaʼe iterrásape, upévare tekotevẽ vaʼekue ojapo peteĩ múro hembeʼýre.

Israélpe heta óga oreko vaʼekue terrása. Upépe sapyʼánte umi hénte ojupi oguapy hag̃ua kuarahýpe, oñembopiroʼy térã ojapo hag̃ua ambue tembiapo ogapypegua. Veránope katu ipiroʼy asy ojeke hag̃ua (1 Samuel 9:26). Umi ombaʼapóva kokuépe oiporu avei pe terrása omonguarahy hag̃ua ígo térã parrál ha umi semílla omolina mboyve (Josué 2:6).

Yma ojeporu avei pe terrása oñemombaʼeguasu hag̃ua Ñandejára Jehovápe térã umi taʼangápe (Nehemías 8:16-18; Jeremías 19:13). Apóstol Pedro las 12 rupi ojupi terrásape oñemboʼe hag̃ua (Hechos 10:9-16). Ha pe terrása ári ojapóramo peteĩ techoʼi parrál térã palméra roguégui, katuete oiméne itrankílo ha ipiroʼy asy upépe.

Peteĩ lívro (The Land and the Book) heʼi umi isrraelíta róga oguerekoha eskaléra “oka gotyo ojejupi hag̃ua pe terrásape”. Upéicha umi ogajára ikatu oguejy pe terrásagui ohasaʼỹre ikoty rupi. Ko mbaʼe ñanemomanduʼa Jesús heʼi vaʼekuére peteĩ siuda oñehundítarõ guare: “Pe oĩva terrásape, ani oguejy onohẽ ikosakuéra hógagui” (Mateo 24:17, NM).