Sísí to Hwɛndò Mɛ
NUXEWUTU SÍSÍ TO HWƐNDO MƐ DO NYÍ NUJƆNU
Enyí hagbɛ́ hwɛndò tɔn lɛ nɔ ná sísí yenɔzo, nulɛ nɔ yì ganji bɔ asu, asi, kpó ovi lɛ kpó nɔ mɔɖɔ emi to xixɔ́ mɛ.
-
Owě ɖé ɖɔ ɖɔ, enyí asu kpó asi kpó nɔ sí oɖe awetɔ, “é ma nyí onǔ vonɔtawun lɛ kɛ́ɖɛ́ mɛ [wɛ yé nɔ dó owǎnyi xe yé ɖó ná yenɔzo xya te gba], cigbǎ to onǔ flinflin lɛ lɔsu mɛ egbesɔegbesɔ.”—Owě lɔ The Seven Principles for Making Marriage Work.
-
Dodinnanu ɖé dóxya ɖɔ ovi xe nɔ símɛ lɛ nɔ ɖeji bo ma nɔ mɔ ovɔ́ mɛ ná yeɖe. Yé nɔ vɛ́ kpó mɛjitɔ yětɔn lɛ kpó bo ma nɔ jɛ akpɔ̀nmɛzɔ̀n sɔmɔ.
NǓXE A GǍN WÀ
Ðɔxodókpɔ́ xɛ́ hwɛndò towe. Tintan, ɖike mɛxe to hwɛndò lɔ mɛ lɛkpó ni nyɔ́ nǔxe “sísí” didóxya bɛ́hɛn. Awetɔ, lɛnnukpɔ́ndó lěxe hagbɛ́ hwɛndò lɔ tɔn lɛkpó ɖóná nɔ yinuwa ɖó kpó lěxe yé ma ɖóná nɔ yinuwa ɖó kpó jí. Atɔ̀ntɔ, mì ɖɔxodókpɔ́ to hwɛndò mɛ, ná mɛlɛkpó nidó nyɔ́ lěxe yè ná nɔ dó sísí xya ɖó.
Zé akpajlɛ̌ ɖayǐ. Enyí hagbɛ́ hwɛndò tɔn towe lɛ wanunyidò, be a nɔ mɔxoɖɔdó yé go wɛ ya? Enyí yé ɖɔ nǔxe yé lɛn, be a nɔ càn yé kò wɛ ya? Kavǐ enyí yé to xoɖɔna we, be a nɔ dóvɔ́na yé wɛ ya?
Ayinamɛ: Tɛnkpɔ́n bo nɔ kpɔ́n sísí ɖi axɔ́ xe a ɖù dó asu kavǐ asi towe, kpó ovi towe lɛ kpó. Ma nɔ mɔɖɔ yé ɖóná wà nuɖé hwɛkpó dó jɛna blo.
Nɔ sí mɛlɛ, enyí linlɛn towe tlɛ gbɔnvo ná yětɔn. Enyí a to xoɖɔ xɛ́ mɛɖé, ma nɔ zán xogbe xe ná sɔhwánmɛ tayiɖi “tɛgbɛ́ janwɛ a nɔ” kavǐ “a ma nɔ [wà le-le] kpɔ́n gbeɖe” blo. Xomɔɖɔdómɛgo mɔnkɔ lɛ ná hɛn xomɛgble hagbɛ́ hwɛndò tɔn towe lɛ bɔ gbemanɔkpɔ́ kpɛviɖe kpoun gǎn wá lɛzun hwɛgbè sínsínnyɛ.
NǓXE MǏ TO WIWÀ
Kunnuɖetɔ Jehovah tɔn lɛ nɔ ná tuli hwɛndò lɛ ɖɔ yé ni nɔ ná sísí yenɔzo. Mǐ nɔ saba ɖɔxodeji to xósɔ́, owě kpó video xe mǐ nɔ ɖetɔ́n vɔ̌nu lɛ kpó mɛ.
NÁ ASU KPÓ ASI KPÓ LƐ: Xósɔ́ ɖebɔdó-ɖego xe nɔ nyí Alọgọ Na Whẹndo Lẹ gǎn gɔ́alɔna asu kpó asi kpó bɔ . . .
-
yé ná nɔ ɖotoaina yenɔzo ganji
-
yé ma ná nɔ nabɔɛ demɛ ná yenɔzo enyí yé ma ɖógbekpɔ́ dó nuɖé jí
-
yé ma nasɔ́ nɔ dɔnnu ba
(To nɔtɛn Intɛnɛt tɔn lɔ jw.org jí, dǐn “Alọgọ Na Whẹndo Lẹ”)
NÁ MƐJITƆ LƐ: Xósɔ́ ɖebɔdó-ɖego xe nɔ nyí Alọgọ Na Whẹndo Lẹ gǎn gɔ́alɔna mɛjitɔ lɛ bɔ yé ná kplɔ́n ovi yětɔn lɛ bɔ . . .
-
yé ná nɔ setonu
-
yé ná nɔ wà xwégbèzɔ́n lɛ
-
yé ná nɔ ɖɔ “mì jàale” kpó “mì wanu” kpó
(To jw.org jí, dǐn “Ovi lẹ Pinplọn Whẹ́n” kpó “Jọja Aflanmẹ lẹ Pinplọn Whẹ́n” kpó)
Sɔ́ kpɔ́n xósɔ́ lɔ “Onǔ Ciɖokpó Ðélɛ Xe Ovi lɛ Ðóná Kplɔ́n” to Fɔ́n! Sɔxa 2 2019 tɔn mɛ gɔ́na xósɔ́ lɔ “Onǔ 12 Xe Nɔ Hɛn Ayǎjɛ Wá Hwɛndò Mɛ” to Fɔ́n! Sɔxa 2 2018 tɔn mɛ, wěda 8-11. (Dǐn xósɔ́ lɔ lɛ to jw.org jí)
NÁ JỌJA LẸ: Adà lɔ Jọja Lẹ xe to jw.org jí bɛ́ xósɔ́, video kpó nukplɔ́nmɛwe lɛ kpó hɛn, exe gǎn gɔ́alɔna jɔja lɛ bɔ . . .
-
yé ná vɛ́ xɛ́ mɛjitɔ yětɔn lɛ kpó nɔvi yětɔn lɛ kpó
-
yé ná nɔ ɖɔxona mɛjitɔ yětɔn lɛ kpó sísí kpó dó osɛ́n xe yé dó ná yé lɛ jí
-
yé ná nɔ wà nǔxe ná zɔ́n bɔ mɛjitɔ yětɔn lɛ ná nɔ ɖejidó yé go lɛ
(To jw.org jí, dǐn “Jọja Lẹ”)
Vɔ̌nu wɛ yè nɔ zán nɔtɛn Intɛnɛt tɔn lɔ jw.org. Yè ma nɔ sú akwɛ́ ná nuɖé to nɔtɛn lɔ jí, mɔ yè ma ná byɔ́ to asi we nadó byɔ́ gbɛ̀mɛ kavǐ kàn nuɖɔnamɛ mɛɖétiti tɔn ɖé byɔ́ we.
