2 Ahọlu lẹ 8:1-29
8 Eliṣa dọna yọnnu he ewọ ko hẹn visunnu etọn gọwá ogbẹ̀ lọ+ dọmọ: “Fọ́n, yèdọ hiẹ po whédo towe po, bo yì nọ jonọ-gbéji to fidepope he hiẹ sọgan nọ, na Jehovah ko magbe nado hẹn huvẹ wá,+ e nasọ tọ́n to aigba lọ ji na owhe ṣinawe.”
2 Enẹwutu, yọnnu lọ fọ́n bo wà kẹdẹdile omẹ Jiwheyẹwhe nugbo lọ tọn ko dọ do. Ewọ po whédo etọn po yì sawhé do aigba Filistinu+ lẹ tọn ji na owhe ṣinawe.
3 To vivọnu owhe ṣinawe lọ lẹ tọn, yọnnu lọ lẹkọwa sọn aigba Filistinu lẹ tọn ji bo yì vẹ̀ ahọlu gando owhé etọn po ogle etọn po go.
4 Todin, ahọlu to hodọna Gehazi devizọnwatọ omẹ Jiwheyẹwhe nugbo lọ tọn dọmọ: “Jaale, pìntàn nujiawu he Eliṣa ko wà lẹpo tọn na mi.”+
5 Whenue ewọ to otàn pìn na ahọlu gando lehe Eliṣa hẹn oṣiọ gọwá ogbẹ̀ do+ go pẹẹ wẹ yọnnu he visunnu etọn yin hinhẹngọwa ogbẹ̀ lọ wá ahọlu dè nado vẹ̀ ẹ gando owhé etọn po ogle etọn po go.+ To afọdopolọji, Gehazi dọmọ: “Oklunọ ṣie ahọlu E, yọnnu lọ die, podọ visunnu etọn he Eliṣa hẹngọwa ogbẹ̀ lọ die.”
6 Ahọlu sọ kanhose yọnnu lọ bọ ewọ pìntàn lọ na ẹn. Whenẹnu wẹ ahọlu de ahọluzọnwatọ họ̀nmẹ tọn de na ẹn bo dọna ahọluzọnwatọ lọ dọmọ: “Gọ̀ nutindo etọn lẹpo jo na ẹn gọna sinsẹ́n lọ lẹpo he ogle etọn na ko detọ́n sọn gbeegbe e ko tọ́n sọn aigba lọ ji kakajẹ din.”
7 Eliṣa wá Damasku+ to whenue Bẹni-hadadi+ ahọlu Silia tọn to azọ̀njẹ. Linlin sọ yin nina ẹn dọmọ: “Omẹ Jiwheyẹwhe nugbo lọ tọn+ ko wáfi.”
8 Enẹwutu, ahọlu dọna Hazaẹli+ dọmọ: “Hẹn nunina de bo yì pé omẹ Jiwheyẹwhe nugbo lọ tọn.+ Kanhose Jehovah gbọn ewọ gblamẹ dọ, ‘Be yẹn na jẹgangan sọn azọ̀n ehe mẹ ya?’”
9 Hazaẹli sọ yì nado pé e bo hẹn nunina de, enẹ wẹ nudagbe wunmẹ lẹpo he to Damasku, yèdọ agbàn he kanklosọ́ 40 sọgan hẹn. E sọ wá bo ṣite to nukọn etọn bosọ dọmọ: “Visunnu towe Bẹni-hadadi ahọlu Silia tọn wẹ do mi hlan dè we nado kanse dọ, ‘Be yẹn na jẹgangan sọn azọ̀n ehe mẹ ya?’”
10 Eliṣa sọ gblọnna ẹn dọmọ: “Yì bo dọna ẹn dọ, ‘E họnwun dọ hiẹ na jẹgangan,’ amọ́ Jehovah ko dohia mi dọ ewọ na kú janwẹ.”+
11 E sọ zín nukun do e ji kaka bọ winyan jẹ hùhù i ji. Whenẹnu wẹ omẹ Jiwheyẹwhe nugbo lọ tọn bẹ avi.
12 Hazaẹli sọ kanse dọmọ: “Naegbọn oklunọ ṣie do to avivi?” Ewọ sọ gblọn dọmọ: “Na yẹn yọ́n oylan he hiẹ na wà na omẹ Islaeli tọn lẹ wutu wẹ.+ A na domiyọ́n figángán yetọn lẹ bo na yí ohí do hù sunnu huhlọnnọ yetọn lẹ bo nasọ gídí ovi yetọn lẹ, podọ hiẹ na zẹ̀ adọ̀ na yọnnu hohonọ yetọn lẹ.”+
13 Hazaẹli sọ dọmọ: “Nawẹ devizọnwatọ towe he yin avún tata de poun sọgan wà onú mọnkọtọn gbọn?” Ṣigba, Eliṣa dọmọ: “Jehovah ko dohia mi dọ hiẹ na wá duahọlu do Silia ji.”+
14 Enẹgodo, e yì sọn Eliṣa dè bo lẹkọwa oklunọ etọn titi dè bọ ewọ kanse e dọmọ: “Etẹwẹ Eliṣa dọna we?” E sọ gblọn dọmọ: “E dọna mi dọ e họnwun dọ hiẹ na jẹgangan.”+
15 Ṣigba to wunkẹngbe, Hazaẹli ze avọ̀-ṣinṣinyọn de bo ylọn ẹn do osin mẹ bosọ zín in* do nukunmẹ na ahọlu lọ kaka bọ e kú.+ Hazaẹli sọ lẹzun ahọlu do otẹn etọn mẹ.+
16 To owhe atọ́ntọ Jeholami+ visunnu Ahabi ahọlu Islaeli tọn mẹ, whenue Jehoṣafati yin ahọlu to Juda, Jeholami+ visunnu Ahọlu Jehoṣafati Juda tọn lẹzun ahọlu.
17 Owhe 32 wẹ e tindo to whenue e duahọlu, e sọ dugán to Jelusalẹm na owhe ṣinatọ̀n.
18 E zinzọnlin gbọn aliho ahọlu Islaeli tọn lẹ tọn ji,+ kẹdẹdile mẹhe wá sọn whédo Ahabi tọn mẹ lẹ ko wà do,+ na viyọnnu Ahabi tọn wẹ yin asi etọn;+ e sọ to nuhe ylan to nukun Jehovah tọn mẹ lẹ wà mapote.+
19 Ṣigba, Jehovah ma jlo na sukúndona Juda, na Davidi devizọnwatọ etọn wutu,+ na e ko dopagbe na ẹn nado na miyọ́ngbán de ewọ+ po visunnu etọn lẹ po kakadoi.
20 To azán etọn lẹ gbè, Edomi fọngu do Juda+ ji bo wá do ahọlu etọn titi ai to godo mẹ.+
21 Enẹwutu, Jeholami dasá yì Zaili po osọ́-kẹkẹ etọn lẹpo po, e sọ fọ́n to zánmẹ bo gbawhàn Edominu he lẹdo e pé lẹ tọn gọna awhàngán daho osọ́-kẹkẹ lẹ tọn lẹ; awhànfuntọ lọ lẹ sọ họnyi gòhọ yetọn lẹ mẹ.
22 Ṣigba, Edomi gbẹ́ zindonukọn to gufinfọn etọn sọta Juda mẹ kakajẹ egbé. Libna+ lọsu sọ fọngu to ojlẹ enẹ mẹ.
23 Otàn Jeholami tọn he pò, yèdọ nuhe e wà lẹpo, be e ma yin kinkan do owe whenuho ahọlu Juda tọn lẹ tọn mẹ ya?
24 Enẹgodo, Jeholami yin hinhẹn nado mlọnai hẹ tọgbo etọn lẹ bo yin dìdì dopọ hẹ tọgbo etọn lẹ do Tòdaho Davidi tọn mẹ.+ Visunnu etọn Ahazia+ sọ lẹzun ahọlu do otẹn etọn mẹ.
25 To owhe 12tọ Jeholami visunnu Ahabi ahọlu Islaeli tọn mẹ, Ahazia visunnu Ahọlu Jeholami Juda tọn lẹzun ahọlu.+
26 Owhe 22 wẹ Ahazia tindo to whenue e duahọlu, e sọ dugán to Jelusalẹm na owhe dopo. Oyín onọ̀ etọn tọn wẹ Atalia,+ yèdọ ovivi* Ahọlu Omli+ Islaeli tọn.
27 E zinzọnlin gbọn aliho whédo Ahabi+ tọn ji bo to nuhe ylan to nukun Jehovah tọn mẹ lẹ wà mapote, kẹdẹdi whédo Ahabi tọn, na e tindo kanṣiṣa alọwle tọn hẹ whédo Ahabi tọn.+
28 Enẹwutu, e zọnhẹ Jeholami visunnu Ahabi tọn nado yì funawhàn hẹ Ahọlu Hazaẹli Silia tọn to Lamọti-giliadi,+ ṣigba Silianu lẹ gbleawuna Jeholami.+
29 Ahọlu Jeholami sọ lẹkọwa Jezleẹli+ nado jẹgangan sọn awugble etọn lẹ mẹ, yèdọ apà he Silianu lẹ ko do e go to Lama to whenue e hoavùn hẹ Ahọlu Hazaẹli Silia tọn.+ Ahazia visunnu Jeholami ahọlu Juda tọn sọ jẹte yì Jezleẹli nado yì pọ́n Jeholami visunnu Ahabi tọn, na ewọ ko yin awugblena* wutu.
