Howhinwhẹn lẹ 17:1-28
17 E pọnte nado dù akla húhú nùdo dopo to fie jijọho* tin te+Hú nado wà hùnwhẹ* to owhé he gbè whẹgbè tin te.+
2 Devizọnwatọ he tindo zinzin na dugán do visunnu he walọ etọn huwinyan ji;Bo na tlẹ sọ mọ ogú yí di dopo to visunnu lọ lẹ mẹ.
3 Ozẹ́n gànkinkọ̀n tọn tin na fataka podọ zòhọ tin na sika,+Ṣigba, Jehovah wẹ nọ gbeje ahun lẹ pọ́n.+
4 Mẹylankan wẹ nọ na ayidonugo hodidọ he nọ gbleawunamẹ,Bọ mẹklọtọ nọ dotoaina odẹ́ he nọ klọmẹ.+
5 Mẹdepope he nọ ṣàn wamọnọ kò to Mẹdatọ etọn vlẹko,+Podọ mẹdepope he nọ jaya to nugbajẹmẹji mẹdevo tọn mẹ ma na nọma yin yasana.+
6 Jẹgbakun de wẹ ovivi* lẹ yin na yọnhonọ lẹ,Podọ otọ́* lẹ wẹ yin gigo visunnu* yetọn lẹ tọn.
7 Ohó he sọgbe* ma jẹna gugutọ.+
Mọjanwẹ ohó lalo ma jẹna gandutọ* de do niyẹn!+
8 Nunina de nọ taidi zannu akuẹgegenu tọn* to nukun mẹhe tindo e tọn mẹ;+Fidepope he e lẹhlan, e nọ tindo kọdetọn dagbe.+
9 Mẹdepope he nọ jo nuṣiwa namẹ* to owanyi dín,+Ṣigba, mẹhe nọ to gigọwa whẹho de ji mapote nọ klan họntọn alọmayiemẹ lẹ.+
10 Nugbẹnamẹ nọ yinuwado mẹhe tindo nukunnumọjẹnumẹ ji sisosiso+Hú nulili nulunọ whla kanweko.+
11 Mẹylankan ma nọ dín nudevo hú nado ṣiatẹ,Ṣigba, wẹnsagun he ma tindo lẹblanu wẹ na yin didohlan nado sayana ẹn.+
12 E pọnte nado pé beali he hẹn ovi etọn lẹ buHú nado dukosọ hẹ nulunọ de to nulú etọn mẹ.+
13 Eyin mẹde nọ yí oylan do sú dagbe họ́,Oylan ma na nọla na whédo etọn.+
14 Avùn de bibẹjẹeji nọ taidi whenue dogbó osin tọn lẹ yin hùnhùn;Whẹpo whẹgbè nido bẹ, yawu tọ́n sọn finẹ.+
15 Mẹhe suwhẹna mẹylankan po mẹhe gblewhẹdo dodonọ po+—Osùnú de wẹ yé omẹ awe lẹ yin na Jehovah.
16 Ale tẹwẹ tin to e mẹ eyin nulunọ de tindo nuhe na hẹn ẹn nado bẹ nuyọnẹn pliTo whenuena e yindọ ewọ ma tindo ahun dagbe nado kẹalọyi i?*+
17 Họntọn nugbo nọ yiwannamẹ to whelẹponu+Podọ nọvisunnu he go yè sọgan dejido to ojlẹ ayimajai tọn lẹ mẹ wẹ ewọ.+
18 Mẹhe zinzin* whèdo nọ na alọ mẹdevo nado yin alọyitọ etọn bosọ nọ yigbeNado yí ede do basi alọyitọ mẹlọ tọn to kọmẹnu etọn nukọn.+
19 Mẹhe yiwanna avùn yiwanna sẹ́nhẹngba.+
Mẹdepope he hẹn họngbo etọn yiji hùn dotẹnmẹ dote na aijijẹ ajiji.+
20 Ayiha gbíngbánnọ ma na tindo kọdetọn dagbe,*+Podọ mẹhe nọ dọho oklọ tọn na dọ̀n pete.
21 Otọ́ he ji ovi nulunọ na nọ blawu;Podọ otọ́ he ji ovi gugutọ ma nọ tindo ayajẹ depope.+
22 Amasin dagbe de* wẹ ahun he gọ́ na ayajẹ yin,+Ṣigba, ayiha he jẹflumẹ nọ hẹnmẹ gbọjọ.*+
23 Mẹylankan nọ yí alọgodo-kuẹ to nuglọ*Nado gada whẹdida.+
24 Nuyọnẹn tin to mẹhe tindo wuntuntun nukọn tlọlọ,Ṣigba, nukun nulunọ tọn nọ to dindanpe kaka yì opodo aigba tọn lẹ.+
25 Visunnu nulunọ nọ hẹn awubla wá na otọ́ etọnBosọ nọ hẹn awufiẹsa* wá na mẹhe ji i.+
26 E ma yọ́n nado nọ sayana* dodonọ,Podọ e ma sọgbe nado hò omẹ nukundeji.
27 Mẹhe tindo oyọnẹn nọ de ohó pò,+Podọ mẹhe tindo wuntuntun na nọ gbọṣi abọẹ.*+
28 Nulunọ he nabọẹ tlẹ nọ yin pinpọnhlan di nuyọnẹntọ,Podọ mẹhe nọ bọ̀ nùflo etọn do taidi wuntuntunnọ.
Nudọnamẹ Odò Tọn
^ To paa mẹ, “nado basi avọ́sinsan lẹ.”
^ Kavi “vivomẹninọ.”
^ Kavi “ovivi sunnu.”
^ Kavi “mẹjitọ.”
^ Kavi “ovi.”
^ Kavi “Ohó dagbe.”
^ Kavi “omẹ nukundeji.”
^ Kavi “nọ yin zannu he nọ hẹn nukundagbe wá.”
^ To paa mẹ, “nọ ṣinyọnnudo nuṣiwa.”
^ Kavi “To whenuena e yindọ zinzin whèdo e?”
^ To paa mẹ, “ahun.”
^ To paa mẹ, “ma na mọ dagbe.”
^ Kavi “nọ hẹn ohú hú.”
^ Kavi “Nuhe yọ́n na azọ̀nhẹngbọ.”
^ To paa mẹ, “alọgodo-kuẹ sọn akọ́nnu.”
^ To paa mẹ, “vivẹ́.”
^ Kavi “gbò akuẹ na.”
^ To paa mẹ, “na tindo fifá to ayiha mẹ.”
