Owalọ lẹ 13:1-52
13 Todin, yẹwhegán lẹ po mẹplọntọ lẹ po tin to agun lẹdo lọ tọn mẹ+ to Antioku: yèdọ Balnaba, Simeọni he nọ yin Nigeli, Lukiu Silene tọn, Manaeni he plọnwe dopọ hẹ Hẹlọdi he yin ogán agbegbe tọn* lọ po Saulu po.
2 Dile yé to lizọnyizọn* wà na Jehovah* bo to nùbla, gbigbọ wiwe dọmọ: “Mì de Balnaba po Saulu+ po dovo na mi na azọ́n he yẹn ko ylọ yé na lọ.”+
3 To whenẹnu, yé blanù bo hodẹ̀, enẹgodo yé ze alọ yetọn lẹ do yé ji bo do yé hlan.
4 Enẹwutu, sunnu he gbigbọ wiwe dohlan ehelẹ yì Seleukia, yé sọ súnhún sọn finẹ yì Kiplu.
5 To whenue yé jẹ Salami, yé jẹ ohó Jiwheyẹwhe tọn lá ji to sinagọgu Ju lẹ tọn lẹ mẹ. Johanu sọ to devizọnwa* na yé.+
6 To whenue yé ko jugbọn lopo lọ pete ji kaka yì Pafo, yé dukosọ hẹ dawe Juvi de he nọ yin Baa-Jesu, yèdọ owọ́ntọ de, podọ yẹwhegán lalo de.
7 Ewọ sọ tin to ayimatẹn-gán* Sọlgiu Paulu, he yin dawe zinzintọ de dè. Sọlgiu Paulu sọ ylọ Balnaba po Saulu po wá ede dè, bo to jejeji nado sè ohó Jiwheyẹwhe tọn.
8 Ṣigba, Elima owọ́ntọ lọ (na enẹ wẹ lẹdogbedevomẹ oyín etọn tọn) jẹ nukundiọsọ yé ji, bo to tintẹnpọn nado lẹ́ ayimatẹn-gán lọ sọn yise mẹ.
9 Whenẹnu, Saulu, mẹhe sọ nọ yin Paulu, gọ́ na gbigbọ wiwe bo pọ́n ẹn tlintlin
10 bosọ dọmọ: “Hiẹ dawe he gọ́ na mẹhodu wunmẹ lẹpo po okà wunmẹ lẹpo po, hiẹ visunnu Lẹgba tọn,+ hiẹ kẹntọ nuhe yin dodo lẹpo tọn, be hiẹ ma na gbọ tasọdona aliho jijlọ Jehovah* tọn lẹ ya?
11 Pọ́n! alọ Jehovah* tọn tin jẹagọdo we, hiẹ nasọ tọ́nnukun bo ma na mọ hinhọ́n owhè tọn na ojlẹ de.” To afọdopolọji, avìvì daho de po zinvlu po ṣinyọ́n ẹn, ewọ sọ jẹ lilẹpe ji bo to mẹhe na hẹn alọ etọn bosọ deanana ẹn dín.
12 To whenue ayimatẹn-gán lọ mọ nuhe ko jọ, e lẹzun yisenọ, na nuplọnmẹ Jehovah* tọn hẹn awuji i wutu.
13 Todin, Paulu po gbẹdohẹmẹtọ etọn lẹ po súnhún sọn Pafo bo wá Pẹlga to Pamfilia. Ṣigba, Johanu+ jo yé do bo lẹkọyi Jelusalẹm.+
14 Ṣigba, yewlẹ tọ́n sọn Pẹlga bo wá Antioku to Pisidia. Yé sọ yì sinagọgu+ mẹ to Gbọjẹzangbe bo sinai.
15 To whenue Osẹ́n lọ+ po owe Yẹwhegán lẹ tọn po ko yin hihia to gbangba godo, ogán sinagọgu tọn lẹ domẹhlan yé, bo dọmọ: “Mì mẹmẹsunnu lẹ emi, eyin mì tindo ohó tulinamẹ tọn depope na gbẹtọ lẹ, mì dọ ẹ.”
16 Enẹwutu, Paulu fọ́n bo mìalọ bosọ dọmọ:
“Mì omẹ Islaeli tọn lẹ po mì mẹhe nọ dibusi Jiwheyẹwhe po lẹ emi, mì dotoai.
17 Jiwheyẹwhe akọta Islaeli ehe tọn de tọgbo mítọn lẹ, e sọ ze akọta lọ daga to ojlẹ he mẹ yé to jonọ-gbéji to aigba Egipti tọn ji bosọ yí awà huhlọnnọ etọn do hẹn yé jẹgbonu.+
18 Podọ na nudi owhe 40, e sinyẹnlin hẹ yé to danfafa ji.+
19 To whenue e ko và akọta ṣinawe sudo to aigba Kenani tọn ji godo, e má aigba yetọn taidi ogú de.+
20 Enẹ lẹpo jọ to nudi owhe 450 gblamẹ.
“To onú ehelẹ godo, e na yé whẹdatọ lẹ kakajẹ yẹwhegán Samuẹli whenu.+
21 Ṣigba to enẹgodo, yé biọ ahọlu de,+ Jiwheyẹwhe sọ na yé Sauli, visunnu Kiṣi tọn, yèdọ dawe de sọn whẹndo Bẹnjamini tọn mẹ,+ na owhe 40.
22 To whenue e de ewọ sẹ̀ godo, e ze Davidi daga taidi ahọlu,+ mẹhe go e dekunnu gando dọmọ: ‘Yẹn ko mọ Davidi, visunnu Jẹsse tọn,+ sunnu de he ahun ṣie kẹalọyi;+ ewọ na wà nuhe yẹn jlo lẹpo.’
23 Sọn kúnkan* dawe ehe tọn mẹ wẹ Jiwheyẹwhe ko hẹn Jesu, mẹwhlẹngántọ de wá Islaeli dile e dopagbe etọn do.+
24 Jẹnukọnna wiwá omẹ enẹ tọn, Johanu ko dọyẹwheho to gbangba hlan omẹ Islaeli tọn lẹpo gando baptẹm he yin ohia lẹnvọjọ tọn go.+
25 Ṣigba, dile Johanu to tadona lizọnyizọn etọn, e nọ saba dọ dọ: ‘Mẹnu wẹ mìwlẹ lẹndọ yẹn yin? Yẹn ma yin ewọ gba. Ṣigba, pọ́n! Mẹde ja to godo ṣie, mẹhe yẹn ma jẹ nado tún afọpa afọ etọn tọn.’+
26 “Mì mẹmẹsunnu lẹ, mì kúnkan whẹndo Ablaham tọn po mẹhe dibusi Jiwheyẹwhe to ṣẹnṣẹn mìtọn lẹ po emi, ohó whlẹngán ehe tọn ko yin didohlan mí.+
27 Na tòmẹnu Jelusalẹm tọn lẹ po ogán yetọn lẹ po ma yọ́n omẹ ehe, ṣigba, to whenue yé to nuyiwa taidi whẹdatọ lẹ, yé hẹn nuhe yin didọ gbọn Yẹwhegán lẹ dali di,+ yèdọ nuhe nọ yin hihia daga to gbọjẹzan lẹpo gbè.
28 Dile etlẹ yindọ yé ma mọ nudepope he hẹn ẹn jẹna okú,+ yé biọ to Pilati si dọ ewọ ni yin hùhù.+
29 Podọ to whenue yé ko hẹn nuhe yin kinkandai gando e go lẹpo di, yé ze e jẹte sọn pòtin* lọ ji bo tẹ́ ẹ do yọdò* de mẹ.+
30 Amọ́, Jiwheyẹwhe fọ́n ẹn sọn oṣiọ lẹ mẹ,+
31 podọ na azán susu, ewọ sọawuhia mẹhe hodo e sọn Galili yì Jelusalẹm lẹ. Omẹ ehelẹ wẹ yin kunnudetọ etọn na gbẹtọ lẹ todin.+
32 “Enẹwutu, mí to wẹndagbe opagbe he yin dido na tọgbo lẹ tọn lọ lá na mì.
33 Jiwheyẹwhe ko sọ hẹn ẹn di mlẹnmlẹn na míwlẹ he yin ovi yetọn lẹ gbọn Jesu finfọnsọnku dali;+ kedẹdile e yin kinkandai to salmu awetọ mẹ do dọ: ‘Hiẹ wẹ visunnu ṣie; yẹn ko lẹzun otọ́ towe to egbé.’+
34 Podọ, nugbo lọ dọ E fọ́n ẹn sọn oṣiọ lẹ mẹ bọ e ma nasọ lẹkọ do gbigble mẹ gbede ba, E dọ ẹ dole dọ: ‘Yẹn na do owanyi nugbo he opagbe etọn yin dido na Davidi lọ hia mì, ehe go yè sọgan ganjẹ.’*+
35 E sọ yin didọ to salmu devo mẹ dọ: ‘Hiẹ ma na dike nugbonọ towe ni mọ gbigble.’+
36 To alọ de mẹ, Davidi wà sinsẹ̀nzọn hlan Jiwheyẹwhe* to whẹndo etọn titi mẹ bo damlọn to okú mẹ bosọ yin titẹ́ dopọ hẹ tọgbo etọn lẹ bo mọ gbigble.+
37 To alọ devo mẹ, ewọ he Jiwheyẹwhe zedaga ma mọ gbigble.+
38 “Enẹwutu, mì gbọ e ni yin yinyọnẹn na mì mẹmẹsunnu lẹ, dọ gbọn omẹ ehe gblamẹ wẹ jona ylando lẹ tọn to yinyin lilá hlan mì,+
39 podọ sọn nulẹpo he mẹ mìwlẹ ma sọgan yin whẹsuna gbọn Osẹ́n Mose tọn dali lẹ mẹ,+ mẹhe yise lẹpo wẹ yin whẹsuna gbọn omẹ ehe gblamẹ.+
40 Enẹwutu, mì họ́ mìde, na nuhe yin didọ to owe Yẹwhegán lẹ tọn mẹ nikaa jọ do mì go dọmọ:
41 ‘Mì pọ́n, mì mẹvlẹtọ lẹ, podọ awú ni ji mì, mì nisọ dọ̀n, na yẹn to azọ́n de wà to azán mìtọn lẹ gbè, azọ́n de he mìwlẹ ma na yise gbede eyin mẹde tlẹ basi zẹẹmẹ etọn na mì to gigọ́ mẹ.’”+
42 Todin, to whenue yé tọ́n jei, gbẹtọ lẹ vẹ̀ yé nado wá dọhona yé gando onú ehelẹ go to Gbọjẹzan he bọdego lọ gbè.
43 Enẹwutu, to whenue mẹhe pli to sinagọgu mẹ lẹ ko gbàdo godo, susu to Ju lẹ po mẹdiọzun Ju lẹ po mẹ he nọ sẹ̀n Jiwheyẹwhe hodo Paulu po Balnaba po, podọ dile yé to hodọna yé, yé dotuhomẹna yé nado gbọṣi nukundagbe majẹhẹ Jiwheyẹwhe tọn mẹ.+
44 To Gbọjẹzan he bọdego lọ gbè, diblayin tòdaho lọ pete wẹ pli dopọ nado sè ohó Jehovah* tọn.
45 To whenue Ju lẹ mọ gbẹtọgun lọ lẹ, yé gọ́ na awuwhàn bo gbọn nùzinzan dali jẹ hodọ ji jẹagọdo nuhe Paulu to didọ lẹ.+
46 Whenẹnu, Paulu po Balnaba po yí adọgbigbo do dọna yé dọmọ: “Dandan wẹ e yin dọ ohó Jiwheyẹwhe tọn ni yin didọhlan mì whẹ́.+ Na mìwlẹ gbẹ́ ẹ dai bo ma mọ mìdelẹ di mẹhe jẹna ogbẹ̀ madopodo wutu, mì pọ́n! míwlẹ lẹhlan akọta lẹ.+
47 Na Jehovah* ko yí ohó ehelẹ do degbena mí dọ: ‘Yẹn ko de we taidi hinhọ́n akọta lẹ tọn, na hiẹ nido yin whlẹngán kakajẹ opodo aigba tọn lẹ.’”+
48 To whenue omẹ akọta lẹ tọn sè ehe, yé jẹ ayajẹ ji bo pagigona ohó Jehovah* tọn, bọ mẹhe tindo ninọmẹ ahun mẹ tọn he jẹna ogbẹ̀ madopodo lẹpo lẹzun yisenọ.
49 Humọ, ohó Jehovah* tọn to yinyin hinhẹn gbayipe gbọn aigba lọ pete ji.
50 Ṣigba, Ju lẹ hẹn yọnnu nukundeji he nọ dibusi Jiwheyẹwhe lẹ po sunnu nukundeji tòdaho lọ tọn lẹ po fọnadán, yé sọ fọ́n homẹkẹn dote+ sọta Paulu po Balnaba po bo yàn yé sọn otò yetọn mẹ.
51 Enẹwutu, yé húnhún kọ́gudu sẹ̀ sọn afọ yetọn lẹ go do yé ji bo yì Ikonioni.+
52 Devi lẹ sọ to gigọ́ na ayajẹ+ po gbigbọ wiwe po zọnmii.
Nudọnamẹ Odò Tọn
^ To paa mẹ, “tẹtlalkes.” Ahọvi lẹdo tọn he nọ ze afọ ahọluigba-gán Lomu tọn dai.
^ Kavi “lizọnyizọn gbangba tọn.”
^ Kavi “alọgọ.”
^ To paa mẹ, “okún.”
^ Kavi “atin.”
^ Kavi “yọdò oflin tọn.”
^ Kavi “dejido.”
^ Kavi “wà ojlo Jiwheyẹwhe tọn.”
