YUUMA yuun dela sɛla n pakɛ paa Israeldoma malema poan. Baabule la tɔɣɛ nɛresɛba n yuun ni ŋmɛ̃’ɛra yuuma lɔɣɔrɔ ge yuuna yele mɛ. Yelemɛŋɛrɛ la dela, ho san pu Baabule la bɔba pia, bɔberɛ buyina de yuuma. Makerɛ, ba gulesɛ Yooma gɔŋɔ la, Solomon gɔŋɔ la, la Fabelegɔ gɔŋɔ ti la dɛna la yuuma. Gɔŋɔ n tɔɣɛ pa’alɛ vom n yuun ani se’em Baabule saŋa la yeti, Baabule la “tɔɣɛ pa’alɛ ti la niɛ peelumi ti Israeldoma la yuun tari yuuma tuna mɛ ba vom poan.”

Vom yɛla poan yuuma. Israeldoma la yuun ni yuuna mɛ pa’ala lan ani ba se’em. (Isa. 30:29) Pɔɣesi la yuun ni ŋmɛ̃’ɛra la sinyaɣesi ge yuuna yuuma wa’ara ba na’am bɔbega poan, ba de’eŋo poan, la ba san zabɛ nyaŋɛ. (Ken. 11:34; 1 Sa. 18:​6, 7; 1 Na. 1:​39, 40) Israeldoma la yuun le yuuna la yuuma pa’ala ba suure n sa’am se’em ba nɛra san ki. (2 Yel. 35:25) McClintock and Strong’s Cyclopedia la yeti, “Israeldoma la yuun nɔŋɛ yuuma mɛ paa.”

Nayire poan yuuma. Israel nadoma la yuun nɔŋɛ yuuma mɛ. Naba Saul yuun yi David ti a wa’ana bɔna a nayire la poan yuuna bɔ’ɔra en. (1 Sa. 16:​18, 23) Pooren, David mea n yuun ta dɛna naba la, a yuun maalɛ la yuuma lɔɣɔrɔ, gulesɛ yuunsoma ge tigese Israel nɛreba basɛba ti ba yuuna Yehowa pu’usegɔ yire la poan. (2 Yel. 7:6; Am 6:5) Naba Solomon yuun tari la buraasi, la pɔɣesi ti ba yuuna a nayire la poan.—Pa. 2:8.

Pu’usegɔ poan yuuma. Sɛla ti Israeldoma la yuun tara pu’usa Yehowa paa dela yuuma. Yuunyuuneba tusa anaasi n yuun ni ŋmɛ̃’ɛra yuuma, Yerusalem pu’usegɔ yire la poan. (1 Yel. 23:5) Ba yuun ni ŋmɛ̃’ɛra la sinyaɣesi, kɔ̃lɔ, duuresi ge me pɛɛbera tintana. (2 Yel. 5:12) Ge daɣɛ yuunyuuneba wa ma’a n yuun tari yuuma pɛ̃ɣera Yehowa. Israeldoma la zo’e zo’e san ni yɛ’ɛsa Yerusalem ti ba ta de’em yuunɛ woo de’eŋo la, ba yuun ni yuuna mɛ. Yuuma wa boi la Yooma 120-134. Yudadoma gɔnɔ pa’alɛ ti, Israeldoma la yuun ni yuuna la Hallel Yuuma a Azɔɔtole saŋa la.

Yuuma kelum pakɛ Naayinɛ yamesi zina beere wa mɛ. (Yam. 5:13) To pu’usegɔ poan, to ni yuuna mɛ pɛ̃ɣera Yehowa. (Ep. 5:19) Yuuma basɛ ti tomam la to mabiisi la tara la nɔyinɛ. (Kol. 3:16) La me kpemeseri la to giila ti to ŋmibera yeledaaŋɔ poan. (Tm. 16:25) Yuuma soŋeri to mɛ ti to ita pa’ala ti to tari sakerɛ bɔ’ɔra Yehowa ge me nɔŋɛ en.