“Daɣɛ mam n bo ho nɔɔrɛ la? Tara sukpe’ene ge zɛ’a kankaŋi. Da zɔta dabeem, Yehowa ho Naayinɛ la boi me la hɔ zɛsɛka woo poan ti ho yɛa.”​—Yosua 1:9, New World Translation.

 “Daɣɛ mam n bo ho nɔɔrɛ la? Zɛ’a kankaŋi ge tara sukpe’ene. Da zɔta dabeem bii ho giila kɔ’ɔsɛ, Yinɛ ho DAANA la wan bɔna la hɔ zɛsɛka woo ti ho yɛa.”—Yosua 1:9, New International Version.

 Yehowa a Naayinɛ n yuun yele wana la, a yuun basɛ ti a yameŋa Yosua tara puti’irɛ ti hali la san puɣum kpe’em la se’em me ti a ka tara ŋmɛregerɛ zɛ’an, a wan ta’an “tara sukpe’ene ge zɛ’a kankaŋi.” Yosua san nana Naayinɛ nɔɔrɛ, la yuun ka nara ti a zɔta dabeem la beere sa’am n wan ta ana se’em, se’ere n sɔi la, la wan ana wuu Yehowa kɔ’ɔn bɔna la en mɛ soŋera en sɛla woo poan. Naayinɛ yuun boi mɛ la Yosua, pa’ala ge soŋera en ti a zabera nyaŋera a dinedoma.

 Yosua yuun eŋɛ la wani “tara sukpe’ene ge zɛ’a kankaŋi”? Gulesegɔ se’a ti Yehowa yuun basɛ ti ba gulesɛ sankaŋa la n yuun kpemese a giila ge bo en paŋa. Gulesegɔ wa ase’a dela “pa’alegɔ zan’an te [Yehowa] yameŋa Moses bo [Yosua] la.” b (Yosua 1:7) Yehowa yuun yele Yosua ti a “zamehɛ kɔ [“ti’isa taɣesa de yele,” New International Version] bolika la yu’uŋɔ.” (Yosua 1:8) Yosua n yuun kaali ge ti’isa taɣesa de yele la yuun soŋɛ en mɛ ti a lu a suure ti a ita Naayinɛ n boti sɛla. Yosua yuun nari ti a tara eŋa n zamesɛ sɛla Naayinɛ Yetɔɣum la poan tuna tuuma ge “behɛ soŋa nana sɛla woo n golehɛ bɔna ko poan la.” A san eŋɛ bala, a wan tara yɛm ge nyɛ nɛŋa tɔlega. Bala mea nɔɔ n yuun eŋɛ. La boi bim ti la yuun kpe’em bo Yosua mɛ ge a yuun tari la vom somɔ ge me tara yelemɛŋɛrɛ pu’usa Yehowa.​—Yosua 23:14; 24:15.

 Yehowa n yuun yele Yosua sɛla la kelum dɛna la giilekpemesego bɔ’ɔra to zina. La pa’alɛ la Yehowa n fabeli a nɛreba woo yele se’em, yele yele woo yeledaaŋɔ san paara ba. A boti la ba nyɛ nɛŋa tɔlega wuu Yosua la! Wuu Yosua la, ba wan “tara sukpe’ene ge zɛ’a kankaŋi” ba san kaala Naayinɛ Yetɔɣum la, ti’isa taɣesa de yele ge tara ku pa’alegɔ la tuna tuuma.

 Moses kum pooren, Yehowa yuun yele la Yosua ti a bɔna Israeldoma la nɛŋa. (Yosua 1:1, 2) Sankaŋa la, Israeldoma la yuun kɔ’ɔn maasum mɛ ti ba kɛ̃ Pu’ulumbiŋe Teŋa la n de Kanaan teŋa la. Ge ba yuun nari ti ba zabɛ la dinedoma n tari paŋa. Makerɛ, Yosua yuun nari ti a zabɛ la Kanaandoma la n yuun de putɔpa la. c (Tɛɛnhegɔ 9:5; 20:17, 18) Kanaandoma wa yuun zo’e mɛ ge me tara zaberɛ lɔɣɔrɔ gana Israeldoma la. (Yosua 9:1, 2; 17:18) Ge Yosua yuun tari la sukpe’ene dɔla Yehowa pa’alegɔ. Naayinɛ yuun sirum boi mɛ la en ti Israeldoma yuun zabɛ nyaŋɛ ba dinedoma la zo’e zo’e yuuma ayoobe ma’a poan.​—Yosua 21:43, 44.