1 Pita 5:1-14
5 Enẹwutu, taidi mẹho hatọ de, yèdọ kunnudetọ yajiji Klisti tọn lẹ tọn de podọ mimátọ gigo he na wá yin didehia lọ tọn,+ yẹn to mẹho he tin to ṣẹnṣẹn mìtọn lẹ vẹ̀* dọmọ:
2 Mì yìn lẹngbọpa Jiwheyẹwhe tọn+ he yin zizedo alọmẹ na mì bo nọ wadevizọn taidi nugopọntọ,* e ma yin po mananọmawà po, ṣigba sọn ojlo mẹ wá to Jiwheyẹwhe nukọn;+ e ma yin po owanyi na ale mawadodo tọn po,+ ṣigba po jejejininọ po;
3 e ma yin nado duklunọ do mẹhe yin ogú Jiwheyẹwhe tọn lẹ ji gba,+ ṣigba nado yin apajlẹ na lẹngbọpa lọ.+
4 Podọ to whenue lẹngbọhọtọ-gán lọ+ na ko yin hinhẹn sọawuhia, mì na mọ jẹgbakun gigo tọn he ma nọ kupẹ́ lọ yí.+
5 Mọdopolọ, mì jọja sunnu lẹ, mì nọ yin mẹmẹglọ hlan sunnu mẹho lẹ.*+ Ṣigba, na mìmẹpo ni nọ yí whiwhẹ* dogo* to nuyiwa mìtọn hẹ ode awetọ mẹ, na Jiwheyẹwhe nọ diọnukunsọ saklanọ lẹ, ṣigba e nọ do nukundagbe majẹhẹ hia whiwhẹnọ lẹ.+
6 Enẹwutu, mì nọ whiwhẹ mìde to alọ huhlọnnọ Jiwheyẹwhe tọn glọ, na ewọ nido ze mì daga to ojlẹ sisọ mẹ,+
7 dile mì to magbọjẹ* mìtọn lẹpo bẹ dlan ewọ ji,+ na e to mìtọn hòpọn wutu.+
8 Mì gbọṣi lẹnpọn dagbenọ-yinyin mẹ, mì nọ aṣeji!+ Kẹntọ mìtọn Lẹgba to dindanpe di kinnikinni de he to lìlì bo to mẹhe e na tlẹndu dín.+
9 Ṣigba, mì diọnukunsọ ẹ,+ bo lodo to yise mẹ, to yinyọnẹn mẹ dọ yajiji wunmẹ dopolọ lẹ wẹ pipli mẹmẹsunnu mìtọn lẹ tọn pete to aihọn mẹ to pipehẹ.+
10 Ṣigba, to whenue mì ko jiya na ojlẹ vude godo, Jiwheyẹwhe nukundagbe majẹhẹ lẹpo tọn, he ylọ mì do gigo madopodo etọn mẹ+ to kọndopọ mẹ hẹ Klisti, ewọ lọsu titi na dotana azọ́nplọnmẹ mìtọn. E na hẹn mì lodo,+ e na hẹn mì yin huhlọnnọ,+ e na hẹn mì nọtegli.
11 Ewọ tọn wẹ huhlọn kakadoi. Niṣẹ.*
12 Gbọn Silvanu*+ gblamẹ, yèdọ mẹhe yẹn nọ pọ́n hlan taidi mẹmẹsunnu nugbonọ de, yẹn ko kanwehlan mì to hogbe vude mẹ, nado na mì tuli bo dekunnu vẹkuvẹku dọ ehe wẹ nukundagbe majẹhẹ nugbo Jiwheyẹwhe tọn. Mì nọ nọte gligli to ehe mẹ.
13 Ewọ he to Babilọni, yèdọ mẹdide de taidi mìwlẹ, yí nudọdomẹ etọn lẹ hlan mì, podọ Malku+ visunnu ṣie lọsu wàmọ ga.
14 Mì yí nùdonùgo owanyi tọn do dọnudo ode awetọ mìtọn.
Na mìmẹpo he tin to kọndopọ mẹ hẹ Klisti ni tindo jijọho.
Nudọnamẹ Odò Tọn
^ Kavi “yẹn to tudohomẹna mẹho he tin to ṣẹnṣẹn mìtọn lẹ.”
^ Kavi “bo nọ yí sọwhiwhe do pọ́n e go.”
^ Kavi “yí whiwhẹ do blagbajana mìde.”
^ Kavi “mẹdezewhè.”
^ Kavi “hlan mẹho lẹ.”
^ Kavi “ahunmẹdunamẹnu; nuhiha.”
^ Kavi “Amẹn” to Glẹkigbe mẹ.
^ Sọ nọ yin yiylọdọ Sila.
