Daniẹli 7:1-28
7 To owhe tintan Ahọlu Bẹlṣazali+ Babilọni tọn mẹ, Daniẹli kudlọ de bọ numimọ lẹ wá tamẹ na ẹn dile e to aimimlọn to adọzan etọn ji.+ E sọ wlan odlọ lọ dai;+ e basi kandai nuhe e mọ lọ lẹpo tọn to gigọ́ mẹ.
2 Daniẹli dọmọ:
“Yẹn to nupọn to numimọ ṣie lẹ mẹ to zánmẹ, podọ pọ́n! jẹhọn ẹnẹ olọn tọn lẹ wlu ohù gblagada lọ.+
3 Gbekanlin daho-gbó ẹnẹ+ sọ tọ́njẹgbonu sọn hùmẹ bo gbọnvona yede.
4 “Tintan taidi kinnikinni de+ bo tindo awà akùn tọn lẹ.+ Yẹn sọ to nupọn kakajẹ whenue awà etọn lẹ yin winwẹ́n sẹ̀ bọ e yin zize ṣite sọn aigba bo yin hinhẹn nado nọte do afọ etọn awe ji taidi gbẹtọ de, ahun gbẹtọ tọn sọ yin nina ẹn.
5 “Podọ pọ́n! gbekanlin devo, yèdọ awetọ taidi beali de.+ E yin zize fọ́n do adà ji bọ adàjahú atọ̀n tin to onù etọn mẹ to adú etọn lẹ ṣẹnṣẹn; yè sọ dọna ẹn dọ, ‘Fọ́n bo dù olàn susu.’+
6 “Enẹgodo, yẹn sọ to nupọn, podọ pọ́n! gbekanlin devo, taidi opọ̀ de,+ ṣigba e tindo awà ẹnẹ to nẹgbé taidi awà ohẹ̀ de tọn lẹ. Gbekanlin lọ sọ tindo ota ẹnẹ,+ aṣẹpipa sọ yin nina ẹn nado dugán.
7 “To ehe godo, yẹn zindonukọn bo to nupọn to numimọ zánmẹ tọn lẹ mẹ, yẹn sọ mọ gbekanlin ẹnẹtọ de he dobu bo sẹhundaga bosọ dohuhlọn tlala bo tindo adú gànyuu tọn daho lẹ. E nọ to nuhe lẹdo e lẹpo husudo bo nọ to yé gídí bosọ nọ to afọtùn dehe pò lẹ ji.+ E gbọnvona gbekanlin diẹ he jẹnukọnna ẹn lẹpo, e sọ tindo azò ao.
8 Dile n’to ayidonugo na azò lọ lẹ, pọ́n! azò devo he yin pẹvi,+ tọ́n do ṣẹnṣẹn yetọn bọ atọ̀n to azò tintan lọ lẹ mẹ yin finfẹ́n sẹ̀ sọn nukọn etọn. Podọ pọ́n! nukun he taidi gbẹtọ tọn lẹ tin to azò ehe go gọna onù he yí sakla* do to hodọ de.+
9 “Yẹn sọ to nupọn kakajẹ whenue ofìn lẹ yin didoai bọ Mẹhe Ko Tin sọn Hohowhenu lọ+ sọ sinai.+ Avọ̀ etọn wé taidi osin-agó,+ oda he tin to ota etọn sọ taidi ofún wewe. Miyọ́n wẹ ofìn etọn; kẹkẹfọ etọn lẹ sọ yin miyọ́n he to jiji.+
10 Miyọ́n to sisà jẹgbonu sọn nukọn etọn.+ Fọtọ́n donu fọtọ́n angẹli lẹ tọn nọ to lizọnyina ẹn, podọ fọtọ́n ao donu fọtọ́n ao angẹli lẹ tọn ṣite to nukọn etọn.+ Whẹdida+ sọ bẹjẹeji to Whẹdatẹn lọ bọ owe lẹ yin hùnhùn.
11 “To ojlẹ enẹ mẹ, n’to nupọn, na ohó he azò lọ yí sakla* do to didọ lẹ wutu;+ n’pọ́n kakajẹ whenue gbekanlin lọ yin hùhù bọ agbasa etọn yin vivasudo bo yin zizedlan miyọ́n mẹ nado yin fifiọ.
12 Ṣigba, na nuhe dù gbekanlin he pò lẹ,+ gandudu yetọn yin yíyí sọn yé si bọ gbẹninọ yetọn yin kandlẹnna na ojlẹ de po osaa de po.
13 “N’sọ to nupọn to numimọ zánmẹ tọn lẹ mẹ, podọ pọ́n! mẹhe taidi visunnu gbẹtọ tọn de+ ja po aslọ olọn tọn lẹ po; dotẹnmẹ yin nina ẹn nado yì Mẹhe Ko Tin sọn Hohowhenu lọ+ dè, yé sọ hẹn ẹn hẹji sẹpọ Omẹ enẹ lọ nukọn.
14 Yè sọ yí gandudu,+ gbégbò+ po ahọluduta de po na ẹn, na gbẹtọ lẹ, akọta lẹ po akọ̀ lẹpo po nido nọ wadevizọn na ẹn.+ Gandudu madopodo de wẹ gandudu etọn bo ma na juwayi, ahọluduta etọn ma nasọ yin vivasudo.+
15 “Na yẹn Daniẹli tọn, n’jẹflumẹ to ayiha mẹ, na numimọ he wá tamẹ na mi lọ lẹ dobuna mi wutu.+
16 Yẹn dọnsẹpọ dopo to mẹhe ṣite to finẹ lẹ mẹ nado kàn nuhe ehe zẹẹmẹdo taun sè e. Ewọ sọ gblọn bo hẹn tadena onú ehelẹ tọn zun yinyọnẹn na mi.
17 “‘Gbekanlin daho-gbó ehelẹ he sọha yetọn yin ẹnẹ,+ yin ahọlu ẹnẹ he na fọ́n to aigba ji.+
18 Ṣigba, omẹ wiwe Gigogán lọ tọn lẹ+ na mọ ahọluduta lọ yí,+ ahọluduta lọ nasọ yin yetọn+ kakadoi, mọwẹ, yèdọ kakadoi podọ doidoi.’
19 “Enẹgodo, n’jlo na yọ́n nususu dogọ gando gbekanlin ẹnẹtọ lọ go, he gbọnvona diẹ lẹpo; e sẹhundaga taun bo tindo adú gànyuu tọn lẹ po ofẹ̀n gànvẹẹ tọn lẹ po, e sọ nọ to nuhe lẹdo e lẹpo husudo bo nọ to yé gídí bosọ nọ to afọtùn dehe pò lẹ ji;+
20 podọ gando azò ao+ he to ota na ẹn lẹ go, gọna azò he tọ́n bọ atọ̀n devo flẹ to nukọn etọn lẹ,+ azò he tindo nukun lẹ gọna onù he yí sakla* do to hodọ bo klohu dehe pò lẹ.
21 “Yẹn sọ to nupọn dile azò enẹ lọ to awhànfun hẹ omẹ wiwe lẹ bo to dùdù to yé ji,+
22 kakajẹ whenue Mẹhe Ko Tin sọn Hohowhenu lọ+ wá bọ omẹ wiwe Gigogán lọ tọn lẹ+ duto owhẹ̀ he yin didá lọ ji, podọ ojlẹ dide lọ wá na omẹ wiwe lẹ nado yí ahọluduta lọ.+
23 “Nuhe e dọ die: ‘Na nuhe dù gbekanlin ẹnẹtọ lọ, ahọluduta ẹnẹtọ de tin he na sọawuhia to aigba ji. E na gbọnvona ahọluduta diẹ lẹpo, e nasọ hù aigba lọ pete sudo bo na tùnafọ e ji bo nasọ gídí i.+
24 Na nuhe dù azò ao lọ lẹ, ahọlu ao na fọ́n sọn ahọluduta enẹ mẹ; podọ devo nasọ fọ́n bọdo yé go bo na gbọnvona tintan lẹ bo nasọ duto ahọlu atọ̀n ji.+
25 Ewọ na dọho sọta Gigogán lọ,+ e nasọ yangbé omẹ wiwe Gigogán lọ tọn lẹ tọn mapote. E na tẹnpọn nado diọ ojlẹ lẹ po osẹ́n po, yé nasọ yin jijodo alọ etọn mẹ na ojlẹ de, ojlẹ lẹ podọ odaa ojlẹ de tọn.*+
26 Ṣigba, whẹdida bẹjẹeji to Whẹdatẹn lọ bọ yé yí gandudu etọn sọn e si nado sukúndona ẹn bo và ẹ sudo mlẹnmlẹn.+
27 “‘Podọ ahọluduta lọ, gandudu lọ po yẹyi daho ahọluduta he tin to olọn glọ lẹpo tọn po sọ yin yíyí na mẹhe yin omẹ wiwe Gigogán lọ tọn lẹ.+ Ahọluduta madopodo wẹ ahọluduta yetọn,+ gandudu lẹpo nasọ nọ sẹ̀n yé bo nọ setonuna yé.’
28 “Vivọnu nuhe n’mọ bo sè lọ lẹ tọn niyẹn. Na yẹn Daniẹli tọn, linlẹn ṣie lẹ dotukla mi susu sọmọ bọ nukunmẹ ṣie kúṣiọ;* ṣigba n’hẹn whẹho lọ do ahun ṣie mẹ.”
Nudọnamẹ Odò Tọn
^ Kavi “goyiyi.”
^ Kavi “goyiyi.”
^ Kavi “goyiyi.”
^ Enẹ wẹ, na ojlẹ atọ̀n daa.
^ Kavi “bọ awusọhia ṣie diọ.”
