Bunbilipaalesi ni tara imma’asum la paŋa mɛ. Ge bã’asi daani bunbilipaalesi basɛba mɛ. La ani hon la bala? La san dɛna bala, V’loria, Justin, la Nisa n de Yehowa Sɛɛradoma yele wa wan kpemese ho giila. Bisɛ ba eŋɛ se’em ta’an ŋmibe ba bã’a la poan.

•  V’loria

•  Justin

•  Nisa

 Mam yuun dela yuun pia la anaasi ge tara fibromyalgia bã’a la. Mam yuun ta paɛ yuun pisiyi la ti n tari la induma bã’a, lupus bã’a la Lyme bã’a. Ho inya san ka kpeŋe, la daɣɛ naana ti ho eŋɛ sɛla ti ho bɔta. Saŋa ase’a, ze’ele mam sia bɔba sigera ni kɔ’ɔn ki mɛ ti la nara ti n zi’ire kɔɔreŋɔ keekee zuo.

 Mam n ka ta’an ita yɛla ase’a la ka ba’ɛ daana mam wuu mam n kan ta’an gulesɛ sɛla bii vuke sɛla liŋa la. Mam san ni nyɛ kɔma n keni, mam ni ti’isɛ bisɛ sɛla n sɔi ti la kpe’em bo mam ti mam me kena. La ni ana mam wuu mam dela bunbasela.

 Yelesonɛ la dela, mam deodoma la mabiisi n boi Yehowa Sɛɛradoma tansugere la poan la soŋeri mam mɛ. Mabiisi san ni wa’ana bisɛ mam, la ni ana mam wuu n ka boi n ma’a la. La boi bim ti la daɣɛ naana ti ba dekɛ mam eŋɛ loore poan ge le dekɛ mam yese la n kɔɔreŋɔ keekee la ge mabiisi ni kelum beem mam mɛ.

 Bunkureba n boi tansugere la poan la ni soŋɛ mam mɛ se’ere n sɔi la, ba mi la ni ana ho se’em ho san bɛ̃’ɛra. Ba soŋɛ mam mɛ ti n mina n tɔregɔ beene ge ni ka ba’ɛ namesa ti n eŋɛ yelese’a ti n kan ta’an eŋɛ la. Mam puurɛ ni pee mɛ paa se’em ma’a ti n kena tansugere zamesegɔ ge bɔna na’am mɔɔlegɔ poan la. (Hebru 10:25) Mam san ni eŋɛ bala, mam ni baŋɛ ti la ka pakɛ la mam bɛ̃’ɛri la, mam ka boi n tɔka la n mabiisi la.

 Mam ni tɛ̃ra ti Yehowa bo’ori to la sɛla n wan ta’an soŋɛ tɔ ti to ŋmibera. Makerɛ, Baabule la yeti, hali nɛra inya san puɣum sa’ana, eŋa n ani se’em a suuren sa la kɔ’ɔn dɛna la ‘paalega dabeserɛ woo poan.’ (2 Korint 4:​16) Lan ani mam se’em n bala!

 Ti’isɛ yele wa bisɛ: Bã’asi san ba’ɛ daana tɔ, beni n sɔi ti la yele pakɛ ti to basɛ ti nɛreba soŋera tɔ? Ho san tara imma’asum, ho wan eŋɛ la wani ta’an soŋɛ se’em n bɛ̃’ɛri?​​—Magaha 17:17.

 Mam yuun lu mɛ ge ka ta’an eŋɛ sɛsɛla. Mam nyu’ɔ n yuun bobe ge ti n yuun ka ta’an eŋɛ sɛsɛla. Ba yuun eŋɛ la kalam tari mam keŋɛ asibitin. Yia la, dɔgetadoma la yuun ka baŋɛ sɛla n tari mam. Ge pooren ti ba yuun ta bisɛ mam la, ba yuun baŋɛ ti la dela Lyme bã’a.

 Lyme bã’a wa yuun kɔ’ɔn di kɛ̃ mam inya za’a mɛ. La boi bim ti yuuma zo’e zo’e n wana ge saŋa ase’a mam ni kɔ’ɔn gɔɣera mɛ, kan ta’an eŋɛ sɛsɛla. Dabesa ase’a me, mam inya za’a ni kɔ’ɔn duna mɛ yele yele wuu mam nudibisi, ti mam kan ta’an mum ba. La ni ana mam wuu mam kɔ̃ba za’a pũ’ɛ mɛ la.

 Mam ni ti’isa ti, ‘Mam ba’ɛ pɔ’ɛ mɛ ti n dɛna bã’ara.’ Bala ni basɛ ti mam sunsɔa nyie mɛ. Daarewoo mam ni kaasa mɛ bɔ’ɔra Naayinɛ sɔkera yeti, “Beni n sɔi ti ho basɛ ti la ana mam wana?” Hali mam yuun kɔ’ɔn ti’isa ti Naayinɛ zaɣesɛ mam mɛ. Ge mam yuun ti’isɛ la Yob yele n boi Baabule la poan la. Yob yuun ka bɔkɛ soŋa soŋa sɛla n sɔi ti yeledaaŋɔ zo’e zo’e paara en ge a yuun kelum tara sakerɛ bɔ’ɔra Naayinɛ mɛ. Yob yuun san ta’an tara sakerɛ bɔ’ɔra Naayinɛ hali la yeledaaŋɔ zo’e zo’e la, mam me wan ta’an eŋɛ bala.

 Tansugere keendoma la kɔ’ɔn soŋera mam mɛ paa. Ba ni kena bisera mam mɛ ge ni soke baŋɛ la ani mam se’em. Keema ayima yuun yeti n san bɔta ti n tɔɣɛ bo nɛra, n ta’an yi en saŋa woo ti n bɔta. Mam kɔ’ɔn pu’usa Yehowa mɛ daarewoo la zɔtɔ ana taaba wa!​​—Isaiah 32:​1, 2.

 Saŋa ase’a, to san ni bɛ̃’ɛra to ni tamɛ ti Yehowa mi yelese’a n paari to la mɛ. Baabule la yeti: ‘Dekɛ ho yeledaaŋɔ za’a bo Yehowa ge a wan soŋɛ ho.’ (Yooma 55:22) Mam n ni ita sɛla daarewoo n bala.

 Ti’isɛ yele wa bisɛ: Sɛba n nɔŋɛ hɔ wan soŋɛ ho la wani ti ho ta’an ŋmibe bã’asi poan?​​—Magaha 24:10; 1 Tesalonika 5:​11.

 Mam n yuun de bunbilipaalega la, ba yuun bisɛ mam ti n tari la Marfan syndrome bã’a, bã’a sɛka n duni kɔ̃ba ge ni basɛ ti ho ka le tara paŋa. Marfan syndrome bã’a la ta’an daam ho nini, ho suure la ho inya la zɛ’ɛsi ase’a. La ka wuni mam daarewoo ge la san gbirege, mam ni ka ta’an zɛ’a.

 Lan yuun nan pɔsɛ la, mam yuun ni kɔ’ɔn kaasa mɛ. Mam yuun fabeli mɛ ti n kan ta’an tum yelese’a ti n nɔŋɛ n tuna la. Makerɛ dela, mam nɔŋɛ wa’a mɛ paa ge mam san ni ti’isɛ bisɛ ti dabeserɛ keni na mam kan ta’an le wa bii la wan kpe’em bo mam ti n kena, la ni daam mam mɛ paa.

 Mam keema yuun soŋeri mam mɛ. A yuun basɛ ti la ka ana mam wuu n dela bunbasela la. A yuun yele mam yeti n da zɔta dabeem se’ere n sɔi la bã’a la ta’an nyaŋɛ mam. A yuun le kpemese mam giila ti n zusa saŋa woo se’ere n sɔi la, nɛra ka boi n bɔkɛ ge mina la ani mam se’em gana Yehowa.​​—1 Peter 5:7.

 Gulesegɔ sɛka n kpemese mam giila dela Yooma 18:6 n yeti: ‘Mam susa’aŋɔ poan, mam yi la Yehowa, mam yi’iri la n Naayinɛ n susa’aŋɔ poan. A wum mam kunkore la a yire la poan, bilam ti mam kaasega lu a tuba poan.’ Gulesegɔ wa basɛ ti n baŋɛ ti n san zusɛ Yehowa ti a soŋɛ mam n bã’a wa poan, a wan kelese mam ge soŋɛ mam. A kɔ’ɔn bɔna mɛ la mam saŋa woo.

 Mam zamesɛ baŋɛ ti yeledaaŋɔ san paɛ tɔ ti to suure sa’am, la daɣɛ be’em se’ere n sɔi la to kan ta’an li’isɛ ka. Ge to da basɛ ti lan ani to se’em la nyaŋɛ tɔ ti la ta sa’am tomam la Yehowa bɔŋa la. La daɣɛ eŋa n ta’asɛ yeledaaŋɔ la, a me kan malum basɛ tɔ to san dekɛ en deŋɛ nɛŋa to vom poan.​​—Yames 4:8.

 Ti’isɛ yele wa bisɛ: Naayinɛ n basɛ ti to namesa yoi?​​—Yames 1:​13.