Howhinwhẹn lẹ 24:1-34
24 A whànwu mẹylankan lẹ blo,A sọ tindo ojlo vẹkuvẹku nado dogbẹ́ hẹ yé blo,+
2 Na yé nọ lẹnayihamẹpọn do danuwiwa ji to ahun yetọn mẹ,Bọ nùflo yetọn lẹ nọ dọho gando lehe yé na hẹn tukla wá do go.
3 Gbọn nuyọnẹn dali wẹ owhé* de nọ yin didoai,+Podọ gbọn wuntuntun dali wẹ e nọ yin hihọ́-basina.
4 Gbọn oyọnẹn dali wẹ abò etọn lẹ nọ yin hinhẹn gọ́
Po nuhọakuẹ wunmẹ lẹpo po gọna adọkunnu dagbedagbe lẹ.+
5 Mẹhe yin nuyọnẹntọ nọ tindo huhlọn,+Podọ gbọn oyọnẹn dali wẹ mẹde nọ hẹn huhlọn etọn jideji.
6 Gbọn anademẹ nuyọnẹn tọn dali wẹ hiẹ na funawhàn towe,+Podọ gbọn ayinamẹtọ susu gblamẹ wẹ awhàngbigba* nọ tin.+
7 Nuyọnẹn nugbo tintindo ko zẹ̀ nugopipe nulunọ tọn go;+Ewọ ma nọ tindo nudepope nado dọ to họngbo tòdaho lọ tọn ji.
8 Mẹdepope he nọ blasé domẹgoNa nọ yin yiylọdọ ogán to ayiha wintinwintin kinkan mẹ.+
9 Ylando wẹ ayiha wintinwintin nulunọ tọn lẹ,Gbẹtọ lẹ sọ nọ gbẹwanna mẹṣankotọ.+
10 Eyin hiẹ gbọjọ to azán ayimajai tọn gbè,*Huhlọn towe ma na sọtẹ́n.
11 Whlẹn mẹhe to yinyin dindọn yì okú mẹ lẹ gán,Podọ gọkọna mẹhe to sàmù jei hùhùtẹn lẹ.+
12 Eyin hiẹ dọ, “Amọ́ mí ma ka yọnẹn nẹ,”Be Mẹhe nọ gbeje ahun* lẹ pọ́n ma mọnukunnujẹemẹ wẹ?+
Mọwẹ, Mẹhe nọ doayi gowe* na yọnẹnBo na suahọ mẹdopodopo sọgbe hẹ nuyiwa etọn.+
13 Visunnu ṣie, nọ dù owín, na e yọ́n;Owín he nọ kùn sọn owínjá mẹ nọ vivi to nùmẹ.
14 Mọdopolọ, hiẹ ni yọnẹn dọ nuyọnẹn yọ́n na we.*+
Eyin hiẹ dín in mọ, a na tindo sọgodo dagbeBọ todido towe ma na yin sinsánsẹ.+
15 A gbọn kanyinylan dali tọ̀wu dai sẹpọ owhé dodonọ tọn blo;A và gbọjẹtẹn etọn sudo blo.
16 Na dodonọ sọgan jai whla ṣinawe bo na vọ́ fọnṣite,+Ṣigba, nugbajẹmẹji wẹ na hẹn mẹylankan dahli.+
17 Eyin kẹntọ towe jai, a jaya blo,Podọ eyin ewọ dahli, a hùnhomẹ blo;+
18 E ma yinmọ, Jehovah na mọ bo gblehomẹ,Bọ Ewọ na lẹ́ homẹgble etọn sọn kẹntọ towe ji.+
19 A jẹflumẹ* na ylanwatọ lẹ tọn wutu blo;A sọ whànwu mẹylankan lẹ blo,
20 Na sọgodo dagbe de ma tin na ylanwatọ depope;+Miyọ́ngbán mẹylankan tọn na yin ṣíṣí.+
21 Visunnu ṣie, nọ dibusi Jehovah po ahọlu po.+
A sọ dogbẹ́ hẹ agọjẹdonutọ lẹ* blo,+
22 Na nugbajẹmẹji na wá yé ji to ajiji mẹ.+
Mẹnu wẹ yọ́n vasudo he yé omẹ awe lẹ* na hẹnwa yé ji?+
23 Nuyọnẹntọ wẹ hodidọ ehelẹ lọsu tin na dọmọ:
E ma yọ́n nado nọ homẹnukuntapọn to whẹdida mẹ.+
24 Mẹdepope he nọ dọna mẹylankan dọ, “Dodonọ wẹ hiẹ,”+Na yin dẹ̀hodo gbọn gbẹtọ lẹ dali bọ akọta lẹ na de e gbà.
25 Ṣigba, onú na yọ́n na yé mẹhe nọ wọhẹ mẹylankan lẹ;+Dona nudagbe lẹ tọn na nọ yin kinkọ̀n do yé ji.+
26 Gbẹtọ lẹ na nọ donùnùgo na mẹhe nọ yí nugbodidọ do gblọnho.*+
27 Basi tito na azọ́n gbonu tọn towe bo wleawu nulẹpo tọn dai to glemẹ;Enẹgodo, do whédo towe ai.
28 A dekunnu sọta kọmẹnu towe matin whẹwhinwhẹ́n blo.+
A yí nùflo towe do doyẹklọ mẹdevo lẹ blo.+
29 A dọ blo dọ: “N’na wà na ẹn kẹdẹdile e ko wà na mi do;N’na yiahọsu nuhe e ko wà tọn.”*+
30 N’gbọn ogle adidọnọ tọn pá wayi,+Yèdọ vẹngle mẹhe zinzin* whèdo tọn.
31 N’mọdọ ogbé ylankan wẹ gọ́ e mẹ;Wùnkan lẹ ko ṣinyọ́n aigba lọ ji,Podọ adó zannu tọn etọn ko yin gbigbà hányán.+
32 Yẹn ko doayi ehe go bo hẹn ẹn do ahun mẹ;N’ko mọ ehe bo mọ nuplọnmẹ ehe* yí dọmọ:
33 Amlọn vude, amlọngọ sisà vude dogọ,Alọ biblá dogo na ojlẹ vude nado gbọjẹ,
34 Ohẹ́n na wá ji we di ajotọ,Podọ hẹ́njijẹ na wá ji we di awhànfuntọ de.+
Nudọnamẹ Odò Tọn
^ Kavi “whédo.”
^ Kavi “kọdetọn dagbe; whlẹngán.”
^ Kavi “to ojlẹ tukla tọn mẹ.”
^ Kavi “mẹwhinwhàn.”
^ Kavi “alindọn towe go.”
^ Kavi “vivi na alindọn towe.”
^ Kavi “fiẹ.”
^ Kavi “mẹhe tindo ojlo na diọdo.”
^ Enẹ wẹ, Jehovah po ahọlu po.
^ Kavi vlavo, “Gblọndo tlọlọ nina nọ taidi nùdonùgonamẹ.”
^ Kavi “N’na yiahọsu to e go.”
^ To paa mẹ, “ahun.”
^ To paa mẹ, “bo ko mọ mẹplọnlọ.”
