Baabule la poan, Greek yelebire a·naʹsta·sis ti ba lerege ti “kum isigere” la vuurɛ dela “isige” bii “le vaɛ isige.” Nɛra san isige kum poan, la pa’alɛ ti a le vo’e mɛ ana wuu eŋa n daa ani se’em la.​—1 Korint 15:12, 13.

 La boi bim ti yelesum la n de “kum isigere” ka boi Hebru Gulesegɔ la ti ba yi’ira Old Testament la poan ge bilam me pa’alɛ ti nɛreba wan ta isige kum poan. Makerɛ, Naayinɛ yuun doose nɔdɛ’ɛsa Hosea poan yeti: ‘Mam wan faaɛ ba yɔɔ poan basɛ; n wan isige ba kum poan.’​—Hosea 13:14; Yob 14:13-15; Isaiah 26:19; Daniel 12:​2, 13.

 Nɛreba wan ta isige kum poan bɔna la bɛ? Nɛreba basɛba wan ta isige kum poan bɔna saazuo naɛ la Krista dɛna nadoma. (2 Korint 5:1; Liligere 5:​9, 10) Baabule la yiiri dɛna wa la ‘yia kum isigere’ la ‘pɔsega kum isigere.’ Bala pa’alɛ ti kum isigere ayima me wan taɣelɛ. (Liligere 20:6; Filipi 3:​11) Pooren kum isigere wa dela nɛreba zo’e zo’e n wan ta isige bɔna tingɔŋɔ wa zuo.​—Yooma 37:29.

 Nɛreba wan ta isige kum poan la wani? Naayinɛ bo Yezu la paŋa ti a isige nɛreba kum poan. (Yon 11:25) Yezu wan le vo’e “sɛba woo te ba pin ba yɔɔrɔ poan la”. Ba wan tara halese’a ti ba daa puɣum tara la ge me tɛ̃ra sɛla ti ba daa mina la. (Yon 5:​28, 29) Nɛresɛba n wan ta bɔna saazuo la wan dɛna la vo’osum nɛreba ge ti sɛba n wan isige bɔna tingɔŋɔ wa zuo la tara inya n ani kasi la imma’asum.​—Isaiah 33:24; 35:​5, 6; 1 Korint 15:42-​44, 50.

 Bani n wan ta isige kum poan? Baabule la yeti “Yenɛ wan bahɛ te . . . sɛba n tone som la sɛba n tone be’em ihege ba kum poan.” (Tooma 24:15) Tuntɔɔdoma la dela nɛresɛba n tari sakerɛ wuu Noah, Sarah la Abraham. (Pin’ileŋɔ 6:9; Hebru 11:11; Yames 2:​21) Nɛresɛba n daɣɛ tuntɔɔdoma la dela sɛba n ka doli Naayinɛ pa’alegɔ la ge me ka nyɛ yɔ’ɔ ta’an zamesɛ baŋɛ en la.

 Ge nɛresɛba n ba’ɛ tum be’em ta gaŋɛ la ge ka tee la kan nyɛ kum isigere. Nɛrebana san ki, za’a n bala. Ba kan le vo’e.​—Matu 23:33; Hebru 10:26, 27.

 Sankani ti nɛreba wan ta isige kum poan? Baabule la yuun tɔɣɛ biŋe ti saazuo kum isigere la wan tum tuuma la Krista saŋa poan. Sankaŋa la yuun pɔsɛ la yuun 1914 poan. (1 Korint 15:21-​23) Yezu Krista Yuun Tusere Bisega la poan, a wan isige nɛresɛba n ki la ti ba bɔna paradiisi poan tingɔŋɔ wa zuo.​—Luke 23:43; Liligere 20:​6, 12, 13.

 Beni n sɔi ti to tara sakerɛ ti nɛreba wan isige kum poan? Baabule la tɔɣɛ la kum isigere bawai yele ti nɛreba yuun nyɛ la ba nini. (1 Nadoma 17:17-​24; 2 Nadoma 4:​32-37; 13:20, 21; Luke 7:​11-​17; 8:40-​56; Yon 11:38-​44; Tooma 9:​36-​42; Tooma 20:​7-​12; 1 Korint 15:​3-6) Yezu n yuun isige Lazarus kum poan la dela ninmɔ’ɔrɛ se’ere n sɔi la Lazarus yuun ki la dabesa anaasi. Leyɛ’ɛsa, nɛrekuuŋɔ n yuun nyɛ Yezu n isige en la. (Yon 11:39, 42) Hali nɛresɛba n yaɛ Yezu la yuun ka zaɣesɛ yelemɛŋɛrɛ wa ge ba yuun tuɣum siisum mɛ ti ba ku Yezu la Lazarus.​—Yon 11:47, 53; 12:​9-​11.

 Baabule la pa’alɛ ti Naayinɛ tari paŋa ge me bɔta ti a isige nɛresɛba n ki la mɛ. Naayinɛ tɛ̃ri nɛresɛba woo ti a wan dekɛ a paŋa n ka tari makerɛ isige ba la yele mɛ. (Yob 37:23; Matu 10:30; Luke 20:37, 38) Naayinɛ wan ta’an le vo’e sɛba n ki la. A me boti a isige ba mɛ! Baabule la n pa’ali kum isigere la n wan ta ana se’em la, ku tɔɣɛ Naayinɛ yele ti: “Ho wan ba’ahom ɛɛra hom mɛŋa n yagom sɛla wa.”​—Yob 14:15.

Nɛreba n ti’iseri kum isigere yele se’em

 Sɔlema: Kum isigere la dela sia la n wan le ta naɛ la inya la.

 Yelemɛŋɛrɛ: Baabule la pa’alɛ ti sia la dela nɛra la mea ge daɣɛ sɛla n boi a poan n wan ta isige a kum pooren. (Pin’ileŋɔ 2:7, footnote; Ezekiel 18:4) Nɛra san isige kum poan, la pa’ali ti Naayinɛ n malum naam en.

 Sɔlema: Nɛreba basɛba wan isige kum poan ge le nyɛ sa’aŋɔ bilam bilam.

 Yelemɛŋɛrɛ: Baabule la yeti ‘sɛba n yun tum be’em la’ wan ‘isige kum poan ti ba gãkɛ ba.’ (Yon 5:​29) La daɣɛ sɛla ti ba yuun eŋɛ ge ki la ti ba wan dekɛ gãkɛ ba ge sɛla ti ba wan eŋɛ ba kum isigere la pooren. Yezu yuun yeti: “sɛba n ki la wan wona mam Yenɛ Dayɔa la te n tɔgɔra. Te sɛba n wan ta wom mam la, wan vɔna.” (Yon 5:​25) Nɛresɛba n wan ‘kelese’ ge nana yelese’a ti ba zamesɛ ba kum isigere la pooren la yu’ura wan bɔna la “vom gɔŋɔ” la poan​—Liligere 20:12, 13.

 Sɔlema: Nɛra san isige kum poan, a wan kelum tara la insɛka ti a yuun tara ge nyaa ki la nɔɔ.

 Yelemɛŋɛrɛ: Nɛra san ki, a inya ni po’ɛ la za’a za’a.​—Pa’ala 3:​19, 20.